1 อานี มูห ฌาราง ดูอี แคง ครึร อารูเบน อี มูห ฆอน ฆีณ อาอีซาเรลัะ ตึอน. โกบ แฮะ ปรา อัน ดี อีด โดบ อีบึณ เตียะ ฆูณ อัน, รูห มูห อัน ฆอน ฆีณ แฮะ วี อาบ ดัว ดี ฆอน อาโยว อี มูห ฆอน อาอีซาเรลัะ ปอ วี. โคว, แคง ฌาราง เฆ ฆอน อาอีซาเรลัะ เฆ ตู ฮับ จืร อัน ดอ โฆว. 2 ปาย ตี บอ ครึร อายูดา ปี บอ แฮะ แบน ครึร อี ตาง หลึอม อี เฮา, ปี บอ มึห อู วี อี ดี แบน ดา กาณา อี อึบ ดูอี เฮา มืร, ฆอน อาโยว ตึอน ยี แฮะ ปึอน รูห ดี แบน ฆอน ฆีณ. 3 อารูเบน อี มูห ฆอน ฆีณ อาอีซาเรลัะ ตี, อัน มึห ฆอน อี จืร อาฮาน, อาพาลู, อาเฮฌาโรน บอ อาคามี.

4 หลูกหลาน อาโยวเอลัะ บอ จืร อาเซมายา. ฆอน อาเซมายา ปี วี จืร อาโกวกัะ. ฆอน อาโกวกัะ ปี วี จืร อาซีมี. 5 ฆอน อาซีมี ปี วี จืร อามีคา. ฆอน อามีคา ปี วี จืร อารายา. ฆอน อารายา ปี วี จืร อาบาลัะ.

6 ฆอน อาบาลัะ ปี วี จืร อาบีราฮัะ. คูนดีคัม ตาง อี จืร อาตีกาลาดบีเลซา อี อึบ ดูอี อาโมยว อาซูรา แฮะ ตัห กาโฆห แป อาบีราฮัะ อี มูห ดา ตาง เฆ ดูอี ครึร อารูเบน. คูนดีคัม ตี บอ เหมต ฮาว อาบีราฮัะ ตี.

7 เฆ อี มูห บีนอง วอแว, อี แบน อู อึณกรึห อี แบน ฆูณ ดัง เฆ, แฮะ แดม อูน แคง ฌาราง ปาย นี. 8 เฆ บอ มูห อาเยยีลา อี มูห ดา ตาง, อาซาคารา บอ อาเบนลา อี มูห ฆอน อาอัดฌาด บอ หลาน อาเซมา อี มูห ดูอี แคง อึณกรึห อาโยวเอลัะ ตึอน. ดูอี เฆ ตี, เฆ บอ กอย จูห ดี มืง อารอ กอ วี ฌัม ดี มืง เนปอ บอ มืง บาลัะมอง. 9 พึง มามัก มาบู เฆ แฮะ แบร กืน กาเซา ดอ กอย เฆ แคง มืง ฆีเลอาด. โคว, เฆ แฮะ ปึอน กาดาย อี กาว็อห กาเซา. อึณ บอ จูห ดี แปร กาฮ็อห บลาก นา เลห ซีแง กอ วี ฌัม ดี แบลง อึม อูพาราด.

10 ดอ มูห โจว บาน คูนดีคัม อาซอลู ตึอน, เฆ ดูอี อารูเบน แฮะ กาโฆห, แฮะ ง็อห ยัม ดูอี อาฮาการา. เฆ บอ วี ปลูะ ดูอี เฆ ตี, วี กอย โดง กาโฆห เฆ ตี ดอน นา ดอน โปละ กอ ฌัม บลาก นา เลห ซีแง มืง ฆีเลอาด.

11 เฆ หลูกหลาน อาฆัด บอ กอย โคบ เฆ ดูอี อารูเบน ดี มืง บาซัน, กอ วี ฌัม มืง ซาลากา.

12 อาโยวเอลัะ บอ แบน ดา อี แยต เฆ. อาซาพาม บอ แบน ดูอี อี โดบ อัน. วาย อัน ตี บอ มึห อายาเน ฆาย อาซาพัด อี กอย แคง มืง บาซัน.

13 บีนอง วอแว อี โดบ อึณโฮม เฆ บอ มูห อึณโฮม อามีคีลา, อาเมซูลัม, อาเซบา, อายอเร, อายาคาน, อาฌายา บอ อาเอบา. เฆ บอกาเฆลียด กอย บู อึณโฮม.

14 ดูอี เฆ ตี เฆ มูห หลูกหลาน อาพีเฮลา อี มูห ฆอน อาฮูรี. อาฮูรี มูห ฆอน อายารอ. อายารอ วี มูห ฆอน อาฆีเลอาด. อาฆีเลอาด วี มูห ฆอน อามีคีลา. อามีคีลา วี มูห ฆอน อาเยซีเซ. อาเยซีเซ วี มูห ฆอน อายาตอ. อายาตอ วี มูห ฆอน อาบูด.

