คาน 15
ปัน ตี อาซามูเอน บอ กาลาง ดี อาซอลู ต็อห, “เฌาพรา แฮะ จัร โอว แตห โอว พ็อห นามัน ดี ฆีณ แม, แตห แม แบน คูนดีคัม อี อึบ ดูอี อีซาเรลัะ, แตห แม อึบ เฆ ดูอี ปี ร็อห เฌาพรา. ดอ ตี นี, แตห แม โทม โฆรห เฌาพรา. 2 เฌาพรา อี อึบ โตต ดอน โมยว, อัน แฮะ ต็อห, ‘โอว แฮะ โนว ปี โบง เฆ ดูอี อามาเลก ดี ดูอี อีซาเรลัะ. ดอ เลห เฆ แคง มืง แอฆึบ เฆ ดูอี อามาเลก แฮะ แร อึณเตณ ดูอี อีซาเรลัะ. 3 ดอ ตี นี, แตห เบ กาโฆห ปยาต แวน ดูอี อามาเลก ตี. อาว โลว กาเว มาเซ. ปยาต แวน โตต ดอน โมยว. แคะ ปี มึห เฆ, บอ ฆอน อี ซี ปู มืร, ง็อห โตต. บอ มาบู, มามัก, อึณปร็อง กาฮาต บอ มาลา เฆ ดอน โมยว โลว ง็อห แวน โตต.’”
4 อาซามูเอน แฮะ ฮอต ต็อห ปาย ตี, อาซอลู บอ แดะ กาฌูะ ดูอี เฆ ตึอน บอ ร็อห ดูอี อี ดี แบน ดา ซึก อัน. ดอ กอย อัน ดี มืง แตลีม ตึอน, อัน ร็อห ดา ซึก อัน ตี. อึณ มูห ดา ซึก อี ฮาว ดี เปลา อาดา อา แซน วี บอ ดา ซึก ดูอี อายูดา อู หมึณ วี. 5 อาซอลู บอ ฮาว ดี มืง อามาเลก ตึอน. เฆ บอ เครียง เฆ แคง โรง โดบ นอน, บัร ดี ง็อห ดูอี อามาเลก ตึอน. 6 อาซอลู บอ กาลาง ดี ดูอี เคนีด อี กอย รึม โดบ ดูอี อามาเลก. อัน ต็อห, “โกบ แฮะ ดึอม โบง เบ นา หมึอม ดี ดูอี อีซาเรลัะ ดอ เลห เฆ แคง มืง แอฆึบ ตึอน, ดอ ตี นี โอว ต็อห ดี เบ, แตห เบ เลห ฮาว ตัะ โดง กอย เฆ ดูอี อามาเลก ตี. โอว โยว โอว ปยาต บอ เบ โดบ ดูอี เฆ ตี.” ปาย ตี เฆ ดูอี อากีนี ตึอน บอ เลห ตัะ โดง กอย ดูอี อามาเลก.
7 อาซอลู บอ กาโฆห ปยาต เฆ ดูอี อามาเลก, จูห ดี มืง ฮาวีลัะ, ฮาว ฌัม ดี อึณเตณ อี ฮาว ดี มืง ซูรา, อี ลาย กาซืร ดี มืง แอฆึบ ตึอน. 8 อัน บอ เหมต โดว อีม คูนดีคัม อากาด อี อึบ ดูอี อามาเลก เฆ ตึอน. อัน บอ ง็อห แวน โตต เฆ, ตา มาปัวะ ลาง อัน. 9 มาแล, อาซอลู บอ เฆ ดูอี อัน, เฆ กาเว คูนดีคัม อากาด ตึอน. บอ โดว ซัดดาวา เฆ อี ฆลัณ, บอ มาบู, มามัก, มาบู ดีแตด โดว อี ชีด เฆ ตู ง็อห แวน แตห อึณ โตต. อี ตู ชีด อี จีจีว, อี เช, เฆ ยี ง็อห แวน กอ โตต.
10 ปัน ตี เฌาพรา ตัห ฌัม โดง กอย อาซามูเอน ตึอน ต็อห, 11 “โอว วี โหลห, โอว แฮะ กาลึบ ดี แตห อาซอลู แบน คูนดีคัม. อัน แฮะ วัห โอว, อาว ฮู โดบ ปี ต็อห โอว.” ปัน ตี อาซามูเอน บอ กลึร กาเซา, บอ ซาคึร ดี เฌาพรา ดอง คืน.
