1 ปัน ตี อาดาวีด วี กาพา แคง น็อห อัน ต็อห, “โอว โยว อู ซีแง อาซอลู บอ ปึอน ดี ง็อห โอว. เซ โอว เตา ฮาว แคง มืง พีลีที, อึณ ดี มูห อึณ ดี หมึอม. เซ โอว เตา ฮาว ดี ตี, อาซอลู มืร ดี จู เหรต โอว แคง กาดาย ดูอี อีซาเรลัะ นี. โอว มืร ดี ปึอน เบลห น็อห, เบลห พึอม โอว. โอว ดี บอ ลอด ตัะ อัน.”

2 โคว, อาดาวีด บอ ดูอี อัน เดา มาย็อห วี ตึอน บอ วี ฮาว โดง กอย คูนดีคัม อาคีด อี มูห ฆอน อามาออคัะ, อี อึบ มืง ฆาทัะ ตึอน. 3 อาดาวีด เฆ ดูอี อัน เฆ ดอน อี บอ โย็ง อีบึณ อัน เฆ ฆอน อัน ฮาว กอย โดง กอย คูนดีคัม อาคีด แคง มืง ฆาทัะ ตึอน. บอ อีบึณ อาดาวีด อา วี ตึอน อี จืร นาง เอฮีนอง, อี มูห ดูอี มืง เยจาเรลัะ บอ นาง เอพีเฆลา อี มูห ดูอี มืง ฆาเมลัะ, อี มูห อีบึณ อานาบาลัะ ตึอน, ฆาย มืร แฮะ กอย โดบ อัน. 4 อี เฮา บอ กาลาง ดี อาซอลู ลอง อาดาวีด แฮะ เตา ฮาว ดี มืง ฆาทัะ. วาย ตี อาซอลู อาว ฮู โดบ ดี เหรต อัน.

5 อาดาวีด กาลาง ดี คูนดีคัม อาคีด ตึอน ต็อห, “เซ อึณ ล็อะ น็อห แม, หมาณ แตห แม ดัว กาดาย โดง ดี กอย แคง มืง อู มืง, แตห โอว ปึอน ดี กอย. อาว กาอาบ โอว กอย ดี รึม โดบ แม แคง มืง แม คูนดีคัม นี.”

6 โคว, ซีแง ตี คูนดีคัม อาคีด บอ ดัว มืง ฌีกาลาด ดี อัน. ซีณ ดอ อัน ตี มืง ฌีกาลาด แฮะ แบน มืง ปี อึบ คูนดีคัม อี อึบ มืง ยูดา กอ ฌัม อาตึร. 7 อาดาวีด บอ กอย แคง มืง เฆ ดูอี พีลีที อาดา อู ซีนัม ดี พวน มาเฆียน.

8 อู เฌณ อาดาวีด เฆ ดูอี อัน ตึอน บอ ฮาว โฌน ดูอี เฆซูรา, ดูอี เกนราจี บอ เฆ ดูอี อามาเลก. ซีณ อาต ตี ดูอี อาโมยว เฆ ตี, เฆ มูห ดูอี อี กอย แคง มืง ตี, เฆ กอย จูห ดี อึณเตณ อี ฮาว ดี มืง ซูรา กอ ฌัม มืง แอฆึบ. 9 อาดาวีด บอ กาโฆห ปยาต อู โปละ, บอ อีบึณ บอ อีมาย อัน อาว ฮู แตห ลอด คอ อู วี. อัน บอ ดึห มาบู, มามัก, มาโลว, มังปร็อง กาฮาต บอ ครึง เฆ, วี เวณ โดง กอย คูนดีคัม อาคีด ตึอน.

10 เซ คูนดีคัม อาคีด บอ ดีหมอด อาดาวีด ต็อห, “อาตึร นี แม แฮะ ตัห กาโฆห ดี เหมา?” อาดาวีด วี ต็อห, “โอว แฮะ ฮาว กาโฆห นา เตต มืง ยูดา.” เซ อาว ปาย ตี, อัน บอ ต็อห, “นา เตต มืง เยราเมเอม,” บอ “นา เตต มืง เฆ ดูอี อากีนี.” 11 อาดาวีด ตู แตห อึณ ซี มึห อีบึณ อีมาย คอ อู วี อี ปึอน ดี ดึห ตัห ดี มืง ฆาทัะ ตึอน. โคว, อัน ต็อห, “โยว เฆ กาลาง ลอง แปะ แฮะ โบง โอว นี บอ ต็อห, ‘อาดาวีด แฮะ โบง ปาย นี ปาย นี.’” ดอ กอย อัน แคง มืง พีลีที ตึอน, อาดาวีด นับ ดี โบง ปาย ตี. 12 คูนดีคัม อาคีด บอ หณึม โฆรห อาดาวีด. อัน ต็อห, “อัน แฮะ โบง กอ ฌัม บล็อะ ดูอี อีซาเรลัะ, แตห เฆ กอ กาอีห อัน. โกบ อัน ปาย นี, อัน โลว คัม ดี แบน หมาย โอว บอ โจว อัน.”