1 วาย อัน ตี คูนดีคัม อาดาวีด แฮะ ปึอน ดี กอย ดาคึย แคง โฮว อัน. อัน วี กาลาง ดี ดา อี บยาน โฆรห เฌาพรา อี จืร อานาทาน บอ ต็อห, “ดอ ตี นี โอว แฮะ ปึอน ดี กอย แคง โฮว อี มูห เฮ อารีด. อี มูห ฌีดืก เฌาพรา ยี กอย แคง ทึบ บีก.”

2 อานาทาน วี ต็อห ดี อัน, “แตห แม โบง แคะ ปี อึง น็อห แม. โคว, เฌาพรา แฮะ กอย รึม โดบ แม.”

3 มาแล, แคง หมึร ตี เฌาพรา วี กาลาง โฆรห ดี อานาทาน ต็อห,

4 “แตห แม ฮาว กาลาง ดี แดเจณ โอว อี มูห อาดาวีด ต็อห, ‘แม ตู มูห อี ดี ซัม กาง โดง กอย โอว. 5 ซีณ ดอ แตห โอว เฆ ดูอี อีซาเรลัะ เลห แคง มืง แอฆึบ กอ ฌัม อาตึร นี โอว ตู ดึอม กอย แคง กาง. โอว กอย มี แคง ทึบ บีก บอ โลว กาโทะ ฮาว แบน โปละ แบน โปละ. 6 ดอ แฮะ ฮาว รึม โอว โดบ เฆ ดูอี อีซาเรลัะ ตี, โอว แฮะ จัร เฆ ดา ตาง ยอด แมน ดูอี อี กรึบ โอว. โอว ยี ตู ดึอม จัร เฆ คอ อู เฌณ ต็อห, เหมา อึณ ปาย ปี ตู ดึห เบ เฮ อารีด ซัม กาง อาดา โอว?’”

7 โคว, ดอ ตี นี แตห แม วี กาลาง ดี อาดาวีด ต็อห, “โอว อี มูห เฌาพรา อี อึบ โตต, โอว แฮะ ร็อห แม อาดาวีด. โอว แฮะ แตห แม เลห แคง กาปึม มาบู, แกวะ ฮู แตห แม เฮียง มาบู ตี. โอว แฮะ แตห แม แบน ดา กาณา อี อึบ ดูอี อีซาเรลัะ อี มูห ดูอี ปี อึบ โอว. 8 แม บอ ฮาว นา เหมา, โอว แฮะ ฮาว รึม โดบ แม. โอว แฮะ ฮาว แยต ดี อาต แม, ดึห แวน รันซู แม บอกาเฆลียด. โอว ดี บอ ดัว อาพูง ดี แม, แตห แม ปี เฆ อี มูห ดา ตาง ซืด แดง กาดาย นี. 9 แดง ตี เฆ ดูอี ปี อึบ โอว อี มูห ดูอี อีซาเรลัะ โอว ดี แตห เฆ ปึอน ดี กอย ซีคยา, แกวะ แตห เฆ โลว วี กาโทะ วาย นี, แตห เฆ กอย โดง กอย เฆ ตี. เฆ อี ตู หมึอม ตึอน, อาว ฮู ปึอน ดี ปยาต เฆ ปี อาต นี. 10 ซีณ ดอ ร็อห โอว ดา ตาง อี อึบ ดูอี อีซาเรลัะ, เฆ รันซู แม แฮะ โบง นา ตู หมึอม ดี เบ. โอว ยี ดี แตห รันซู แม หราย โตต ดอน โมยว. แดง ตี โอว เฌาพรา ดี แตห หลูกหลาน แม กอย ซีคยา เซเซ. 11 เซ ฮี ฌัม ซีแง โนะ อาซาก แม, แม ฮี ยัม ปี ดา ดา แม, อึณ ดี มึห หลูกหลาน แม อู วี ดี ปลูะ แม. โอว ดี วี แตห ฆอน อาราง แม แบน ปี แม, แตห มาน มืง ปี อึบ อัน กอย มัน ซีคยา เซเซ. 12 ฆอน แม ตี ดี ซัม กาง อาดา โอว. โอว มืร ดี แตห มาน มืง ปี อึบ อัน กอย มัน ซีคยา เซเซ. 13 โอว ดี แบน ฆูณ อัน. อัน มืร ดี แบน ฆอน โอว. โอว มืร ตู วี ดึห วีว, ตู ดึห แวน น็อห ร็อก กาเว โอว ดี อัน. โอว ตู โบง ปี แปะ แฮะ โบง โอว ดี อาซอลู อี แฮะ กอย ดี อาต แม. 14 โอว ดี อาบ แตห อัน อึบ เฆ ดูอี ปี อึบ โอว, แตห อัน บอ อึบ มืง โอว เซเซ. มืง ปี อึบ อัน ตี บอ กอย เซเซ ตู หราย ดอ เหมา.”

