1 อาดาวีด บอ กามวน ซังคยาง ดี เฆ ดา โบว อัน อี อึบ ดา ซึก แบน แหรณ แบน มาย็อห. 2 แฮะ ฮอต อัน มืร กาลาง ดี เฆ ดูอี อีซาเรลัะ บอกาเฆลียด ต็อห, “เซ เบ โพรม, เซ เฌาพรา อี มูห เฌาพรา ปี กรึบ เอ บอ อึง, แตห เอ จัร ดาลาม ฮาว กาลาง ดี เฆ บีนอง เอ อี กอย ดอน นา ดอน โปละ แคง มืง อีซาเรลัะ, กาลาง บอ ดี เฆ ดา อี หลู ดี เฌาพรา บอ ดี เฆ ดูอี ครึร อาเลวี อี กอย แคง เรา แคง มืง โดบ เฆ ดูอี ตี, แตห เฆ บอกาเฆลียด ตัห กาฌูะ กาดึม โดบ เอ. 3 แฮะ ฮอต แตห เอ วี ฮาว ดึห ตัห ฌีดืก เฌาพรา โดง กอย เอ นี. โคว, ดอ มูห โจว บาน คูนดีคัม อาซอลู ตึอน, อาว มึห อาเซ อี ณึงราง ยึร ลอง อัน ตี.” 4 ปาย ตี แคะ กอย เฆ ดูอี บอกาเฆลียด บอ โคย ดาคึย กาเซา ดอ ยึร เฆ โฆรห ตี. โคว, เฆ ทาง แฮะ มูห แฮะ หมาน.

5 จูห ดี อึม แบลง ซีโฮวรา อี กอย ดี กาอูน กาดาย มืง แอฆึบ กอ วี โฮะ ฌัม ดี มืง เลโบวฮามาด อาดาวีด มืร แตห ดูอี อีซาเรลัะ บอกาเฆลียด ตัห กาฌูะ, แตห เฆ ฮาว ดึห ฌีดืก เฌาพรา อี กอย ดี มืง กีรียาดยารีม, แตห อัน วี ตัห ดี มืง เยรูซาแลม. 6 อาดาวีด บอ เฆ ดูอี อีซาเรลัะ บอกาเฆลียด เฆ บอ ฮาว ดี มืง บาอาลา อี จืร บอ มืง กีรียาดยารีม อี กอย แคง กาดาย มืง ยูดา. เฆ ต็อห ดี ฮาว ดึห ฌีดืก เฌาพรา. อึณ มูห เฌาพรา อี แฮะ แตห อี นับ จืร อัน, อี กอย ดี กาแต อารึบ อามู อามาด อัน เฌา อี จืร เครูบ.

7 เฆ มืร ดึห เลห ฌีดืก เฌาพรา ตี แคง กาง อาพีนาดาบ, วี ดาง แดง ลักเลา กามาย. อาอูฌาฮา ฆาย อาฮีออ บอ แบน อี แวด ลักเลา ตี. 8 อาดาวีด เฆ ดูอี อีซาเรลัะ บอกาเฆลียด มืร ฆา แคะ ซี นับ เฆ ดี ฆา บอ ต็อห โหมว อี อืบ มยูก เฌาพรา. เฆ บอ กัร โมยว อี ฮัม เกยา แบน โมยว แบน โมยว อี มูห ดีง, ดีง ดีเรา, ฆรึง, แชณ บอ เวา.

9 ดอ ตัห ฌัม เฆ ดี โอ็ง กางน็อห อี จืร คีโดน, มามัก บอ ดีปลาด. อาอูฌาฮา ตึอน บอ ตา ปา ฌีดืก เฌาพรา ตี. 10 ปัน ตี เฌาพรา บอ รู ดี อาอูฌาฮา ตึอน. เฌาพรา บอ ดัม หมาบ ดี อัน โกบ แฮะ ปา อัน ฌีดืก เฌาพรา. อัน บอ ยัม ดี ตี อู เฌณ.

11 ปาย ตี เฆ บอ แตห โดง ตี จืร เพเรดอาอูฌาฮา กอ ฌัม อาตึร นี. อาดาวีด มืร อาว ฮู ดาคึย โกบ แฮะ แตห เฌาพรา อาอูฌาฮา ยัม.

12 ซีแง ตี อาดาวีด บอ โยว เฌาพรา ต็อห, “เหมา โอว ดี ปาย ดี ดึห ตัห ฌีดืก เฌาพรา โดง กอย โอว?” 13 ปาย ตี อาดาวีด อาว ฮู วี ดึห ตัห ฌีดืก เฌาพรา โดง กอย อัน ดี มืง เยรูซาแลม. อัน บอ วี วัห ฮาว ดี กาง อาโอวเบนเอโดม อี มูห ดูอี อาโมยว กีดตี. 14 เฆ บอ อูน ฌีดืก เฌาพรา ดี ตี อาดา โอย มาเฆียน. เฌาพรา บอ วี ม็องการา ดัว ดี อึณโฮม อาโอวเบนเอโดม บอ แคะ มึห อัน ดอน โมยว.