เฆ มืร ดึห ฮาว ฌีดืก เฌาพรา โดง กอย ทึบ แปะ แฮะ โบง อูน อาดาวีด อาดา ฌีดืก เฌาพรา ตี. เฆ มืร เบลห อูน แคง ทึบ ตี. แฮะ ฮอต, เฆ มืร วี หลู ปี ดี หลู อี โดะ ดี เงา, หลู ปี ดี หลู อี กอย กาฌูะ โฮม รึม. 2 วาย แฮะ ฮอต อาดาวีด หลู ปี ดี หลู ตี, อัน วี ฆาว ปวน เฌาพรา, วี ม็องการา ดัว ดี ดูอี เฆ บอกาเฆลียด. 3 อัน มืร กาซาง ปี ดี โฮม ดี เฆ ดูอี อีซาเรลัะ บอกาเฆลียด. บอ อีบึณ บอ อีมาย ดอน อี แฮะ ปึอน คามูน อู วี อู โบ็ง, ยัง อู กาซีะ บอ เบล มางูน กาฮ็อห อู ดีแคลบ.

4 อาดาวีด วี จัร ดูอี อาเลวี มัง อี, แตห เฆ อืบ เฌาพรา ปี กรึบ เฆ ดูอี อีซาเรลัะ. อัน แตห เฆ แบน อี แยต ดี อาต ฌีดืก เฌาพรา, ซาคึร บอ กาลาง ฆูง เฆฌู ดี เฌาพรา, ต็อห บอ โหมว อี อืบ มยูก เฌาพรา. 5 อาซาบ บอ แบน ดา อี แยต เฆ. อาซาคารา บอ แบน ดา อี จอย อัน. แดง ตี บอ มูห อาเยฮีลา, อาเซมีราโมด, อาเยอีลา, อามาดีซี, อาเอลีอาบ, อาบีนายา, อาโอวเบนเอโดม บอ อาเยยีลา. เฆ ตี บอ แบน อี บัห ดีง. อาซาบ บอ โชห แชณ. 6 ดา อี หลู ดี เฌาพรา อา วี อี จืร อาบีนายา ฆาย อายาฮาเฌลา, ฆาย แบน อี บูด เวา เซเซ ดอ กอย เฆ ดี อาต ฌีดืก เฌาพรา.

7 อาดาวีด แฮะ แดม โหมว อี อืบ ฆูง เฆฌู เฌาพรา นี. อัน บอ อาบ ดัว โหมว ตี ดี อาซาบ เฆ บีนอง อัน อี มูห ดูอี อาโมยว อาเลวี, แตห เฆ แยต ดูอี อี ต็อห โหมว. อัน บอ ต็อห,

8 แตห เอ ดาง ฆูง เฆฌู ดี เฌาพรา. แตห เอ ซาคึร ดี อัน เฌา. แตห เอ บอ กาลาง บยัะ ดี อี เฮา ลอง แปะ แฮะ โบง อัน เฌา, แตห ดูอี บอกาเฆลียด กอ นับ ลอง อัน ตี.

9 แตห เอ ต็อห โหมว อี อืบ เฌาพรา. แตห เอ กาลาง ดี อี ดอน โมยว อี หมึอม อาม แปะ แฮะ โบง อัน เฌา.

10 โกบ มูห เอ ดูอี ปี อึบ อัน เฌา, แตห เอ บอ โคย. แตห เฆ อี กรึบ อัน เฌา บอ โบยว ดาคึย.

11 แตห เอ บอ บึง เฌาพรา, แตห เอ บึง ปวน อัน อี ตาง กาเซา. แตห เอ บอ กรึบ ซาคึร ดี อัน เซเซ.

12 แตห เอ โหลห อี หมึอม อาม กาเซา แปะ แฮะ โบง อัน เฌา. แตห เอ โหลห บอ แปะ แฮะ ดัม อัน เฌา ดี อี.

13 อึย เบ อี มูห หลูกหลาน อาโกบ อี มูห แดเจณ เฌาพรา, เบ อี มูห หลูกหลาน อาอีซาเรลัะ, แตห เบ โบง ปาย ตี.

14 อัน เฌา บอ มูห เฌาพรา ปี กรึบ เอ. ปี ซูงพยาด อัน เฌา แฮะ กาลัต แดง กาดาย, แตห เฆ ดูอี บอกาเฆลียด กอ นับ.

15 แตห เอ มืร โหลห เซเซ แปะ แฮะ กาแซณ อัน ดี เอ. แกวะ แตห เอ ปีว ดารา ปี ดัม อูน อัน กอ ฌัม อู แหรณ โจว.