12 ซีณวัห เจว อาซามูเอน บอ ยีต แตห อัน ปึอน ดี ฮาว กาตูณ อาซอลู โดบ อึณเตณ ตึอน. อัน ยี ตู ตัห. อี เฮา วี ต็อห “อาซอลู แฮะ ฮอต โฮะ ดี นอน ฆาเมลัะ, แฮะ ฮอต ซัม ร็อง, แตห อี นับ, อัน แฮะ ฮอต แป, แตห อี วี อืบ อัน. ปัน ตี อัน ดี วี เวณ ดี มืง ฆีลัะฆา ตึอน.”
13 วาย อัน ตี อาซามูเอน บอ ฮาว โดง กอย อาซอลู. อาซอลู วี ต็อห ดี อัน, “แตห เฌาพรา ม็องการา แตห ดี แม. โอว แฮะ โบง โดบ แคะ ปี ต็อห เฌาพรา ดี โอว.”
14 อาซามูเอน บอ ดีหมอด อัน ต็อห, “เซ อึณ ปาย ตี, ฮัม มาบู อี ปึอน ยึร บอ ฮัม อึณปอ มัก ปี ยึร โอว นี, อึณ มูห มาเซ?”
15 อาซอลู มืร วี ต็อห, “เฆ แฮะ ดึห ตัห โกรว ดูอี อามาเลก ฌึร ตี. เฆ วี กาเว มาบู เฆ มามัก อี มูห โดว อี ชีด หลึอม โดว เฮา. เฆ ดี แตห อึณ แบน ปี ดี หลู ดี เฌาพรา, อี มูห เฌาพรา ปี กรึบ แม. แดง ตี, เฆ แฮะ ฮอต ง็อห แวน โตต, อาว ฮู มึห มาเซ.”
16 อาซามูเอน บอ กาลาง ดี อาซอลู ต็อห, “แม โทม, โอว ดี กาลาง โฆรห ปี ต็อห เฌาพรา ดี โอว ฮู มึอน นี.” อาซอลู วี ต็อห, “อึร, แตห แม กาลาง.”
17 อาซามูเอน มืร ต็อห, “คา อาต แม แฮะ ทาง, แม มูห ครึร ดูอี เปรต. แม ยี วี แบน ฆีณ อี แยต ดูอี อีซาเรลัะ. เฌาพรา แฮะ จัร โอว พ็อห นามัน ดี ฆีณ แม แตห แม วี แบน คูนดีคัม อี อึบ ดูอี อีซาเรลัะ. 18 เฌาพรา แฮะ จัร แม ฮาว ปอ โปละ, แฮะ กาลาง ต็อห, ‘ฮาว ง็อห ดูอี อามาเลก อี มึห หมาบ กืน กาเซา ตึอน. แตห แม กาโฆห ง็อห เฆ. ปยาต แวน แตห เฆ กอ ชึม ลึร หราย โตต.’ 19 โคว, อึณ ปาย เหมา แม ตู โทม ปี ต็อห เฌาพรา? แม วี ดึห ตัห โกรวกราม รันซู ตี, แตห อึณ วี แบน หมาบ ดี อาต เฌาพรา.”
20 อาซอลู วี กาลาง ดี อาซามูเอน ต็อห, “โอว แฮะ ฮอต โทม ปี ต็อห เฌาพรา อาคัร หมาน. โอว แฮะ โดบ อึณเตณ ปี จัร เฌาพรา โอว ฮาว. โอว บอ ดึห ตัห คูนดีคัม อากาด, อี อึบ ดูอี อามาเลก ตี. แดง ตี โอว แฮะ ฮอต ง็อห แวน โตต โตต. 21 มาแล, ดา ซึก โอว บอ วี ดึห มาบู เฆ มามัก โดว อี ชีด หลึอม โดว เฮา อี โลว ง็อห แวน ตี. เฆ บอ ต็อห ดี แตห อึณ แบน ปี ดี หลู ดี เฌาพรา อี มูห เฌาพรา ปี กรึบ แม แคง มืง ฆีลัะฆา ตึอน.”
