1 วาย อัน ตี เฆ ดูอี กืน บอ อีมาย บอ อีบึณ เฆ, เฆ บอ ปึณ บอ กาลาง นา ตู หมึอม ลอง เฆ ดูอี อายูดา, เฆ อี มูห อู บีนอง วอแว. 2 มัง อี บอ ต็อห, “ดูอี แคง อึณโฮม เย แฮะ กืน กาเซา, แตห เย ฮาว ดึห โหงว, แตห เย ปึอน ดี โฮม, แกวะ แตห เย ยัม.”

3 มัง อี บอ ต็อห, “โกบ แฮะ มึห อาคราว เอต โบม, เย แฮะ ดึห โดง นา เย บอ มาน มางูน เย บอ กาง เย, แฮะ งาม ดี อี เฮา, แตห เย ปึอน โหงว เฆ ดีฆาว.”

4 มัง อี บอ ต็อห, “เย แฮะ การ็อห รึอน อี เฮา, แตห เย ฮับ คอน มาน, คอน โดง นา บอ คอน มาน มางูน เย แคะ ปี หมาณ คูนดีคัม. 5 เย มืร มูห อึณกรึห อึณกราต เอ ดูอี อายูดา. ฆอน เย มืร มูห ฆอน หมึอม ปี ฆอน เฆ ดา กาณา เอ. มาแล, เย ยี วี กาดูห ดี วี ย็อง ฆอน อีมาย บอ ฆอน อีบึณ เย แบน หมาย อี เฮา. ฆอน อีบึณ เย มัง อี แฮะ ฮอต แบน หมาย อี เฮา. เย มืร อาว แป ดี วี ทูด วีว. โคว, มาน เย เฆ โดง นา เย บอ มาน มางูน เย แฮะ ฮอต โจห ดี อี เฮา.”

6 ดอ ยึร โอว โฆรห ตู หมึอม ปี ปึณ ปี กาลาง เฆ ตี, โอว บอ รู กาเซา. 7 โอว บอ กาพา ปี ดี ปาย ลอง อัน ตี, โอว บอ วี มาโนว เฆ อี มูห อามู อามาด บอ เฆ ดา ตาง อี อึบ มืง. โอว มืร ต็อห ดี เฆ, “เบ นี, เบ บอ นับ ดี วี ดึห ดี โฮม เอียง รึอน เอียง โหงว ดี บีนอง วอแว เบ.” โอว มืร แดะ แคะ กอย ดูอี กืน, แตห เฆ บอกาเฆลียด ตัห กาฌูะ, แตห อึณ ปึอน ดี วี อึณปราย ลอง อัน ตี. 8 โอว มืร กาลาง ดี เฆ ต็อห, “แคะ ปี ปึอน เอ โบง, เอ แฮะ ฮอต โบง. เอ แฮะ ฮอต ทูด วีว, จึห วีว ดูอี อายูดา อี แฮะ แบน หมาย ดูอี อาโมยว เฮา. ดอ ตี นี, เบ ปี วี คาหนาบ บีนอง เบ, แตห เฆ วี ย็อง โดว เฆ ดี เบ.” เฆ ดา ตาง ตึอน มืร โทม, อาว มึห อี โฆรห คอ อู วี. โคว, เฆ อาว ฮู นับ ปี ดี ต็อห เฆ.

9 วาย อัน ตี โอว ปี วี ต็อห, “ลอง ปี โบง เบ นี, อึณ ตู หมึอม. เบ โลว โยว เฌาพรา, โลว โบง ซืร ซืร หมาน หมาน, แกวะ แตห ดูอี อาโมยว เฮา อี มูห รันซู เอ ปึอน ดี แนนัะ เอ. 10 บอ โอว บอ เฆ บีนอง โอว บอ เฆ ดูอี อี จอย โอว, เย แฮะ ดัว เฆ การ็อห รึอน เฆ โหงว ดีฆาว. แกวะ แตห เอ ยี หลัยะ ดี โฮม เอียง อัน ปี ตู ปึอน ดึห เอ ดี เฆ. 11 อาตึร นี, แตห เบ วี ดัว วีว โตต โกรว แปะ แฮะ ดึอม งาม อี เฮา ดี เบ. บอ มูห มาน เฆ โดง นา เฆ, บอ มูห มาน มางูน เฆ, บอ กาปึม เฮ นามัน เฆ บอ กาง เฆ, แตห เบ วี ดัว วีว โตต ดี เฆ. แตห เบ วี ดัว วีว บอ เอียง ดอน โมยว แปะ แฮะ หมาณ เบ. บอ มูห รึอน, บอ มูห โหงว, อึม มางูน บอ นามัน, แตห เบ วี แตห วีว โตต.”

