1 อาดาวีด บอ วี เตา เลห ดี โดง จืร นายูด อี มูห แคง กาดาย มืง รามา ตึอน, วี ฮาว ฌัม โดง กอย อาโยวนาทาน. อัน ดีหมอด อาโยวนาทาน ต็อห, “โอว แฮะ กาดูห ดี โบง มาเซ? โอว มึห หมาบ มาเซ? โอว แฮะ โบง อี ตู หมึอม มาเซ, แตห ฆูณ แม เหรต ดี ฆยาม อาซาก โอว?”

2 อาโยวนาทาน มืร วี ต็อห ดี อัน, “แม ตู โลว ยัม, อาว แบน ดอ เหมา. ปี ดี โบง ฆูณ โอว ดอน โมยว, อึณ บอ มูห อามู เตียะ อามู ตาง, อัน ดี กาลาง แตห โอว นับ ดี อาต. เซ อัน ดี บอ เครียง ดี โอว โมยว ตี, อาว มึห ดีโคว. ปี โยว แม อาว หมาน.”

3 อาดาวีด มืร บอ ดืง ต็อห, “ฆูณ แม แฮะ นับ ซีคยา, แม มูห ฆึก โอว. โคว, อัน คราม แคง น็อห อัน ต็อห, ‘แกวะ แตห อาโยวนาทาน นับ ลอง อัน ตี. โยว น็อห อัน ตู ดาคึย.’ เฌาพรา แฮะ นับ, โอว ต็อห อาคัร ดี แม. อึณ แฮะ ฆีด อี แจก, โอว ดี บอ ยัม.”

4 อาโยวนาทาน วี กาลาง ดี อาดาวีด ต็อห, “แม ซี แตห โอว โบง มาเซ, โอว ดี โบง โดบ แคะ ปี ต็อห แม.”

5 อาดาวีด ปี วี ต็อห, “แคหณา นี อึณ มูห บลอย มาเฆียน กามาย. บอ โอว โลว ตัห โฮม รึม โดบ คูนดีคัม. โอว ยี ซี ฮาว เครียง โดว โอว แคง แปร, แตห กอ ฌัม ปา ดี อับ ซีแง ฮาโอย. 6 เซ ฆูณ แม ต็อห ดี แม ลอง ตู ยึร อัน ดี โอว, แตห แม กาลาง ดี อัน ต็อห, ‘อาดาวีด หมาณ, แตห โอว ควาง อัน เวณ ดี มืง เบดแลม อี มูห โดง กอย บรีม อัน. อึณ แฮะ กาตัด ดี ฌัม บลอย ปี หลู วอแว เฆ ครึร อัน ดอน ซีนัม.’ 7 เซ อัน บอ ต็อห, ‘แฮะ มูห,’ น็อห โอว แฮะ เฆียด. เซ อัน บอ รู กาเซา, แม ดี บอ นับ, อัน มึห ปี ซี คราม ดี โบง นา จีจีว ดี โอว. 8 โอว ยี หมาณ, แตห แม กาเว โอว โกบ แฮะ ฮอต แม ดัว กาดีก ซัดฌา ดี โอว ดี อาต เฌาพรา. เซ หมาบ บอ กอย ดี โอว, แตห แม ง็อห ยัม โอว. อาว ฮู โลว ตึย โอว โดง กอย ฆูณ แม.” 9 อาโยวนาทาน วี ต็อห, “อาว แบน ปาย ตี ดอ เหมา. เซ โอว บอ นับ อี แจก ลอง ฆูณ โอว คราม ดี โบง นา ตู หมึอม ดี แม, โอว ดี วี กาลาง ดี แม อู เฌณ.”

10 อาดาวีด วี ต็อห, “เซ ฆูณ แม ดี บอ กาลาง จาว ดี แม ลอง โอว, อาเซ ดี วี ตัห กาลาง ดี โอว?”

11 ปัน ตี อาโยวนาทาน วี ต็อห, “ตัห, แตห อาย ฮาว แคง แปร.” ฆาย บอ กาโดบ ฮาว แคง แปร.

12 อาโยวนาทาน วี ต็อห ดี อาดาวีด, “เฌาพรา อี อีม, เฌาพรา ปี กรึบ ดูอี อีซาเรลัะ อัน แฮะ ยึร, ตัะ หณา อาคราว นี, โอว ดี เทว ดีหมอด ฆูณ โอว. เซ อัน บอ คราม ดี โบง นา หมึอม ดี แม, โอว ดี กาลาง ดี แม อาคัร หมาน. 13 เซ ฆูณ โอว บอ ต็อห ดี โบง นา ตู หมึอม ดี แม, เซ โอว ยี ตู ฮาว กาลาง ดี แม, ตู จอย แตห แม ลอด, แตห เฌาพรา บอ ดัว ดูก ตาง ดี โอว. แตห เฌาพรา กอย รึม โดบ แม, แตห อึณ ปี เฌาพรา แฮะ ดึอม กอย รึม โดบ ฆูณ โอว. 14 ดอ ซี อีม โอว นี, แตห บอ แม กาเว โอว, แตห บอ เฌาพรา เฆฌู โอว, แกวะ แตห โอว กาดูห ดี ยัม. 15 บอ อึณโฮม โอว, บอ หลูกหลาน โอว, แตห แม กาเว เซเซ ปาย ตี. เซ เฌาพรา ฮี ฮอต แวน รันซู แม แดง กาดาย นี, แตห น็อห แม ร็อก อึณโฮม โอว เซเซ.”

