1 อาซอลู กาลาง ดี ฆอน อัน อี จืร อาโยวนาทาน บอ ดี แดเจณ อัน ดอน อี, แตห เฆ ง็อห ยัม อาดาวีด. 2 อาโยวนาทาน ยี ร็อก กาเซา อาดาวีด. อัน กาลาง ดี อาดาวีด ต็อห, “ฆูณ โอว อาซอลู ฆยาม ดี ง็อห ยัม แม. แตห แม ซาดีก โดว แม. ฮี ฌัม แคหณา, แตห แม กอย โดง ตู ลึห, แตห แม เครียง โดว แม. 3 โอว ดี ตัห กาตัด โดง กอย แม ตี, กามวน ดี ฆูณ โอว. โอว ดี กาลาง โฆรห ดี ฆูณ โอว ลอง แม. เซ โอว บอ ยึร ลอง มาเซ, โอว ดี วี ตัห กาลาง ดี แม.”

4 อาโยวนาทาน บอ กาลาง ซีคยา โฆรห ดี ฆูณ อัน ลอง อาดาวีด ตึอน. อัน ต็อห, “แกวะ แตห แม คูนดีคัม ตาง ลูต น็อห ดี อาดาวีด ตึอน. บอ อัน มืร ตู ลูต น็อห มาเซ ดี แม. แคะ ปี โบง อัน ดี แม, อึณ มูห โตต อี บอด อี หมึอม. 5 อัน ยี ตู กาเว อาซาก อัน. อัน แฮะ ง็อห ยัม ดูอี พีลีที ตึอน. เฌาพรา มืร แฮะ แป เฆ รันซู ดูอี อีซาเรลัะ บอกาเฆลียด. บอ แม มืร แฮะ ยึร. บอ แม แฮะ โคย โดบ. โกบ มาเซ แม วี ซี โบง หมาบ? โกบ มาเซ แม วี ซี ง็อห ดูอี หมึอม? ปี ซี โบง แม ตู มึห ดีโคว.”

6 อาซอลู บอ โทม โฆรห อาโยวนาทาน ตึอน. อัน บอ ดืง ต็อห, “เฌาพรา แฮะ นับ, โฆรห ปี กาลาง โอว นี แฮะ หมาน อาคาคัร. อาดาวีด ตู โลว ยัม.”

7 อาโยวนาทาน บอ แดะ อาดาวีด, บอ วี กาลาง ลอง ดอน โมยว ดี อัน บอ ตึย อาดาวีด วี ฮาว ฌัม โดง กอย อาซอลู ตึอน, แตห อัน วี กอย รึม โดบ อาซอลู ปี อาต นี.

8 วาย ตี ปอ อู เฌณ เฆ ดูอี พีลีที วี กาโฆห ดี ดูอี อีซาเรลัะ. บอ อาดาวีด ฮาว กาโฆห ดี เฆ. อัน บอ ปึอน ดี ง็อห ยัม กืน กาเซา เฆ. เฆ บอ เตา ฮาว.

9 ดอ กอย อาซอลู แคง โฮว, อัน โฆ็ง บลา เลียห อัน. กานัม ฮาย ตึอน วี ตัห ปยาต น็อห อัน. อาดาวีด บอ วี บัห ดีง อัน ตึอน. 10 ดอ อัน ตี อาซอลู ดึห บลา เลียห อัน, ต็อห ดี ซีโนห อาดาวีด ดึก ดี แรง. อาดาวีด ยี วัห แตห บลา เลียห วี ดีซีณ ดึก ดี แรง ตึอน. อาดาวีด บอ เตา ตัะ อาซอลู แคง หมึร ตี.

11 อาซอลู บอ จัร ดูอี ฮาว ดี กาง อาดาวีด, แตห เฆ บัร อัน, แตห อัน ปึอน ดี ง็อห อาดาวีด ซีณวัห ตึอน. นาง มีคาลัะ อี มูห อีบึณ อาดาวีด อัน บอ กาลาง ดี อาดาวีด ต็อห, “เซ แม ตู เตา แคง หมึร นี, แคหณา แม ดี ยัม.” 12 อัน บอ จอย อาดาวีด, บยัว โลง อัน แคง กาเดา ปาแตง, แตห อัน ปึอน ดี เตา, แตห อัน ลอด. 13 ปัน ตี อัน บอ ดึห อารึบ เฌา ปี กรึบ อัน อู กาดัง, ตัห เบลห แดง กาโช็ง อีด อาดาวีด, บอ ดึห บอ ครึง บอ ฮึก มาแป, เบลห แบน หมอน, วี ดึห ฮึบ ปลึก.

