1 ปัน ตี อึณ วี มึห ดูอี อี กอย แคง มืง จีพัะ. เฆ วี ตัห โดง กอย อาซอลู ดี มืง ฆีบียา ตึอน ต็อห, “อาดาวีด วี เครียง อัน ดี นอน ฮาคีลัะ อี กอย นา อาต โดง จืร เยซีโมน ตึอน.”

2 อาซอลู บอ ร็อห ดูอี อีซาเรลัะ โอย แหรณ วี แตห เฆ โดบ อัน ฮาว แคง แปร จีพัะ ตึอน, แตห เฆ เหรต อาดาวีด ดี ตี. 3 อาซอลู บอ คยัะ ดี นอน ฮาคีลัะ อี กอย นา อาต เยซีโมน ดี โคบ อึณเตณ ตึอน. อาดาวีด มืร กอย แคง แปร ตี. อาดาวีด บอ นับ, อาซอลู แฮะ ตัห เหรต อัน. 4 อัน บอ จัร ดูอี ฮาว คยอง ดี ยอด, แตห เฆ กอ นับ, อาซอลู แฮะ ตัห ฌัม อาคัร หมาน.

5 อาดาวีด บอ ยีต ฮาว ฌัม โดง คยัะ อาซอลู. อัน บอ ยอด โดง อีด อาซอลู ฆาย ดา โบว อี อึบ ดา ซึก อัน. ดา โบว ตี อัน จืร อาบานา. อัน มูห ฆอน อาเนรัะ. อาซอลู ยี อีด โดง คยัะ เฆ ตี. เฆ ดา ซึก อัน บอ กอย อีด กอ โรบ อัน.

6 อาดาวีด บอ ดีหมอด อาฮีมาเลก อี มูห ดูอี อาโมยว เฮทีด. อัน ดีหมอด บอ อาพีเซ อี มูห วา อายอพัะ, อี มูห ฆอน นาง เจรูยา. อัน ต็อห, “อาเซ ดี โดบ โอว โลง โดง กอย อาซอลู ตึอน?”

อาพีเซ วี ต็อห, “โอว อี ดี โดบ แม.”

7 อาดาวีด ฆาย อาพีเซ บอ ฮาว โดง กอย อาซอลู แคง หมึร ตี. ฆาย บอ ยึร อาซอลู อีด โดง คยัะ อัน. บลา เลียห อัน, อัน ซีะ กาจ็อง ดี กาดาย โคบ ฆีณ อัน. อาบานา บอ ดูอี เฆ ตึอน อีด โรบ อัน.

8 อาพีเซ ต็อห ดี อาดาวีด, “อาตึร นี เฌาพรา ดี แตห แม แป รันซู แม. โคว, แตห แม แตห โอว ดึห บลา เลียห โอว, ซัด อู เฌณ, แตห อัน กาหลูห ฌัม กาดาย. อาว โลว วี ซัด ปอ อู เฌณ.”

9 อาดาวีด วี กาลาง ดี อาพีเซ ต็อห, “แกวะ ง็อห แวน อัน. อัน มูห ดูอี ปี พ็อห เฌาพรา นามัน ดี ฆีณ อัน. อาเซ ง็อห อัน, อึณ ดี บอ แบน หมาบ ดี อัน.” 10 ปัน ตี อาดาวีด วี กาลาง ต็อห, “โอว ต็อห อาคัร หมาน ดี แม. เฌาพรา อี ดี ง็อห อัน. เซ อาว โกบ มูห อัน ยัม ดาคึย, อัน ดี ยัม ดอ กาโฆห อัน. 11 อึณ ยี มูห โอว, โกบ แฮะ แตห เฌาพรา อี พ็อห นามัน ดี ฆีณ อัน, โอว ตู โบง นา ตู หมึอม ดี อัน ดอ เหมา. โคว, ดอ ตี นี แตห แม ดึห บลา เลียห บอ กาเปา อึม อี กอย โคบ ฆีณ อัน. แฮะ ฮอต, แตห อาย ฮาว เวณ.”

12 ปัน ตี อาดาวีด บอ ดึห ฮาว บลา เลียห บอ กาเปา อึม อี กอย โคบ ฆีณ อาซอลู ตึอน. อาว มึห คอ อู วี อี นับ ลอง อัน ตี. อาว มึห อี อึณซึห คอ อู วี. โคว, เฌาพรา แฮะ แตห เฆ อีด ตาง, อีด ลึก ดอน วี.

13 อัน แฮะ ฮอต ฮาว, อาดาวีด บอ กาโลห ฮาว นา ดอย ดีลัยะ ตึอน. อัน บอ ฮาว กอย ดี นอน อี ราม กาโต็ง. นา กาแต เฆ ตี, อึณ ซี กาว็อห. 14 อาดาวีด บอ แดะ ดูอี เฆ ตึอน. อัน บอ ดีหมอด อาบานา อี มูห ฆอน อาเนรัะ. อัน ต็อห, “อึย อาบานา, แม ตู อึร โฆรห โอว?”

