1 ปัน ตี แคะ กอย ดูอี อีซาเรลัะ, เฆ บอ กาโพรม ดี ตัห โดง กอย อาดาวีด ดี มืง เฮโบรว ตึอน. เฆ ต็อห, “เย นี, เย มูห บีนอง วอแว แม. 2 ดอ แบน อาซอลู คูนดีคัม อี อึบ เย, แม ยี แฮะ แยต ดา ซึก เย ดูอี อีซาเรลัะ ดอ กาโฆห เย ดี รันซู เย. เฌาพรา มืร แฮะ ต็อห ดี แม, ‘แม โลว ยอด แมน ดูอี โอว อี มูห ดูอี อาโมยว อีซาเรลัะ. แม ดี บอ แบน ดา กาณา อี อึบ เฆ.’”

3 ปัน ตี วาย แฮะ ตัห ฌัม เฆ ดา ตาง ดูอี อีซาเรลัะ โดง กอย อาดาวีด ดี มืง เฮโบรว ตึอน, อัน บอ กาแซณ ดี เฆ, แตห บอ เฌาพรา โทม. เฆ บอ กาโพรม ดี พ็อห นามัน ดี ฆีณ อาดาวีด, แตห อัน แบน คูนดีคัม อี อึบ ดูอี อีซาเรลัะ. ปาย ตี อึณ บอ แบน โตต ดอน โมยว แคะ ปี บยัะ เฌาพรา ดี อาซามูเอน ตึอน.

4 อาดาวีด เฆ ดูอี อีซาเรลัะ บอกาเฆลียด บอ แรน ดา ซึก เฆ, ฮาว ดี มืง เยรูซาแลม อี บอ จืร มืง เยบูด. อึณ บอ มูห โดง กอย บรีม เฆ ดูอี เยบูซีด. 5 ดูอี เยบูซีด ต็อห ดี อาดาวีด, “แม ตู ปึอน ลึบ แคง มืง นี.” มาแล, อาดาวีด บอ กาโฆห บอ ปึอน โดง เครียง ดา ซึก เฆ อี จืร ฌีโอน. เฆ บอ แตห โดง ตี จืร มืง อาดาวีด.

6 อาดาวีด แฮะ ต็อห, “วี อี ยัะ ฮาว กาโฆห ดี ดูอี เยบูซีด ดี อาต อี เฮา, อัน ดี ปึอน ดี อึบ ดา ซึก โอว.” อายอพัะ อี มูห ฆอน นาง เจรูยา, อัน บอ ฮาว ดี อาต อี เฮา. แฮะ ฮอต, อัน บอ แบน ดา อี อึบ ดา ซึก.

7 ปัน ตี อาดาวีด บอ ฮาว กอย โดง เครียง เฆ ดา ซึก. โคว, เฆ บอ แตห โดง ตี จืร มืง อาดาวีด. 8 อัน บอ วี อึณปราย มืง ตี, วี โบง อึณโฆว จูห ดี บืน อัน บอ ซัม แรง มืง. อายอพัะ บอ วี อึณปราย โดง ซี ฆีด ซี กอย แคง มืง ตี. 9 ปาย ตี ปวน บอ อาพูง ดังโคว อาดาวีด บอ แกร ดี กืน, แกร ดี ตาง. โคว, เฌาพรา อี อึบ โตต ดอน โมยว แฮะ กอย รึม โดบ อัน.

10 อานี บอ มูห ฌาราง ดา ซึก อาดาวีด อี แยต เฆ อี กยัะ ดี กาโฆห. บอ เฆ บอ ดูอี อีซาเรลัะ บอกาเฆลียด แฮะ ลาย โพรม ดี จอย อาดาวีด, แตห อัน แบน คูนดีคัม เฆ อี อึบ มืง เฆ ดอน นา ดอน โปละ, แตห อึณ โดบ กาดีก ซัดฌา แปะ แฮะ ดัว เฌาพรา ดี เฆ. 11 เฆ ดา ซึก อาดาวีด อี กยัะ ดี กาโฆห บอ มูห อายาโซวบาม อี มูห ดูอี อาโมยว อาฮักโมวนีด. อัน บอ มูห ดา ตาง อี อึบ เฆ อี กยัะ ดี กาโฆห. อัน แฮะ ดึอม ตา บลา เลียห อัน, ง็อห ยัม ดูอี โอย มาย็อห วี อู เฌณ.

12 อี ดาม อัน บอ มูห อาเลอาซา อี มูห ฆอน อาดอดา, อี มูห บอ อาโมยว อาโฮวฮีด. อัน บอ บา แคง พึง เฆ โอย วี อี กยัะ ดี กาโฆห.