22 อาซามูเอน วี ต็อห, “แม ทาง เฌาพรา อึง, เซ เบ หลู โดว ซัดดาวา อี โดะ กาซึม บอ ปี ดี หลู แบน โมยว แบน โมยว ตี หลึอม เบ โทม โฆรห อัน? อาว มูห ปาย ตี. เซ เบ แฮะ โดบ ปี อึง เฌาพรา, อึณ หมึอม หลึอม ปี หลู เบ ตี. เซ เบ โทม โฆรห อัน, อึณ หมึอม หลึอม เบรียง มาบู อาโล็ง ตี. 23 อึณ ปาย ตี. อาเซ กาแคณ ดี เฌาพรา, อึณ ปี อัน โบง อาดาด. อาเซ บอ มึห น็อห ดืร, อึณ ปี อัน โบง หมาบ อี ฮาย กาเซา บอ กรึบ อารึบ. โกบ แฮะ แวน แม โฆรห เฌาพรา, เฌาพรา มืร ดี บลัวะ เลห แม, ตู แตห แม แบน คูนดีคัม.”
24 อาซามูเอน แฮะ ฮอต กาลาง โฆรห ตี, อาซอลู บอ วี ต็อห, “โอว แฮะ ฮอต โบง หมาบ. โอว แฮะ ฮอต หลึร ปี ต็อห เฌาพรา. บอ โฆรห แม โอว แฮะ แวน. โกบ โยว โอว เฆ ดูอี กืน, โอว แฮะ วี ควาง เฆ โบง ปี อึง เฆ. 25 ดอ ตี นี, โอว หมาณ, แตห แม ฆ็อห แวน หมาบ โอว. หมาณ, แตห แม ฮาว โดบ โอว, แตห โอว วี ปึอน ดี กรึบ ซาคึร ดี เฌาพรา.”
26 อาซามูเอน วี กาลาง ดี อาซอลู ต็อห, “โอว อาว ฮู ฮาว โดบ แม. โคว, แม แฮะ แวน โฆรห เฌาพรา, เฌาพรา มืร ดี ดึห แวน ปวน แม อี แตห แม แบน คูนดีคัม.”
27 ดอ วี กาบัด อาซามูเอน ต็อห ดี ฮาว, อาซอลู บอ ปา ดืด โบรว ซีโตว อาซามูเอน ตึอน, แตห อึณ กอ กายาต. 28 อาซามูเอน บอ วี ต็อห ดี อัน, “อาตึร นี เฌาพรา แฮะ ดึห มืง ดูอี อีซาเรลัะ เลห ตัะ แม, แกวะ ฮู แตห แม อึบ. อัน แฮะ วี ดัว มืง ตี ดี ดูอี อู วี อี กอย โคบ แม, อี หมึอม หลึอม แม. 29 เฌาพรา อี แตห โปลม แตห แฮณ ดี ดูอี อีซาเรลัะ, อัน ตู นับ ดี กาโลว. อัน ตู นับ ดี กาปลูะ น็อห. โคว, เฌาพรา ตู มูห อาโมยว ดูอี อี นับ ดี กาปลูะ น็อห.”
30 ปัน ตี อาซอลู บอ วี ต็อห, “โอว แฮะ ฮอต ลูต. ดอ ตี นี, โอว ยี หมาณ, แตห แม วี ตัห โดบ โอว. แตห โอว ปึอน ดี วี กรึบ เฌาพรา อี มูห เฌาพรา ปี กรึบ แม ตี. ปาย ตี แตห แม จอย โอว มึห ซาเร ดี อาต เฆ อี แบน ดา ตาง, เฆ อี แยต ดูอี โอว บอ ดี อาต เฆ ดูอี อีซาเรลัะ.” 31 อาซามูเอน บอ วี โดบ ตัห ดี ปัน อาซอลู, แตห อัน วี ปึอน ดี กรึบ เฌาพรา.
32 ปัน ตี อาซามูเอน วี ต็อห, “แดะ คูนดีคัม อากาด อี อึบ ดูอี อามาเลก ตึอน, แตห อัน ตัห โดง กอย โอว.”
คูนดีคัม อากาด ตึอน มืร บอ ฌอนโฌม บอ โคย ดี ตัห. อัน ทาง แคง น็อห อัน, “โอว แฮะ ฮอต ลอด ยัม, อาคัร หมาน. อาว ฮู โลว โยว ดี ยัม.”
33 อาซามูเอน วี ต็อห, “มาปัวะ ลาง แม แฮะ โบง แตห อีบึณ ชึม ฆอน เฆ. ปาย ตี บอ มา แม ดี วี ชึม ฆอน อัน.” อัน แฮะ ฮอต ต็อห ปาย ตี, อัน บอ ง็อห ยัม คูนดีคัม อากาด ตึอน. อัน โบง ปาย ตี ดี โดง กรึบ เฆ เฌาพรา ดี มืง ฆีลัะฆา ตึอน.