1 อาซอลู บอ วี ตัห โดง กาโฆห อัน ดี ดูอี พีลีที, อี เฮา บอ ต็อห ดี อัน, “แม ยอด, อาดาวีด แฮะ วี ตัห กอย แคง แปร ดี มืง เอนเกดี ตึอน.” 2 อาซอลู บอ ร็อห ดูอี อีซาเรลัะ โอย แหรณ วี, แตห เฆ ฮาว แคง แปร ดี นอน ดาอาง โดง มึห มาแป แปร, แตห เฆ เหรต อาดาวีด เฆ ดูอี อัน.

3 เฆ บอ ฌัม โดง มึห กาปึม มาบู อี กอย โคบ อึณเตณ โดง มึห กาเดา มาว. อาซอลู บอ ลึบ ฮาว แคง กาเดา มาว ตี, แตห อัน ปึอน ดี วีน แปร ดี ตี. อี มูห อาดาวีด เฆ ดูอี อัน, เฆ ยี กอย โดง ซืด กาเดา มาว ตี. 4 เฆ ดูอี อาดาวีด บอ กาลาง ดี อัน ต็อห, “แม ยอด, ดอ ตี นี แฮะ ฌัม ซีแง ปี กาลาง เฌาพรา ดอ ต็อห อัน ดี แม, ‘โอว ดี อาบ รันซู แม ดี แม.’ แม แฮะ ปึอน โบง แคะ ปี ซี โบง แม ดี อัน.” อาดาวีด บอ แกร ดี ฮาว กาเครียะ, ตู แตห อึณ ฆรัณ. อัน บอ ปรา ดี ซัวะ ซีโตว อาซอลู อี แจก.

5 วาย ตี อัน วี ลูต น็อห โกบ แฮะ ซัวะ อัน ซีโตว อาซอลู ตึอน. 6 อัน วี กาลาง ดี ดูอี อัน ต็อห, “หมาณ, แตห เฌาพรา แคร โอว, แกวะ แตห โอว โบง โมยว นี ดี ดา กาณา โอว, อี มูห วี แปะ แฮะ พ็อห เฌาพรา นามัน ดี ฆีณ อัน. แกวะ แตห โอว โบง นา ตู หมึอม ดี อัน. โคว, เฌาพรา แฮะ อึง ดี พ็อห นามัน ดี ฆีณ อัน.” 7 อาดาวีด บอ กาลาง โฆรห ตี บอ แคร ดูอี อัน, ตู แตห เฆ โบง มาเซ ดี อาซอลู. อาซอลู บอ เลห ฮาว ตัะ กาเดา มาว ตี.

8 วาย ตี อาดาวีด บอ วี เลห แคง กาเดา มาว ตึอน, บอ วี แดะ ดี กาลาง โดบ ดี ปัน อาซอลู ต็อห, “อึย แม คูนดีคัม โอว, แม มูห ดา กาณา โอว.” อาซอลู ตึอน บอ วี มางัห วีว นา ปัน อัน. อาดาวีด บอ วี มูด ฆึบ ดี กาดาย ครึบเครา. 9 อัน วี กาลาง ดี อาซอลู ต็อห, “เหมา อึณปาย ปี โทม แม ปี กาลาง มัง อี ดี แม ต็อห, ‘อาดาวีด แฮะ เหรต ดี โบง นา ตู หมึอม ดี แม?’ 10 แม ยอด, อาตึร นี เฌาพรา แฮะ อาบ แม ดี โอว แคง กาเดา มาว นี. มัง อี ปี บอ แฮะ แดะ โอว ง็อห แม มืร, โอว ยี กาเว แม ต็อห, ‘โอว ตู โบง นา ตู หมึอม มาเซ ดี ดา กาณา โอว โกบ แฮะ พ็อห เฌาพรา นามัน ดี ฆีณ อัน.’ 11 แดง ตี, แม ฆูณ, แตห แม ยอด โดณ ซีโตว แม ปี โฆ็ง โอว นี. โกบ ตู ซี ง็อห ยัม โอว อาซาก แม, โอว ซัวะ มี ซีโตว แม อี แจก นี, แตห แม นับ, แตห แม ยึร ลอง ตู มึห โอว ดี โบง นา ตู หมึอม ดี แม. โอว ตู ลูต น็อห มาเซ ดี แม. มึห อี แม, อี เหรต ดี ง็อห อาซาก โอว. 12 แตห เฌาพรา ซูงพยาด ดี กาแต อาย บอ อา วี. แตห เฌาพรา แบ แตห แบ ดัว หมาบ แปะ แฮะ ลูต โอว ดี แม ตี. โอว มืร ตู โบง มาเซ ดี แม. 13 อึณ ปี โฆรห มากาทัะ ดอ มึอน อี ต็อห, ‘อี ตู หมึอม อึณ ตัห ดี อี ตู หมึอม.’ โคว, โอว ตู โบง มาเซ ดี แม ดอ เหมา.

14 แม คูนดีคัม อี อึบ ดูอี อีซาเรลัะ, แม เลห เหรต อาเซ? อึณ ปี แม เหรต มาโซว อี แฮะ ฮอต ยัม. อึณ ปี แม เหรต มาซีเดียน อู โดว. 15 โคว, แตห เฌาพรา ซูงพยาด อามู นี. แตห อัน ยอด บอ แม บอ โอว. แตห อัน เฌา จอย โอว, แตห อัน คยอด โอว, ตู แตห แม ปึอน ดี ดัว ดูก ดี โอว.”

16 อาดาวีด แฮะ ฮอต กาลาง โฆรห ตี, อาซอลู บอ วี ดีหมอด ต็อห, “อึย อาดาวีด, แม มูห ฆอน โอว. อานี มูห โฆรห แม, แฮะ มูห?” ดอ กาลาง อัน โฆรห ตี, อัน บอ วี ยาม ตาง. 17 อัน ปี วี กาลาง ดี อาดาวีด ต็อห, “น็อห แม แฮะ ซืร หลึอม โอว. โอว แฮะ โบง อี ตู หมึอม ดี แม. แม วี โบง นา หมึอม ดี โอว. 18 อาตึร นี, แม แฮะ แหน ดี โอว, แม แฮะ เฆฌู โอว. เฌาพรา ปี บอ แฮะ แตห แม ปึอน ดี ง็อห ยัม โอว, แม ยี ตู โบง มาเซ ดี โอว. 19 เซ ดูอี กาตูณ รันซู เฆ, อาว มึห อี แตห รันซู อัน ลอด. เฌาพรา ดี วี เฆฌู แม. โกบ แปะ แฮะ โบง แม ดี โอว อาตึร นี. 20 ดอ ตี นี โอว แฮะ นับ ซีคยา, แม ดี แบน คูนดีคัม. บอ มาน มืง อีซาเรลัะ แฮะ มูห แม อี ดี อึบ โตต. 21 โคว, แม โลว ดัว กาดีก ซัดฌา ดี โอว, ดืง แตห บอ เฌาพรา โทม. วาย โจว โอว นี, แกวะ แตห แม แวน บอ ฆอน โอว เฆ หลาน โอว. แม มืร ฮู โบง นา ตู หมึอม ดี หลูกหลาน โอว, บอ ดี อึณกรึห ฆูณ โอว เฆ บอกาเฆลียด.” 22 อาดาวีด บอ ดัว กาดีก ซัดฌา ดี อาซอลู. อาซอลู บอ วี เวณ โดง กอย โฮว อัน. อาดาวีด บอ ดูอี อัน วี เวณ โดง กอย โดง เครียง เฆ ตึอน.