1 โบว กานัม อี จืร ซาตาน, อัน ซี ปยาต เฆ ดูอี อีซาเรลัะ. อัน บอ กาซูห น็อห อาดาวีด, แตห อัน ตีห ฌาราง เฆ ดูอี ปี อึบ อัน บอกาเฆลียด. 2 อาดาวีด มืร กาลาง ดี อายอพัะ บอ เฆ ดา โบว อี กอย โดบ อัน ต็อห, “แตห เบ ฮาว แคง มืง อีซาเรลัะ นี ดอน โปละ, จูห ดี มืง บีราเซบา, แตห อึณ กอ วี ฌัม ดี มืง ดาน, แตห เบ ตีห โตต แคะ กอย ดูอี. โอว ซี นับ, ดูอี แฮะ กืน แคะ เหมา.”

3 อายอพัะ วี ต็อห, “หมาณ แตห เฌาพรา โบง, แตห ดูอี อีซาเรลัะ วี กืน หลึอม แคะ แฮะ มึห ดอ ตี นี อาดา อู มาย็อห บูน. แม คูนดีคัม ตาง, ดูอี เฆ ตี บอ มูห แดเจณ แม บอกาเฆลียด. เหมา อึณ ปาย ปี ซี โบง แม ฌึร ตี, แตห ดูอี อีซาเรลัะ โลว คัม หมาบ?”

4 มาแล, คูนดีคัม แนะ จัร อายอพัะ โทม โฆรห อัน. ปาย ตี อายอพัะ มืร เลห โดง กอย อัน ตี, วี ฮาว แคง มืง อีซาเรลัะ บอ มืง. แฮะ ฮอต, อัน มืร วี ตัห ดี มืง เยรูซาแลม. 5 อายอพัะ มืร ฮาว ดึห ฌาราง ดูอี เฆ ตึอน, วี ตัห อาบ ดี อาดาวีด. ดูอี อีซาเรลัะ อี แฮะ ปึอน กาโฆห ตา ครึง กาโฆห, เฆ กอย อู ลาน ดี อู แซน วี. บอ ดูอี อายูดา แฮะ กอย พวน แซน ดี บู หมึณ วี.

6 มาแล, โฆรห ปี กาลาง คูนดีคัม ตึอน, อาว ล็อะ น็อห อายอพัะ. โคว, อัน มืร ตู ตีห ดูอี แคง ครึร อาเลวี บอ ดูอี แคง ครึร อาเบนยาม. 7 เฌาพรา มืร ตู อึง ลอง จัร อาดาวีด ฮาว ตีห ฌาราง เฆ ดูอี. อัน เฌา มืร วี ดัม หมาบ ดี เฆ ดูอี อีซาเรลัะ.

8 อาดาวีด วี กาลาง ดี เฌาพรา ต็อห, “โอว แฮะ โบง กาลึบ, แตห หมาบ โอว กืน กาเซา. ดอ ตี นี โอว หมาณ, แตห แม เฌา ฆ็อห แวน หมาบ โอว ตี. โอว แฮะ โบง อี ฮาย อี มืก.”

9 ปัน ตี เฌาพรา วี กาลาง โฆรห ดี อาฆัด อี มูห ดูอี อี ดีหมอด เฌาพรา^a อาดา อาดาวีด ต็อห, 10 “แตห แม วี ฮาว กาลาง ดี อาดาวีด ต็อห, ‘เฌาพรา แฮะ ต็อห, อัน กาลาง โอย โมยว ดี แม, แตห แม ร็อห อาดา อู โมยว ปี ซี แตห แม อัน โบง ดี แม.’”

11 อาฆัด มืร ฮาว กาลาง ดี อาดาวีด ต็อห, “แม โลว ร็อห ปี ดี โบง เฌาพรา ดี แม. 12 อัน ดี แตห เบ เอต ปี ดี โฮม แคง มืง นี อาดา โอย ซีนัม. เซ อาว ปาย ตี, แม โลว เตา รันซู แม อาดา โอย มาเฆียน. เซ อาว ปาย ตี, อัน ดี แตห เบ มึห เซา รอฆา, แตห อามู อามาด เฌาพรา ง็อห ยัม ดูอี อีซาเรลัะ ดอน นา ดอน โปละ อาดา โอย ซีแง ดอ ซี มึห เฆ รอฆา อี ฮาย กาเซา. โอย โมยว ตี, แตห แม ร็อห อาดา อู โมยว, แตห โอว วี ปึอน ดี กาลาง ดี เฌาพรา.”

13 อาดาวีด วี ต็อห ดี อาฆัด, “โอว แฮะ ฌัม ดูก ตาง กาเซา. หมาณ, แตห เฌาพรา โบง ดี โอว แคะ ปี อึง อัน. โคว, อัน นับ ดี กาเว กาเซา. แกวะ แตห ดูอี โบง ดี โอว แคะ ปี อึง เฆ.”

14 ปัน ตี เฌาพรา บอ แตห ดูอี อีซาเรลัะ มึห เซา รอฆา. ดูอี เฆ บอ ยัม อาดา บู หมึณ วี. 15 อัน เฌา วี จัร อามู อามาด อัน ปยาต บอ มืง เยรูซาแลม. อามู อามาด แฮะ หงา ดี ปยาต ตี, เฌาพรา บอ วี ยึร, บอ วี แบน น็อห กลึร. อัน วี นัมโหลห ดูก ตาง ปี ดี โลว คัม เฆ. โคว, อัน วี กาลาง ดี อามู อามาด อัน ตี ต็อห, “จู แคะ ตี. แกวะ ฮู โบง ปัว.” ดอ อัน ตี อามู อามาด เฌาพรา กอย โคบ กังน็อห อารอนา อี มูห ดูอี เยบูซีด.

