อึณ มึห อู ซีแง, อาโยวนาทาน อี มูห ฆอน อาซอลู ตึอน, อัน แดะ แดเจณ อัน อี โฆ็ง ครึง กาโฆห, ต็อห ดี อัน, “ตัห, แตห อาย ฮาว โดง กอย ดับ ดูอี พีลีที เฆ อี กอย นา ดอย.” อัน ยี ตู หมาณ อาควาง ฆูณ อัน.

2 ดอ อัน ตี อาซอลู ยี กอย นา เรต มืง ฆีบียา ครึม เฮ มาจัก, อี กอย แคง มืง มีโครน ตึอน. เฆ อี กอย โดบ อัน ตึอน, อึณ มึห เดา มาย็อห วี. 3 บอ อาฮียา กอย รึม โดบ อาซอลู. อัน มูห ฆอน อาฮีโตบ. อาฮีโตบ มูห ฆอน วา อาอีคาบูด, อี มูห ฆอน อาพีเนฮาด. อาพีเนฮาด วี มูห ฆอน อาเอลี อี ดึอม มูห ดา ตาง หลู ดี เฌาพรา ดี มืง ซีโลว ตึอน. อาฮียา บอ แบน ดูอี หลู ดี เฌาพรา. โคว, อัน ปึอน ดี ชึบ ครึง เอโพด ตึอน. เฆ ดูอี อี กอย รึม โดบ อาซอลู, อู วี มืร ตู นับ อาโยวนาทาน แฮะ เลห ฮาว โดง กอย เฆ.

4 อี มูห ดี กาแต นอน, โดง ต็อห อาโยวนาทาน ดี กาโลห ฮาว ดี ดา ซึก พีลีที เฆ ตึอน, อู บลาก อึณ มึห ดาอาง ตาง กาโตต บัต. ปอ อู บลาก มืร มึห กาโตต ดาอาง ปาย ตี. ดาอาง อู บลาก อัน จืร บอณีก. ปอ อู บลาก อัน จืร เซเน. 5 ดาอาง อู โบ็ง, อัน กอย ซืร บลาก นา กัว นา ฮาว มืง มีกมาด ตึอน. ปอ อู โบ็ง, อัน กอย ซืร บลาก นา เตต, นา ฮาว มืง ฆีบา.

6 อาโยวนาทาน กาลาง ดี ดูอี อี โฆ็ง ครึง กาโฆห อัน. อัน ต็อห, “ตัห, แตห อาย กาโลห ฮาว โดง กอย เฆ ดูอี อี ตู โดบ เฌาพรา. แตห อาย ยอด, โยว เฌาพรา ปี ซอ จอย อาย ดี เฌณ. ดูอี กาโฆห บอ กืน บอ เปรต, อึณ มูห เฌาพรา อี แป รันซู. อาว มึห อี ปึอน แร เฌาพรา.”

7 ดูอี อี โฆ็ง ครึง กาโฆห อาโยวนาทาน ตึอน, อัน วี กาลาง ต็อห, “โบง ปี อึง แม, โอว ดี โดบ ปี ต็อห แม ตี.”

8 อัน แฮะ ฮอต ต็อห ปาย ตี อาโยวนาทาน ปี วี ต็อห, “อาย กาโลห ฮาว โดง กอย เฆ ตี, แตห เฆ ยึร อาย. 9 เซ เฆ บอ ต็อห ดี อาย, ‘แตห บาย กอย บัร, แตห เย วี ตัห โดง กอย บาย ตี,’ อาย ตู ปึอน โฮะ. อาย บอ วี กอย ดี นี. 10 เซ เฆ บอ ต็อห, ‘โฮะ ฌัม โดง กอย เย นี,’ อาย บอ โฮะ. อึณ ดี แบน ลักซานา ลอง เฌาพรา ดี อาบ เฆ ดี อาย.”

11 ฆาย ตึอน บอ ฮาว, แตห เฆ ดูอี พีลีที ตึอน ยึร ฆาย. ดูอี พีลีที บอ ต็อห, “ยอด ดูอี แฮแบร, เฆ แฮะ เลห ตัห แคง กาเดา กาดาย โดง เครียง เฆ ตึอน.” 12 ดูอี อี กอย แคง ดับ ตึอน บอ ดัด ดี อาโยวนาทาน ฆาย อี โฆ็ง ครึง กาโฆห อัน ตึอน ต็อห, “ตัห, แตห บาย นับ อาเซ ดี กยัะ.”

