อาดาวีด บอ เตา เลห ดี มืง ฆาทัะ ตึอน, บอ วี ฮาว กอย ดี กาเดา มาว อี จืร อาตูลัม ตึอน. อีกัด อัน เฆ วอแว อัน บอ ยึร ลอง อัน, เฆ บอ ฮาว โดง กอย อัน. 2 แคะ กอย เฆ ดูอี อี มึห นี อี ทูก อี เฮา บอ เฆ อี มึห ดูก แบน โมยว แบน โมยว บอ เฆ ดูอี อี ตู อึง ดา กาณา เฆ, เฆ บอกาเฆลียด บอ ฮาว โดง กอย อาดาวีด ตึอน, วี โดบ อัน. เฆ กอย พวน มาย็อห วี.

3 อาดาวีด บอ วี ฮาว ดี มืง มีฌาพา แคง กาดาย มืง โมวอาบ. อัน บอ กาลาง ดี คูนดีคัม อี อึบ มืง โมวอาบ ตี ต็อห, “อาต หณัม นับ โอว ลอง ปี ดี โบง เฌาพรา ดี โอว นี, โอว หมาณ แตห แม แตห ฆูณ มา โอว ตัห กอย โดง กอย แม.” 4 อัน บอ แตห ฆูณ มา อัน ตัห กอย โดบ คูนดีคัม อี อึบ มืง โมวอาบ ตึอน. เฆ บอ กอย ดี ตี ดอ กอย อาดาวีด แคง โดง เครียง อัน ตึอน.

5 ปัน ตี อึณ มึห ดูอี บยาน โฆรห เฌาพรา อี จืร อาฆัด. อัน บอ กาลาง ดี อาดาวีด ต็อห, “แม แกวะ กอย แคง โดง เครียง แม ตี, แม เลห ฮาว กอย ดี มืง ยูดา.” โคว, อาดาวีด บอ ฮาว ฌัม แคง แปร อี จืร ฮาเรด ตึอน.

6 ดอ อัน ตี อาซอลู กอย ดี นอน อี กาตัด มืง ฆีบียา. อัน ซี โฆ็ง บลา เลียห อัน, กอย ครึม เฮ. บอ เฆ อามู อามาด อัน กอย รึม โดบ อัน. อึณ บอ มึห ดูอี กาลาง ดี อัน ลอง แฮะ วี ยึร เฆ อาดาวีด บอ ดูอี อี โดบ อาดาวีด. 7 อาซอลู บอ กาลาง ดี เฆ อี จ็อง โรบ อัน ต็อห, “อึย เบ ดูอี แคง ครึร อาเบนยาม, แตห เบ โทม โฆรห โอว. ฆอน อาเยเซ ตึอน ตู มึห ดี กาซาง ดัว มาน เฆ โดง นา บอ กาปึม เบล มางูน ดี เบ. อัน ตู ปึอน แตห เบ แบน ดา โบว วี อึบ ดา ซึก แบน แหรณ แบน มาย็อห. 8 เซ อึณ ปาย ตี เหมา อึณ ปาย ปี ปรา เบ ดี โบง นา ตู หมึอม ดี โอว? แคะ กอย เบ, อาว มึห คอ อู วี อี กาลาง ดี โอว ลอง ฆอน โอว แฮะ ลาย กาแซณ ดี ฆอน อาเยเซ ตี. แคะ กอย เบ, อาว มึห อี กาเว โอว, อาว มึห อาเซ อี กาลาง ลอง ฆอน โอว แฮะ วี กาซูห ดีแบ โอว อู วี, แตห อัน บัร ดี กาโฆห ดี โอว, ปี ปี โบง อัน อาตึร นี.”

9 อาโดวกัะ อี มูห ดูอี อาโมยว เอโดม ตึอน, อัน บอ กอย รึม โดบ เฆ อามู อามาด อาซอลู ตึอน. อัน บอ ต็อห, “โอว แฮะ ยึร ฆอน อาเยเซ แฮะ ฌัม ดี มืง โนวบัะ, แฮะ ตัห โดง กอย อาฮีมาเลก อี มูห ฆอน อาฮีโตบ ตึอน. 10 อาฮีมาเลก บอ ดีหมอด เฌาพรา ดาง อัน. อาดาวีด บอ ดึห ปี ดี โฮม บอ มา ปัวะ ลาง ปี ดึอม โฆ็ง อากอลาด อี มูห ดูอี พีลีที ตึอน.”

11 คูนดีคัม บอ จัร อี แดะ ดูอี หลู ดี เฌาพรา อี จืร อาฮีมาเลก, อี มูห ฆอน อาฮีโตบ ตึอน บอ อึณโฮม ฆูณ อัน. เฆ บอกาเฆลียด แฮะ แบน ดูอี หลู ดี เฌาพรา อี กอย ดี มืง โนวบัะ ตึอน. เฆ บอ กาโพรม ดี ตัห โดง กอย คูนดีคัม ตึอน. 12 อาซอลู บอ กาลาง ต็อห, “ฆอน อาฮีโตบ, แตห แม โทม.” อัน มืร วี ต็อห, “โอว แฮะ กอย ดี นี, แม คูนดีคัม.”