16 อาดาวีด วี ซากึห ยอด, วี ยึร อามู อามาด เฌาพรา แฮะ จ็อง ดี กาแต เบลณ ฆาย กาดาย, โฆ็ง มาปัวะ ลาง วี หงา ดี มืง เยรูซาแลม. อาดาวีด บอ เฆ อี มูห ดูอี อี อึบ อี แยต เฆ ดูอี อีซาเรลัะ, เฆ วี ชึบ ดี ตา ครึง จาน, วี มูด ฆึบ ดี กาดาย.

17 อาดาวีด วี ซาคึร ดี เฌาพรา ต็อห, “อึย แม เฌาพรา, อึณ มูห โอว อี แฮะ โบง ลูต. อึณ มูห โอว อี แฮะ จัร เฆ ฮาว แฆบ ฌาราง ดา ซึก โอว. ดูอี เฆ ตี, เฆ ปี มาบู, ตู โบง หมาบ มาเซ. อึย แม เฌาพรา อี มูห เฌาพรา ปี กรึบ โอว. แตห แม ดัม หมาบ มี ดี โอว บอ ดี เฆ ดูอี อาโมยว โอว. โอว หมาณ, แกวะ แตห เฆ ดูอี ปี อึบ แม เฌา โลว คัม ดูก ตาง ตี.”

18 ปาย ตี อามู อามาด เฌาพรา ตึอน บอ วี กาลาง ดี อาฆัด, แตห อัน วี ฮาว ดี อาดาวีด, แตห อาดาวีด โบง กาโช็ง หลู อาดา เฌาพรา ดี โอ็ง กังน็อห อารอนา ตึอน อี มูห ดูอี เยบูซีด. 19 อาดาวีด มืร ฮาว โบง แคะ ปี กาลาง เฌาพรา ดี อาฆัด ตี.

20 บอ อารอนา บอ ฆอน อีมาย อัน พวน วี, เฆ กอย ดี โอ็ง กังน็อห ตี มัห โหงว. ดอ ยึร เฆ ฆอน อีมาย อารอนา ดี อามู อามาด เฌาพรา ตึอน, เฆ บอ กาแบลบ เตา ฮาว เครียง เฆ. 21 ปัน ตี อาดาวีด บอ ตัห. อารอนา บอ ยึร อาดาวีด, อัน บอ เลห ฮาว มูด ฆึบ ดี กาดาย ดี อาต อาดาวีด.

22 อาดาวีด วี ต็อห ดี อัน, “ย็อง ดัว โอ็ง กังน็อห แม ดี โอว, แตห โอว ปึอน ดี ซัม กาโช็ง หลู ดี เฌาพรา, แตห อัน ดึห แวน เซา รอฆา ดี ดูอี, แตห เฆ วี แกน. โอว มืร ดี ดัว ดี แม แคะ กาดาน ง็อห อัน.”

23 อารอนา วี ต็อห ดี อาดาวีด, “แตห แม ดา กาณา โอว ดึห หลู แคะ ปี อึง แม. ดี นี โอว แฮะ มึห บอ มัก อี ปึอน หลู. บอ ครึง มัห โหงว เฆ นี, ปึอน แบน เฮ อี โดะ ดี เงา. บอ เคาคยูง นี, แตห อึณ แบน ปี ดี หลู ดีฆาว แบน โมยว แบน โมยว. โอว ดี ดัว ดี แม.”

24 คูนดีคัม มืร วี ต็อห, “อาว มูห ปาย ตี. โอว ดี ดัว ง็อห อัน ดี แม. โอว ตู ดึห ดีโลย ดีลาย โกรว แม. เซ โอว ตู โตต รึอน, อาว ปึอน หลู ดี เฌาพรา อี มูห เฌาพรา ปี กรึบ โอว.”

25 อาดาวีด มืร วี ซัะ ครีว อาดา เดา มาย็อห เซเคน ดัว ดี อารอนา, แตห อึณ แบน ง็อห โอ็ง กังน็อห อัน ตี. 26 อาดาวีด มืร โบง กาโช็ง หลู ดี เฌาพรา บอ หลู ปี ดี หลู อี โดะ ดี เงา บอ ปี หลู อี กอย กาฌูะ โฮม รึม. อัน มืร ซาคึร ดี เฌาพรา. เฌาพรา มืร โทม ปี ซาคึร อัน บอ โบง แตห เงา เลห แคง ฆางหราว, โจห แดง กาโช็ง หลู อัน ตึอน.

27 ดอ อัน ตี เฌาพรา มืร วี กาลาง ดี อามู อามาด เฌาพรา, แตห อัน วี เชียบ อูน มาปัวะ ลาง แคง บราม อัน. อามู อามาด เฌาพรา ตี มืร โบง ปี กาลาง เฌาพรา ดี อัน. 28 แฮะ ฮอต ปาย ตี อาดาวีด มืร แฮะ นับ เฌาพรา แฮะ โทม โฆรห ปี ซาคึร อัน, อัน มืร วี หลู ปี ดี หลู แดง กาโช็ง หลู อี กอย ดี โอ็ง กังน็อห อารอนา ตี. 29 อัน หลู ดี เฌาพรา โดง ตี โคว, อาคราว ดอ อัน ตี ทึบ บีก บอด ปี โบง อาโมวแซ แคง แปร กาฮ็อห ตึอน, บอ กาโช็ง โดง หลู เฆ ปี ดี หลู, อึณ ซี กอย ดี โดง จา แคง มืง กีปอง. 30 มาแล, อาดาวีด ยี ตู ยัะ ฮาว ดีหมอด เฌาพรา ดี ตี โกบ โยว อัน มาปัวะ ลาง อามู อามาด เฌาพรา.