1 เฆ อี มูห ฆอน อายูดา เฆ จืร อาเพเรด, อาเฮฌาโรน, อาคามี, อาฮูรา บอ อาโซวบาน.

2 อาโซวบาน วี มึห ฆอน อีมาย อี จืร อารายา. อารายา บอ มูห ฆูณ อายาฮาด. อายาฮาด วี มึห ฆอน อีมาย อี จืร อาฮูมาย บอ อาลาฮาด. ดูอี เฆ ตี, เฆ แบน ฆูณ ดัง เฆ ดูอี อาโมยว โฌวรา.

3 อาเอทาม วี มึห ฆอน อี จืร อาเยจาเรลัะ, อาอีทามา บอ อาอีตาบาด. อัน มึห บอ ฆอน อีบึณ อู วี อี จืร นาง ฮาจาเรลัะปอนี. 4 อาเบนูเอน บอ มูห ฆูณ อาเกตอ. อาเอเฌน มูห ฆูณ อาฮูซา. เฆ หลูกหลาน อาฮูรา อี มูห ฆอน ฆีณ นาง เอพาราด, อี แฮะ แบน ฆูณ ดัง มืง เบดแลม, เฆ จืร ปาย นี.

5 อาซูรา อี มูห ฆูณ อาเดกอ ตึอน, อัน มึห อีบึณ อา วี อี จืร นาง เฮลา บอ นาง นารา.

6 นาง นารา ตี แฮะ แบน มา เฆ ฆอน อีมาย อี จืร อาฮูฌาม, อาเฮพา, อาเทมานี บอ อาฮาซาตารี. อาซูรา บอ มูห ฆูณ เฆ ตี.

7 นาง เฮลา วี มึห ฆอน อีมาย บอ จืร อาเฌรีด, อาโฌวฮาน, อาเอทานัน, อากอฌา. 8 อากอฌา วี มึห ฆอน อีมาย อี จืร อาโนบ บอ อาจอเบบา. อากอฌา บอ มูห ฆูณ ดัง เฆ ดูอี อาโมยว อาฮาเรลา อี มูห หลูกหลาน อาฮารูม ตึอน.

9 อึณ บอ มึห ดูอี อู วี อี จืร อายาเบฌา. อัน มูห ดูอี ปี โรวเซ ดอน อี หลึอม เฆ บีนอง วอแว อัน. มา อัน แตห อัน จืร อายาเบซา. โคว, มา อัน ต็อห, “โอว แฮะ คัม ดูก ตาง กาเซา ดอ ฆึอด อัน.” 10 อายาเบฌา บอ ซาคึร ดี เฌาพรา ปี กรึบ เฆ ดูอี อีซาเรลัะ. อัน ต็อห, “อึย แม เฌาพรา, โอว หมาณ, แตห แม ม็องการา ดัว ดี โอว, แตห แม ปีว็อห กาดาย โดง กอย โดง รัณ โอว. โอว หมาณ, แตห แม เฌา กอย รึม โดบ โอว บอ ฆ็อง แร อาเพ อาเร อี ดี แตห โอว คัม ดูก.” อัน แฮะ ฮอต ซาคึร ปาย ตี เฌาพรา มืร ดัว แคะ ปี หมาณ อัน ตี.

11 อาเคลูบ อี มูห วา อาซูฮา, อัน วี มึห ฆอน อีมาย บอ จืร อามาฮีรา. อามาฮีรา บอ วี แบน ฆูณ อาเอทูน. 12 อาเอทูน วี มึห ฆอน อีมาย อี จืร อาเบดราพัะ, อาพาเซยา บอ อาเทฮีนา. อาเทฮีนา บอ แบน ฆูณ อาอีรานาฮาซา. หลูกหลาน เฆ ตี, เฆ มืร กอย ดี มืง เรคา.

13 อาเคนาด วี มึห ฆอน อีมาย อี จืร อาออซันเยลา บอ อาเซรายา. อาออซันเยลา ปี วี มึห ฆอน อีมาย อี จืร อาฮาซาด บอ อามอนอเซ. 14 อามอนอเซ วี มึห ฆอน อีมาย อี จืร อาออพารา. อาเซรายา บอ มูห ฆูณ อายอพัะ วี แฮะ แบน ดัง มืง เฆอาราซัม อี มูห โดง กอย เฆ ดูอี อี แบน ลักซามา.