อาโยวนาทาน วี กาลาง ดี ดา อี โฆ็ง ครึง กาโฆห อัน ต็อห, “แม โฮะ โดบ ดี ปัน โอว. เฌาพรา แฮะ ฮอต อาบ เฆ ดี เอ ดูอี อีซาเรลัะ.”

13 อาโยวนาทาน บอ มึอน โฮะ. ดา อี โฆ็ง ครึง กาโฆห ตึอน มืร โดบ ดี ปัน อัน. อาโยวนาทาน บอ แดบ แดบ ดูอี ปี กาตูณ อัน, แตห เฆ เกห. ดา อี โฆ็ง ครึง กาโฆห บอ โดบ ดี ง็อห แตห เฆ ยัม. 14 ปี ง็อห ยัม อาโยวนาทาน บอ ดา อี โฆ็ง ครึง กาโฆห อัน ตึอน, อึณ มูห อา ฆึร วี. โอ็ง โดง กาโฆห ฆาย ตึอน, อึณ กาว็อห แคะ ปี แท มามัก อู ฆู อาดา อู ซีแง. แฮะ มูห กาบัก อี ลึบ ซีมา อู ปูง.

15 เฆ ดา ซึก ดูอี พีลีที บอ ดีเยณ ดีโยว. บอ อี กอย แคง ดับ, บอ อี คยัะ แคง นา, บอ อี บัร โกรว, บอ อี เลห กาโฆห, เฆ ดอน อี บอ โยว กาเซา บอ แบน กาฟัร กาเฟียน ดี เฆ. เฌาพรา แฮะ แตห อึณ แบน กาฟัร กาเฟียน ปาย ตี. บอ มาอีม บอ เยณ กาเซา.

16 เฆ ดา ซึก อาซอลู อี บัร แคง มืง ฆีบียา, โดง มูห แคง กาดาย ดูอี อาเบนยาม ตึอน, เฆ บอ ยอด. เฆ บอ ยึร, พึง ดา ซึก พีลีที เฆ แฮะ แกร ดี โยม, ฮาว แบน โปละ แบน โปละ. 17 ดอ อัน ตี อาซอลู บอ กาลาง ดี เฆ ดูอี อี กอย โดบ อัน. อัน ต็อห, “ตีห ดี ยอด แตห เอ นับ ดูอี บอกาเฆลียด, แตห เอ นับ อี มูห ดูอี เอ, อาเซ แฮะ เลห ฮาว.” ปัน ตี เฆ บอ ตีห. อี มูห อาโยวนาทาน บอ ดูอี อี โฆ็ง ครึง กาโฆห อัน, ฆาย อาว ฮู กอย โดบ เฆ.

18 อาซอลู บอ กาลาง ดี อาฮียา ต็อห, “ดึห ฌีดืก เฌาพรา ตัห ดี นี.” ดอ อัน ตี ฌีดืก เฌาพรา กอย โดบ ดูอี อีซาเรลัะ. 19 ดอ กาลาง อาซอลู โฆรห ดี ดา อี หลู ดี เฌาพรา, อึณ บอ มึห ซีนัน ซีนืง ตัห นา คยัะ ดูอี พีลีที. อาซอลู วี ต็อห ดี ดา อี หลู ดี เฌาพรา, “จู, แกวะ ปา ฌีดืก, เบลห อูน ปาย ตี.”