16 แกวะ แตห เอ ปีว กาดีก ซัดฌา ปี ดัว อัน เฌา ดี อาบราฮัม บอ ปี กาแซณ อัน ดี อาแซก.

17 อัน วี กาลาง อูน ลอง อัน ตี ดี อาโกบ, แตห อึณ แบน ปี กาแซณ อี กอย เซเซ แคง มืง อีซาเรลัะ.

18 อัน เฌา แฮะ ต็อห, “โอว ดี ดึห กาดาย มืง กานัณ ตึอน, แตห อึณ วี แบน คาฆูน ปี ดัว โอว ดี เบ, แตห เบ ลาย ปลูะ ฮาว เซเซ.”

19 เฆ ดูอี ปี อึบ เฌาพรา ดอ ซี เปรต กาเซา เฆ, เฆ ปี แคต ตัห กอย แคง กาดาย มืง กานัณ ตี.

20 เฆ บอ โลว ฮาว วีว ฮาว เวณ. แฮะ ฌัม อู มืง, ปี วี โลว ฮาว ปอ อู มืง. เฆ แฮะ ตัห ดี ดูอี อู โมยว, ปี วี โลว ฮาว ดี ดูอี ปอ อู โมยว.

21 มาแล, เฌาพรา ตู แตห อี เฮา คาหนาบ เฆ. อัน เฌา บอ มาโนว คูนดีคัม แบน กาดัง แบน กาดัง ต็อห,

22 “อาว ปึอน บลัต, อาว ปึอน ปยาต อี มูห ดูอี ปี ร็อห โอว. อาว ปึอน โบง นา จีจีว ดี เฆ ดูอี อี บยาน โฆรห โอว.”

23 อึย เบ อาโมยว ดูอี อี กอย แดง กาดาย บอกาเฆลียด, แตห เบ ต็อห โหมว ดี เฌาพรา. ดอน ซีแง ดอน ซีแง, แตห เอ กาลาง ลอง เฌาพรา คยอด อี.

24 กาลาง แตห ดูอี ดอน โมยว นับ แคะ ตาง อาพูง ดังโคว อัน เฌา. กาลาง บอ อี หมึอม อาม กาเซา แปะ แฮะ โบง อัน เฌา, แตห ดูอี ดอน โมยว กอ นับ.

25 โคว, เฌาพรา แฮะ บอด มยาด กาเซา, แฮะ กาอาบ เอ อืบ อัน เฌา. อึณ แฮะ กาอาบ เอ โยว บอ โรวเซ เฌาพรา หลึอม อี เฮา โรวเซ เฌา ปี กรึบ เฆ แบน กาดัง แบน กาดัง.

26 เฌา ปี กรึบ เฆ ดูอี อาโมยว เฮา บอกาเฆลียด, เฆ มูห มี อารึบ ราง. อี มูห เฌาพรา อาคาคัร, อัน ยี พาน เบลห บอ เบลณ บอ ฆางหราว.

27 อัน เฌา บอ มึห ปวน เฆ อาพูง ตาง กาเซา. แคง โดง กอย อัน ปวน อัน บอ อาโรง อัน แฮะ แตห อี โบยว ดาคึย.

28 อึย เบ ดูอี อี กอย แดง กาดาย บอกาเฆลียด, แตห เอ อืบ เฌาพรา. แตห เอ อืบ ปวน อัน บอ อาพูง ดังโคว อัน.

29 แตห เอ อืบ เฌาพรา, แตห อึณ กาดาน แคะ ตาง อาพูง ดังโคว อัน. แตห เอ แรน ปี ดี หลู, ตัห หลู ดี โดง กอย อัน เฌา. แตห เอ กรึบ อัน เฌา อี มึห อาพูง ดังโคว, อี ซีงา บอด กาเซา.

30 แตห เอ อี กอย แดง กาดาย บอ โยว บอ ดียูห ดีเยณ ดี อาต อัน เฌา. โคว, แคะ กอย ดอน โมยว แดง กาดาย, อึณ กอย มัน ซีคยา, อาว ฮู มึห อาเซ อี ปึอน โบง แตห อึณ รัร, แตห อึณ กาปยาต.

31 แตห บอ ฆางหราว บอ กาดาย โคย ดาคึย. แตห อึณ ปี เฆ กาลาง ดี ดูอี ดอน โมยว ลอง เฌาพรา อี อึบ โตต ดอน โมยว.

