1 ดอ ยึร อาซันบาลาด ลอง แฮะ วี กาจูห เย ดี วี อึณปราย แรง มืง ตี, อัน ตู อึง บอ รู กาเซา. อัน บอ ลูกตาย บอ กาณัห เฆ ดูอี อาโมยว อายูดา. 2 อัน บอ กาลาง ดี อาต บีนอง อัน บอ ดี อาต เฆ ดา ซึก แคง มืง ซามารี ต็อห, “เฆ ดูอี อายูดา เฆ ตู อัห ตู คัร มาเซ. มาเซ ปี คราม เฆ ดี โบง? เฆ ทาง เฆ ดี ปึอน ดี วี ซัม มืง เฆ? เฆ ซี แรน ปี ดี หลู เฆ? เฆ ทาง เฆ ดี โบง แตห อึณ ฮอต อาดา อู กาจัน? มืง เฆ แฮะ ฮอต กาปยาต ลึร โตต. เฆ บอ ทาง เฆ ดี ปึอน ดี วี ฆึห เลห มาว อี ซี กอย แคง อึณปึม กาดาย เฆ ตี อี แฮะ ฮอต กาซึม โตต?”

3 ดอ กาลาง อัน โฆรห ตี, อึณ บอ มึห อาตอพียา อี มูห ดูอี อาโมยว อัมโมน, อัน กอย ดี ตี บอ ต็อห, “เซ เฆ ดี บอ แป ดี โบง แรง มืง มืร, อึณ ตู อัห มาเซ. เซ มาโซว แปร ตัห โฮะ นา แดง มืร, อึณ ดี วี ดีฆล็อห โจห โตต.”

4 ปัน ตี โอว บอ วี ซาคึร ต็อห, “อึย เฌาพรา, โอว หมาณ, แตห แม เฌา โทม ปี ซาคึร เย. เย แฮะ กาดูห ดี คัม แบน ปี ลูกตาย อี เฮา. หมาณ, แตห เฆ วี คัม โฆรห ปี แนนัะ เฆ ดี เย ตี. แตห เฆ วี คัม อี เฮา เหมต ฮาว เฆ แบน หมาย แคง มืง ดูอี อาโมยว เฮา. แตห เฆ ชึม ปาย ตี. 5 แกวะ ฆ็อห แวน หมาบ แปะ แฮะ โบง เฆ ตี. แกวะ ปีว หมาบ เฆ ตี. โคว, ดอ แฮะ แนนัะ เฆ ดี เย อี โบง ฆาน นี, เฆ แฮะ แนนัะ บอ แม เฌา.”

6 ปี บอ แฮะ ปาย ตี มืร, เย แฮะ กาโพรม ดี โบง แรง มืง. เย บอ โบง แตห อึณ ฮอต นา จา อัน อาดา อู กาแต. โคว, เฆ ดูอี แฮะ มึห น็อห ซี โบง.

7 อาซันบาลาด บอ อาตอพียา บอ เฆ ดูอี อาราบ, ดูอี อัมโมน บอ เฆ ดูอี อาจูด, ดอ ยึร เฆ ลอง แนะ อี โบง ฮาว เย แรง มืง เยรูซาแลม บอ ลอง แฮะ วี กาบีด วี อึณปราย เย โดง หลูห โดง ลึร กาปยาต ตึอน, เฆ บอ แว รู กาเซา. 8 ปาย ตี เฆ บอ ลาย กามวน ซังคยาง, แตห เฆ ปึอน ดี ตัห กาโฆห ดี มืง เยรูซาแลม, แตห เฆ ปึอน ดี แคร ฆาน ปี โบง เย. 9 มาแล, เย บอ วี ซาคึร ดี เฌาพรา บอ แตห อึณ มึห ดูอี อี บัร, แตห เฆ บัร มืง ดอง วัน ดอง คืน โกบ มึห รันซู เย ตี.

10 เฆ ดูอี อายูดา บอ ต็อห โหมว อี บยัะ ลอง แฮะ หณาบ ดี น็อห เฆ. เฆ ต็อห, “ดูอี อี โตว มาว ตาง, แฮณ เฆ แกร ดี โยม. โมยว อี กาปยาต ลึร, เหมา ดี ปาย ดี วี ซัม.”

11 บอ เฆ รันซู เย วี ต็อห, “เฆ ตู ดี นับ ตู ดี ยึร เอ, เอ ดี ปึอน ดี ลึบ ฮาว กอ ฌัม กาแต เฆ, เอ ดี บอ ปึอน ดี ลึบ แดบ ลึบ ง็อห ยัม เฆ, แกวะ แตห เฆ ปึอน ดี โบง ฮาว ฆาน เฆ, แตห อึณ ฆืด ปาย ตี.”