14 อาซอลู บอ จัร แดเจณ อัน, แตห เฆ ฮาว เหมต อาดาวีด. อีบึณ อัน วี ต็อห, “อาดาวีด เซาพึร.”

15 อาซอลู ปี วี จัร แดเจณ อัน ฮาว, แตห เฆ ปึอน ดี ยอด อาดาวีด. อัน ต็อห, “ดึห ตัห อัน, บอ กาโช็ง อีด อัน ตี. แตห โอว ปึอน ดี ง็อห ยัม อัน.” 16 เฆ บอ ลึบ ฮาว แคง อีด ตึอน, เฆ บอ ยึร อารึบ ราง อี กอย แดง กาโช็ง อีด ตี. บอ ครึง ฮึก มาแป อี แบน หมอน แฮะ กอย แดง ฆีณ ตึอน.

17 อาซอลู บอ ดีหมอด นาง มีคาลัะ ต็อห, “เหมา อึณ ปาย ปี กาโลว แม ดี โอว? แม แฮะ เบลห รันซู โอว แตห อัน ลอด ฮาว ปาย นี.”

นาง มีคาลัะ วี ต็อห ดี อาซอลู, “อัน ต็อห ดี โอว, ‘เซ แม ตู เบลห โอว, โอว ดี ง็อห ยัม แม.’”

18 อาดาวีด บอ เลห เตา แตห อัน ลอด. อัน บอ ฮาว ฌัม โดง กอย อาซามูเอน ดี มืง รามา ตึอน. อัน บอ กาลาง โตต ดอน โมยว ลอง ปี โบง อาซอลู ดี อัน. ฆาย อาซามูเอน บอ วี กาโดบ ฮาว ดี เรา นายูด, กอย ดี ตี. 19 อี เฮา บอ วี กาลาง ดี อาซอลู ลอง อาดาวีด แฮะ ฮาว กอย ดี เรา นายูด แคง กาดาย มืง รามา ตึอน. 20 อาซอลู ปี วี จัร แดเจณ อัน, แตห เฆ ฮาว เหมต อาดาวีด. เฆ บอ ฮาว ยึร พึง ดูอี บยาน โฆรห เฌาพรา. บอ อาซามูเอน กอย โดบ เฆ, แบน ดา อี แยต เฆ. ดอ อัน ตี น็อห พึอม เฌาพรา บอ โจห บอ ดี เฆ แดเจณ อาซอลู, แตห บอ เฆ บยาน โฆรห เฌาพรา. 21 อี เฮา วี กาลาง ดี อาซอลู ลอง อัน ตี, อัน ปี วี จัร แดเจณ อัน ปอ อู พึง วี ฮาว. เฆ ตี มืร บอ บยาน โฆรห เฌาพรา. แฮะ มูห โอย เฌณ, อาซอลู แฮะ จัร แดเจณ อัน ฮาว. ดอน เฌณ อึณ ยี ปาย ตี. 22 ปัน ตี อาซอลู บอ ฮาว โดว อัน, ต็อห ดี ฮาว ดี มืง รามา ตึอน. อัน บอ ฮาว ฌัม โดง มึห อึม คึม ตาง ดี เรา เจคูะ. อัน บอ ดีหมอด เฆ ต็อห, “อาซามูเอน ฆาย อาดาวีด กอย ดี เหมา?” ดูอี อู วี วี กาลาง ดี อัน ต็อห, “อัน กอย ดี เรา นายูด แคง กาดาย มืง รามา ตึอน.”

23 อัน บอ ฮาว ดี เรา นายูด แคง กาดาย มืง รามา ตี. ดอ อัน ตี น็อห พึอม เฌาพรา บอ กอย รึม โดบ อัน, แตห บอ อัน วี กาลาง บยาน โฆรห เฌาพรา ดอ ฮาว อัน โดบ อึณเตณ. 24 อัน บอ บูต แวน บอ ครึง ปี ตา อัน, บอ บยาน โฆรห เฌาพรา ดี อาต อาซามูเอน ตึอน. อัน บอ กอย ปาย ตี อู หมึร ดี อู ซีแง. โกบ อึณปาย ตี, เฆ บอ ต็อห, “อึณ แหนน อาซอลู มืร แฮะ วี แบน ดา อี บยาน โฆรห เฌาพรา.”