20 อาซอลู บอ เฆ ดูอี อี กอย โดบ อัน, เฆ บอ ตัห กาฌูะ ต็อห ดี ฮาว กาโฆห. เฆ บอ ยึร ดา ซึก พีลีที แฮะ วี ดึห มาปัวะ ลาง, ลาย กาโฆห ราง เฆ. เฆ บอ ยึร บอ พึง ดา ซึก เฆ แฮะ กาปยาต โตต. 21 เฆ ดูอี แฮแบร อี ดึอม กอย บลาก ดูอี พีลีที อาต นี, เฆ อี แฮะ ดึอม ลึบ แคง โดง คยัะ ดูอี พีลีที ตึอน, เฆ บอ ตัห ดอน นา ดอน โปละ, วี กอย รึม โดบ ดูอี อีซาเรลัะ อี กอย โดบ อาซอลู ฆาย อาโยวนาทาน ตึอน. 22 บอ ดูอี อีซาเรลัะ อี แฮะ เครียง กาแต นอน อาเอพารีม ตึอน, เฆ บอ ยึร ลอง ดูอี พีลีที แฮะ เลห เตา, เฆ บอ วี ตัห, วี โดบ ดา ซึก เฆ, คูงครัห ดูอี พีลีที ตึอน. 23 ปาย ตี เฌาพรา บอ คยอด ดูอี อีซาเรลัะ ดอ อัน ตี. เฆ กาโฆห บอ กาโลห ฮาว มืง เบดอาเวน.

24 ซีแง ตี ดูอี อีซาเรลัะ บอ ยึร ดูก ดี น็อห เฆ. อาต กาโฆห เฆ, อาซอลู แฮะ ดืง เฆ ต็อห, “อาตึร นี โอว ดืง ดอน อี อี โฮม มาเซ อาต อับ. อาว เบระ ดี น็อห โอว, เซ โอว ตู แป รันซู โอว.” โคว, อาว มึห อาเซ อี โฮม.

25 ดา ซึก เฆ ตึอน ดอน อี บอ ฌัม แคง นัง เฮ นัง แปร โดง มึห งาม มาเพียน กอย แดง กาดาย. 26 ดอ ฌัม เฆ แคง นัง เฮ นัง แปร ตึอน, งาม มาเพียน ปี บอ จอด ปาย ป็อก ป็อก มืร, ยี ดู มึห อี ยัะ ดึห บลึบ แคง โมต อัน โกบ โยว เฆ อาซอลู. 27 อี มูห อาโยวนาทาน ตึอน, โกบ ตู ยึร อัน ปี ดืง ฆูณ อัน ดี เฆ ดูอี บอกาเฆลียด, อัน บอ ดึห ฆล็อง เลียห ปี โฆ็ง อัน ตึอน, ดูห อึณลาง งาม มาเพียน บอ ดึห โฮม. อู เฌณ งาย อัน บอ บลาง ลึห ซีคยา. 28 ปัน ตี อึณ มึห ดูอี อู วี กาลาง ดี อัน ต็อห, “ฆูณ แม แฮะ กาลาง ดี ดูอี บอกาเฆลียด ต็อห, ‘โอว ดืง ดอน อี เฆ อี โฮม ปี ดี โฮม อาตึร นี.’ โคว อัน ตี, เย ดอน อี แฮะ นูน, แฮะ ดีหลัห กาเซา ตืก.”

29 อาโยวนาทาน มืร วี ต็อห, “ฆูณ โอว, อัน ปยาต ดูอี บอ มืง. แตห แม ยอด, งาย โอว แฮะ บลาง ลึห ซีคยา โกบ โฮม โอว งาม มาเพียน อี แจก ตึอน.

30 เซ อึณ มูห ดูอี เอ บอกาเฆลียด ปึอน ดี โฮม, เอ ดี บอ ปึอน โตต แคะ กอย โกรวกราม รันซู เฆ ตึอน. บอ ปี ซี โฮม เอ ซีแง อาตึร นี, อาว นับ ดี กาลาง แคะ ตาง อาฆยึร อัน. แดง ตี, เอ ดี ปึอน ดี โฆห ยัม บอ ดูอี พีลีที เฆ บอกาเฆลียด.” 31 ซีแง ตี, เฆ บอ กาโฆห ดี ดูอี พีลีที, จูห ดี มืง มีกมาด กอ ฌัม มืง อาจาลูน. วาย อัน ตี เฆ มืร แฮะ นูน, แฮะ ดีหลัห อาว ฮู มึห แฮณ. 32 เฆ บอ กาโพรม ดี ดึห โกรวกราม รันซู เฆ. บอ มูห มาบู, มามัก, มัก ดีรอย. เฆ บอ ง็อห ยัม โตต แดง กาดาย ตึอน, โฮม บอ ยัง บอ หนาม อัน. 33 อี เฮา บอ กาลาง ดี อาซอลู ต็อห, “ดูอี เฆ ตึอน แฮะ กาโพรม ดี โฮม บอ ยัง บอ หนาม โดว ซัดดาวา ดอน โมยว. เฆ แฮะ ฮอต ลูต เฌาพรา.”

