1 ปัน ตี เฌาพรา วี กาลาง ดี อาซามูเอน ต็อห, “ซีณ ดอ กาลาง โอว อาซอลู อาว ฮู ปึอน แบน คูนดีคัม, น็อห แม ตู ดาคึย. แฮะ เหลณ, แม กลึร ปาย ตี. แตห แม จู กลึร ดอ ตี นี, ดึห นามัน แม, ฮับ แคง กาเปา, ฮาว โดง ต็อห โอว. โอว ซี แตห แม ฮาว โดง กอย อาเยเซ, อี มูห ดูอี มืง เบดแลม ตึอน. โอว แฮะ ร็อห ฆอน อีมาย อัน อู วี แตห อัน แบน คูนดีคัม.”

2 อาซามูเอน มืร วี ต็อห, “เหมา โอว ดี ปาย ดี ฮาว? เซ อาซอลู ฮี ยึร ลอง อัน ตี, อัน ดี ง็อห ยัม โอว.”

อัน แฮะ ฮอต ต็อห ปาย ตี เฌาพรา ปี วี กาลาง ต็อห, “แม ดึห ฮาว บอ ฆอน มัก ซืร บอ ต็อห, ‘โอว ตัห แตห โอว ปึอน ดี หลู โดว ตี ดี เฌาพรา.’ 3 แม บาง อาเยเซ ตี, แตห อัน ตัห ดี บลอย หลู ตี. ปัน ตี โอว ดี แหน ปี ดี ปาย ดี โบง ดี แม. แม ดี ปึอน ดี พ็อห นามัน ดี ฆีณ วี ปี กาลาง โอว ดี แม.”

4 อาซามูเอน บอ โบง ปี กาลาง เฌาพรา ดี อัน. อัน บอ ฮาว ดี มืง เบดแลม ตึอน. ปัน ตี เฆ ดา ตาง แคง มืง เบดแลม ตึอน บอ โยว กาเซา, บอ ดีหมอด อัน ต็อห, “แม ซารา แฮะ ตัห, แตห อึณ เฆียด เยน ฆยามซา ดี เย?”

5 อัน วี ต็อห, “อึร, แฮะ เฆียด เยน ฆยามซา. โอว ตัห แตห เอ ปึอน ดี หลู โดว ตี ดี เฌาพรา. แตห เบ แรน ดอน โมยว, แตห เบ ซีงา. แฮะ ฮอต, แตห เบ ตัห ลึบ บลอย หลู โดบ โอว.” อัน บอ บาง บอ อาเยเซ, บอ ฆอน อีมาย อัน, แตห บอ เฆ แรน โดว เฆ, แตห อึณ ซีงา โดบ ปี ดัม ดารา, แตห บอ เฆ ตัห ลึบ บลอย หลู ตี.

6 เฆ บอกาเฆลียด บอ ตัห ฌัม ดี บลอย หลู ตี, อาซามูเอน บอ ยึร อาเอลีอาบ, อัน กาพา ต็อห, “แฮะ มูห วี นี อาคัร หมาน, ปี ต็อห เฌาพรา, แตห โอว พ็อห นามัน ดี ฆีณ อัน.”

7 เฌาพรา วี กาลาง ดี อาซามูเอน ต็อห, “อาว โลว ยอด อารึบ อัน เฆ นา จา อัน. โอว ตู โลว วี ตี. ปี ยึร เฌาพรา, อาว ปี ปี ยึร ดูอี. ดูอี ยอด มี อารึบ. เฌาพรา ยอด บอ น็อห.”

8 ปัน ตี อาเยเซ ตึอน บอ แดะ อาพีนาดาบ, แตห อัน ตัห นา อาต อาซามูเอน ตึอน. อาซามูเอน วี ต็อห, “เฌาพรา ตู ร็อห ดึห วี นี.” 9 ปัน ตี อาเยเซ ปี วี แตห อาซามา ตัห. อาซามูเอน ปี วี ต็อห, “วี นี มืร เฌาพรา ตู ร็อห.” 10 ปัน ตี อาเยเซ บอ แตห ฆอน อีมาย อัน บู วี ตึอน ตัห ฌัม นา อาต อาซามูเอน. อาซามูเอน วี กาลาง ดี อัน ต็อห, “เฆ นี มืร, เฌาพรา ตู ร็อห, ตู ดึห.” 11 อัน วี ดีหมอด อาเยเซ ต็อห, “ฆอน อีมาย แม บอกาเฆลียด แฮะ ตัห กอย โตต ดี นี?”