32 อึย อึม นัมมูกซารา บอ โดว ซัดดาวา อี กอย แคง อึม ตี, แตห เบ ฮัม ดีงึณ ตาง ตาง. บอ โดง นา บอ อี กอย แคง โดง นา ดอน โมยว, แตห เบ บอ โคย ดาคึย.

33 ปัน ดี ตัห ซูงพยาด อัน เฌา อามู ดูอี แดง กาดาย นี, บอ เฮ เฆ หรัง อี กอย แคง แปร, เฆ ดี บอ ดาคึย ปี ดูอี อี ต็อห โหมว ดาคึย บอ อืบ เฌาพรา.

34 แตห เอ ดาง ฆูง เฆฌู ดี เฌาพรา โกบ แฮะ หมึอม กาเซา อัน เฌา. อัน เฌา บอ มึห น็อห ร็อก เซเซ.

35 แตห เบ แดะ ต็อห, “อึย แม เฌาพรา ปี กรึบ เย, เย หมาณ, แตห แม เฌา คยอด เย บอ ดึห เลห เย แคง ดูอี อาโมยว เฮา, แตห เย ปึอน ดี วี ดาง ฆูง เฆฌู ดี แม เฌา อี มึห ปวน ตาง กาเซา, แตห เย มึห น็อห กรึอม ดอ อืบ มยูก เย ดี แม เฌา.”

36 แตห เอ อืบ เฌาพรา อี มูห เฌาพรา ปี กรึบ ดูอี อีซาเรลัะ. เอ ดี อืบ อัน เฌา ซีณ ดอ ตี นี ฮาว นา อาต เซเซ.

เฆ แฮะ ฮอต ต็อห โหมว ตี, เฆ ดูอี บอกาเฆลียด ต็อห, “แตห อึณ แบน ปาย ตี.” บอ “เอ อืบ เฌาพรา.”

37 คูนดีคัม อาดาวีด จัร อาซาบ บอ บีนอง อัน อี มูห ดูอี อาโมยว อาเลวี, แตห เฆ โบง ฆาน ดี โดง อูน เฆ ฌีดืก เฌาพรา ตึอน, แตห เฆ โบง ฆาน ตี ดอน ซีแง ดอน ซีแง. 38 อาโอวเบนเอโดม บอ เฆ ดูอี เดา ฆึร ดี ดา วี อี โดบ อัน, เฆ บอ โลว จอย อาซาบ ตึอน. อาโฮวซา ฆาย อาโอวเบนเอโดม อี มูห ฆอน อาเยดูทูน, ฆาย แบน ดา อี บัร มาโลห ดี โดง กอย ฌีดืก เฌาพรา.

39 ดา อี หลู ดี เฌาพรา อี จืร อาฌาโดก บอ เฆ บีนอง อัน อี มูห ดา อี หลู ดี เฌาพรา, อาดาวีด บอ จัร เฆ โบง ฆาน ดี ทึบ บีก บอด อี กอย ดี โดง จา แคง มืง กีปอง. 40 ซีณวัห อู เฌณ บอ บา ดี อับ อู เฌณ, เฆ มืร หลู ปี ดี หลู อี โดะ ดี เงา แดง กาโช็ง หลู, แตห อึณ โดบ ปี แดม อูน แคง บับ ดารา เฌาพรา ดี เฆ ดูอี อีซาเรลัะ. 41 อาเฮมาน ฆาย อาเยดูทูน บอ กอย รึม โดบ เฆ อี เฮา อี มูห ดูอี แปะ แฮะ ร็อห เฆ, แตห เฆ ต็อห โหมว อี อืบ มยูก เฌาพรา. เฆ ต็อห, “เฌาพรา มึห น็อห ร็อก กาเว เซเซ.” 42 อาเฮมาน ฆาย อาเยดูทูน ตึอน, ฆาย บอ โลว ยอด ลึมลา เฆ อี บูด เวา อี โชห แชณ บอ โมยว ปี โลว ดอย, โลว บัห ดอ ต็อห เฆ โหมว อี อืบ มยูก เฌาพรา. เฆ ฆอน อาเยดูทูน ยี แบน ดูอี อี บัร มาโลห.

43 แฮะ ฮอต วาย ตี, เฆ ดูอี บอกาเฆลียด เวณ กาง อาเซ กาง อัน. อาดาวีด มืร วี เวณ ดี โฮว โดง กอย อัน บอ กอย ดาคึย โดบ เฆ ดูอี แคง อึณโฮม อัน.