13 อัน แฮะ กอย บลาก อาดาวีด ดอ ตัห เฆ ดูอี พีลีที ดี โดง จืร บาซาทามีม. ดอ อัน ตี เฆ ดูอี อีซาเรลัะ แฮะ ฮอต เตา ฮาว แคง โดง นา โดง ซัม เฆ ซีโฆ็งรา. 14 บอ อัน บอ เฆ ดูอี อี โดบ อัน, เฆ กอย แคง โดง นา ตี, กาโฆห ดี เฆ ดูอี พีลีที ดี ตี. เฌาพรา มืร แตห อัน ออง ดา ซึก กืน กาเซา.

15 อาดา อู ซีแง, ดา ตาง โอย วี อี กอย แคง พึง เฆ ดา ตาง โอย ฆึร วี อี อึบ อี, เฆ บอ ฮาว โดง กอย อาดาวีด แคง กาเดา มาว อี จืร อาตูลัม อี กอย โคบ มาว ตาง. ดอ อัน ตี เฆ ดูอี พีลีที อู พึง แฮะ คยัะ โคบ ดีลัยะ แบลง อึม เรพีม.

16 อาดาวีด ยี กอย แคง โดง เครียง ดา ซึก ตึอน. เฆ ดูอี พีลีที อาดา อู พึง, แฮะ กอย แคง มืง เบดแลม. 17 อาดาวีด ยี ซี เดียง อึม. โคว, อัน ต็อห, “แตห ยี นับ ดี มึห อี ต็อะ ตัห อึม แคง อึม คึม อี กอย โคบ มาโลห มืง เบดแลม ตึอน, แตห อัน ตัห ดัว โอว เดียง.” 18 ปาย ตี เฆ ดา โบว โอย วี ตึอน, เฆ บอ ฮาว กาโลห กาแต เฆ ดา ซึก ดูอี พีลีที. เฆ บอ ฮาว ต็อะ อึม แคง อึม คึม ปี อึบ ดูอี พีลีที อี กอย โคบ มาโลห มืง เบดแลม ตึอน, ดึห ตัห, ดัว ดี อาดาวีด. มาแล, อาดาวีด ยี ตู เดียง. อัน วี ฮูห แดง กาดาย หลู ดี เฌาพรา. 19 อัน วี ต็อห, “เฌาพรา บอ นับ, โอว ตู ปึอน เดียง อึม นี ดอ เหมา. เซ อาว ปาย ตี อึณ ปี โอว เดียง หนาม เฆ ดูอี อี ตู หลัยะ อาซาก โดว บรีม เฆ.” โกบ อึณ ปาย ตี อัน ตู เดียง. ปาย ตี เฆ ดา โบว โอย วี อี อึบ ดา ซึก ตึอน, เฆ แฮะ ปียัะ เฆ ดี โบง.

20 อาพีเซ อี มูห วา อายอพัะ มูห ดา อี อึบ เฆ ดา โบว โอย วี ตึอน. อัน มืร แฮะ ตา บลา เลียห อัน, กาโฆห ง็อห ยัม ดูอี โอย มาย็อห วี. โคว, ดอน อี วี อืบ อัน ปี เฆ อืบ เฆ โอย วี ตึอน. 21 ปี ซัะ บา อัน แคง โอย วี ตึอน, อัน แฮะ มึห ซาเร หลึอม เฆ. โคว, อัน แบน ดูอี อี แยต เฆ.

22 อาบีนายา อี มูห ฆอน อาเยฮอยาดา อี ตัห มืง กาบาเฌลัะ อัน มูห ดา ซึก อี ยัะ กาโฆห. อัน แฮะ ดึอม ออง แบน เฌณ แบน เฌณ. อัน แฮะ ง็อห ดูอี อาโมวอาบ อา วี, อี กยัะ ดี กาโฆห หลึอม อี เฮา. แดง ตี, ดอ แฮะ โจห อึม ดาด, อัน แฮะ ดึอม ฮาว ลึบ แคง กาเดา กาดาย เหมต มาครังซี, วี ง็อห ยัม. 23 ดูอี แอฆึบ อู วี อี ตาง จา พัน กานีห มืร, อัน แฮะ ง็อห ยัม. ดูอี แอฆึบ ตี, ปี บอ แฮะ โฆ็ง บลา เลียห อี ตาง กาเซา มืร, อี มูห อาบีนายา, อัน โฆ็ง มี อึณกรวน, ต็อห ดี กาโฆห ดี ดูอี ตี. อัน บอ ฮาว พาด ดึห บลา เลียห แคง แด ดูอี ตี, วี ซัด ยัม อัน. 24 อาบีนายา แฮะ ฮอต โบง ปาย ตี เฆ อืบ อัน แตห อึณ ปี เฆ แฮะ อืบ โอย วี อี กยัะ กาเซา, อัน ยี มึห ซาเร หลึอม เฆ. 25 อัน ปี บอ แฮะ มึห ซาเร ตาง หลึอม เฆ แคง พึง โอย ฆึร วี ตึอน มืร, อัน ยี ตู บา แคง พึง เฆ ดา โบว โอย วี ตึอน. อาดาวีด วี แตห อัน อึบ ดา ซึก อี บัร อาซาก อัน.