15 อาฆาลีบ อี มูห ฆอน อาเยโพวนา ตึอน, อัน วี มึห ฆอน อีมาย อี จืร อาอีรู, อาเอลาฮา บอ อานาอัม. อาเอลาฮา บอ มูห ฆูณ อาเคนาด.

16 อาเยฮาลาเลน บอ มึห ฆอน อีมาย อี จืร อาจีพัะ, อาฌีพาฮา, อาตีรี บอ อาซาเรลา.

17 อาเอซาราฮา มึห ฆอน อีมาย อี จืร อาเยซา, อาเมเรด, อาเอเพน บอ อายาโลน. อีบึณ อาเมเรด อู วี มึห ฆอน อีมาย อี จืร อาเมรียัม, อาเซมา บอ อาอีซาบา. อาอีซาบา บอ มูห ดัง มืง เอซาตามอ. เฆ มูห ฆอน นาง บีซียา อี มูห ฆอน คูนดีคัม แคง มืง แอฆึบ. 18 อีบึณ อาเมเรด อี มูห ดูอี อาโมยว ยูดา, อัน วี มึห ฆอน อีมาย อี จืร อาเยรีด อี แบน ดัง มืง เกตอ. อาเฮบา แบน ดัง มืง เซคอ. อาเยกูซีน แฮะ แบน ดัง มืง จานอ.

19 อาโฮวคียา บอ คัด ดึห วา อานาฮาม. หลูกหลาน ฆาย ตี บอ แบน ฆูณ ดัง เฆ ดูอี บอกาเฆลียด อี กอย แคง มืง ฆีลัะ, อี มูห ดูอี อาโมยว ฆามีด. อึณ มูห บอ เอซาตามอ อี มูห อาโมยว อามาคาทีด.

20 อาซีมูน วี มึห ฆอน อีมาย อี จืร อามานูน, อารีนา, อาแบนฮานา บอ อาตีโลน. อาอีซี มึห ฆอน อีมาย อี จืร อาจอเฮด บอ อาเบนจอเฮด.

21 อาเซลา บอ มูห ฆอน อายูดา อู วี. เฆ ดูอี อาโมยว อัน บอ มูห อาเอรา อี แบน ดัง มืง เลกา, อาลาตัะ บอ แบน ดัง มืง มาเรซา บอ พึง เฆ อี นับ ดี ด็อะ บีก กาตัม ลูย, อี กอย แคง มืง เบดอาซาบา ตึอน. 22 อึณ มึห บอ อาโยวคีม บอ ดูอี แคง มืง คอเฌพัะ บอ อาโยวอาด บอ อาซาราบ, เฆ อี อึบ ดูอี โมวอาบ, เฆ กอย แคง มืง เบดแลม. ลอง อัน ตี, แฮะ แดม อูน แคง ฌาราง อู ซีณ ดอ มึอน. 23 ดูอี เฆ ตี, เฆ มูห ดูอี อี นับ ดี โบง กาโละ กาดาย, เฆ โบง บอ ฆาน คูนดีคัม บอ กอย แคง มืง เนตีม บอ แคง มืง เกตีรา.

24 อาซีเมโอน มึห ฆอน อีมาย อี จืร อาเนมูลา, อายามีน, อายารีบ, อาเฌนรา บอ อาซาอูน. 25 อาซาอูน วี มึห ฆอน อีมาย อี จืร อาซาโลม. อาซาโลม วี มึห ฆอน อีมาย อี จืร อามีบาซาม. อามีบาซาม วี มึห ฆอน อี จืร อามีดมา.

26 เฆ หลูกหลาน อามีดมา บอ มูห ฆอน อัน อี จืร อาฮาโมวเยลา. ฆอน อาฮาโมวเยลา บอ มูห อาฌากูรา. ฆอน อาฌากูรา บอ มูห อาซีมี.

