คาน 28
ลอง อาซอลู ดีหมอด กานัม
1 ดอ อัน ตี ดูอี พีลีที บอ แดะ แคะ กอย ดา ซึก เฆ ตัห กาฌูะ, ต็อห ดี กาโฆห ดี ดูอี อีซาเรลัะ. คูนดีคัม อาคีด บอ กาลาง ดี อาดาวีด ต็อห, “แตห แม นับ, บอ แม บอ ดูอี แม, เบ โลว ฮาว กาโฆห โดบ โอว.”
2 อาดาวีด วี ต็อห ดี คูนดีคัม อาคีด, “คา นี, แม ดี นับ อาคัร หมาน ปี ดี ปาย โอว ดี โบง.” แฮะ ฮอต, คูนดีคัม อาคีด วี ต็อห, “เซ อึณ ปาย ตี โอว ดี แตห แม แบน ดา อี อี บัร อาซาก โอว เซเซ.”
3 ดอ อัน ตี อาซามูเอน แฮะ ฮอต ยัม. ดูอี อีซาเรลัะ บอ ยาม กลึร. เฆ บอ ดึห โดว อาซามูเอน, ดีบ อัน แคง มืง รามา อี มูห มืง โดง กอย บรีม อัน. อาซอลู แฮะ ดึอม ณอน แวน ยา เปร บอ เฆ ดูอี อี แดะ กานัม โลง แคง มืง บอ มืง, แตห เฆ เลห ฮาว ตัะ มืง.
4 ปัน ตี ดา ซึก ดูอี พีลีที บอ ตัห คยัะ ดี มืง ซูนีม. อาซอลู บอ แดะ แคะ กอย ดูอี อีซาเรลัะ บอกาเฆลียด ตัห กาฌูะ. เฆ บอ คยัะ แดง นอน ฆีลัะปอ ตึอน. 5 อาซอลู บอ ยึร พึง ดูอี พีลีที เฆ ตึอน, อัน บอ มึห น็อห โยว น็อห ดีเยณ. 6 อัน ดีหมอด ดี เฌาพรา. เฌาพรา ยี ตู อึร โฆรห อัน. อัน ตู แตห เฆ อีด อึณบาว. บอ มาว อูรีม ตู แตห เฆ นับ. บอ ดูอี บยาน โฆรห เฌาพรา ตู นับ ดี กาลาง มาเซ. 7 ปัน ตี อาซอลู กาลาง ดี หมาย อัน ต็อห, “แตห เบ เหรต ยา กานัม โลง ดึห ตัห โดง กอย โอว. แตห โอว ดีหมอด อัน.”
หมาย อัน วี ต็อห, “แคง มืง อีนตอลัะ อึณ มึห ยา กานัม โลง อู วี.”
8 ปัน ตี อาซอลู บอ กาปลูะ ครึง อัน, แตห อารึบ อัน บลืง. อัน บอ โย็ง ดูอี อา วี ฮาว โดบ อัน. แปร มืร แฮะ อับ, เฆ บอ ฮาว ฌัม โดง กอย ยา กานัม โลง ตึอน. อาซอลู บอ ดีหมอด ต็อห, “หมาณ ดี บึง กานัม อี กอย รึม โดบ แม ตี. หมาณ, วี ปี ดี กาลาง โอว ดี แม, แตห แม แดะ อัน ตัห.”
9 อีบึณ ตึอน วี ต็อห, “แม แฮะ นับ ปี โบง อาซอลู. อัน แฮะ โฮว ยา เปร บอ ดูอี อี แดะ กานัม, แตห เฆ เลห แคง มืง บอ มืง. เหมา อึณ ปาย ปี วี คราม แม ดี ดีณ ยอต, แตห บอ โอว ยัม?”
10 อาซอลู บอ ดืง, แตห บอ เฌาพรา โทม, ต็อห ดี อัน, “โอว ต็อห อาคัร ดี แม. เซ แม โบง ปี ต็อห โอว ตี, อาว แบน หมาบ ดี แม, อาว โลว คัม หมาบ.”
11 อีบึณ ตึอน ปี วี ดีหมอด ต็อห, “แม ซี แตห อาเซ ตัห ฌัม ดี นี?”
อาซอลู วี ต็อห, “แตห อาซามูเอน ตัห.”
12 อีบึณ ตึอน บอ ยึร อาซามูเอน, อัน ปี วี ดัด ตาง ต็อห ดี อาซอลู, “โกบ อึณ ปาย เหมา, แม กาโลว โอว? แม นี แฮะ มูห อาซอลู.”