15 แคะ ปี ยึร อัน โฆรห ตี, อานาทาน มืร กาลาง โตต ดี อาดาวีด.

16 แฮะ ฮอต, คูนดีคัม อาดาวีด บอ ลึบ ฮาว โดง กอย เฌาพรา, แตห อัน ปึอน ดี กาลาง โฆรห ดี เฌาพรา. อัน บอ ต็อห, “อึย แม เฌา อี มูห เฌาพรา บอด, บอ โอว บอ ดูอี แคง อึณโฮม โอว อาว มูห อาโมยว อี อาเร ตาง. แม เฌา ยี แฮะ มยูก โอว แคะ นี.

17 แดง ตี แม เฌา แฮะ เฆฌู โอว กืน กาเซา. แม เฌา แฮะ กาลาง แตห โอว นับ ลอง นา อาต อึณ ดี ปาย เหมา ดี ดูอี อาโมยว โอว. อึย แม เฌา อี มูห เฌาพรา บอด, แม แฮะ มยูก โอว หลึอม อี เฮา.

18 โอว อาว ฮู นับ ดี กาลาง ปอ อึณ ปัว โกบ แฮะ โจะ มยูก แม เฌา ดี โอว. 19 โกบ ร็อก แม ดี โอว แม แฮะ โบง แคะ ตี อี โดบ ปี อึง แม. แม มืร แฮะ แตห เย นับ ลอง กาดีก ซัดฌา ตี.

20 อึย แม เฌาพรา, อาว มึห เฌา คอ อู กาดัง อี ปี แม เฌา. เย แฮะ นับ, แดง แม เฌาพรา อาว มึห เฌาพรา ปอ อู กาดัง. 21 แดง กาดาย นี อึณ มืร ตู มึห ดูอี คอ อู โมยว อี ปี ดูอี อีซาเรลัะ ปี อึบ แม. แม เฌา แฮะ กาดูห ดี ทูด เลห เฆ, แกวะ แตห เฆ แบน หมาย อี เฮา, วี แตห เฆ แบน ดูอี ปี อึบ แม, แตห อี เฮา ยึร แคะ ตาง ปวน แม. แม แฮะ โบง นา หมึอม อาม กาเซา บอ อี หมึอม โยว ดอ ซูต แม อาโมยว ดูอี เฮา บอ อารึบ ปี กรึบ เฆ, แตห เฆ เลห แคง มืง เฆ อาต ตัห ฌัม เฆ ดูอี อีซาเรลัะ. ปาย ตี แม เฌา แฮะ โบง วาย แฮะ เลห เฆ แคง มืง แอฆึบ ตึอน. 22 แม เฌา แฮะ แตห ดูอี อีซาเรลัะ แบน ดูอี อาโมยว ปี อึบ แม บอ อึบ เฆ เซเซ. แม มืร แฮะ แบน เฌาพรา ปี กรึบ เฆ เซเซ.

23 กาดีก ซัดฌา แปะ แฮะ ดัว แม เฌาพรา ดี โอว บอ ดี ดูอี อาโมยว โอว ดอ ตี นี, แตห อึณ หมาน เซเซ. โฆรห แปะ แฮะ ต็อห แม เฌา ดี โบง, แตห อึณ แบน โตต ดอน แด. 24 แตห แม โบง โดบ กาดีก ซัดฌา แปะ แฮะ ดัว แม ตี, แตห อี อืบ แม เฌาพรา เซเซ. แตห เฆ ต็อห, ‘เฌาพรา อี อึบ โตต ดอน โมยว อี อึบ ดูอี อีซาเรลัะ, อัน บอ มูห เฌาพรา ปี กรึบ ดูอี อีซาเรลัะ.’ ปาย ตี บอ อาโมยว โอว อี มูห แดเจณ แม, เฆ ดี กอย มัน ซีคยา บอ กอย เซเซ.

25 แม เฌา แฮะ ฮอต บยัะ ดี โอว ลอง ดี แตห แม ดูอี อาโมยว โอว แบน คูนดีคัม เซเซ. โคว, โอว ยัะ ซาคึร ปาย ตี. 26 แม เฌา แม มูห เฌาพรา. โฆรห แม เฌา มืร มูห โฆรห มูห โฆรห หมาน. กาดีก ซัดฌา ตี แม เฌา มืร แฮะ ดัว ดี โอว อี มูห แดเจณ แม. 27 แม แฮะ อึง ดี ม็องการา ดัว ดี หลูกหลาน โอว แตห เฆ กอย เซเซ, โดบ แม เฌา. แม เฌาพรา อี อึบ โตต ดอน โมยว, แคะ ปี กาลาง แม, แคะ ปี ม็องการา ดัว แม, อึณ ดี แตห เฆ หลูกหลาน โอว ฆยามซา เซเซ.” แคะ ตี, อาดาวีด แฮะ ซาคึร ดี เฌาพรา.