1 ดอ เตา วัห อาดาวีด ดี อาซอลู, วี ฮาว กอย แคง มืง ฌีกาลาด ตึอน, เฆ ดา ซึก มัง อี วี ตัห กอย โดบ อาดาวีด บอ จอย อัน. 2 ดูอี เฆ ตี บอ มูห ดูอี ครึร อาเบนยาม อี มูห บีนอง ครึร อาซอลู ตึอน. เฆ บอ มูห ดูอี อี แฮะ แหลว ดี บัณ อัะ บอ อาปืะ, ตา แด เฆ บอ บลาก อาฆัะ บลาก อาอัห.

3 ดา โบว อี อึบ เฆ บอ มูห อาเฮจา บอ อาโยวอาด อี มูห ฆอน อาเซมาอา. ฆาย ตี บอ มูห ดูอี อาโมยว ฆีบียา. อึณ มูห บอ อาเยซีเอน ฆาย อาเบลีด อี มูห ฆอน อาฌามาวีด, อาบีราคา บอ อาเยฮู อี มูห อาโมยว อานาโทด. 4 อึณ มูห บอ อาอีซามายา อี ตัห มืง กีปอง, อัน บอ มูห ดา ซึก อี บาะ แคง โอย ฆึร วี ตึอน. อัน บอ อึบ เฆ โอย ฆึร วี ตึอน. อึณ มูห บอ อาเยเรมี, อายาฮาเฌลา, อายอฮานัน บอ อายอจาบาด อี ตัห มืง เกตารา. 5 อึณ มูห บอ อาเอลูเจ, อาเยรีมูด, อาเบลาน, อาเซมารี บอ อาเซพาดี อี มูห อาโมยว ฮารูพีด, 6 บอ อาเอนคานา, อาอีซียา, อาจาเรน, อายอจา บอ อายาโซวบาม, เฆ มูห ดูอี อาโมยว อาโควรา. 7 อาโยวลา บอ อาเฌบาดี อี มูห ฆอน อาเยโรวฮัม อี ตัห มืง เกตอ ตึอน.

8 บอ เฆ ดูอี แคง ครึร อาฆัด มัง อี, เฆ แฮะ วี ตัห โพรม รึม โดบ อาดาวีด ดอ กอย อัน แคง โดง เครียง แคง แปร กาฮ็อห. ดูอี เฆ ตี, เฆ ตู โยว บอ โพรม ดี กาโฆห เซเซ. เฆ มืร กยัะ ดี ตา มัง ฆ็อง บอ บลา เลียห. นา เฆ บอ ปี มาครังซี. เฆ บอ ครัน ปี มาฌัะ อี กอย ดี นอน.

9 เฆ อี แบน ฆีณ ซึก ตาง, เฆ แฮะ ลาย ดาม โดบ อายา เฆ ปาย นี. อี แยต เฆ วี ดอ โฆว บอ มูห อาเอเฌน. อาออบาดี บอ มูห วี ฮาอา. อาเอลีอาบ บอ มูห วี ฮาโอย.

10 อามีซามาน บอ มูห วี อึณพวน. อาเยเรมี บอ มูห วี อึณพัน.

11 อาทัย บอ มูห วี อึณเดา. อาเอลีเอน วี อึณบู.

12 อายอฮานัน วี อึณดา. อาเอจาบาด วี อึณดีม.

13 อาเยเรมี บอ มูห วี ฆึร บอ อามาคาบาน วี ฆึร ดี เหลห.

14 ดูอี เฆ นี, เฆ มูห โตต ดูอี แคง ครึร อาฆัด อี อึบ ดา ซึก. วี อี ตาง ซืด ดอ โฆว, อัน นับ ดี แป ดา ซึก อู แหรณ วี. วี ดี กาแดะ ซืด บอ นับ ดี แป อู มาย็อห วี. 15 อึณ มูห ดูอี เฆ ตี อี กาโลห แบลง ยอดาน ดอ มูห มาเฆียน ดอ โฆว. อึณ มูห อาคราว ดอ ตาง อึม แประ แคง แบลง ยอดาน. ดอ อัน ตี อึม แฮะ อึณปูน บาง แบลง ตี บอกาเฆลียด. ดูอี เฆ ตี มืร แฮะ ฮาว ณอน เตา เฆ ดูอี อี กอย แคง ดีลัยะ บาง แบลง ตี, แตห เฆ อี กอย นา เลห ซีแง บอ นา เฆต ซีแง กาโชต เตา ฮาว.

