ปัน ตี เฆ บอ วี กาลาง ดี อาดาวีด ต็อห, “แม ยอด, ดูอี พีลีที แฮะ วี กาโฆห ดี มืง ฆีลัะ. เฆ แฮะ ฮาว โดง มัห เฆ โหงว, ดึห ฮาว โตต โหงว.” 2 อาดาวีด บอ ดีหมอด เฌาพรา ต็อห, “อึณ ปึอน ฮาว กาโฆห ดี ดูอี พีลีที เฆ ตี?”

เฌาพรา วี กาลาง ดี อาดาวีด ต็อห, “ฮาว, กาโฆห ดี เฆ, แกวะ แตห เฆ ปึอน ดี อึบ มืง ฆีลัะ ตี.”

3 ดูอี อาดาวีด วี กาลาง ดี อัน ต็อห, “เอ กอย มืง ยูดา นี มืร, เอ ซี บอ โยว. เซ เอ ฮาว กาโฆห ดี ดา โบว ดูอี พีลีที ดี มืง ฆีลัะ ตี, เอ ดี แว โยว กาเซา.”

4 ปัน ตี อาดาวีด ปี วี ดีหมอด เฌาพรา อึณ ปัว. เฌาพรา วี ต็อห, “แตห แม ฮาว ดี มืง ฆีลัะ ตี. โอว ดี แตห แม แป ดูอี พีลีที.” 5 อาดาวีด บอ แดะ ดูอี อัน, แตห เฆ ฮาว ดี มืง ฆีลัะ ตี. เฆ บอ กาโฆห ดี ดูอี พีลีที บอ ดึห ฮาว บอ โดว ซัดดาวา เฆ. เฆ บอ ง็อห ยัม กืน ดูอี พีลีที บอ คยอด ดูอี มืง ฆีลัะ ตี. 6 อาบาทา อี มูห ฆอน อาฮีมาเลก ตึอน, ดอ ตัห อัน โดง กอย อาดาวีด ดี มืง ฆีลัะ ตึอน, อัน บอ โฆ็ง ตัห บอ ซีโตว เอโพด ตึอน.

7 อี เฮา บอ กาลาง ดี อาซอลู ลอง อาดาวีด แฮะ ตัห ฌัม ดี มืง ฆีลัะ. อาซอลู วี ต็อห, “เฌาพรา ดี แตห โอว ปึอน ดี เหมต อัน. อัน แฮะ ลึบ แคง มืง อี มึห มาโลห, มึห แซ. อึณ ปี อัน แฮะ คร็อง อูน โดว อัน แคง กาปึม.” 8 อาซอลู บอ แดะ กาฌูะ แคะ กอย ดูอี อัน, บอ แรน ซึก อัน ฮาว ดี มืง ฆีลัะ ตี.

9 อาดาวีด บอ ยึร ลอง อาซอลู แฮะ คราม ดี โบง อี ตู หมึอม ดี อัน, อัน บอ กาลาง ดี อาบาทา อี มูห ดา อี หลู ดี เฌาพรา ต็อห, “แม ดึห ตัห ซีโตว เอโพด แม ดี นี.” 10 ปัน ตี อาดาวีด บอ วี ต็อห, “อึย แม เฌาพรา, แม มูห เฌาพรา อี อึบ ดูอี อีซาเรลัะ, โอว อี มูห แดเจณ แม แฮะ ยึร, อาซอลู แฮะ คราม ดี ตัห ดี มืง ฆีลัะ นี. อัน ซี ตัห ปยาต แวน มืง นี โกบ กอย โอว ดี นี. 11 แตห แม กาลาง ดี โอว, เฆ ดูอี มืง ฆีลัะ นี ดี อาบ โอว ดี อัน? โยว อาซอลู ดี ตัห หมาน โดบ ซาดาง ปี ยึร โอว ตี? เฌาพรา, แม มูห เฌาพรา ดูอี อีซาเรลัะ. โอว หมาณ, แตห แม กาลาง ดี โอว.”

อัน แฮะ ฮอต ซาคึร ปาย ตี เฌาพรา วี ต็อห, “อาซอลู ดี ตัห หมาน.”

12 อาดาวีด ปี วี ดีหมอด ต็อห, “ดูอี มืง ฆีลัะ นี ดี อาบ โอว บอ ดูอี โอว ดัว ดี อาซอลู?”

เฌาพรา มืร วี ต็อห, “เฆ ดี อาบ ดัว แม ดี อัน.”

13 ปัน ตี อาดาวีด เฆ ดูอี อัน เดา มาย็อห วี ตึอน, เฆ วี เลห ดี มืง ฆีลัะ ตี, วี ฮาว แบน โปละ แบน โปละ, โดง ปึอน เฆ ฮาว. อี เฮา ปี วี กาลาง ลอง อาดาวีด แฮะ ฮอต เลห เตา ดี อาซอลู ตัะ มืง ฆีลัะ ตี, อาซอลู มืร อาว ฮู ฮาว.

14 อาดาวีด บอ ฮาว กอย แคง แปร อี มึห โดง ปึอน เครียง ซีคยา อัน, โดง กอย กาแต นอน แคง แปร จีพัะ ตึอน. อาซอลู ปี บอ เหรต อัน ดอน ซีแง มืร, เฌาพรา ตู อาบ อัน ดี อาซอลู.