15 อาฮีน บอ มูห ฆอน อาบาดีลา, บอ มูห หลาน อาฆูนี. อาฮีน ตี แบน ฆูณ ดัง เฆ ดูอี อาโมยว อัน.

16 เฆ ดูอี อาโมยว อาฆัด แฮะ กอย แคง เรา แคง มืง บาซัน อี มูห กาดาย มืง ฆีเลอาด อี มึห เปต กืน. เฆ กอย บอ แคง มืง ซาโรน บอ มืง.

17 ฌาราง จืร ดูอี เฆ ตี, อึณ แฮะ แดม อูน ดอ มูห โจว บาน คูนดีคัม อาโยวทาม อี อึบ มืง ยูดา, บอ โจว บาน คูนดีคัม อาเยโรวโบว อี อึบ มืง อีซาเรลัะ.

18 เฆ ดูอี ครึร อารูเบน, ครึร อาฆัด บอ ครึร อามานาเซ อู กาแต, เฆ มึห ดา ซึก พวน หมึณ ดี พวน แหรณ ดี บู มาย็อห ดี เดา ฆึร วี. ดูอี เฆ ตี, เฆ มูห ดูอี อี โปลม คัะ. เฆ แฮะ ฮอต พึก ซีคยา ซีคยา. เฆ แฮะ ปึอน โฆ็ง มัง ฆ็อง บอ มาปัวะ ลาง, แฮะ นับ บอ ดี บัณ อัะ. 19 เฆ บอ โฮะ กาโฆห ดี ดูอี อาโมยว อาฮาการา, ดูอี อาเยทู, ดูอี อานาพีด บอ ดูอี อาโมยว อานอดาบ. 20 เฆ มืร บึง เฌาพรา บอ ซาคึร หมาณ, แตห เฌาพรา จอย เฆ. เฌาพรา มืร โทม โฆรห ปี ซาคึร เฆ. เฌาพรา มืร แตห เฆ กาโฆห แป ดูอี อาฮาการา บอ เฆ ดูอี อี จอย ดูอี อาฮาการา เฆ ตี. 21 เฆ บอ เหมต ฮาว มังปร็อง กาฮาต พัน หมึณ โดว, มาบู อู แซน ดี พัน หมึณ, มาลา อา แหรณ โดว บอ ดูอี อู แซน วี. 22 เฆ มืร แฮะ ปึอน ดี ง็อห ยัม กืน กาเซา รันซู เฆ. โคว, เฌาพรา แฮะ จอย เฆ กาโฆห. เฆ บอ วี ปึอน ดี กอย แคง มืง ตี กอ วี ฌัม ปัน วี ตัห เหมต ฮาว อี เฮา ดี เฆ.

23 เฆ ดูอี ครึร อามานาเซ แฮะ กืน กาเซา. เฆ กอย บลาก นา เลห ซีแง. เฆ บอ กอย แคง มืง บาซัน, กอย โลง กอ ฌัม ดี บาลัะเฮราโมน. อึณ มูห นอน เซนีรา อี บอ จืร นอน เฮราโมน.

24 เฆ อี มูห ฆูณ ดัง อี แบน ดา ตาง แคง อึณกรึห เฆ บอ มูห อาเอเพน, อาอีซี, อาเอลีเอน, อาจาเรลัะ, อาเยเรมี, อาโฮวตอวา บอ อายาดีลา. ดูอี เฆ ตี, เฆ มูห ดา ซึก อี กยัะ อี แฮณ กาเซา. เฆ บอ แบน ดา ตาง อี อึบ อี แยต ดูอี แคง อึณกรึห เฆ. 25 ปี บอ แฮะ ปาย ตี ดูอี เฆ ตี ยี ตู โบง นา ซืร นา หมาน ดี เฌาพรา ปี กรึบ ฆูณ ดัง เฆ. เฆ วี แวน เฌาพรา, วี บึง เฌา ปี กรึบ ดูอี อาโมยว เฮา อี มูห ดูอี ปี โฮว เตา เฌาพรา, อี กอย แคง มืง เฆ ตี. 26 ปาย ตี เฌาพรา มืร จัร คูนดีคัม อาบูลา อี อึบ มืง อาซูรา อี บอ จืร บอ อาตีกาลาดบีเลซา, ตัห กาโฆห ปยาต แวน มืง เฆ. คูนดีคัม ตี แฮะ ฮอต เหมต ฮาว ดูอี ครึร อารูเบน, ครึร อาฆัด บอ ครึร อามานาเซ อู กาแต. อัน วี แตห เฆ กอย แคง มืง ฮาลา, มืง ฮาปอ, มืง ฮารา บอ โคบ แบลง อึม กอจัน. เฆ บอ กอย ดี ตี กอ ฌัม ดอ ตี นี.