1 แฮะ ฮอต, อาโมวตาเก บอ วี นับ ลอง ปี คราม เฆ. อัน บอ กายาต ครึง ตา อัน, วี ชึบ ดี ตา ครึง จาน, วี ดึห กาฟาง บรัด ดี โดว อัน. อัน บอ วี ฮาว แคง มืง บอ ยาม ตาง บอ กลึร กาเซา. 2 อัน บอ ฮาว ฌัม บาง มาโลห โฮว คูนดีคัม. โกบ แฮะ ชึบ อัน ครึง จาน, อาว ฮู ปึอน ลึบ นา แคง. 3 แปะ อามีง คูนดีคัม ตึอน แฮะ ฌัม ดอน มืง ปี อึบ อัน, อึณ แตห เฆ ดูอี อายูดา วี กลึร บอ โยว บอ ยาม. เฆ กืน บอ ยืน ปี ดี โฮม, บอ ชึบ ครึง จาน, กอย แคง กาฟาง บอ ยาม ตาง.

4 ปัน ตี อึณ บอ มึห แดเจณ นาง เอซาทา บอ ดูอี ซัห อี อึบ ฌืง นาง, เฆ บอ กาลาง แตห นาง เอซาทา นับ ลอง อาโมวตาเก. อัน บอ นับ, อาว ล็อะ น็อห อัน. อัน บอ วี ดึห ครึง ตึย ฮาว, แตห อาโมวตาเก กาปลูะ แวน ครึง จาน อัน ตึอน. อาโมวตาเก ยี ตู โลว. 5 แฮะ ฮอต นาง เอซาทา บอ วี แดะ อาฮาเดก, อี มูห ดูอี แปะ แฮะ ดัว คูนดีคัม, แตห อัน แบน อี ปี ซูต ปี จัร นาง. นาง บอ จัร อัน ฮาว ดีหมอด อาโมวตาเก, เหมา อึณ ปาย ปี โบง อัน ปาย ตี.

6 อาฮาเดก บอ ฮาว แคง มืง, ฌัม ดี โดง ฆลัง นา อาต มาโลห โฮว คูนดีคัม โดง กอย อาโมวตาเก ตึอน. 7 อาโมวตาเก บอ กาลาง โตต ดอน โมยว ลอง ปี ซี โบง เฆ ดี อัน บอ ลอง รึอน แปะ แฮะ กาแซณ อาฮามาน ดี ดัว ดี คูนดีคัม, แตห อัน จัร อี ง็อห แวน โตต แคะ กอย ดูอี อายูดา. 8 อัน บอ ดึห แปะ อามีง ปี แดม เฆ ดี มืง ซูซาน อี ต็อห ดี ง็อห แวน เฆ ดูอี อายูดา. อัน วี แตห อาฮาเดก ดึห ดัว ดี นาง, แตห นาง วี ฮาว กาลาง ดี คูนดีคัม, แตห อัน วี กาเว ดูอี อายูดา อี มูห ดูอี อาโมยว อัน.

9 อาฮาเดก บอ วี ตัห กาลาง ปี ต็อห อาโมวตาเก ตี. 10 ปัน ตี นาง เอซาทา บอ วี กาลาง ดี อาฮาเดก แตห อัน วี ฮาว ต็อห ดี อาโมวตาเก, 11 “แคะ กอย แดเจณ คูนดีคัม บอกาเฆลียด บอ ดูอี อี กอย ดอน มาน ดอน มืง, เฆ บอกาเฆลียด แฮะ นับ ซีคยา, ลอง ดารา คูนดีคัม. เซ อึณ มึห อีบึณ อีมาย ปี ตู แดะ คูนดีคัม ตัห, อัน ยี ตัห โดง กอย คูนดีคัม, อึณ มึห มี ดารา อู โมยว. ดูอี ตี โลว ยัม. อึณ มึห มี อู โมยว อี แตห ดูอี ตี ลอด ยัม. เซ คูนดีคัม ดึห เลียห ครีว อัน, โซ็ง ดี ดูอี อี ตัห, อาว โลว ยัม. อี มูห โอว, คูนดีคัม ตู แดะ โอว, แฮะ โนะ อู มาเฆียน.”

12 เฆ บอ วี ฮาว กาลาง ดี อาโมวตาเก ปี ต็อห นาง ตี. 13 อาโมวตาเก วี แตห เฆ ต็อห ดี นาง, “เซ ดูอี อายูดา บอกาเฆลียด โลว ยัม, แม ทาง, โกบ กอย แม แคง โฮว คูนดีคัม, แม ดี ลอด ยัม? 14 เซ แม ตู ต็อห มาเซ ดอ ตี นี, อึณ ดี บอ มึห อี เฮา อี ดี จอย, อี ดี คยอด ดูอี อายูดา. มาแล, บอ แม บอ ครึร ฆูณ มา แม, เบ ดี ชึม. โอว ยี ทาง, แม กอย แคง โฮว นี ดอ ตี นี, แตห แม ปึอน ดี จอย.”

15 นาง เอซาทา ปี วี จัร เฆ ฮาว ต็อห ดี อาโมวตาเก, 16 “แตห แม ฮาว แดะ กาฌูะ เฆ ดูอี อายูดา บอกาเฆลียด อี กอย แคง มืง ซูซาน, แตห เบ ยืน ปี ดี โฮม อาดา โอว, แตห เบ ซาคึร ดี เฌาพรา ดอง คืน ดอง วัน อาดา โอย ซีแง. บอ โอว บอ เฆ แดเจณ โอว เย มืร ดี ยืน ปี ดี โฮม ปาย ตี. แฮะ ฮอต, คูนดีคัม ปี ซัะ แดะ โอว, โอว ดี ฮาว โดง กอย อัน. เซ โอว บอ โลว ยัม, โอว แฮะ คัม.”

17 ปัน ตี อาโมวตาเก บอ ฮาว โบง โดบ ปี ต็อห นาง เอซาทา ตี.