1 ดอ อัน ตี อาซันบาลาด บอ อาตอพียา บอ อาเฆซีม อี มูห ดูอี อาโมยว อาราบ บอ รันซู เย บอกาเฆลียด, เฆ บอ ยึร ลอง แฮะ ฮอต วี อึณปราย เย แรง มืง. อาว ฮู มึห กาเดา โดง หลูห คอ อี แจก. มาแล, ยี หณัม ปึอน ดี ฮับ บลัะ มาโลห. 2 เฆ แฮะ ยึร ลอง อัน ตี, อาซันบาลาด ฆาย อาเฆซีม วี ตัห กาลาง โฆรห ดี โอว ต็อห, “ตัห แตห เอ ลาย กาตูณ ดี เรา อู โปละ อู โปละ แคง ฆลัง ออนอ ตึอน.” ฆาย ยี แฮะ คราม ดี โบง นา ตู หมึอม ดี โอว.

3 โอว มืร วี จัร อี ฮาว กาลาง ดี ฆาย ต็อห, “โอว มึห ฆาน กืน กาเซา. โอว ตู ปึอน เบลห อูน ฆาน โอว ตี. โกบ มาเซ โอว กอ โลว แตห ฆาน โอว ฆืด กอย ปาย ตี แตห โอว วี ฮาว โดง กอย บาย?” 4 ฆาย ปี วี ดัม ตัห โฆรห ปาย ตี ดี โอว, อึณ กอ โนะ พวน เฌณ. โอว ปี วี กาลาง ฮาว ปี ปี กาลาง โอว คา อาต ตึอน.

5 แฮะ ฮอต, ปอ อู เฌณ อาซันบาลาด บอ จัร แดเจณ อัน ตัห ปี คา อาต ตึอน. คา นี, แดเจณ อัน แฮะ โฆ็ง บอ แปะ อี ตู ดอก ฌึม. 6 โฆรห ปี แดม แคง แปะ ตี, อึณ บอ ต็อห, “โอว แฮะ ยึร เฆ ดูอี อาโมยว เฮา ดอน โมยว แฮะ กาลาง โฆรห ลอง แม. บอ อาเฆซีม แฮะ ต็อห, โฆรห เฆ ตี แฮะ หมาน. เฆ ต็อห, บอ แม บอ เฆ ดูอี อายูดา, เบ แฮะ คราม ดี โบง กาบัห ดี เย. โคว, เบ แฮะ วี อึณปราย แรง มืง. เฆ บอ ต็อห, แม คราม ดี แบน บอ คูนดีคัม อี อึบ เฆ. 7 เฆ มืร ต็อห, แม แฮะ ดาง แตห อึณ มึห ดูอี อี บยาน โฆรห เฌาพรา, แตห เฆ วีน ดี กาลาง แคง มืง เยรูซาแลม ต็อห, ‘อึณ แฮะ มึห คูนดีคัม แคง อืง ยูดา.’ ดอ ตี นี, โอว ดี วี กาลาง ลอง อัน ตี ดี คูนดีคัม ตาง. โคว, แตห แม ตัห กามวน ดี โอว.”

8 แฮะ ฮอต ปาย ตี โอว มืร วี จัร ดูอี โอว ฮาว กาลาง ดี อัน ต็อห, “โฆรห ปี กาลาง แม อาว มึห อี มูห อี หมาน คอ อู แด. แม พูกพาม ราง แม.”

9 ดูอี เฆ ตี, เฆ เทว ดี กาโบยว เย. เฆ ทาง, เย ตู มึห โปลม เฆ แฮณ, ตู ปึอน โบง แตห ฆาน เย ฮอต. โอว บอ วี ซาคึร ต็อห, “อึย แม เฌาพรา, โอว หมาณ, แตห โอว วี มึห โปลม เฆ แฮณ แตห โอว ปึอน ดี โบง ฆาน โอว ตี.”

