1 วาย ตี อาดาวีด บอ กาโฆห ดี ดูอี พีลีที. อัน บอ แป เฆ. อัน บอ ปึอน มืง ฆาทัะ บอ เรา อี กอย โรบ มืง ตี อี มูห มืง ปี อึบ เฆ ดูอี พีลีที.

2 อาดาวีด วี กาโฆห แป บอ ดูอี อาโมยว โมวอาบ. ดูอี เฆ ตี กาดูห ดี แบน ดูอี ปี อึบ อัน บอ โลว ฮับ จึง ดี อัน.

3 แดง ตี อาดาวีด แฮะ กาโฆห บอ ดี คูนดีคัม อาฮาเดจา อี อึบ มืง จอพัะ กอ ฌัม มืง ฮามาด. อาฮาเดจา ตัห โดง ตี ดอ ฮาว อัน บอ คราม ดี กาโฆห แตห อัน ปึอน กาดาย อี ฌัม โคบ อึม แบลง อูพาราด ตึอน. 4 อาดาวีด บอ ดึห ลักเลา อาฮาเดจา อู แหรณ หลาง บอ ดา ซึก อี ป็อะ ลักเลา ตี บู แหรณ วี, ดา ซึก อี ฮาว ดี เปลา อา หมึณ วี. อัน บอ ดึห อูน มังปร็อง อาดา อู มาย็อห โดว. อี กอย แดง ตี, อัน บอ แดบ โตต ซีนัะ เปลา เฆ.

5 เฆ ดูอี อาโมยว อาราม อี กอย แคง มืง ดามาคู ตึอน เฆ บอ ตัห ต็อห ดี จอย ดา ซึก อาฮาเดจา อี มูห คูนดีคัม อี อึบ มืง จอพัะ ตึอน. อาดาวีด บอ ง็อห ยัม ดูอี อาราม อา หมึณ ดี อา แหรณ วี. 6 อัน บอ อูน ดา ซึก อัน แคง มืง ดามาคู อี กอย แคง กาดาย อาโมยว ดูอี อาราม ตึอน. ดูอี อาราม เฆ ตี บอ กาดูห ดี แบน หมาย อาดาวีด, ฮับ รึอน จึง ดี อัน. อาดาวีด บอ ฮาว นา เหมา, เฌาพรา มืร จอย อัน, แตห อัน แป รันซู อัน.

7 อาดาวีด บอ ดึห มัง ฆ็อง ครีว ปี โฆ็ง ดา ตาง อาฮาเดจา อี อึบ ดา ซึก อัน, วี ฮาว ดี มืง เยรูซาแลม. 8 อัน บอ ดึห บ็อง เดณ กืน กาเซา แคง มืง เทบา ฆาย มืง คูนัะ อี มูห มืง ปี อึบ อาฮาเดจา ตึอน. บ็อง เดณ ตี อาซาโลวโมว แฮะ วี ดึห โบง อึม ดึง บ็อง เฆ ร็อง แคง โฮว เฌาพรา.

9 คูนดีคัม อาดออีด อี อึบ มืง ฮามาด อัน บอ ยึร ลอง อาดาวีด แฮะ กาโฆห แฮะ แป ดา ซึก อาฮาเดจา ตึอน อี อึบ มืง จอพัะ, 10 อัน บอ จัร ฆอน อีมาย อัน อี จืร อาฮาโดม, แตห อัน ฮาว โดง กอย คูนดีคัม อาดาวีด, แตห อัน กาลาง โฆรห ดาคึย ดี อัน, บอ อืบ อัน โกบ แฮะ กาโฆห แป อัน อาฮาเดจา ตึอน. อัน โบง ปาย ตี โคว, บอ อัน แฮะ ดึอม กาโฆห ดี อาฮาเดจา. อาฮาโดม บอ ดึห ดี โฆ็ง ซีลัยะ แบน โมยว แบน โมยว อี มูห รึอน เฆ ครีว บอ บ็อง เดณ, วี ดัว ดี อาดาวีด.

11 คูนดีคัม อาดาวีด บอ ดึห โกรว เฆ ตี, วี หลู ดี เฌาพรา. ดอ ดึห อัน โกรว อี มูห รึอน บอ ครีว ดี ดูอี มืง เอโดม, มืง โมวอาบ, มืง อัมโมน, มืง พีลีที, บอ มืง อามาเลก แปะ แฮะ กาโฆห แป อัน, อัน มืร แฮะ หลู ปาย ตี.

12 อาพีเซ อี มูห ฆอน นาง เจรูยา ตึอน แฮะ กาโฆห แป ดูอี อาโมยว เอโดม ดี โดง จืร ดีลัยะ ซัยะ. อัน มืร แฮะ ง็อห ยัม ดูอี เฆ ตี อาดา อู หมึณ ดี ดา แหรณ วี. 13 อัน มืร อูน ดา ซึก อัน แคง กาดาย มืง เอโดม ดอน นา ดอน โปละ. แคะ กอย ดูอี มืง เอโดม เฆ บอ กาดูห ดี แบน หมาย อาดาวีด. เฌาพรา มืร แตห อาดาวีด ออง ดอน โปละ โดง ฮาว กาโฆห อัน.

14 ปัน ตี อาดาวีด บอ อึบ มืง อีซาเรลัะ บอ มืง. อัน มืร โบง ซืร ซืร หมาน หมาน ดอน โมยว ดี เฆ ดูอี ปี อึบ อัน. 15 อายอพัะ อี มูห ฆอน นาง เจรูยา ตึอน, อัน บอ แบน ดา โบว อี อึบ ดา ซึก บอกาเฆลียด. อายอซาพาด อี มูห ฆอน อาฮีลูด บอ แบน ดา จาเร. 16 อาฌาโดก อี มูห ฆอน อาฮีโตบ บอ อาฮีมาเลก อี มูห ฆอน อาบาทา ฆาย บอ แบน ดา อี หลู ดี เฌาพรา. อาซาวาซา บอ แบน ดา อี จอย ดา จาเร แดม แปะ. 17 อาบีนายา อี มูห ฆอน อาเยฮอยาดา แบน ดา อี อึบ เฆ ดา ซึก อี บัร อาดาวีด. เฆ ฆอน อีมาย คูนดีคัม อาดาวีด ดอน อี มืร แฮะ แบน ดา กาณา อี กอย โคบ คูนดีคัม บอ จอย อัน อึบ มืง.