16 ปัน ตี อาโยวนาทาน ฆาย อาดาวีด บอ ลาย กาแซณ ต็อห, “บอ หลูกหลาน อาดาวีด, อาเซ ปยาต ปี ลาย กาแซณ อาย นี, แตห เฌาพรา เวียะ ดี รันซู อาดาวีด แคะ ปี โบง เฆ ดี อัน.” 17 อาโยวนาทาน วี แตห อาดาวีด กาลาง ฌึร ตี, โกบ ลาย ร็อก ฆาย. อาดาวีด ร็อก อาโยวนาทาน กอ ปี อัน ร็อก โดว บรีม อัน.

18 ปัน ตี อาโยวนาทาน วี กาลาง ดี อาดาวีด ต็อห, “แคหณา แฮะ มูห มาเฆียน กามาย. เฆ ดี โหลห แม ดอ ยึร เฆ โดง กอย แม แฮะ เบลา, แม ตู กอย. 19 แม ยี กอย เครียง อาดา โอย ซีแง. แฮะ ฮอต, บา ดี อับ, แม โลว วี โลง โดง กอย เครียง แม โดว แม คา อาต ตึอน, โดง มูห โคบ มาว ตาง อี จืร เอเจ. 20 โอว มืร ดี บัณ ฮาว บลา โอย ณ็อง ดี โคบ มาว ตี. 21 โอว ดี วี จัร ฆอน ดีรอย ฮาว ดึห. โอว ดี ต็อห, ‘แม ฮาว เหรต ตัห บลา ตึอน.’ เซ โอว กาลาง ต็อห, ‘แม ฮาว ยอด, บลา ตึอน กอย นา อาต แม ตี, แตห แม ดึห ตัห,’ โฆรห ตี แตห แม นับ, แฮะ หมาน แฮะ มูห, แม ปึอน ดี เลห ตัห. อาว มึห นา ตู หมึอม มาเซ. 22 เซ โอว ยี ต็อห ดี ฆอน ดีรอย, ‘ยอด, บลา แฮะ ฮอต ฮาว ปวน แม,’ อึณ ดี แตห แม นับ, แม โลว ฮาว ปอ โปละ, เฌาพรา แฮะ จัร แม ฮาว. 23 ลอง ปี ลาย กาลาง อาย นี, แตห แม โหลห เซเซ, บอ เฌาพรา แฮะ นับ โตต.”

24 ปัน ตี อาดาวีด บอ เครียง กอย แคง แปร ตึอน. บอ ฌัม ซีแง มาเฆียน กามาย ตึอน, คูนดีคัม บอ ตัห กอย โดง ดี โฮม อัน. 25 อัน บอ ตูต โดง ตูต อัน เซเซ, อี กอย โคบ แรง ตึอน. อาโยวนาทาน บอ กอย กาดัห อาซอลู. อาบานา บอ กอย ดี โคบ อาโยวนาทาน. โดง กอย อาดาวีด มืร, แฮะ เบลา ปาย ตี. 26 มาแล, ซีแง ตี อาซอลู ตู ต็อห มาเซ. อัน ทาง, แฮะ มึห อู โมยว อู โมยว อี แตห อัน อาว ฮู ซีงา โดบ ปี ดัม ดารา, แกวะ แตห อัน ปึอน โฮม รึม. 27 ปา แคหณา แฮะ วี ฌัม มาเฆียน กามาย อา ซีแง. โดง ตูต อาดาวีด แฮะ เบลา ปอ อู เฌณ. อาซอลู บอ ดีหมอด อาโยวนาทาน ตึอน ต็อห, “อึณ ปาย เหมา, ฆอน อาเยเซ ตึอน ปี ฮู ตัห โฮม รึม โดบ เอ ดี นี? บอ อาหมึร อาตึร อัน ตู ตัห.”

