แฮะ ฮอต, อาดาวีด วี ต็อห, “โฮว เฌาพรา อี มูห เฌาพรา ปี กรึบ เอ โลว กอย ดี นี. กาโช็ง โดง หลู เฆ ดูอี อีซาเรลัะ ปี หลู อี โดะ ดี เงา มืร, โลว กอย ดี นี.”

2 ดอ อัน ตี อาดาวีด มืร จัร เฆ ดูอี อาโมยว เฮา อี กอย แคง มืง อีซาเรลัะ ตัห กาฌูะ, จัร เฆ โบง ฆาน. มัง อี บอ โลว ด็อห มาว อาดา โฮว เฌาพรา ตี. 3 อัน มืร ดึห ฮีน กืน กาเซา, แตห เฆ โบง มาฮีน อาดา บลัะ มาโลห, โบง บอ มัง กาเกียบ. อัน บอ ดึห บ็อง เดณ อี กืน กาเซา. อึณ กอ ฮู นับ ดี ซัะ แคะ บอ จัน. 4 บอ เฮ อารีด ปี ดึห ตัห ดูอี มืง ทูโรว ฆาย มืง ซีโดน ดัว ดี คูนดีคัม อาดาวีด, อึณ แฮะ กืน กาเซา กอ ฮู นับ ดี ตีห. อาดาวีด มืร ดัว โตต ดี เฆ ลักซามา.

5 อาดาวีด แฮะ กาพา แคง น็อห อัน ต็อห, “โฮว เฌาพรา ปี ดี โบง ฆอน อีมาย โอว อี จืร อาซาโลวโมว, อัน โลว โบง แตห อึณ มึห อาพูง ดังโคว, มึห ซาเร แตห ดูอี ดอน มาน ดอน มืง กอ อาม. มาแล, อัน ยี ซี เตียะ, อัน หณัม นับ ดี โบง ซีคยา. โคว, โอว โลว แรน อูน แบน โมยว แบน โมยว.” ปาย ตี อาดาวีด แฮะ แรน อูน โกรวกราม กืน กาเซา อาต ยัม อัน.

6 แฮะ ฮอต, อัน วี แดะ ตัห ฆอน อัน อี จืร อาซาโลวโมว, วี ดัม อัน ซัม โฮว เฌาพรา อี มูห เฌาพรา ปี กรึบ เฆ ดูอี อีซาเรลัะ.

7 อาดาวีด วี ต็อห ดี อัน, “อึย แม ฆอน โอว, โอว แฮะ ซี ซัม โฮว เฌาพรา อี ปวน ตาง, อี มูห เฌาพรา ปี กรึบ โอว. 8 มาแล, เฌาพรา ยี วี กาลาง ดี โอว ต็อห, ‘แม แฮะ ง็อห ยัม ดูอี กืน กาเซา. แม มืร แฮะ ดึอม กาโฆห มืง แบน มืง แบน มืง. โคว, แม ตู ปึอน ซัม โฮว โอว. 9 ปี บอ แฮะ ปาย ตี มืร, แม ยี มึห ฆอน อีมาย อู วี, โอว ดี แตห อัน ปึอน ดี กอย ดาคึย, กอย หนีม หนีม. แตห อัน ลอด อาเพ อาเร ดี รันซู อัน อี กอย โรบ อัน ดอน บลาก. จืร อัน มูห อาซาโลวโมว. บอ โจว อัน, อัน ดี ปึอน ดี อึบ มืง อีซาเรลัะ ดาคึย ดาคึย, อาว มึห อี ลาย กาโฆห. 10 อัน ตี อี ดี ซัม โฮว โอว. อัน ดี แบน ฆอน โอว, โอว มืร ดี แบน ฆูณ อัน. โอว มืร ดี แตห หลูกหลาน อัน อึบ เฆ ดูอี อีซาเรลัะ เซเซ.’

