คาน 21
ลอง อาดาวีด เครียง โดว อัน
1 ปัน ตี อาดาวีด บอ ตัห ฌัม ดี มืง โนวบัะ อี มูห โดง กอย ดา อี หลู ดี เฌาพรา อี จืร อาฮีมาเลก. อาฮีมาเลก บอ โยว กาเซา บอ ฮาว รวห อาดาวีด. อัน บอ ดีหมอด อาดาวีด ต็อห, “อึณ ปาย เหมา, แม ปี ตู โย็ง ตัห ฆึก แม, แม ปี ซอ ตัห แม อู วี.”
2 อาดาวีด วี กาลาง ดี อัน ต็อห, “คูนดีคัม แฮะ จัร โอว ฮาว ปอ อู โปละ. อัน ปี วี ต็อห, ‘แกวะ แตห อาเซ นับ ลอง อามู ตี บอ ลอง ปี กาลาง โอว ดี แม นี.’ โอว แฮะ แตห แดเจณ โอว หน็อะ โอว ปอ โปละ. 3 ดอ ตี นี, แม มึห มาเซ? โอว หมาณ คามูน พัน โบ็ง ดี แม. บอ มูห ปี ดี โฮม มาเซ มืร, แฮะ ปึอน ดัว.”
4 ดา อี หลู ดี เฌาพรา วี กาลาง ดี อาดาวีด ต็อห, “คามูน อี กอย ดี โอว นี, อาว มูห ดอน อี ปึอน โฮม. อึณ มึห มี คามูน อี แฮะ ซีงา บอด. มาแล, เซ แดเจณ แม ตู กอย รึม โดบ อีบึณ เฆ, โอว ดี ดัว.”
5 อาดาวีด วี ต็อห ดี อัน, “ซีณ ดอ เลห ตัห เย, อาว มึห อาเซ อี กอย กาโดบ ดี อีบึณ อัน. ดอน เฌณ, เซ เย เลห ฮาว ปาย ตี ครึง ดูอี เย ตี แฮะ ฮอต ซีงา บอด. คา นี, เย แฮะ แว ซาดีก.” 6 ปัน ตี ดา อี บยาน โฆรห เฌาพรา ตึอน, บอ ดึห คามูน อี ซีงา ตึอน, ดัว ดี อัน โกบ อาว มึห คามูน ปอ โมยว. อึณ มึห มี คามูน ปี ดึอม เบลห เฆ ดี อาต เฌาพรา, แปะ แฮะ ฮอต กาปลูะ เฆ ซีณวัห.
7 ซีแง ตี, อึณ มึห แดเจณ อาซอลู อู วี, อี กอย โดง กอย เฌาพรา ดี ตี. อัน จืร อาโดวกัะ. อัน มูห ดูอี เอโดม, อี อึบ เฆ อี เฮียง มาบู อาซอลู ตึอน.
8 อาดาวีด วี กาลาง ดี อาฮีมาเลก ตึอน ต็อห, “โดง กอย แม นี, อึณ มึห มาปัวะ ลาง? โกบ อึณ มึห อามู ลอง คูนดีคัม, โอว มืร กาเตา, อาว ดัน ดึห มาปัวะ ลาง เฆ ครึง กาโฆห คอ อู โมยว.”
9 ดูอี หลู ดี เฌาพรา ตึอน วี ต็อห, “แฮะ มึห มาปัวะ ลาง อากอลาด, อี มูห ดูอี พีลีที ปี ง็อห ยัม แม ดี แบลง เอลา ตึอน, อัน แฮะ กาบัน อูน กอย นา ปัน ซีโตว เอโพด โอว ตี. แม ซี ดึห ฮาว, แฮะ ปึอน. อึณ มึห มี บลัะ ตี, อาว มึห ปอ อู บลัะ.” อาดาวีด วี ต็อห, “อาว มึห มาปัวะ ลาง ปอ อู บลัะ อี หมึอม ปี อานี. แตห แม ดัว ดี โอว.”
10 ซีแง ตี อาดาวีด บอ เลห เตา อาซอลู. โกบ โยว อัน อาซอลู, อัน บอ ฮาว โดง กอย คูนดีคัม อาคีด อี อึบ ดูอี แคง มืง ฆาทัะ ตึอน.
11 เฆ แดเจณ คูนดีคัม อาคีด วี ลาย กาลาง ต็อห, “เย ทาง, วี นี มูห อาดาวีด, คูนดีคัม แคง มืง ตัะ ดอย. อัน อี มูห ปี กาโพรม เฆ ดี ฆา ต็อห โหมว แบน เฌณ แบน เฌณ ต็อห,
‘อาซอลู แฮะ ง็อห ยัม ดูอี แบน แหรณ แบน แหรณ. อาดาวีด ยี ง็อห ดูอี แบน หมึณ แบน หมึณ.’”
12 อาดาวีด ตึอน บอ โนว โฆรห เฆ, อัน บอ วี โยว คูนดีคัม อาคีด อี อึบ มืง ฆาทัะ ตึอน. 13 อัน บอ วี ณึงราง ปีรึร อัน ดอ ยึร เฆ ดี อัน. อัน แตห อัน ปี ดูอี รึร ดอ กอย รึม อัน โดบ เฆ. อัน ณึงราง ซีห แดม ดี มาโลห บอ แตห บอ อึม อาง อัน ฮอย ดี โมต, ฮอย ดี ดีโมห อัน.