1 วาย ตี โอย ซีแง, นาง เอซาทา บอ ชึบ ครึง นาง ฮอคัม, วี ลึบ ฮาว ดี ฆลัะ โฮว คูนดีคัม. คูนดีคัม มืร แฮะ ตูต แดง มาลาง กาซืร มาโลห โฮว อัน. 2 อัน บอ ยึร นาง ฮอคัม เอซาทา แฮะ จ็อง ดี ฆลัะ โฮว อัน, อึณ บอ ล็อะ น็อห อัน. อัน บอ โซ็ง เลียห ปี โฆ็ง อัน บยัะ ดี นาง เอซาทา. นาง บอ ฮาว ณืร คูนดีคัม, บอ ดึร กาแดะ บลา เลียห อัน ตี.

3 คูนดีคัม วี ต็อห ดี นาง, “อึย นาง ฮอคัม เอซาทา, มาเซ ปี โลว แม? แม ซี หมาณ มาเซ? แคะ ปี ซี หมาณ แม, บอ มูห มาน มืง อาดา อู กาแต, โอว ดี ดัว.”

4 นาง เอซาทา วี ต็อห, “เซ แม คูนดีคัม อึง, โอว หมาณ, แตห บอ แม คูนดีคัม บอ อาฮามาน ตัห โดง โบง โอว บลอย เฮียง อาดา บาย คูนดีคัม. โอว แดเจณ แม นี แฮะ แรน อูน บลอย ตี.”

5 คูนดีคัม วี จัร แดเจณ อัน ต็อห, “แตห เบ แดะ อาฮามาน, แตห อัน ตัห ครัน ครัน, แตห ยาย โบง โดบ ปี ต็อห นาง ตึอน.” แฮะ ฮอต, คูนดีคัม ฆาย อาฮามาน บอ ฮาว โดง โบง นาง บลอย ตี. 6 ดอ เดียง เฆ อึม มางูน แคง บลอย ตี, คูนดีคัม วี ต็อห ดี นาง, “แม ซี ปึอน มาเซ, โอว ดี ดัว. แม บอ หมาณ มาเซ, แคะ ปี หมาณ แม, บอ มูห มาน มืง อาดา อู กาแต, โอว ดี ดัว.”

7 นาง เอซาทา วี ต็อห, “ปี ซี หมาณ โอว แดเจณ แม นี, 8 เซ โอว แดเจณ แม บอ แฮะ ล็อะ น็อห แม, เซ แม คูนดีคัม แฮะ มึห น็อห กาเว, แฮะ มึห น็อห ซี แตห แคะ ปี โลว ปี หมาณ โอว, โอว หมาณ บอ แม บอ อาฮามาน, แตห บาย วี ตัห ดี บลอย โอว ปอ อู เฌณ. แคหณา โอว ดี วี แรน บลอย ปอ อู เฌณ อาดา แม คูนดีคัม. ปัน อัน ตี โอว ดี วี กาลาง ลอง แปะ แฮะ ดีหมอด แม ดี โอว”

9 ซีแง ตี อาฮามาน บอ วี เลห แคง โฮว, เวณ ดี กาง อัน. น็อห อัน มืร แฮะ ดาคึย กาเซา. อัน บอ วี ฮาว ยึร อาโมวตาเก ดี บาง มาโลห โฮว คูนดีคัม. อาโมวตาเก ยี ตู ยีต จ็อง, ตู โรวเซ อัน. อัน บอ รู กาเซา ดี อาโมวตาเก ตี.

10 อัน ยี โอด ยี ยืน น็อห รู อัน, เวณ ฌัม แคง กาง อัน. อัน บอ แดะ อีบึณ อัน, อี จืร นาง เฌรีด บอ ฆึก อัน แตห เฆ ตัห. 11 อัน บอ แค ปี ปาย อัน ดี มึห อาพูง, แคะ กืน โกรวกราม อัน, แคะ กืน ฆอน อัน, คูนดีคัม มืร แฮะ มยูก อัน, แตห อัน มึห ปวน แบน โมยว แบน โมยว, แตห อัน ตาง หลึอม เฆ อามู อามาด บอ เฆ อี มูห แดเจณ คูนดีคัม ดอน อี. 12 แดง ตี, อัน บอ แค ต็อห, “นาง เอซาทา อี มูห นาง ฮอคัม, แดง โอว, อัน ตู แตห อาเซ ฮาว โดบ คูนดีคัม โดง โบง อัน บลอย. แคหณา มืร, อัน วี บาง บอ โอว ฮาว โดบ คูนดีคัม. 13 มาแล, เซ โอว ยี ซี ยึร อาโมวตาเก อี มูห ดูอี อายูดา, เซ อัน ซี กอย บาง มาโลห โฮว คูนดีคัม, น็อห โอว ตู ดาคึย ลอง ปี กาลาง โอว ดอ ตี นี.”

14 อัน แฮะ ฮอต ต็อห ปาย ตี อีบึณ อัน อี จืร นาง เฌรีด บอ เฆ ฆึก อัน วี ต็อห, “จัร อี ซัม ร็อง, แตห อึณ จา พัน ฆึร กานีห บอ ปัก ฮอย แมง อัน ดี ร็อง ตี. แคหณา, แตห แม กาลาง ดี คูนดีคัม, แตห อัน ควาง เฆ ปัก ฮอย แมง อาโมวตาเก ดี ร็อง ตี. ฮี ฮอต, แตห แม วี ฮาว โดบ คูนดีคัม โฮม บลอย, แตห น็อห แม ดาคึย.” โฆรห ปี กาลาง เฆ ตึอน บอ ล็อะ น็อห อัน. อัน บอ วี จัร เฆ ซัม ร็อง ตี อู เฌณ.