1 บอ ฌัม แคง หมึร, คูนดีคัม อาว ปึอน ดี อีด. อัน บอ แตห เฆ ดึห ตัห แปะ บืน มืง ปี แดม อูน เฆ ดอ มูห โจว อัน. เฆ บอ ดึห ตีห, แตห คูนดีคัม โทม. 2 เฆ บอ ตีห บอ ลอง อาโมวตาเก แฮะ กาลาง ลอง อาบีกาซัน ฆาย อาเดรีด ตึอน, อี มูห อี บัร มาโลห โฮว, อี แฮะ คราม ดี ง็อห ยัม คูนดีคัม อาฮาเซรู.

3 คูนดีคัม บอ วี ดีหมอด ต็อห, “อี แฮะ ดัว มาเซ ดี อาโมวตาเก อี แบน รูห ปี กาลาง อัน?” เฆ แดเจณ อัน วี ต็อห, “อาว มึห ดี ดัว รูห มาเซ ดี อัน?”

4 คูนดีคัม วี ดีหมอด ต็อห, “อาเซ กอย ดี ฆลัะ ดอย?” ดอ อัน ตี อึณ งยา ตัห ฮาว อาฮามาน ดี ฆลัะ ตี. อัน ต็อห ดี ตัห หมาณ ดี คูนดีคัม, แตห อัน ปึอน ดี ปัก ฮอย แมง อาโมวตาเก ดี ร็อง ปี ซัม เฆ ตึอน.

5 เฆ แดเจณ อัน วี ต็อห, “อาฮามาน อี ตัห.” คูนดีคัม วี ต็อห, “แดะ แตห อัน ตัห ลึบ นา แคง.”

6 อาฮามาน บอ ตัห ลึบ โดง กอย คูนดีคัม. คูนดีคัม วี ต็อห ดี อัน, “แม ทาง, อึณ ดี โลว ปาย เหมา ดี ดูอี ปี ซี มยูก โอว คูนดีคัม?” อาฮามาน วี กาพา แคง น็อห อัน, “แดง โอว นี อาว มึห อาเซ ปี ดี มยูก คูนดีคัม, แตห อัน ตาง หลึอม อี.”

7-8 โคว, อัน วี ต็อห ดี คูนดีคัม, “ดูอี ปี ซี มยูก แม ตึอน, อัน โลว ดึห ครึง ปี ตา คูนดีคัม บอ อึณปร็อง ปี ดึอม ป็อะ คูนดีคัม, แตห บอ ฌึม คูนดีคัม ดึก ดี ฆีณ อึณปร็อง ตี. 9 แฮะ ฮอต, ฌึร ตี ดอน โมยว โลว ดึห ดัว ดี ดา กาณา อู วี, แตห อัน วี อาบ ดี ดูอี ปี ซี มยูก แม คูนดีคัม, แตห อัน ป็อะ อึณปร็อง ฮาว โดบ อึณเตณ กาแต มืง นี, แตห อึณ วี มึห อี แยต นา อาต อัน อู วี ดัด, ‘คูนดีคัม โบง ปาย นี ดี ดูอี ปี ซี มยูก อัน.’”

10 อาฮามาน แฮะ ฮอต กาลาง ปาย ตี คูนดีคัม วี ต็อห ดี อัน, “แตห แม ฮาว ครัน ครัน, ฮาว ดึห ครึง ตา เฆ อึณปร็อง, แตห แม โบง ดี อาโมวตาเก แคะ ปี กาลาง แม ตี ดอน โมยว. อาโมวตาเก มูห ดูอี อายูดา อี กอย บาง มาโลห โฮว ตึอน. แคะ ปี ต็อห แม ดอน โมยว ตี, อาว ปึอน แตห โยม คอ อู โมยว.”

11 ปัน ตี อาฮามาน บอ ฮาว ดึห ครึง ตา บอ อึณปร็อง, วี อาบ ดัว ดี อาโมวตาเก, แตห อัน บอ ป็อะ อึณปร็อง ตี ฮาว แคง มืง. อาฮามาน บอ แยต ดี อาต, ดัด ต็อห, “คูนดีคัม โบง ปาย นี ดี ดูอี ปี ซี มยูก อัน.”

12 แฮะ ฮอต โบง ปาย ตี อาโมวตาเก บอ วี ตัห ดี บาง มาโลห โฮว ตึอน. อี มูห อาฮามาน, อัน แฮะ ซาย, บอ กาโหมะ ฆีณ อัน, วี ปีครัน อัน ดี เวณ ดี กาง อัน. 13 อัน บอ เวณ กาลาง ฌึร ตี ดอน โมยว ดี นาง เฌรีด อี มูห อีบึณ อัน เฆ ฆึก อัน, แตห เฆ โทม.

ปัน ตี เฆ อี มึห อางยาน บอ อีบึณ อัน, เฆ วี ต็อห ดี อัน, “เซ อึณ ปาย ตี, แม ดี ชึม หมาน ดี อาโมวตาเก อี มูห ดูอี อายูดา ตี. แม ตู นับ ดี แป อัน ดอ เหมา.”

14 ดอ กาลาง เฆ ดี อัน ปาย ตี ดูอี ซัห เฆ ตัห แคง โฮว คูนดีคัม, วี แดะ อาฮามาน, แตห อัน ฮาว ครัน ครัน โดง โบง นาง เอซาทา บลอย เฮียง ตึอน.