15 อาดาวีด แฮะ นับ ลอง อาซอลู แฮะ ฮาว เหรต ดี ง็อห อัน. อัน มืร ยี ซี กอย แคง แปร อี จืร จีพัะ แคง นัง เฮ ตึอน. 16 อาโยวนาทาน อี มูห ฆอน อาซอลู ตึอน, อัน บอ ฮาว โดง กอย อาดาวีด แคง นัง เฮ ตี, วี จอย แตห อัน แว บึง ซีคยา เฌาพรา. 17 อาโยวนาทาน กาลาง ดี อาดาวีด ต็อห, “แม แกวะ กลึร, ฆูณ โอว อี มูห อาซอลู ตู ปึอน ปาย เหมา ดี แม. แม ดี แบน คูนดีคัม อี อึบ ดูอี อีซาเรลัะ. ครึม แม แฮะ มูห โอว อี ดี อึบ. ลอง อัน ตี มืร, ฆูณ โอว แฮะ ฮอต นับ.” 18 ฆาย บอ ลาย กาแซณ โบง กาดีก ซัดฌา แตห บอ เฌาพรา โทม. แฮะ ฮอต, อาดาวีด บอ วี กอย แคง นัง เฮ ตึอน. อาโยวนาทาน บอ วี เวณ ดี กาง อัน.

19 ปัน ตี ดูอี อี กอย แคง มืง จีพัะ เฆ บอ กาโพรม ดี ฮาว โดง กอย อาซอลู ดี มืง ฆีบียา. เฆ บอ ต็อห, “อาดาวีด แฮะ ฮาว กอย เครียง อัน กาแต นอน โดง กอย เย, โดง มูห แคง นัง เฮ ดี นอน ฮาคีลัะ อี กอย นา เตต โดง จืร เยซีโมน. 20 โคว, เซ แม คูนดีคัม ซี ฮาว, หมาณ แตห แม ฮาว. เย ดี อาบ ดูอี วี ตี ดี แม คูนดีคัม.”

21 อาซอลู วี ต็อห, “แตห เบ ปึอน นา บอด ปี ม็องการา ดัว เฌาพรา. เบ แฮะ กาเว โอว. 22 ดอ ตี นี แตห เบ ฮาว ยอด, แตห เบ นับ ซีคยา โดง เครียง อัน. แตห เบ เหรต อาเซ แฮะ ยึร อัน. อี เฮา ต็อห, อัน แฮะ ปีหล็อก กืน กาเซา ดี โอว. 23 โคว, อึณ โลว ยอด, แตห เบ โนว, แตห เบ นับ ดอน โปละ โดง เครียง โดง กอย อัน. เซ เบ ฮี นับ ซีคยา, แตห เบ วี ตัห กาลาง ดี โอว. โอว ดี ฮาว รึม โดบ เบ. เซ อัน บอ ซี กอย มืง ตี, แคง ดูอี อายูดา แบน หมึณ แบน แหรณ, โอว ดี ฮาว เหรต, แตห โอว กอ ยึร อัน.”

24 เฆ บอ ฮาว แคง แปร จีพัะ ตึอน ดี อาต อาซอลู. อาดาวีด เฆ ดูอี อัน, เฆ ยี ซี กอย แคง แปร มอนัะ แคง ฆลัง อาราพัะ นา เตต มืง เยซีโมน ตึอน. 25 อาซอลู บอ ดูอี อี โดบ อัน, เฆ บอกาเฆลียด บอ ฮาว เหรต อาดาวีด. อึณ บอ มึห อี กาลาง ดี อาดาวีด. โคว, อัน วี โลง ดี นอน มาว ดาอาง ตาง, วี ฮาว กอย แคง แปร มอนัะ. อาซอลู บอ ยึร ลอง อัน ตี, อัน บอ วี ฮาว เหรต อาดาวีด แคง แปร มอนัะ ตึอน.

26 อาซอลู บอ ฮาว ดี นอน อู บลาก, อาดาวีด เฆ ดูอี อัน บอ กอย ปอ บลาก, โฆยวฆยา แตห เฆ ปึอน ดี เลห ฮาว. อาซอลู เฆ ดูอี อัน แฮะ โรบ อาดาวีด เฆ ดูอี อัน, แฮะ รีน ดี ปึอน ดี เหมต เฆ. 27 ดอ อัน ตี อึณ บอ มึห ดาลาม อู วี ตัห ฌัม โดง กอย อาซอลู. อัน ต็อห, “แตห แม วี ตัห ครัน ครัน, ดูอี พีลีที เฆ แฮะ ตัห ลึบ แคง มืง แม, แฮะ ปรา โกรว เอ.” 28 ปัน ตี อาซอลู บอ จู เหรต อาดาวีด. อัน บอ วี ฮาว โดง กอย ดูอี พีลีที ตึอน. โกบ อึณ ปาย ตี ดี ตี เฆ แตห อัน จืร ซีลัะฮัมมาดูด. 29 อาดาวีด บอ เลห โดง กอย อัน ตี, วี เวณ โดง ปึอน ดี เครียง ซีคยา อี มูห แคง กาดาย เอนเกดี ตึอน.