1 วาย อัน ตี อาดาวีด วี ซัม โฮว อาดา อัน แคง มืง โดง จืร มืง อาดาวีด ตึอน. อัน วี ซัม ทึบ บีก แตห อึณ แบน โดง ดี อูน ฌีดืก เฌาพรา. 2 ดอ อัน ตี อาดาวีด วี ต็อห, “มี เฆ ดูอี ครึร อาเลวี ปึอน กาฆอด ฌีดืก เฌาพรา. โคว, เฌาพรา แฮะ ร็อห เฆ, แตห เฆ กาฆอด ฌีดืก เฌาพรา บอ โบง ฆาน อัน เฌา เซเซ.”

3 วาย อัน ตี อาดาวีด วี แดะ แคะ กอย ดูอี อีซาเรลัะ บอกาเฆลียด, แตห เฆ ตัห กาฌูะ แคง มืง เยรูซาแลม, แตห เฆ ปึอน ดี ฮาว ดึห ตัห ฌีดืก เฌาพรา, วี เบลห อูน ดี โดง แปะ แฮะ แรน อูน อัน. 4 แฮะ ฮอต, อัน วี แดะ บอ เฆ หลูกหลาน อาโรน บอ ดูอี อาเลวี, แตห เฆ ตัห กาฌูะ.

5 แคง ดูอี อาเลวี อี มูห หลูกหลาน อาโควฮาด อี แบน ดา ตาง บอ มูห อาอูเรเอน. อึณ มึห บอ เฆ บีนอง วอแว อัน อาดา อู มาย็อห ดี อา ฆึร วี.

6 แคง หลูกหลาน อาเมนรารี อี แบน ดา ตาง บอ มูห อาซายา. อึณ มึห บอ เฆ บีนอง วอแว อัน อาดา อู มาย็อห ดี อา ฆึร วี.

7 แคง หลูกหลาน อาเฆนราโซน อี แบน ดา ตาง บอ มูห อาโยวเอลัะ. อึณ มึห บอ เฆ บีนอง วอแว อัน อาดา อู มาย็อห ดี โอย ฆึร วี.

8 แคง หลูกหลาน อาเอลีฌาพาน อี แบน ดา ตาง บอ มูห อาเซมายา. อึณ มึห บอ เฆ บีนอง วอแว อัน อาดา อู มาย็อห วี.

9 แคง หลูกหลาน อาเฮโบรว อี แบน ดา ตาง บอ มูห อาเอลีเอน. อึณ มึห บอ เฆ บีนอง วอแว อัน อาดา ดา ฆึร วี.

10 แคง หลูกหลาน อาอูซีเอน อี แบน ดา ตาง บอ มูห อามีนาดาบ. อึณ มึห บอ เฆ บีนอง วอแว อัน อาดา อู มาย็อห ดี ฆึร ดี อา วี.

11 แฮะ ฮอต, อาดาวีด วี แดะ ดา อี หลู ดี เฌาพรา อี จืร อาฌาโดก ฆาย อาบาทา. อัน แดะ บอ เฆ ดูอี อาเลวี อี จืร อาอูเรเอน, อาซายา, อาโยวเอลัะ, อาเซมายา, อาเอลีเอน บอ อามีนาดาบ. 12 อัน บอ กาลาง ดี เฆ ต็อห, “เบ แฮะ แบน ดา ตาง อี อึบ อี แยต ดูอี แคง ครึร เบ. แตห เบ โบง แตห โดว โบ็ง เบ ซีงา บอด, แตห อึณ โดบ ดารา. โคว, เอ โลว โบง ฆาน เฌาพรา อี มูห เฌาพรา ปี กรึบ ดูอี อีซาเรลัะ. เอ โลว ฮาว ดึห ตัห ฌีดืก เฌาพรา, วี ตัห อูน โดง แปะ แฮะ ฮอต ซัม อูน โอว อาดา ฌีดืก ตี. 13 คา อาต นู, เบ ดูอี อาเลวี ตู กาฆอด ฌีดืก เฌาพรา. โคว, เฌาพรา ปี กรึบ เอ วี ดัม หมาบ ดี เอ. เอ มืร ตู โบง โดบ แคะ ปี ดัม อูน อัน เฌา.” 14 ปัน ตี เฆ ดา อี หลู ดี เฌาพรา บอ เฆ ดูอี อาเลวี เฆ มืร โบง แตห โดว โบ็ง เฆ ซีงา บอด, แตห เฆ ปึอน ดี ฮาว กาฆอด ตัห ฌีดืก เฌาพรา. อัน เฌา มูห เฌาพรา ปี กรึบ ดูอี อีซาเรลัะ. 15 เฆ ดูอี อาเลวี บอ ดึห มัง ฆอด, ปลอด ดี ฌีดืก เฌาพรา, วี ฆอด แดง ยัะ เฆ บอ กาฆอด ฮาว, แตห อึณ โดบ แคะ ปี กาลาง อูน เฌาพรา ดี อาโมวแซ ตึอน.

16 อาดาวีด มืร กาลาง ดี เฆ อี แยต เฆ ดูอี อาเลวี, แตห เฆ จัร บีนอง วอแว เฆ ต็อห โหมว ดาคึย, กัร บอ โมยว อี ฮัม ดาคึย บัห บอ ดีง, ดีง ดีเรา บอ โชห แชณ, แตห อึณ ดาคึย.

