1 ดอ แฮะ วี ฌัม อาคราว ดียาง, อี มูห อาคราว ดี ลาย กาโฆห เฆ คูนดีคัม, อายอพัะ บอ แยต ดา ซึก อัน ฮาว รึบ กาดาย มืง ดูอี อัมโมน. อัน บอ ฮาว แวง โรบ มืง ราบา. อี มูห คูนดีคัม อาดาวีด, อัน ยี กอย แคง มืง เยรูซาแลม. เฆ มืร กาโฆห ปยาต แวน มืง แปะ แฮะ โรบ เฆ ตี. 2 อาดาวีด มืร บูต มังฆึม ดี ฆีณ คูนดีคัม. อึณ มูห มังฆึม ครีว อี จัน อู ทาเลน. อึณ มึห บอ แซณ บอด. เฆ มืร วี ดึห ชึบ ดี ฆีณ อาดาวีด. โกรวกราม เฆ แคง มืง ตี แปะ แฮะ พาด แฮะ ดึห ฮาว เฆ มืร แฮะ กืน กาเซา. 3 ดูอี แคง มืง ตี มืร แฮะ กืน. อาดาวีด แฮะ ดึห ฮาว เฆ, จัร แตห เฆ โบง ฆาน ตา ครึง ฮีน, เลกลึร, ฮีน โฆะ บอ มึย. อัน จัร เฆ ดูอี อัมโมน อี กอย ดอน มืง โบง ฆาน ปาย ตี. แฮะ ฮอต, อาดาวีด เฆ ดูอี อี โดบ อัน บอกาเฆลียด บอ วี เวณ ดี มืง เยรูซาแลม.

4 วาย ตี, เฆ วี กาโฆห ดี ดูอี พีลีที ดี มืง เกจา ปอ อู เฌณ. ดอ อัน ตี อึณ มูห อาซีเบเค อี มูห ดูอี อาโมยว ฮูซา, อัน บอ ง็อห ยัม ดูอี อี แฮะ ตาง บอ จา กาเซา, อี จืร อาซีพายา. เฆ ดูอี พีลีที แฮะ ชึม ดี ดูอี อีซาเรลัะ.

5 เฆ ปี วี ลาย กาโฆห ดี ดูอี พีลีที ปอ อู เฌณ. ดอ อัน ตี อาเอฮานัน อี มูห ฆอน อายาอีรา บอ ง็อห อาลาคามี อี มูห วา อากอลาด อี มูห อาโมยว กีดตี. อากอลาด ตี แฮะ ดึอม โฆ็ง บลา เลียห อี มึห ฆล็อง ตาง, กอ ดาน กาบ็อง ด็อะ ฆลาง.

6 วาย ตี, เฆ ปี วี ลาย กาโฆห ดี มืง อาฆัะทัะ ปอ อู เฌณ. อึณ มึห ดูอี อู วี อี ตาง จา. แด อัน บอ ดอน บลาก มึห เดา กานู. บอ เปลา อัน ดอน บลาก มึห เดา กานู. ดอน บลาก กอย อา ฆึร ดี พวน กานู. อัน บอ มูห ดูอี ครึร อาเรพีม อี มูห ดูอี โดว ดี ตาง ดีโลย. 7 อัน บอ กาแคณ ดี ดูอี อีซาเรลัะ. อึณ ยี มูห อาโยวนาทาน อี มูห ฆอน อีกัด อาดาวีด อี จืร อาซีมา ตึอน, อัน บอ ง็อห ยัม ดูอี ตี.

8 เฆ โอย วี แปะ แฮะ ง็อห ยัม อาดาวีด เฆ ดูอี อัน, เฆ บอ มูห ครึร ดูอี อี ตาง จา อี จืร อาเรพีม บอ กอย ดี มืง อาฆัะทัะ ตึอน.