คาน 10
ลอง คูนดีคัม อาซอลู ยัม
1 ดอ อัน ตี เฆ ดูอี พีลีที แฮะ ตัห กาโฆห ดี เฆ ดูอี อีซาเรลัะ ดี นอน ฆีลัะปอ. ดี ตี เฆ ดูอี อีซาเรลัะ มืร แฮะ ยัม กืน กาเซา. เฆ อี ซี ฆีด ซี กอย เฆ แฮะ เตา. 2 เฆ ดูอี พีลีที บอ คูงครัห โดบ อาซอลู เฆ ฆอน อัน. เฆ บอ ฮาว ครับ เฆ บอ ง็อห ยัม อาโยวนาทาน, อาพีนาดาบ บอ อามาลัะคีชูวา. 3 อาซอลู แฮะ กาดูห ดี กาโฆห กาเซา ดี เฆ. ดอ ตัห เครียะ เฆ ดี อัน, บลา อัะ เฆ รันซู อัน แฮะ ล็อะ อัน.
4 อัน บอ กาลาง ดี ดูอี อี โฆ็ง ครึง กาโฆห อัน ต็อห, “ทอด มาปัวะ ลาง แม, บลูห โอว. เซ แม ตู บลูห, เฆ ดูอี อี ตู ซัวะ แวน ฮูน ลัะคานา อีมาย, เฆ ดี ตัห บลูห, แตห โอว ชึม ซาเร.” อัน ปี บอ แฮะ ต็อห ปาย ตี มืร, ดูอี อี โฆ็ง ครึง กาโฆห อัน ตึอน ยี ตู ยัะ โบง มาเซ. โคว, อาซอลู วี ปีเกห ราง อัน, วี ทีบ ดี กาแดะ มาปัวะ ลาง อัน, บอ ยัม.
5 ดูอี อี โฆ็ง ครึง กาโฆห ตึอน, อัน บอ ยึร อาซอลู แฮะ ฮอต ยัม, อัน มืร วี ปีเกห บอ อัน ดี กาแดะ มาปัวะ ลาง อัน. แตห บอ อัน ยัม โดบ อาซอลู. 6 ปาย ตี อาซอลู เฆ ฆอน อีมาย อัน โอย วี แฮะ ฮอต ยัม. บอ เฆ อี กอย แคง อึณโฮม อัน บอ กาดูห ดี ยัม.
7 เฆ ดูอี อีซาเรลัะ อี กอย โดบ ดีลัยะ ตึอน, เฆ วี ยึร ลอง ดา ซึก เฆ แฮะ เตา บอ อาซอลู เฆ ฆอน อีมาย อัน โอย วี แฮะ ฮอต ยัม, เฆ มืร วี เตา เลห แวน เรา กาง บอ มาน มืง เฆ. ดูอี พีลีที เฆ บอ วี ตัห ดึห เรา กาง บอ มาน มืง เฆ ตี.
8 บอ ฌัม ปา แคหณา เฆ ดูอี พีลีที ตัห ต็อห ดี วี บูต เลห ครึง ตา ดี โดว ดูอี ยัม เฆ ตึอน. เฆ บอ ฮาว ยึร บอ โดว ยัม อาซอลู เฆ ฆอน อีมาย อัน ดี นอน ฆีลัะปอ ตึอน. 9 เฆ บอ บูต เลห ครึง ตา อัน, แดบ เลห บอ ฆีณ อัน, ดึห บอ ครึง กาโฆห อัน. แฮะ ฮอต, เฆ วี ตึย ดาลาม เฆ ฮาว แคง มืง พีลีที ดอน นา ดอน โปละ แตห เฆ ปึอน ดี กาลาง ลอง อัน ตี, แตห บอ อารึบ บอ ดูอี บอกาเฆลียด กอ นับ ลอง แฮะ ออง แฮะ แป เฆ. 10 ครึง กาโฆห อาซอลู เฆ บอ ดึห อูน แคง โฮว ปี กรึบ เฆ อารึบ. ฆีณ อัน ตึอน เฆ บอ ฮอย อูน แคง โฮว เฌา ดาโฆน.
11 ดอ อัน ตี เฆ ดูอี แคง มืง ยาเบดฆีเลอาด บอ ยึร ลอง เฆ ดูอี พีลีที แฮะ โบง ปาย ตี ดี โดว อาซอลู, 12 เฆ บอ แดะ ดูอี เฆ อี ยัะ อี ตู โยว, แตห เฆ เลห ฮาว ดึห โดว ยัม อาซอลู บอ ฆอน อีมาย อัน, วี ตัห ดี มืง ยาเบด บอ วี ดีบ เฆ ดัง เฮ เนว. แฮะ ฮอต, เฆ บอ วี ยืน ปี ดี โฮม กอ โนะ บู ซีแง.