อาซอลู มืร วี ต็อห, “เบ นี, เบ แฮะ ฮอต โบง แตห กาดีก ซัดฌา เบ ลึร. ดอ ตี นี อู เฌณ, เบ กาหลอย มาว ตาง อี กอย ดี ตี, แตห อึณ ตัห ฌัม โดง กอย โอว นี.” 34 อาซอลู ปี วี กาลาง ต็อห, “แตห เบ ฮาว กาลาง ดี ดูอี เฆ ตี, ‘ดอน อี ดึห ตัห มาบู เฆ มามัก อัน ดี นี. ง็อห ยัม โฮม ดี นี. แกวะ โฮม หนาม อัน อี ลูต เฌาพรา.’”

ปัน ตี บา ดี อับ, ดูอี เฆ ตึอน บอ ดึห ตัห มาบู, ดึห มามัก เฆ, ตัห ง็อห ดี ตี. 35 อาซอลู มืร บอ โบง กาโช็ง หลู ดี เฌาพรา. ปี โบง อัน ตี, อึณ มูห กาโช็ง ปี หลู ดี เฌาพรา ดอ โฆว อัน.

36 ปัน ตี อาซอลู บอ กาลาง ต็อห, “แตห เอ กาโพรม ดี คูงครัห โดบ ดูอี พีลีที แคง หมึร นี. แตห แปร กอ วัห. แตห เอ ดึห โตต โกรวกราม เฆ บอ ง็อห ยัม โตต เฆ, แกวะ แตห เฆ ฆีด คอ อู วี.”

เฆ บอ โพรม, วี ต็อห, “เย โบง โดบ น็อห แม ตี.”

เฆ แฮะ ฮอต ต็อห ปาย ตี ดูอี หลู ดี เฌาพรา วี ต็อห, “แตห เอ ดีหมอด เฌาพรา ลอง อัน ตี.”

37 อาซอลู บอ ซาคึร หมาณ ดี เฌาพรา. อัน ต็อห, “เย ดี ปึอน คูงครัห โดบ ดูอี พีลีที เฆ นี? แม เฌาพรา ดี อาบ ดัว เฆ ดี เย ดูอี อีซาเรลัะ?” ซีแง ตี, เฌาพรา ยี ตู ต็อห มาเซ.

38 อาซอลู วี ต็อห, “เบ อี มูห ดา ตาง แดง ดูอี บอกาเฆลียด, แตห เบ กาโพรม ดี ตัห ดี นี. แตห เอ ดีหมอด แตห เอ นับ ลอง แปะ แฮะ กาลูต เอ อาตึร นี. 39 เฌาพรา อี คยอด ดูอี อีซาเรลัะ, อัน แฮะ นับ, โฆรห โอว แฮะ หมาน. เซ อึณ บอ มูห ฆอน โอว อาโยวนาทาน ตึอน, อี แฮะ ลูต มืร, อัน ดี โลว ยัม อาคัร หมาน.” กาแต ดูอี เฆ ตึอน, อาว มึห อี กาลาง คอ อู วี.

40 อัน บอ วี กาลาง ดี ดูอี อีซาเรลัะ ต็อห, “แตห เบ กอย อู บลาก. บอ โอว บอ อาโยวนาทาน, ยาย ดี กอย ปอ บลาก.”

อัน แฮะ ฮอต ต็อห ปาย ตี ดูอี เฆ ตึอน บอ กาลาง ดี อาซอลู ต็อห, “โบง แคะ ปี ซี โบง แม.”

41 ปัน ตี อาซอลู บอ ซาคึร ดี เฌาพรา อี มูห เฌาพรา ปี กรึบ ดูอี อีซาเรลัะ. อัน ต็อห, “อึย แม เฌา, แตห แม เฌา บยัะ หมาน หมาน, ซืร ซืร.” ปัน ตี เฌาพรา บอ บยัะ อาซอลู ฆาย อาโยวนาทาน, บอ แตห อี บอกาเฆลียด ปึอน ดี ลอด. 42 อาซอลู ปี วี ต็อห, “แตห เบ กาตาม ยาย อาโยวนาทาน นี.” ปัน ตี เฌาพรา บอ บยัะ อาโยวนาทาน.