อาเยเซ วี ต็อห, “อึณ ซี มึห วี เตียะ. วี ตี, อัน เฮียง มาบู.”

อาซามูเอน วี ต็อห. “จัร ดูอี ฮาว แดะ อัน ตัห. เซ อัน ตี หณัม ตัห ฌัม, เอ ตู ปึอน ดี ลึบ บลอย นี.”

12 อัน บอ จัร อี แดะ ตัห วี ตึอน. อัน แฮะ ฮอต ตัห, แฮะ ปึอน ยึร อารึบ อัน มืร, อึณ ชีด. นา อัน เฆ งาย อัน, อึณ หมึอม ร็อก. บอ ฮึก ฆีณ อัน แฮะ เรณ.

เฌาพรา วี ต็อห, “แม พ็อห นามัน ดี ฆีณ อัน. แฮะ มูห วี นี.”

13 อาซามูเอน บอ ดึห กาเปา นามัน, บอ พ็อห ดี ฆีณ อัน แตห เฆ อีกัด อัน บอ ยึร. ซีณ ดอ อัน ตี น็อห พึอม เฌาพรา อี มึห ปวน ตาง บอ ตัห กอย แคง น็อห อาดาวีด. แฮะ ฮอต ปัน ตี อาซามูเอน บอ วี ยีต ฮาว เวณ ดี มืง รามา.

14 อี มูห อาซอลู ตึอน, น็อห พึอม เฌาพรา แฮะ ฮอต เลห ดี อัน. เฌาพรา ยี แตห กานัม ฮาย ดัว ดูก ดี น็อห อัน.

15 อึณ ยี มึห หมาย อาซอลู วี ต็อห ดี อัน, “แม ยอด, เฌาพรา แฮะ วี แตห กานัม ฮาย ดัว ดูก ดี แม. 16 แตห แม คูนดีคัม กาลาง ดี แดเจณ แม อี ลึมลา แม ตึอน, แตห เฆ เหรต วี อี นับ ดี บัห ดีง อี แมง ดาคึย. เซ กานัม ฮาย ตึอน วี ตัห, แตห อัน บัห ดีง ตี, แตห แม วี ดาคึย.”

17 อาซอลู บอ กาลาง ดี แดเจณ อัน ต็อห, “เบ เหรต วี อี นับ ดี บัห ดีง อี แมง ดาคึย, วี ตึย ดี โอว.”

18 แดเจณ อัน อู วี ต็อห, “อาเยเซ อี กอย มืง เบดแลม ตึอน, อัน มึห ฆอน อู วี, อี นับ ดี บัห ดีง. อัน มืร กยัะ, ยัะ โบง ดอน โมยว. กาโฆห ดี อี มืร, อัน กยัะ. อางยาน อัน มืร บอด. อารึบ อัน มืร ชีด. เฌาพรา มืร กอย รึม โดบ อัน.”

19 ปัน ตี อาซอลู บอ จัร ดูอี อัน ฮาว โดง กอย อาเยเซ, แตห เฆ ต็อห, “โอว หมาณ แตห แม ตึย ฆอน อีมาย แม อี จืร อาดาวีด, อี เฮียง มาบู ตึอน, แตห อัน ตัห โดง กอย โอว.” 20 อาเยเซ บอ ดึห มาลา อู โดว, ดาง คามูน บอ อึม มางูน บอ มาแป ดีแตด อู โดว, อาบ ดัว ดี ฆอน อัน อี จืร อาดาวีด, แตห อัน ฮาว โดง กอย อาซอลู ตึอน.

21 อาดาวีด แฮะ ฮอต ฌัม โดง กอย อาซอลู, อาซอลู มืร ร็อก กาเซา อัน, บอ แตห อัน วี แบน ดูอี อี โฆ็ง ครึง กาโฆห อัน. 22 อาซอลู บอ วี จัร เฆ ฮาว โดง กอย อาเยเซ ตึอน, แตห เฆ ต็อห ดี อัน, “โกบ อาดาวีด แฮะ ล็อะ น็อห โอว, โอว หมาณ แตห แม แตห อัน กอย โดบ โอว ดี นี.”

23 ดอน เฌณ ดอน เฌณ, เซ กานัม ฮาย ปี ตึย เฌาพรา วี ตัห ดี อาซอลู ตึอน, อาดาวีด บอ ดึห ดีง อัน, วี บัห. ปัน ตี อาซอลู บอ ดาคึย, บอ วี แกน. กานัม อี ตู หมึอม ตึอน บอ วี เลห ฮาว เตา ตัะ อัน.