27 อาซีมี บอ วี มึห ฆอน อีมาย ฆึร ดี เดา วี. อัน มึห บอ ฆอน อีบึณ เดา วี. มาแล, แคง อาโมยว เฆ ตี, หลูกหลาน เฆ ตู บอ กืน แคะ เหมา. โคว, อึณโฮม เฆ อาโมยว อาซีเมโอน ตู กืน ปี เฆ อึณโฮม อายูดา. 28 หลูกหลาน อาซีมี เฆ กอย แคง มืง บีราเซบา, มืง มอลาดา, มืง ฮาฌาซูอาน, 29 มืง บีลาฮา, มืง เอเฌม, มืง ตอลาด, 30 มืง อาเบด, มืง ฮอมัะ, มืง ฌีกาลาด, 31 มืง เบดมาคาโบด, มืง ฮาฌาซูซีม, มืง เบดบีรี บอ มืง ซารีม. เฆ กอย แคง มืง เฆ ตี, แตห กอ ฌัม โจว บาน คูนดีคัม อาดาวีด. 32 แดง ตี เฆ บอ กอย บอ แคง เรา แคง มืง อี จืร มืง เอทาม, มืง อาอีน, มืง รีมโมน, มืง ตอเคน บอ มืง อาซาน. อึณ มึห ปอ พัน มืง. 33 อึณ บอ บา บอ เรา อี กอย กาตัด มืง เฆ ตี, กอ วี ฌัม มืง บาลัก. ปาย ตี เฆ แฮะ แดม อูน ลอง ดูอี เฆ บอ โดง กอย เฆ.

34 เฆ ดูอี อี แบน ดา ตาง แคง พึง เฆ ตี บอ จืร อาเมซอบาบ, อายามาเลก, อาโยวซา อี มูห ฆอน อามาฌียา, 35 อาโยวเอลัะ บอ อาเยฮู อี มูห ฆอน อายอซีพี. อึณ มูห บอ ฆอน อาเซรายา บอ ฆอน อาซีเอลา 36 บอ อาเอลีออเน, อายาโควพา, อาเยซอฮายา, อาซายา, อาดีเอน, อาเยซีแมน, อาบีนายา 37 บอ อาฌีซา อี มูห ฆอน อาซีพี. อึณ มูห บอ ฆอน อาลูน, ฆอน อายีตายา, ฆอน อาซีมารี บอ ฆอน อาเซมายา.

38 ดูอี เฆ ตี, เฆ มูห โตต ดา ตาง อี แยต ดูอี แคง พึง เฆ. อึณโฮม เฆ มืร แฮะ แว แบร กืน กาปัว. 39 โคว, เฆ บอ กาย็อห ฮาว บลาก นา เลห ซีแง กอ ฌัม เรต มืง เกตอ. เฆ บอ เบลห บอ เฮียง พึง มาบู มาแป เฆ บลาก นา เลห ซีแง ดีลัยะ โดง กอย เฆ ตี. 40 โดง กอย เฆ ตี, อึณ บอ มึห เปต กืน, เปต มืร บอด. อึณ บอ กาว็อห บอ ฆัด เยน ดาคึย ดอน บลาก. ดูอี อี แฮะ ดึอม กอย ดี ตี มูห ดูอี อาโมยว ฮามา มัง อี.

41 ดอ มูห โจว บาน คูนดีคัม อาเฮจัะกี อี อึบ มืง ยูดา ตึอน เฆ ดา ตาง ตึอน แฮะ ดึอม ฮาว กาโฆห ดี เฆ ดูอี ฮามา. เฆ มืร แฮะ ปยาต แวน ทึบ บีก เฆ, ปยาต แวน บอ ดูอี อาโมยว มอนี ปี ยึร ปี กาตูณ เฆ. เฆ บอ วี ปลูะ ดูอี เฆ ตี บอ วี กอย ดี ตี เซเซ. เฆ อึง โดง ตี โคว, อึณ มึห เปต กืน. กาดาย มืร บอด บอ ปึอน เฮียง ซีคยา พึง มาบู มาแป เฆ. 42 อู ซีแง เฆ ดูอี พัน มาย็อห วี อี มูห ดูอี แคง ครึร อาซีเมโอน เลห ฮาว นา เลห ซีแง โฮะ ดี นอน เซอี. เฆ ฆีณ ซึก บอ มูห ฆอน อีมาย อาอีซี. เฆ จืร อาเบลาทียา, อานารี, อาเรพายา, อาอูซีเอน. 43 เฆ บอ กาโฆห บอ ง็อห แวน ดูอี อามาเลก อี ซี ฆีด ซี กอย, เฆ อี แฮะ เตา อี แฮะ ลอด อาต นี. ปัน ตี เฆ บอ วี กอย ดี ตี กอ ฌัม ดอ ตี นี.