10 อู ซีแง โอว บอ วี ฮาว แล ดี กาง อาเซมายา อี มูห ฆอน อาเดลายา บอ หลาน อามาเฮตาบาลา. อัน บอ กอย เครียง แคง กาง อัน. อัน วี ต็อห ดี โอว, “แตห อาย ฮาว เครียง แคง โฮว เฌาพรา, วี กาบีด มาโลห. โคว, เฆ ดี บอ ตัห เหรต ดี ง็อห ยัม แม แคง หมึร.”

11 โอว มืร วี ต็อห, “โอว ตู มูห ดูอี ฮาย อี ดี โลว วีน ดี เครียง ปาย ตี. แม ทาง โอว ดี ฮาว เครียง แคง โฮว เฌาพรา, แตห โอว ลอด ยัม? โอว ตู โบง ปาย ตี ดอ เหมา.” 12 โอว แฮะ ฮอต นับ, เฌาพรา ตู มึห ดี กาลาง ดี อาเซมายา. อัน บอ มูห ฆึก อาตอพียา ฆาย อาซันบาลาด. ฆาย แฮะ ฌาง อัน, แตห อัน กาลาง โฆรห ตู หมึอม ดี โอว. 13 ฆาย ฌาง อัน ปาย ตี แตห โอว โยว, แตห โอว โบง โดบ อากยาม อางยาน อัน ตี, แตห โอว กาลึบ ดี โบง หมาบ, แตห ฆาย ปึอน แนนัะ โอว บอ กาลาง นา ตู หมึอม ลอง โอว.

14 โอว มืร วี ซาคึร ต็อห, “อึย แม เฌาพรา, โอว หมาณ แตห แม เฌา โนว แปะ แฮะ โบง อาตอพียา ฆาย อาซันบาลาด, แตห แม เฌา วี ดัม หมาบ โดบ แคะ ปี โบง ฆาย ตี. แตห แม เฌา โนว บอ ปี โบง นาง นอตี อี มูห อีบึณ อี บยาน โฆรห เฌาพรา บอ เฆ อี เฮา อี บยาน โฆรห เฌาพรา อี แฮะ ซี กาโบยว โอว.”

15 ฆาน ปี อึณปราย เย แรง มืง ตึอน, เย โบง อาดา พัน ฆึร ดี อา ซีแง. อึณ บอ ฮอต ดอ ฌัม ซีแง อา ฆึร ดี อึณพัน, มาเฆียน เอตูลา. 16 เฆ รันซู เย บอ เฆ ดูอี อาโมยว เฮา อี กอย โคบ เย, เฆ บอ ยึร ลอง อัน ตี, อึณ บอ แบน น็อห ลึร น็อห ดีแตด ดี เฆ. เฆ แฮะ นับ, แปะ แฮะ โบง เย ตี, อึณ กอ ฮอต โกบ แฮะ จอย เฌาพรา ดี เย.

17 ดอ อัน ตี เฆ อามู อามาด อี กอย แคง อืง ยูดา, เฆ บอ ตึย แปะ แบน พืน แบน พืน ดี อาตอพียา. อัน มืร แฮะ ตึย กืน แปะ ดี เฆ. 18 ดูอี อายูดา มืร แฮะ กืน อี แฮะ ดัว กาดีก ซัดฌา ดี อาตอพียา โกบ แฮะ แบน อัน เอียะ อาเซคานี อี มูห ฆอน อาราฮา ตึอน. ฆอน กาโณม อัน อี จืร อาเยโฮวนัน ตึอน, อัน แฮะ วี คัด ดึห ฆอน ดีบยา อี มูห ฆอน อาเมซูลัม อี มูห ฆอน อาเบเรก. 19 ดูอี เฆ ตี เฆ บอ ออน ดี ตัห กาลาง แหน ดี โอว ลอง นา บอด นา หมึอม ปี โบง อาตอพียา ดี เฆ. เฆ ปี วี ดึห โฆรห ปี กาลาง โอว ดี เฆ, ปี วี ฮาว กาลาง ดี อัน. อัน มืร ออน ดี แดม ตัห แปะ, กาโบยว แตห โอว โยว.