43 อาซอลู ปี วี กาลาง ดี อาโยวนาทาน ต็อห, “แตห แม กาลาง ลอง แปะ แฮะ โบง แม.”

ปัน ตี อาโยวนาทาน บอ กาลาง ดี อัน ต็อห, “โอว แฮะ กาดูห ดี ดึห ฆล็อง เลียห โอว ตึอน, แฌะ งาม มาเพียน. โอว แฮะ กาดูห ดี โฮม อี แจก. โกบ แคะ ตี, แม ซี ง็อห ยัม โอว?”

44 อาซอลู ปี วี ต็อห ดี อัน, “อาโยวนาทาน อึย, โอว แฮะ ฮอต ดืง ดี เฌาพรา, แตห แม ยัม.”

45 ดูอี เฆ ตึอน วี กาลาง ดี อาซอลู ต็อห, “อึณ มูห อาโยวนาทาน, อัน แฮะ คยอด เอ ดูอี อีซาเรลัะ นี. ดอ ตี นี แม ซี ง็อห ยัม อัน? แกวะ โบง ปาย ตี. บอ เย ดี วี ดืง ดี เฌาพรา อี อีม เซเซ ตี. ฮึก ฆีณ อัน อู ณ็อง แม มืร ตู ปึอน แตห อึณ โจห แดง กาดาย. อึณ มูห เฌาพรา อี แฮะ จอย แตห อัน แป รันซู เอ อาตึร นี.” ปาย ตี ดูอี เฆ ตึอน บอ จอย อาโยวนาทาน, แตห อัน ลอด ยัม, แกวะ แตห ฆูณ อัน ปึอน ดี ง็อห ยัม อัน.

46 วาย อัน ตี อาซอลู บอ จู คูงครัห เฆ ดูอี พีลีที. ดูอี พีลีที มืร บอ วี เวณ แคง มืง เฆ.

47 ปัน ตี อาซอลู บอ วี อึบ เฆ ดูอี อีซาเรลัะ. อัน บอ กาโฆห ดี รันซู เฆ อี กอย โรบ เฆ ดอน บลาก. อึณ มูห ดูอี มืง โมวอาบ, ดูอี อัมโมน, ดูอี มืง เอโดม, เฆ ดา ตาง อาจอพัะ ตึอน, บอ ดูอี พีลีที เฆ ตึอน. ดา ซึก อัน บอ ฌัม โดง เหมา, เฆ แฮะ แป โตต. 48 อัน มืร ยัะ กาโฆห ดี รันซู อัน. อัน บอ กาโฆห ดี ดูอี อามาเลก. อัน บอ จอย แตห ดูอี อีซาเรลัะ ลอด ตัะ ดา โฌน อี ตัห ปรา โกรว เฆ.

49 ฆอน อีมาย อาซอลู มูห อาโยวนาทาน, อาอีซาวี บอ อามาลัะคีชูวา. อัน บอ มึห ฆอน อีบึณ อา วี. อี ตาง อัน จืร นาง เมราบ. อี เตียะ อัน จืร นาง มีคาลัะ. 50 อีบึณ อาซอลู อัน จืร นาง เอฮีนอง. อัน มูห ฆอน อาฮีมาด. ดา โบว ตาง อัน บอ จืร อาบานา. อัน มูห ฆอน อาเนรัะ. อึณ มูห ฆูณ แตะ อาซอลู. 51 อากีซา มูห ฆูณ อาซอลู. บอ ฆูณ อาบานา จืร อาเนรัะ. อาเนรัะ วี มูห ฆอน อาบีเอลัะ.

52 ดอ มูห โจว บาน อาซอลู ตี, เฆ แฮะ กาโฆห กืน ดี ดูอี พีลีที. ดอ วี กาตูณ อาซอลู ดูอี อี มึห แฮณ กืน, อี มึห โปลม ตาง บอ น็อห ยัะ, อัน วี แดะ ดูอี ตี แบน ดา ซึก อัน.