1 อาดาวีด แฮะ ฮอต แบน คูนดีคัม. วาย อัน ตี อาฮีรัม อี มูห คูนดีคัม อี อึบ มืง ทูโรว บอ จัร ดาลาม อัน ฮาว โดง กอย อาดาวีด, แตห เฆ ดึห ตัห บอ เฮ อารีด, แตห บอ ลักซามา เฆ อี นับ ดี โฆว มาอูด โบง ตึก ฮาว โดบ เฆ, แตห เฆ โบง โฮว โดง กอย อาดาวีด. 2 ปาย ตี อาดาวีด มืร แฮะ นับ, เฌาพรา แฮะ แตห อัน แบน คูนดีคัม อี อึบ ซีคยา ดูอี อีซาเรลัะ. อัน เฌา มืร แฮะ แตห มาน มืง อัน มัน ซีคยา โกบ มูห เฆ ดูอี อีซาเรลัะ ดูอี ปี อึบ อัน.

3 แคง มืง เยรูซาแลม ตี อาดาวีด วี ดึห อีบึณ ปอ อึณปัว, แตห อัน วี มึห บอ ฆอน อีบึณ บอ ฆอน อีมาย. 4 ฆอน อัน อี ฆึอด แคง มืง เยรูซาแลม ตี เฆ บอ จืร อาซามูอา, อาซอบาบ, อานาทาน, อาซาโลวโมว, 5 อาอีบารา, อาเอลีซูอา, อาเอเบเลด, 6 อานอกา, อาเนเพก, อายาพา, 7 อาเอลีซามา, อาเบเลตัะ บอ อาเอลีเพเลด.

8 ดอ ยึร เฆ ดูอี พีลีที ลอง อาดาวีด แฮะ คัม ดี พ็อห นามัน ดี ฆีณ อัน, แบน คูนดีคัม อี อึบ ดูอี อีซาเรลัะ, เฆ บอ แรน ซึก บอ ฮาว กาโฆห ดี อัน. อาดาวีด มืร ฮาว ณืร เฆ. 9 เฆ ดูอี พีลีที แฮะ ฮอต ตัห ลึบ แคง ดีลัยะ อี จืร เรพีม. 10 อาดาวีด มืร ดีหมอด เฌาพรา ต็อห, “แม แตห โอว ฮาว กาโฆห ดี ดูอี พีลีที เฆ ตี? แม เฌา ดี แตห โอว ออง โอว แป เฆ?” เฌาพรา วี ต็อห ดี อัน, “แตห แม ฮาว กาโฆห ดี เฆ. โอว ดี แตห แม ออง.”

11 อาดาวีด บอ ฮาว ดี มืง บาลัะเบราซีม. อัน บอ กาโฆห บอ แป เฆ. อัน ต็อห, “เฌาพรา แฮะ แยต ดี อาต โอว, แฮะ ปยาต รันซู โอว, แตห อึณ ปี อึม ตาง แฮะ ตัห โบง แตห อึณโฆว ซีฆลูห.” ปาย ตี เฆ บอ แตห โดง ตี จืร บาลัะเบราซีม.^a 12 ดอ เตา ดูอี พีลีที เฆ ตี, เฆ บอ แวน บอ อารึบ ราง ปี กรึบ เฆ. อาดาวีด วี จัร เฆ ดูอี อี โดบ อัน, แตห เฆ วี ดึห โดะ แวน โตต แคง เงา.

13 อาว บอ เหลณ ดูอี พีลีที แฮะ วี ตัห ลึบ แคง ดีลัยะ เรพีม ตึอน. 14 อาดาวีด ปี วี ดีหมอด เฌาพรา ปอ อู เฌณ. เฌาพรา วี ต็อห ดี อัน, “แม แกวะ ฮาว ซืร โดง คยัะ เฆ. แม โลว แลบ ตัห นา ปัน เฆ. แม โลว ฮาว นา กอย เฮ กาเปรียห ตึอน, ตัห ณืร เฆ ดี ตี. 15 แม ฮี ยึร ฆรัณ ดา ซึก ดี กาแดะ เฮ กาเปรียห ตี, แตห แม ฮาว กาโฆห อู เฌณ, อึณ แตห แม นับ, โอว แฮะ แยต แม, แตห แม ปึอน ดี กาโฆห แป ดา ซึก ดูอี พีลีที ตี.” 16 อาดาวีด มืร โบง โดบ ปี กาลาง เฌาพรา ดี อัน. อัน บอ คูงครัห ดูอี พีลีที, จูห ดี มืง กีปอง กอ วี ฮาว ฌัม ดี มืง เกจา. 17 ลอง ปี โบง อาดาวีด ตี, อึณ บอ ลึห ฮาว ดอน นา ดอน โปละ. เฌาพรา โบง แตห ดูอี ดอน โมยว โยว อัน.