16 บอ เฆ ดูอี แคง ครึร อาเบนยาม มัง อี บอ ดูอี แคง ครึร อายูดา มัง อี, เฆ ตัห โดง เครียง อาดาวีด. 17 อาดาวีด มืร เลห รวห เฆ บอ กาลาง ดี เฆ ต็อห, “เซ เบ ตัห ปี ฆึก, ตัห จอย ตัห ฆัม โอว, โอว มืร ดี รวห เบ. ตัห, แตห เบ โพรม บลาก โอว. มาแล, เซ เบ ยี ตัห เหรต ปี ดี ปาย ดี ดึห อาบ โอว ดี รันซู โอว ดอ ตู มึห โอว ดี โบง หมาบ, แตห เฌาพรา ปี กรึบ เฆ ฆูณ ดัง เอ ยึร ลอง อัน ตี บอ ดัม หมาบ ดี เบ.”

18 น็อห พึอม เฌาพรา บอ ตัห ลึบ แคง น็อห อามาเซ วี อี มูห ดา ตาง เฆ ดูอี โอย ฆึร วี ตึอน. อัน วี ต็อห, “อึย อาดาวีด, เย บอ มูห ดูอี ปี อึบ แม. อึย แม ฆอน อาเยเซ, เย แฮะ ตัห กอย รึม โดบ แม. แตห แม ดาคึย ฆยามซา. บอ เฆ อี กอย รึม โดบ แม บอ เฆ อี จอย แม, แตห เฆ ดาคึย ฆยามซา ปาย ตี. โคว, เฌาพรา ดี จอย แม.” แฮะ ฮอต, อาดาวีด มืร วี รวห เฆ. อัน มืร แตห เฆ แบน ฆีณ ซึก แคง พึง ดา ซึก อัน.

19 ดูอี แคง ครึร อามานาเซ มัง อี บอ เตา ตัห ลึบ อาดาวีด ดอ แรน อัน ซึก, ต็อห ดี กาโฆห โดบ เฆ ดูอี พีลีที ฮาว กาโฆห ดี อาซอลู. มาแล, อาดาวีด ตู วี กาดูห ดี จอย ดูอี พีลีที เฆ ตี. โคว, คูนดีคัม ดูอี พีลีที เฆ ตี โยว อาดาวีด วี ฮาว อาบ บอ เฆ ดี อาซอลู อี มูห ดา กาณา อัน. 20 ดา ซึก เฆ ดูอี อามานาเซ อี ฮาว กอย บลาก อาดาวีด ดอ วี เวณ อัน ดี มืง ฌีกาลาด, อึณ บอ มูห อาตานาฮา, อายอจาบาด, อายีตาเยน, อามีคีลา, อายอจาบาด, อาเอลีฮู บอ อาฌีลาเซ. เฆ ดา ซึก ตี ดอน วี แฮะ อึบ ดา ซึก อามานาเซ อาดา อู แหรณ วี. 21 เฆ บอ จอย อาดาวีด กาโฆห ดี ดา โฌน. โคว, เฆ บอกาเฆลียด มูห ดา ซึก อี ยัะ ดี กาโฆห บอ แบน ดา โบว ตาง อี อึบ ดา ซึก อาดาวีด. 22 ดอน ซีแง ดอน ซีแง, อึณ บอ มึห ดูอี ตัห ลึบ อาดาวีด. อึณ บอ แตห ดา ซึก อัน แกร ดี กืน กาเซา ปี ดา ซึก ปี อึบ เฌาพรา.

23 ดอ กอย อาดาวีด แคง มืง เฮโบรว ตึอน, อึณ บอ มึห ดา ซึก กืน กาเซา อี แฮะ โพรม ดี กาโฆห. เฆ แฮะ ตัห กอย โดบ อาดาวีด, แตห เฆ ปึอน ดี จอย อัน, แตห อัน ปึอน ดี วี ปลูะ อาซอลู. ปาย ตี อึณ บอ โดบ กาดีก ซัดฌา ปี ดึอม กาลาง อูน เฌาพรา. ฌาราง ดูอี เฆ ตี บอ ปาย นี.

24 ดูอี แคง ครึร ยูดา อี แฮะ ปึอน โฆ็ง มัง ฆ็อง บอ บลา เลียห บอ ตา ครึง กาโฆห, เฆ กอย เดา แหรณ ดี ดา มาย็อห วี.

25 ดา ซึก แคง ครึร อาซีเมโอน อี แฮะ โพรม ดี กาโฆห, เฆ กอย บู แหรณ ดี อู มาย็อห วี.

26 ดูอี แคง ครึร อาเลวี มึห พวน แหรณ ดี เดา มาย็อห วี. 27 อึณ บอ บาะ อาเยฮอยาดา อี มูห ดา ตาง แคง อาโมยว อาโรน. อัน บอ มึห อี โดบ อัน อาดา โอย แหรณ ดี บู มาย็อห วี. 28 อึณ มูห บอ อาฌาโดก เฆ ดา ซึก อี กยัะ ดี กาโฆห, อี มูห ดา อี แยต อี เฮา แคง อึณกรึห เฆ, เฆ กอย อา ฆึร ดี อา วี.