17 เฆ ดูอี อาเลวี มืร วี แดะ อาเฮมาน อี มูห ฆอน อาโยวเอลัะ. บอ แคง เฆ บีนอง อัน อัน แดะ อี จืร อาซาบ อี มูห ฆอน อาเบเรก. แคง บีนอง อาโมยว อาเมนรารี อัน บอ แดะ อาเอทาน อี มูห ฆอน อากูซายา. 18 ปัน ตี เฆ วี แดะ บีนอง เฆ ปอ อู พึง, แตห เฆ แบน พึง ฮาอา. ดูอี เฆ ตี บอ มูห อาซาคารา, อายาเฌลัะ, อาเซมีราโมด, อาเยฮีลา, อาอูนี, อาเอลีอาบ, อาบีนายา, อามาอาเซยา, อามาดีซี, อาเอลีพาเลด, อาเมเนยา บอ อาโอวเบนเอโดม ฆาย อาเยเฮลา อี มูห ดูอี อี บัร มาโลห.

19 อาเฮมาน, อาซาบ บอ อาเอทาน, เฆ บอ แบน ดา อี โชห แชณ บ็อง เดณ. 20 อาซาคารา, อาฌีเอลา, อาเซมีราโมด, อาเย อาเยฮีลา, อาอูนี, อาเอลีอาบ, อามาอาเซยา บอ อาบีนายา, เฆ บอ แบน อี กรีด ดีง ดีเรา, แตห อึณ เลห ฮัม อี จืร อาลาโมด. 21 อามาดีซี, อาเอลีพาเลด, อาเมเนยา, อาโอวเบนเอโดม, อาเยฮีลา, อาฌาฌียา, เฆ บอ แบน อี แยต อี บัห ดีง. เฆ บอ แยต อี เฮา แตห อึณ เลห ฮัม อี จืร เซมีนีด. 22 อาเคนานียา, โกบ แหลว อัน ดี กัร ดี บัห ดอน โมยว, เฆ บอ แตห อัน แบน ดา อี อึบ เฆ ต็อห โหมว บอกาเฆลียด.

23 อาเบเรก บอ อาเอนคานา ฆาย แบน ดา อี บัร ฌีดืก เฌาพรา. 24 เฆ ดา อี หลู ดี เฌาพรา บอ มูห อาเซบานี, อาโยวซาพัด, อาเนทาเนลา, อามาเซ, อาซาคารา, อาบีนายา บอ อาเอลีเอฌา, เฆ ตี บอ แบน ดา อี บูด เวา ดอ ฮาว เฆ นา อาต ฌีดืก เฌาพรา. อาโอวเบนเอโดม บอ อาฮียา, ฆาย บอ โลว บัร มาโลห โดง กอย ฌีดืก เฌาพรา.

25 ปาย ตี คูนดีคัม อาดาวีด บอ เฆ ดูอี อี มูห ดา ตาง อี อึบ อี แยต เฆ ดูอี อีซาเรลัะ บอ เฆ ดา ตาง อี อึบ พึง ดา ซึก อู แหรณ, เฆ บอกาเฆลียด บอ ฮาว ดี กาง อาโอวเบนเอโดม, แตห เฆ ปึอน ดี ฮาว ดึห ตัห ฌีดืก เฌาพรา. เฆ มืร แฮะ โคย, แฮะ ดาคึย กาเซา. 26 เฌาพรา แฮะ จอย, แฮะ กาเว เฆ ดูอี อาโมยว อาเลวี อี แฮะ กาฆอด ฌีดืก เฌาพรา ตี. โคว, ดูอี เฆ ตี มืร ดึห มาบู อาโล็ง เฆ มัก อาโล็ง อู โมยว บู โดว, หลู แตห อึณ แบน ปี ดี หลู เฆ. 27 อาดาวีด บอ เฆ ดา ตาง อี ต็อห โหมว บอ อาเคนานียา อี มูห ดา อี อึบ เฆ อี ต็อห โหมว ตี, บอ เฆ ดูอี อาเลวี อี กาฆอด ฌีดืก เฌาพรา ตึอน, เฆ บอกาเฆลียด แฮะ ชึบ ดี ตา ครึง บีก กาตัม ลูย. อี มูห อาดาวีด, อัน แฮะ วี ชึบ บอ ซีโตว เอโพด อี มูห บีก กาตัม ลูย. 28 ปาย ตี แคะ กอย เฆ ดูอี อีซาเรลัะ บอกาเฆลียด, เฆ บอ โคย ดาคึย บอ ต็อห โหมว ตาง ตาง. เฆ บอ บูด นึง แป, บูด เวา, โชห แชณ, บัห ดีง, กรีด บอ ดีง ดีเรา ฮาว โดบ ฌีดืก เฌาพรา ตึอน, วี ตัห ดี มืง เยรูซาแลม.

29 ดอ ตัห ลึบ เฆ แคง มืง อาดาวีด, นาง มีคาลัะ อี มูห ฆอน อาซอลู ตึอน, อัน วี กอย ดี บาง กาเดา ปาแตง, วี ยึร คูนดีคัม อาดาวีด แฮะ ฆา แฮะ โคย กาเซา ปาย ตี. แคง น็อห อัน, อัน ทาง ปี โบง คูนดีคัม แฮะ หมึอม กาอีห.