12 บอ เฆ ดูอี อายูดา อี กอย กาแต รันซู เย เฆ ตี เฆ วี ออน ดี ตัห ดัว ซาดีก ดี เย แบน เฌณ แบน เฌณ. เฆ ต็อห, “เบ บอ กอย ดี เหมา, เฆ ดี ตัห กาโฆห ดี เบ ดี ตี.”

13 โคว อัน ตี, โอว มืร จัร แตห อึณ มึห ดูอี อี โฆ็ง ครึง กาโฆห, แตห เฆ โฆ็ง มาปัวะ ลาง เฆ บลา เลียห บอ บลา อัะ, แตห เฆ บัร โดบ แรง มืง กาซืร อี หณัม ปึอน ดี อึณปราย เฆ ตึอน, แตห เฆ บัร โดบ อึณโฮม เหมา อึณโฮม อัน. 14 โอว แฮะ ฮอต ยอด ปี ปาย อาคยาก อัน, โอว มืร กาลาง ดี เฆ อามู อามาด บอ ดี เฆ ดา กาณา อี อึบ มืง บอ ดี เฆ ดูอี กืน. โอว ต็อห, “แกวะ แตห เบ โยว รันซู เอ ตี. แตห เบ วี โหลห เฌาพรา ปี กรึบ เอ, แคะ เหมา อัน แฮะ ตาง แฮะ หมึอม โยว. แตห เบ กาโฆห ดาง ครึร บีนอง วอแว เบ, ดาง หลูกหลาน เบ บอ ดาง อึณโฮม, อีบึณ เฆ ฆอน วา เบ.”

15 เฆ รันซู เย ตี บอ วี นับ, เย แฮะ ฮอต นับ ลอง ปี คราม เฆ บอ ลอง อากยาม อางยาน เฆ. เฆ บอ วี โหลห โดว เฆ บอ วี นับ เฌาพรา แฮะ ปยาต แวน ปี คราม เฆ ดี โบง. ดอ อัน ตี เย วี กาโพรม ดี วี โฮะ โฆว โฮะ โบง แรง มืง กาซืร อาเซ กาซืร อัน.

16 จูห ซีณ ดอ อัน ตี ดูอี โอว อาดา อู กาแต, โอว แตห เฆ โบง ฆาน. อาดา ปอ อู กาแต, โอว แตห เฆ โฆ็ง บลา เลียห เฆ มัง ฆ็อง บอ บลา อัะ, แตห เฆ ชึบ บอ ซีโตว ฮีน บอ บัร. เฆ ดา ตาง เย บอ กอย นา ปัน, บัร ดี จอย ดูอี อายูดา. 17 เฆ อี โบง แรง มืง บอ เฆ อี โตว อี ดึห ตัห ครึง แรง มืง ตี, แคง แด เฆ อาดา อู บลาก, เฆ บอ โฆ็ง ครึง กาโฆห. แด เฆ อาดา ปอ อู บลาก โบง ฆาน. 18 เฆ ดูอี อี โบง ฆาน ตึอน มืร, เฆ กาน็อง มาปัวะ ชัะ ดี ณอย เฆ ดอน อี. เฆ ดา อี บัร ดี บูด เวา, เฆ ยี จ็อง โคบ โอว.

19 โอว บอ วี กาลาง ดี เฆ อามู อามาด บอ ดี เฆ ดา กาณา อี อึบ มืง บอ ดี เฆ ดูอี กืน ต็อห, “โดง โบง เอ ฆาน นี, อึณ แฮะ กาว็อห กาเซา, ดูอี เอ อี โบง แรง มืง มืร, แฮะ กอย อู วี อู โปละ, อึณ แฮะ ราม ลาย กายาน กาโต็ง กาเซา. 20 เซ เบ ฮี ยึร ฮัม เวา นี กอย ดี เหมา, แตห เบ ตัห กาฌูะ ดี ตี. เฌาพรา ปี กรึบ เอ ดี กาโฆห ดาง เอ.”

21 ปาย ตี ซีณ กาจูห แปร ดี บลาง กอ วี ฌัม เลห ซีมัณ, ดูอี เย อาดา อู กาแต บอ โบง แรง มืง, อาดา ปอ อู กาแต โฆ็ง ครึง กาโฆห บอ บัร. 22 ดอ อัน ตี โอว วี กาลาง ดี เฆ ดูอี กืน ต็อห, “แตห อีมาย ดอน อี บอ แดเจณ อัน ตัม แคง มืง. แคง หมึร แตห เฆ บัร มืง. กาแต ซีแง, แตห เฆ บอ โบง ฆาน.” 23 ปาย ตี บอ โอว บอ เฆ บีนอง โอว บอ เฆ อี จอย โอว บอ ดูอี อี บัร มืง, อาว มึห อาเซ อี ปึอน ดี กาปลูะ เลห ครึง ปี ตา อัน. ดอน อี บอ โฆ็ง ครึง กาโฆห เฆ เซเซ.