28 อาโยวนาทาน วี กาลาง ดี อาซอลู ต็อห, “อาดาวีด แฮะ หมาณ โอว ควาง อัน ฮาว ดี มืง เบดแลม. 29 อัน ต็อห, ‘แตห แม แตห โอว ฮาว. วอแว โอว, เฆ แฮะ โบง บลอย หลู ดี มืง เฆ. อีกัด โอว มืร แฮะ ดัม โอว ตัห. เซ แม อึง, โอว หมาณ, แตห โอว ปึอน ดี ฮาว จัร อีกัด โอว.’ อัน มืร แฮะ ฮาว. โคว, อัน ตู ตัห ดี นี.”

30 ปัน ตี อาซอลู บอ รู กาเซา ดี อาโยวนาทาน. อัน ต็อห, “แม มูห ฆอน กาแต ฆลัะ. โอว แฮะ นับ ซีคยา, แม ร็อก ฆอน อาเยเซ ตี. อึณ แตห บอ แม บอ มา แม ชึม ซาเร บอ หมึอม ซาย. 31 เซ ฆอน อาเยเซ ตี ตู ยัม, เซ อัน ยี ซี กอย แดง กาดาย นี, แม ตู ปึอน กอย. มืง นี มืร, แม ตู ปึอน ดี อึบ. แม ฮาว ดอ ตี นี, แดะ ตัห อัน ดี โอว. โอว โลว ง็อห ยัม อัน.”

32 อาโยวนาทาน วี กาลาง ดี ฆูณ อัน ต็อห, “โกบ อึณ ปาย เหมา อาดาวีด โลว ยัม? อัน แฮะ โบง ลูต มาเซ?” 33 อาซอลู บอ วี ซีโนห บลา เลียห ต็อห แตห อึณ ล็อะ อาโยวนาทาน. โกบ แฮะ ปาย ตี อาโยวนาทาน กอ นับ ซีคยา ฆูณ อัน แฮะ ฆยาม หมาน ดี ง็อห อาดาวีด, แตห อึณ ยัม.

34 อาโยวนาทาน บอ ยีต ดี โดง โฮม เฆ ตึอน, อัน บอ รู กาเซา. ซีแง ตี อัน มืร อาว ฮู โฮม มาเซ. โกบ ฆูณ อัน แฮะ โบง นา หมึอม ซาย ดี อาดาวีด, อัน บอ กลึร แคง น็อห อัน.

35 ปา แคหณา ซีณวัห, อาโยวนาทาน บอ แดะ ฆอน ดีรอย, ฮาว แคง แปร อี มูห โดง ลาย กาแซณ ฆาย อาดาวีด ตึอน. 36 อัน บอ กาลาง ดี ฆอน ตึอน ต็อห, “แม กาแบลบ ฮาว เหรต บลา ปี บัณ โอว ตึอน, วี ดึห ตัห.” ดอ กาแบลบ ฮาว ฆอน ตึอน, อัน บอ บัณ บลา อู ณ็อง, แตห อึณ กาโลห ปวน ฆอน ตึอน. 37 ฆอน ตึอน บอ ฌัม โดง โจห บลา ปี บัณ อาโยวนาทาน, อัน วี แดะ ต็อห, “บลา แฮะ กาโลห ฮาว นา อาต แม ตี.” 38 อาโยวนาทาน ปี วี แดะ โดบ ดี ปัน ฆอน ตึอน ต็อห, “ปีครัน แม กาแบลบ แฮ แฮ, แกวะ ฆืด.” อัน บอ แฆบ ตัห บลา โดง กอย อาโยวนาทาน. 39 ฆอน ตึอน ยี ตู นับ มาเซ ลอง ดาง อาตี. มี อาโยวนาทาน ฆาย อาดาวีด อี นับ. 40 อาโยวนาทาน บอ ดึห ครึง กาโฆห อัน, ดัว ดี ฆอน ดีรอย ตึอน, ต็อห ดี อัน, “แม ดึห โกรว นี, วี เวณ แคง มืง.”

41 ฆอน ตึอน แฮะ ฮอต ฮาว, อาดาวีด วี ตัห นา เตต มาว ตึอน, วี ครึบเครา ดี กาดาย วี มูด ฆึบ ดี อาต อาโยวนาทาน โอย เฌณ. ฆาย บอ ลาย อูห บอ ยาม. อาดาวีด ยี ยาม ตาง กาเซา.

42 อาโยวนาทาน บอ กาลาง ดี อาดาวีด ต็อห, “แตห แม ฮาว ดาคึย. อาย แฮะ ฮอต ลาย กาแซณ ดี อาต เฌาพรา, แฮะ ดืง ต็อห, ‘เฌาพรา แฮะ ยึร บอ แม บอ โอว, อัน ดี บอ ยึร บอ วอแว อาย, แตห อาย ลาย ร็อก เซเซ.’” อัน แฮะ ฮอต ต็อห ปาย ตี อาดาวีด บอ ยีต ฮาว อู บลาก. อาโยวนาทาน บอ วี เวณ แคง มืง ตึอน.