26 เฆ ดา ซึก อาดาวีด อี กยัะ ดี กาโฆห บอ มูห อาซาเฮลัะ อี มูห วา อายอพัะ ตึอน, อาเอฮานัน อี มูห ฆอน อาตอตอ อี กอย มืง เบดแลม,

27 อาซาโมด อี มูห ดูอี อาโมยว ฮารอรีด, อาเฮเลด อี มูห ดูอี อาโมยว เบลอนี,

28 อาอีรา อี มูห ฆอน อาอีเกซา อี กอย มืง เดกอ, อาบีเอจา อี ตัห มืง อานาโทด,

29 อาซีเบเค อี มูห ดูอี อาโมยว ฮูซา, อาอีเล อี มูห ดูอี อาโมยว อาโฮวฮีด,

30 อามาฮาเร อี ตัห มืง เนตอพา, อาเฮลีด อี มูห ฆอน อาบาอานา บอ ตัห มืง เนตอพา,

31 อาอีเด อี มูห ฆอน อารีเบ อี ตัห มืง ฆีบียา แคง กาดาย เฆ ดูอี อาโมยว อาเบนยาม, อาบีนายา อี มูห ดูอี อาโมยว บีราโทน,

32 อาฮูเร อี กอย โดบ ดีลัยะ โดบ แบลง กาอาด, อาบีเอลัะ อี มูห ดูอี อาโมยว อาบา,

33 อาฌามาวีด อี มูห ดูอี บาฮารูมีด, อาเอลีอาบา อี มูห ดูอี ซาลาโบน,

34 เฆ ฆอน อาฮาซีม อี มูห ดูอี ฆีฌูน, อาโยวนาทาน อี มูห ฆอน อาซาเฆ อี มูห ดูอี ฮารา,

35 อาฮีอาม อี มูห ฆอน อาซาคา อี มูห ดูอี อาโมยว ฮารา, อาเอลีพาลัะ อี มูห ฆอน อาอูรัะ,

36 อาเฮพา อี มูห ดูอี อาโมยว เมคีรา, อาฮียา อี มูห ดูอี อาโมยว เบลอนี,

37 อาเฮจารอ อี มูห ดูอี อาโมยว กาเมลัะ, อานาเร อี มูห ฆอน อาเอฌาเบ,

38 อาโยวเอลัะ อี มูห วา อานาทาน, อามีบาฮา อี มูห ฆอน อาฮาเกรี,

39 อาเฌลีก อี มูห ดูอี อาโมยว อัมโมน, อานาฮาเร อี มูห ดูอี อาโมยว เบรอทีด อี โฆ็ง ครึง กาโฆห อายอพัะ อี มูห ฆอน นาง เจรูยา.

40 อึณ มูห บอ อาอีรา บอ อากอรีบ อี มูห อาโมยว อีทารี,

41 อาอูรียา อี มูห ดูอี อาโมยว เฮทีด, อาฌาบาด อี มูห ฆอน อาบาเล,

42 อาตีนา อี มูห ฆอน อาซีจา. วี อี แบน ดา ตาง อี อึบ แคง ครึร อารูเบน, อึบ บอ แดง ดา ซึก อัน เฆ โอย ฆึร วี,

43 อึณ มูห บอ อาฮานัน อี มูห ฆอน อามาคา, อาโยวซาพัด อี มูห อาโมยว มีทีนีด,

44 อาอูฌียา อี มูห ดูอี อาโมยว อาซาตารา, อาฮาซามา บอ อาเยยีลา อี มูห ฆอน อาโฮวซาม อี มูห ดูอี อาโมยว อารอ.

45 อายีตาเยน บอ อายอฮา อี มูห ฆอน อาซีมารี บอ ดูอี อาโมยว ตีจี,

46 อาเอลีเอน อี ตัห มืง มาฮาวา, อาเยรีเบ บอ อายอซาวี อี มูห ฆอน อาเอลาอัม, อาอีเดมา อี มูห ดูอี อาโมยว โมวอาบ,

47 อาเอลีเอน, อาโอวเบด บอ อายาเซลัะ อี มูห ดูอี อาโมยว เมจอเบด, เฆ บอกาเฆลียด แฮะ แบน ดา ซึก อาดาวีด อี กยัะ ดี กาโฆห.