13 อาซอลู วี ต็อห, “โกบ อึณปาย เหมา, บอ แม บอ ฆอน อาเยเซ ตึอน แฮะ ปรา ดี โบง นา ตู หมึอม ดี โอว? บอ คามูน, บอ มา ปัวะ ลาง แม แฮะ ดัว ดี อัน. แม แฮะ ดีหมอด บอ เฌาพรา ดาง อัน, แตห อัน ปึอน ดี แวน โอว, วี บัร ดี ฆยาม โอว, กอ ฌัม อาตึร นี.”

14 อาฮีมาเลก วี กาลาง ดี คูนดีคัม ต็อห, “กาแต ดีแบ แม บอ กาแต ดูอี แม เฆ นี, อาว มึห อาเซ อี โดบ ซีคยา แม ปี เอียะ แม, อี มูห อาดาวีด ตี. อัน ดี ลึบ ลึบ, เลห เลห, โบง ปี จัร แม. ดอน อี โฆม อัน แคง โฮว แม นี. 15 โอว มืร แฮะ ดึอม ดีหมอด เฌาพรา ดาง อัน แบน เฌณ แบน เฌณ. แม แกวะ ทาง, บอ โอว บอ ครึร โอว แฮะ โบง นา ตู หมึอม. ลอง อามู ปี ต็อห แม ตี โอว ตู นับ มาเซ.”

16 คูนดีคัม วี ต็อห, “อึย อาฮีมาเลก, บอ แม บอ อึณโฮม ฆูณ แม, เบ ดี กาดูห ดี ยัม อาคัร หมาน.”

17 อัน แฮะ ฮอต ต็อห ปาย ตี, คูนดีคัม วี ดัม ดี ดา ซึก อี กอย บัร โรบ อัน ต็อห, “แตห เบ ดึห ดูอี อี หลู ดี เฌาพรา ตี, ง็อห ยัม. เฆ แฮะ จอย อาดาวีด, แฮะ นับ ลอง อาดาวีด แฮะ เตา, เฆ ยี ตู กาลาง แตห โอว นับ.”

อัน แฮะ ฮอต ต็อห ปาย ตี, เฆ อามู อามาด อัน ยี ตู ยัะ ง็อห ดูอี อี หลู ดี เฌาพรา เฆ ตึอน.

18 ปัน ตี คูนดีคัม วี กาลาง ดี อาโดวกัะ ต็อห, “แตห แม ง็อห ดูอี หลู ดี เฌาพรา เฆ นี.” อาโดวกัะ อี มูห ดูอี อาโมยว เอโดม ตึอน, อัน บอ ง็อห แวน ดูอี อี หลู ดี เฌาพรา เฆ ตึอน ดา ฆึร ดี พัน วี, อี มูห เฆ อี ปึอน ดี ตา ซีโตว เอโพด ตึอน. 19 แคง มืง โนวบัะ อี มูห มืง โดง กอย ดูอี อี หลู ดี เฌาพรา ตึอน, อัน บอ ง็อห แวน บอ อีมาย อีบึณ บอ ฆอน ดีรอย บอ ฆอน งัะ อี หณัม ฆ็อห ปู. อัน บอ ง็อห แวน บอ มามัก, มาโลว, มาบู เฆ, แตห อึณ ยัม โตต.

20 อึณ ยี มึห อู วี อี จืร อาบาทา อี มูห ฆอน อาฮีมาเลก บอ หลาน อาฮีโตบ ตึอน, อัน บอ เตา ฮาว โดง กอย อาดาวีด. อัน บอ ลอด. 21 อาบาทา ตี บอ กาลาง ดี อาดาวีด ลอง อาซอลู แฮะ ง็อห แวน ดูอี หลู ดี เฌาพรา ตึอน. 22 อาดาวีด วี กาลาง ดี อาบาทา ต็อห, “ซีณ ซีแง ตึอน, ดอ ยึร โอว อาโดวกัะ อี มูห ดูอี เอโดม ตึอน, โอว มืร แฮะ นับ อู เฌณ, อัน ดี กาลาง ดี อาซอลู. เฆ วอแว ครึร ฆูณ แม, เฆ แฮะ ยัม โกบ โอว.

23 โคว, แตห แม กอย รึม โดบ โอว. แม แกวะ กลึร. วี อี เหรต ดี ง็อห โอว, อัน เหรต บอ ดี ง็อห แม. เซ แม กอย รึม โดบ โอว, อาว ฮู โลว โยว.” แคะ ตี อัน ต็อห ดี อาบาทา ตึอน.