12 ดา ตาง เฆ ตึอน แฮะ ฮอต โทม, เฆ วี ต็อห, “อึร, เย ดี วี ดัว วีว ดี เฆ. เย มืร อาว ฮู หมาณ นี ตี ดี เฆ. เย ดี โทม โฆรห แม.” ดอ อัน ตี โอว บอ วี แดะ เฆ ดา อี หลู ดี เฌาพรา, วี จัร เฆ ดา ตาง ตึอน, แตห เฆ คัม กาดีก ซัดฌา. แตห เฆ บอ โบง โดบ กาดีก ซัดฌา แปะ แฮะ คัม เฆ นา อาต เฆ ดา อี หลู ดี เฌาพรา. 13 ดอ อัน ตี โอว มืร วี ดียึห กาซืร กาหรู ดี ซีโตว โอว ต็อห, “แตห เฌาพรา วี โบง ปาย ตี ดี เฆ อี ตู โบง โดบ กาดีก ซัดฌา แปะ แฮะ ดัว เฆ อาตึร นี. แตห อัน เฌา ดียึห เลห เฆ ดี กาง โดง กอย อัน. แกวะ ฮู แตห เฆ แบน ดูอี ปี ยอด แมน อัน เฌา. แตห เฆ กาดูห ดี เลห ฮาว, แกวะ แตห เฆ มึห มาเซ.” เฆ ดูอี กืน มืร โทม. เฆ วี ต็อห, “แตห อึณ มูห อึณ หมาน แตห อึณ แบน ปาย ตี.” แฮะ ฮอต, เฆ มืร วี อืบ เฌาพรา. ดา ตาง เฆ ตึอน มืร โบง โดบ กาดีก ซัดฌา เฆ ตี.

14 แดง ตี, บอ โอว บอ บีนอง โอว, เย ตู ดึอม ดึห ปี ดี โฮม อี มูห รูห เย. ดอ อึบ คูนดีคัม อาตาเจรีด ดี มาน มืง อัน อาดา อา ฆึร ซีนัม, อัน แฮะ แตห โอว แบน ดา กาณา อี อึบ มืง ยูดา. ซีณ ดอ อัน ตี อึณ กอ วี ฌัม ดอ แฮะ อึบ คูนดีคัม ดี มาน มืง อัน อาดา โอย ฆึร ดี อา ซีนัม, อึณ แฮะ แบน ฆึร ดี อา ซีนัม. ดอ อัน ตี โอว ตู ดึห มาเซ แปะ แฮะ ปึอน โอว ดึห. 15 อี มูห เฆ ดา กาณา อี อึบ มืง อาต นี, เฆ แฮะ แฆบ กืน ดี ดูอี เรา ดูอี กาง. เฆ หมาณ ดี โฮม ดอน ซีแง ดอน ซีแง บอ คามูน บอ อึม มางูน บอ รึอน พวน ฆึร กยาบ. แดเจณ เฆ บอ นับ ดี คาหนาบ ดูอี เรา ดูอี กาง. โอว ยี ตู โบง ปาย ตี โกบ โรวเซ โอว เฌาพรา. 16 โอว บอ โบง แคะ ปี ปึอน โอว โบง, แตห แรง มืง เจว ฮอต. เฆ อี โบง รึม ฆาน โดบ โอว บอกาเฆลียด, เฆ บอ กาโพรม ดี จอย โบง มี แรง มืง ตี. เย มืร ตู จึห มาน เฆ โดง นา.

17 บอ มูห ดูอี อายูดา, บอ มูห ดา ตาง อี อึบ มืง, เฆ อี โฮม รึม แคง กาง โอว เซเซ, เฆ กอย อู มาย็อห ดี พัน ฆึร วี. แดง เฆ ตี, โอว ปี วี ยอด แมน บอ แคต อี มูห ดูอี อาโมยว เฮา อี ตัห โดง กอย โอว. 18 เฆ แดเจณ โอว บอ โลว แรน ปี ดี โฮม อาดา เฆ ตี. อู ซีแง อู ซีแง บอ โลว ง็อห มัก อู โดว, มาบู อี ฆลัณ ซีคยา เดา โดว บอ มาเอียน เฆ มาเบบ มัง โดว. แดง ตี, ฆึร ซีแง อู เฌณ, โอว ปี วี เบลห เฆ เดียง อึม มางูน แบน โมยว แบน โมยว อี กืน กาเซา. ปี บอ แฮะ โตต กืน แคะ ตี มืร, โอว ยี ตู หมาณ แปะ แฮะ ปึอน ดึห โอว โกบ มูห โอว ดา กาณา อี อึบ มืง. โคว, ฆาน ปี โลว จอย เฆ ดูอี เรา ดูอี กาง, อึณ แฮะ ฮอต จัน. 19 อึย แม เฌาพรา, โอว ซาคึร ดี แม อี มูห เฌาพรา อี อึบ โอว. โอว หมาณ, แตห แม โหลห แปะ แฮะ โบง โอว อาดา ดูอี เฆ นี, แตห แม เฌา วี เฆฌู โอว.