1 ปาย ตี คูนดีคัม ฆาย อาฮามาน บอ วี ฮาว โฮม บลอย ปี เฮียง นาง เอซาทา ปอ อู เฌณ. 2 ดอ อัน ตี ดอ เดียง เฆ อึม มางูน, คูนดีคัม วี กาลาง ดี นาง ปอ อู เฌณ ต็อห, “อึย นาง เอซาทา, มาเซ ปี โลว แม? มาเซ ปี ซี หมาณ แม? แคะ ปี ซี หมาณ แม ตี บอ มูห มาน มืง อาดา อู กาแต โอว ดี ดัว.”

3 นาง ฮอคัม เอซาทา วี ต็อห, “อึย แม คูนดีคัม, เซ โอว อี มูห แดเจณ แม แฮะ ล็อะ น็อห แม, โอว หมาณ, แตห แม กาเว อาซาก โอว, แตห แม กาเว บอ อาซาก ดูอี อาโมยว โอว, แกวะ แตห เย ยัม. แคะ ตี ปี ซี หมาณ โอว. 4 โคว, เฆ อี เฮา แฮะ ฮอต ย็อง โอว บอ ดูอี อาโมยว โอว, แตห เย ยัม ปี โดว ซัดดาวา ปี ง็อห อี. เซ อึณ มูห เฆ ย็อง, แตห เย แบน หมาย อี เฮา, บอ มูห หมาย อีบึณ อีมาย, โอว ตู ต็อห มาเซ. โคว, อาเร ฌึร ตี อาว กาอาบ ดีแล แม คูนดีคัม.”

5 ปัน ตี คูนดีคัม อาฮาเซรู บอ วี ดีหมอด นาง เอซาทา ต็อห, “อี เหมา แฮะ ยัะ คราม ดี โบง ปาย ตี? อัน มูห อาเซ? อัน กอย ดี เหมา?”

6 นาง เอซาทา วี ต็อห, “อี แบน รันซู เย, อี ซี โบง นา จีจีว ดี เย แฮะ มูห อาฮามาน นี, อี ฮาย กาเซา.” อัน แฮะ ฮอต ต็อห ปาย ตี อาฮามาน ตึอน บอ ดีเยณ ดีโยว คูนดีคัม ฆาย นาง. 7 ปัน ตี คูนดีคัม บอ รู กาเซา. อัน บอ ยีต ดี บาง บลอย วี ฮาว แคง กาปึม อัน. อาฮามาน บอ นับ, คูนดีคัม ดี ดัม หมาบ ดี อัน, อัน บอ วี กอย ดี ปัน, หมาณ แตห นาง เอซาทา กาเว อัน, แกวะ แตห อัน กาดูห ดี ยัม.

8 คูนดีคัม บอ วี ตัห โดง กอย นาง เอซาทา. อัน บอ ตัห ยึร, อาฮามาน แฮะ ฆึบ ดี กาโช็ง โดง ตูต นาง เอซาทา ตึอน. อัน วี ต็อห, “ดอ ตี นี แม ปี วี ซี บลัต บอ นาง ฮอคัม ดี อาต โอว แคง โฮว นี.” ดอ ต็อห คูนดีคัม ปาย ตี เฆ บอ ตัห กาโหมะ ฆีณ อาฮามาน.

9 อึณ ยี มึห อาโบวนา อี มูห ดูอี ซัห อี แบน แดเจณ คูนดีคัม. อัน วี ต็อห, “โคบ กาง อาฮามาน อึณ มึห ร็อง ปี ซัม อัน, อี จา พัน ฆึร กานีห. อัน แฮะ คราม ดี ปัก ฮอย แมง อาโมวตาเก, อี แฮะ ดึอม จอย แม คูนดีคัม ตึอน.” คูนดีคัม วี ต็อห, “ฮาว ปัก ฮอย แมง อัน ดี ตี.”

10 ปัน ตี เฆ บอ ดึห อาฮามาน ฮาว ปัก อัน ดี ร็อง ปี ซัม อูน อัน อาดา อาโมวตาเก ตึอน. แฮะ ฮอต, น็อห คูนดีคัม บอ วี ดาคึย อู เฌณ.