13 คูนดีคัม วี กาลาง ดี อัน ต็อห, “แม แกวะ โยว, แตห โอว นับ ปี ยึร แม ตี.”
อีบึณ ตึอน วี ต็อห ดี อาซอลู, “โอว แฮะ ยึร กาเปรา อี แฮะ เลห แดง กาดาย, ตัห ดี โอว.”
14 คูนดีคัม ปี วี ดีหมอด ต็อห, “อารึบ อัน, อึณ ปาย เหมา?” อีบึณ ตึอน วี ต็อห, “อึณ มูห ดูอี กัด อี ตัห. อัน ชึบ บอ ซีโตว ตาง.”
ปัน ตี อาซอลู บอ นับ, แฮะ มูห อาซามูเอน. อัน บอ มูด ฆึบ ดี กาดาย อู เฌณ.
15 อาซามูเอน บอ ดีหมอด อาซอลู ต็อห, “เหมา อึณ ปาย ปี บยีต แม ดี โอว, แตห โอว ตัห ดี นี?”
แฮะ ฮอต, อาซอลู วี ต็อห, “โอว แฮะ ฌัม ดูก ตาง, แฮะ หณาบ กาเซา. ดูอี พีลีที เฆ แฮะ กาโฆห ดี โอว. เฌาพรา มืร แฮะ แวน โอว. เซ โอว ดีหมอด อัน, อัน ตู อึร โฆรห โอว. อัน ตู แตห ดูอี บยาน โฆรห เฌาพรา, กาลาง ดี โอว. อึณบาว มืร อาว ฮู แตห. โกบ อึณ ปาย ตี โอว บาง แม ซารา ตัห, แตห แม กาลาง แหน ปี ดี โลว โบง โอว.”
16 อาซามูเอน วี ต็อห, “เซ เฌาพรา แฮะ แวน แม, แฮะ วี แบน รันซู ดี แม, เหมา อึณปาย ปี โลว แม วี ดีหมอด โอว? 17 เฌาพรา แฮะ โบง โดบ ปี กาลาง อูน อัน ดี โอว ตึอน. เฌาพรา ดี ดึห เลห มาน มืง ดี แม, วี ดัว ดี ดูอี อี กอย กาตัด แม อี มูห อาดาวีด ตึอน. 18 แม ตู โบง ปี จัร เฌาพรา แม โบง ดอ รู กาเซา อัน ดี ดูอี อามาเลก ตึอน. โกบ ตู โทม แม โฆรห เฌาพรา ตี, อาตึร นี แม กาดูห ดี คัม ดูก ฌึร นี. 19 แดง ตี, เฌาพรา ดี ดึห บอ แม, บอ ดูอี อีซาเรลัะ, วี ดัว เบ ดี ดูอี พีลีที แตห เฆ แป เบ. แคหณา บอ แม, บอ ฆอน อีมาย แม, เบ ดี ตัห ฌัม โดง กอย โอว. เฌาพรา ดี บอ ดึห แตห ดูอี พีลีที ปึอน ดี อึบ บอ ดา ซึก เบ.”
20 อาซามูเอน แฮะ ฮอต กาลาง โฆรห ตี, อาซอลู บอ เกห, อีด กาแหนบ ดี กาดาย. อัน บอ โยว กาเซา โกบ โฆรห ปี กาลาง อาซามูเอน ตึอน. โกบ ตู โฮม อัน มาเซ อู หมึร ดี อู ซีแง, อัน ฮู มึห แฮณ มาเซ.
21 ยา กานัม โลง ตึอน วี ตัห โดง กอย อาซอลู. อัน บอ ยึร แฮะ ดูก แฮะ หณาบ กาเซา ดี น็อห อาซอลู, อัน บอ ต็อห, “แม ยอด, โอว แฮะ โทม โฆรห แม ดา กาณา. โอว มืร ตู โยว ดี ยัม. โอว มืร โทม โดบ ปี กาลาง แม ดี โอว. 22 โคว, ดอ ตี นี, หมาณ แตห แม วี โทม โฆรห โอว. แตห โอว ปึอน ดี ดึห ปี ดี โฮม อี แจก, เบลห แตห แม โฮม. แตห แม วี มึห แฮณ, วี ปึอน ดี ฮาว.”
23 แฮะ ฮอต, อัน วี ต็อห, “โอว ตู โฮม.” อี มูห หมาย อัน เฆ ดูอี อัน บอ อีบึณ ตึอน, เฆ บอ เหลา น็อห อัน. แฮะ ฮอต, อัน บอ โทม โฆรห เฆ. อัน บอ ยีต ดี กาดาย ตึอน, วี ฮาว ตูต แดง กาโช็ง.