29 ดูอี แคง ครึร อาเบนยาม อี มูห อึณกรึห อาซอลู ตึอน, เฆ กอย โอย แหรณ วี. มาแล, เฆ กืน แฮะ กอย บลาก อาซอลู.

30 ดูอี แคง ครึร อาเอพารีม อี มึห ซาเร ตาง แคง ครึร เฆ, เฆ มึห อา หมึณ ดี ดา มาย็อห วี.

31 เฆ ดูอี แคง ครึร อามานาเซ อู กาแต, อี มูห ดูอี ปี ร็อห เลห เฆ, แตห เฆ ฮาว โจะ อาดาวีด แบน คูนดีคัม เฆ, เฆ กอย อู หมึณ ดี ดา แหรณ วี.

32 เฆ ดูอี แคง ครึร อาอีซาคา, เฆ อี มูห ดา ตาง อี นับ ลอง อาคราว ดอ อัน ตี, นับ บอ ลอง ดูอี อีซาเรลัะ แฮะ กาอาบ โบง มาเซ, เฆ กอย อา มาย็อห วี. บอ บีนอง วอแว ปี อึบ เฆ แฮะ โดบ เฆ.

33 เฆ ดูอี แคง ครึร อาเฌบูโลน อี แฮะ แหลว ดี กาโฆห บอ อี แฮะ โพรม ดี กาโฆห บอ มึห น็อห ซืร น็อห หมาน ดี จอย อาดาวีด, เฆ กอย พัน หมึณ วี.

34 เฆ ดูอี แคง ครึร อานาบทาลี, อี แฮะ โพรม ดี กาโฆห, เฆ กอย อู แหรณ วี. อึณ บอ มึห บอ เฆ ดา ซึก อี โฆ็ง มัง ฆ็อง เฆ บลา เลียห, เฆ กอย โอย หมึณ ดี บู แหรณ วี.

35 เฆ ดูอี แคง ครึร อาดาน, อี แฮะ โพรม ดี กาโฆห, เฆ กอย อา หมึณ ดี ดา แหรณ ดี เดา มาย็อห วี.

36 เฆ ดูอี แคง ครึร อาเซน อี แฮะ ฮอต ปึอน กาโฆห, เฆ กอย พวน หมึณ วี.

37 เฆ ดูอี อี กอย บลาก นา เลห ซีแง อึม แบลง ยอดาน, อี มูห ดูอี ครึร อารูเบน, ดูอี ครึร อาฆัด บอ ครึร อามานาเซ อู กาแต, เฆ กอย อู แซน ดี อา หมึณ วี. ดูอี เฆ ตี แฮะ โฆ็ง ครึง กาโฆห ดอน โมยว.

38 เฆ ดูอี บอกาเฆลียด บอ มึห น็อห ซี จอย อาดาวีด. ดอ ตัห เฆ ดี มืง เฮโบรว เฆ แฮะ คัด น็อห ดี แตห เฆ โจะ มยูก อาดาวีด, แตห อัน แบน คูนดีคัม อี อึบ ดูอี อีซาเรลัะ บอกาเฆลียด. เฆ ดูอี อีซาเรลัะ อี มูห ดูอี เรา ดูอี กาง, เฆ มืร แฮะ แบน อู น็อห, แฮะ โพรม ดี โจะ มยูก อาดาวีด ปาย ตี. 39 เฆ ดูอี อี แฮะ ตัห ดี อาดาวีด, เฆ มืร กอย โดง กอย อาดาวีด กอ โนะ โอย ซีแง. เฆ มืร โฮม รึม เดียง รึม. โคว, บีนอง อึณกรึห เฆ แฮะ ฮอต แรน ดัว ดี เฆ. 40 บอ เฆ อี กอย โต็ง อี มูห ดูอี ครึร อาอีซาคา, อาเฌบูโลน บอ อานาบทาลี, เฆ มืร แฮะ ดาง มาลา, ดาง มังปร็อง กาฮาต, ดาง มาโลว เฆ มามัก, แตห เฆ ตึย ปี ดี โฮม ปี ดี ฮาบ ดอน โมยว. อึณ บอ มูห เคาคยูง, ดีแคลบ เบล ดีปู บอ เบล มางูน, อึม มางูน บอ นามัน, บอ มามัก เฆ มาบู. ปาย ตี เฆ มึห กืน ปี ดี โฮม ปี ดี ฮาบ. โคว, เฆ ดูอี อีซาเรลัะ บอ มาน บอ มืง แฮะ มึห น็อห อี โบยว ดาคึย.