1 วาย อัน ตี อาว บอ เหลณ คูนดีคัม อานาฮาซา อี อึบ ดูอี อัมโมน บอ ยัม. ฆอน อีมาย อัน อี จืร อาฮานูน บอ วี ปลูะ ฆูณ อัน. 2 คูนดีคัม อาดาวีด ต็อห, “โอว ดี บยัะ ลอง ลาย แบน ฆึก ดี อาฮานูน, แตห อึณ ปี ฆูณ อัน อี จืร อานาฮาซา แฮะ ดึอม ลาย แบน ฆึก ดี โอว.” อาดาวีด มืร จัร เฆ ดาลาม อัน, แตห เฆ ฮาว เหลา น็อห อัน, โบง แตห น็อห อัน วี หนีม วี เยน วาย แฮะ ยัม ฆูณ อัน ตึอน.

3 เฆ อามู อามาด แคง มืง อัมโมน ตึอน เฆ วี กาลาง ดี คูนดีคัม อาฮานูน ต็อห, “แม ทาง แฮะ หมาน ลอง อาดาวีด แตห ดาลาม อัน ตัห เหลา น็อห แม? แม ทาง อึณ มูห โกบ โรวเซ อัน ฆูณ แม ตึอน? อาว มูห ปาย ตี. อาดาวีด จัร เฆ ตัห ดี แม, แตห เฆ ปึอน ดี คยอง ดี ยอด แคง มืง เอ, แตห เฆ ปึอน ดี ปยาต แวน มืง เอ นี.” 4 แฮะ ฮอต, อาฮานูน บอ เหมต ดาลาม อาดาวีด. อัน บอ ฆาะ แวน ดีโมห ดี กูงกาบ เฆ บอ กาซัวะ บอ ครึง ปี ตา เฆ อู กาแต, แตห อึณ ฌัม ดี ซีโป็ง เฆ. แฮะ ฮอต อัน วี เบลห ฮาว เฆ.

5 ดอ วี ตัห กาลาง อี เฮา ลอง อัน ตี ดี อาดาวีด, อัน บอ จัร แตห เฆ ฮาว บัร ดี รวห เฆ โดบ อึณเตณ. โกบ แฮะ หมึอม ซาย กาเซา เฆ, อัน กาลาง ดี เฆ ต็อห, “แตห เบ กอย ฆืด ดี มืง เยรีโคว, บัร แตห ดีโมห ดี กูงกาบ เบ กอ วี ดี โต็ง. วาย นี เบ บอ วี ตัห.”

6 คูนดีคัม อาฮานูน บอ เฆ ดูอี อัมโมน บอ วี ยึร ลอง อาดาวีด แฮะ วี กาอีห เฆ, เฆ วี ดึห รึอน อู แหรณ ทาเลน,^a แตห เฆ วี ฌาง ลักเลา บอ ดา ซึก อี ป็อะ ลักเลา อี กอย แคง กาดาย มืง อารามนาราฮัม. มืง ตี บอ กอย นา กัว มืง อาราม อี กอย แคง กาดาย มืง มาคา บอ แคง กาดาย มืง จอพัะ ตึอน. 7 ลักเลา บอ ดา ซึก อี ป็อะ ลักเลา ปี ฌาง เฆ ตี มึห โอย หมึณ ดี อา แหรณ หลาง. ดา ซึก คูนดีคัม อี อึบ มืง มาคา บอ เฆ ดูอี อัน มืร แฮะ ตัห คยัะ โคบ มืง เมเดพา. แคะ กอย ดูอี อัมโมน มืร, แฮะ แรน ซึก, แฮะ เลห ตัห ดอน มาน ดอน มืง.

8 อาดาวีด บอ ยึร ลอง อัน ตี, อัน วี จัร อายอพัะ บอ ดา ซึก อัน บอกาเฆลียด, แตห เฆ ฮาว โดง คยัะ เฆ. 9 ดูอี อัมโมน เฆ มืร เลห ตัะ มืง เฆ, บัร ดี กาโฆห ดี บาง มาโลห มืง เฆ. เฆ คูนดีคัม อี แฮะ ตัห จอย เฆ กาโฆห, เฆ ยี กอย แคง ฆลัง ราง อาเซ ราง อัน.