อาบานา วี ต็อห, “อาเซ อี ตัห แดะ คูนดีคัม?”

15 อาดาวีด วี ต็อห ดี อาบานา, “โอว ทาง, แม มูห อีมาย. แคง ดูอี อีซาเรลัะ อาว มึห อาเซ อี แฮะ ปี แม. โกบ อึณ ปาย เหมา, แม ตู บัร ซีคยา คูนดีคัม อี อึบ แม? ดูอี อู วี แฮะ ตัห ต็อห ดี ง็อห ยัม คูนดีคัม แม. 16 แปะ แฮะ โบง แม นี อาว หมึอม. แฮะ หมาน อาคาคัร, บอ แม บอ ดา ซึก แม แฮะ กาอาบ ยัม โกบ ตู บัร ซีคยา แม ดา กาณา แม อี มูห ดูอี แปะ แฮะ พ็อห เฌาพรา นามัน ดี ฆีณ อัน. ดอ ตี นี, แม ยอด, บลา เลียห ฆาย กาเปา อึม ปี ตา คูนดีคัม, อี กอย โคบ ฆีณ อัน ตึอน, อึณ ซี มึห, อาว มึห?”

17 อาซอลู บอ นับ, อึณ แฮะ มูห โฆรห อาดาวีด. อัน วี ต็อห, “อึย ฆอน โอว อาดาวีด, แฮะ มูห โฆรห แม?” อาดาวีด ปี วี ต็อห, “แฮะ มูห โฆรห โอว, แม คูนดีคัม อี อึบ โอว. 18 โกบ อึณ ปาย เหมา, แม ดา กาณา โอว เหรต โอว? มาเซ ปี โบง โอว? หมาบ มาเซ ปี โบง โอว? 19 ดอ ตี นี แม คูนดีคัม, แตห แม โทม โฆรห โอว. เซ เฌาพรา แฮะ แตห แม กาแคณ ดี โอว, หมาณ แตห เฌาพรา ดึห ปีหลู โอว. เซ อึณ ยี มูห ดูอี อี แตห แม กาแคณ ดี โอว, แตห เฌาพรา ดืง เฆ. เฆ แฮะ โฮว เลห โอว, แกวะ แตห โอว กอย แดง กาดาย ปี ดัว เฌาพรา ดี ฆูณ โอว. เฆ บอ ต็อห, ‘เลห ฮาว, วี กรึบ เฌา ปี กรึบ อี เฮา.’ 20 โคว, ดอ ตี นี โอว หมาณ, แกวะ แตห โอว ยัม กาโต็ง โดง กอย เฌาพรา. แม คูนดีคัม อีซาเรลัะ, แม แฮะ เลห เหรต โอว. อึณ ปี แม เหรต มาซีเดียน. เบ บอ เหรต โอว ปี เบ โดบ ดี เหมต มาดีกูด.”

21 อาซอลู วี ต็อห, “โอว แฮะ ฮอต ลูต. อึย แม ฆอน โอว อาดาวีด, แตห แม วี ตัห. โกบ แฮะ กาเว แม ดี โอว อาตึร นี, โอว มืร ฮู โบง นา ตู หมึอม ดี แม วาย นี. โอว แฮะ โบง นา มืก, แฮะ ลูต กาเซา.”

22 อาดาวีด วี ต็อห, “อึย แม คูนดีคัม, แม ยอด, บลา เลียห แม อี กอย ดี แด โอว นี, แตห แม จัร ฆอน ดีรอย อู วี ตัห ดึห ดี โอว. 23 เฌาพรา ดี ดัว อาฆยึร ดอน อี อี มึห น็อห ซืร น็อห หมาน. เฌาพรา แฮะ อาบ แม ดี โอว อาตึร นี. โอว ยี ตู โบง มาเซ ดี แม อี มูห ดูอี แปะ แฮะ พ็อห เฌาพรา นามัน ดี ฆีณ อัน. 24 แม ยอด, โอว แฮะ กาเว อาซาก แม อาตึร นี. โอว วี หมาณ, แตห เฌาพรา บอ กาเว อาซาก โอว, แกวะ แตห โอว กาดูห ดูก ดอน โมยว.”

25 อาซอลู วี ต็อห ดี อาดาวีด, “อึย แม ฆอน โอว อี จืร อาดาวีด, แม ดี โบง อี คึกคัม คัม แบน โมยว แบน โมยว. ปี ดี โบง แม ดอน โมยว, อึณ ดี ออง.”

แฮะ ฮอต ปัน ตี อาดาวีด บอ เลห ฮาว. อาซอลู มืร บอ วี เวณ ดี กาง อัน.