11 โคว อัน ตี แม ฆอน โอว, แตห เฌาพรา กอย รึม โดบ แม, แตห แม ปึอน ดี โบง โฮว เฌาพรา อี มูห เฌาพรา ปี กรึบ แม, แตห อึณ กอ ฮอต, แตห อึณ โดบ กาดีก ซัดฌา ปี ดัว เฌาพรา ดี แม. 12 แดง ตี, ปัน ดี ดาง เฌาพรา แม แบน คูนดีคัม อี อึบ ดูอี อีซาเรลัะ, แตห อัน ดัว อางยาน ดี แม, แตห แม นับ ปี ดี โลว โบง, แตห แม โดบ ดารา เฌาพรา, อี มูห เฌาพรา ปี กรึบ แม. 13 เซ แม กอ ซาดีก ดี โบง โดบ ดารา ปี ดึอม ดัว เฌาพรา ดี อาโมวแซ อาดา เฆ ดูอี อีซาเรลัะ, แม ดี บอ ปึอน ดี โบง ดอน โมยว, แคะ ปี คราม ปี มาง แม ดี โบง. แตห แม มึห น็อห ยัะ น็อห โปลม. แกวะ แตห แม โยว บอ กาลูต น็อห.

14 ลอง โฮว เฌาพรา ตี, โอว แฮะ คัด น็อห ดี โบง ปาย คาคัร. โอว แฮะ แรน อูน ครีว อู แซน ทาเลน, รึอน อู ลาน ทาเลน. อึณ บอ มึห บอ บ็อง เดณ บอ ฮีน กืน กาเซา กอ ฮู แป ดี ซัะ จัน อัน. เฮ เฆ มาว มืร, โอว แฮะ แรน อูน กืน กาเซา อาดา โฮว เฌาพรา ตี. แตห แม ปี วี ฮับ ปอ อึณ ปัว. 15 แดง ตี, แม แฮะ มึห ดูอี อี โบง ฆาน แม อี กืน กาเซา. แฮะ มึห อี นับ ดี โบลห มาว, อี นับ ดี โฆว มาอูด บอ ลักซามา. อาว วัน มี แคะ ตี. แฮะ มึห บอ ดา ลาก อี แหลว อี กยัะ ดี โบง แบน โมยว แบน โมยว. 16 เฆ นับ ดี จึม ครีว เฆ รึอน บอ บ็อง เฆ ฮีน. แตห แม จูห ดี โบง ซีณ ดอ ตี นี. แตห เฌาพรา มืร กอย รึม โดบ แม.”

17 วาย อัน ตี อาดาวีด วี กาลาง บอ ดี เฆ ดูอี อี มูห ดา ตาง อี อึบ อี แยต เฆ ดูอี อีซาเรลัะ ดอน อี, แตห บอ เฆ จอย อาซาโลวโมว. 18 อัน กาลาง ดี เฆ ต็อห, “เฌาพรา ปี กรึบ เบ แฮะ กอย รึม โดบ เบ. อัน เฌา แฮะ แตห เบ ปึอน ดี กอย ดาคึย ดาคึย, แตห อึณ บอ เยน ดอน บลาก. อัน เฌา แฮะ ควาง แตห โอว แป เฆ ดูอี อี ดึอม กอย แคง มืง นี บอกาเฆลียด. เฆ มืร แฮะ กาดูห ดี แบน หมาย เบ บอ คัม เฌาพรา อึบ เฆ. 19 ดอ ตี นี แตห บอ น็อห บอ พึอม เบ วี โดบ ซีคยา เฌาพรา ปี กรึบ เบ ตี. แตห เบ ซัม โฮว เฌาพรา, แตห เบ บอ ปึอน ดี ดึห ตัห ฌีดืก เฌาพรา, บอ ครึง ตา อี ซีงา ปี โลว จัร โลว ตา เบ ดอ ดี กรึบ เบ ดี อัน เฌา, แตห เบ บอ ปึอน ดี ดึห ตัห อูน โตต แคง โฮว เฌาพรา ตี.”