10 อายอพัะ บอ ยึร ลอง ดา ซึก เฆ ตี แฮะ ตัห กอย อา บลาก, บอ นา ปัน นา อาต. อัน บอ ร็อห ดูอี อี โปลม อี ครัน แคง ดูอี อีซาเรลัะ, แตห เฆ แบน อี บัร อี แร ดูอี อาราม เฆ ตี. 11 เฆ อี ซี กอย อัน บอ แตห อาพีเซ อี มูห วา อัน แยต เฆ, แตห เฆ กอย บัร ดูอี อัมโมน เฆ ตึอน. 12 อายอพัะ วี ต็อห, “เซ ดูอี อาราม บอ แป โอว, แตห แม ตัห จอย โอว. เซ ดูอี อัมโมน บอ แป แม, โอว ดี ฮาว จอย แม. 13 แตห เอ มึห น็อห โปลม, แตห เอ ยัะ กาโฆห อาดา ดูอี อาโมยว เอ บอ อาดา มาน มืง ปี อึบ เฌาพรา ปี กรึบ เอ. เฌาพรา ดี โบง แตห อึณ แบน ปี อึง อัน.”

14 ปัน ตี อายอพัะ บอ เฆ ดูอี อี โดบ อัน, เฆ บอ ฮาว กาตัด ดูอี อาราม, แตห เฆ ปึอน ดี กาโฆห ดี เฆ. ดูอี อาราม มืร เตา เฆ. 15 เฆ ดูอี อัมโมน บอ ยึร ลอง เฆ ดูอี อาราม แฮะ เตา, เฆ มืร วี กาโพรม ดี เตา ดี อาพีเซ อี มูห วา อายอพัะ, วี เวณ ลึบ แคง มืง เฆ. อายอพัะ บอ เลห โดง กอย เฆ, วี เวณ แคง มืง เยรูซาแลม.

16 ดูอี อาราม บอ นับ, เฆ แฮะ ชึม ดี ดูอี อีซาเรลัะ. เฆ บอ วี ตัห กาฌูะ ปอ อู เฌณ. คูนดีคัม อาฮาเดจา อี อึบ มืง จอพัะ บอ จัร ดาลาม อัน ฮาว แดะ ดา ซึก อาราม อี กอย บลาก นา ตัะ อึม แบลง อูพาราด. คูนดีคัม อาฮาเดจา วี แตห อาซอบาก อึบ ดา ซึก เฆ ตี, แตห อัน แยต เฆ.

17 อาดาวีด บอ ยึร ลอง อัน ตี, อัน บอ แตห ดูอี อีซาเรลัะ ตัห กาฌูะ, แตห เฆ วี ฮาว กาโลห แบลง อึม ยอดาน ตึอน, วี ฮาว โดง กอย ดูอี อาราม เฆ ตี. เฆ มืร ลาย กาโฆห โดง ตี. 18 เฆ ดูอี อีซาเรลัะ บอ คูงครัห ดูอี อาราม. อาดาวีด เฆ ดูอี อี โดบ อัน บอ ง็อห ยัม ดา ซึก อาราม อี ป็อะ ลักเลา อาดา บู แหรณ วี. อัน ง็อห บอ ดา ซึก อี ฮาว ดี เปลา พวน หมึณ วี. อาซอบาก อี มูห ดา ตาง อี อึบ ดา ซึก เฆ ตี มืร, เฆ แฮะ ฮอต ง็อห ยัม.

19 เฆ คูนดีคัม ปี อึบ อาฮาเดจา ตึอน, เฆ บอ ยึร ลอง แฮะ ชึม เฆ ดี ดูอี อีซาเรลัะ, เฆ บอ วี กาโพรม ดี แบน อู ฆึก ดี อาดาวีด. เฆ บอ คัม ดี แบน หมาย อาดาวีด. วาย ตี ดูอี อาราม อาว ฮู ยัะ จอย ดูอี อัมโมน กาโฆห ดี อี.