1 อาซอลู ตึอน แบน คูนดีคัม ดอ อาซาก อัน โอย ฆึร ซีนัม. อัน อึบ ดูอี อีซาเรลัะ อาดา พวน ฆึร ดี อา ซีนัม.

2 อัน บอ ร็อห ดูอี อีซาเรลัะ โอย แหรณ วี. แฮะ ฮอต, อาดา อา แหรณ วี, อัน แตห เฆ กอย โดบ อัน ดี มืง มีกมาด ดี นอน เบดาเอน ตึอน. อี มูห อาดา อู แหรณ, อัน แตห เฆ กอย โดบ อาโยวนาทาน แคง มืง ฆีบียา, โดง มูห กาดาย ดูอี อาเบนยาม เฆ ตึอน. เฆ อี ซี ฆีด อัน บอ จัร เฆ วี เวณ โดง กอย เฆ ดอน อี.

3 อาโยวนาทาน ตึอน บอ กาโฆห, บอ แป ดูอี พีลีที, บอ ปยาต แวน ดา ซึก เฆ อี กอย ดี มืง ฆีบา ตึอน. ดูอี พีลีที มืร บอ ยึร ลอง อาตี. อาซอลู บอ จัร อี บูด เวา, แตห ดูอี บอ มืง กอ นับ. อัน ต็อห, “แตห ดูอี แฮแบร เฆ ดอน อี ยึร.” 4 ปาย ตี ดูอี อีซาเรลัะ ดอน อี บอ ยึร ลอง อาซอลู แฮะ กาโฆห, แฮะ แป ดูอี พีลีที ตึอน. ดูอี พีลีที เฆ บอ ฌ็อง ดูอี อีซาเรลัะ. เฆ ดูอี อีซาเรลัะ ดอน อี บอ โดบ อาซอลู, ฮาว กาฌูะ ดี มืง ฆีลัะฆา ตึอน.

5 ดูอี พีลีที วี ตัห กาฌูะ, ต็อห ดี วี กาโฆห ดี ดูอี อีซาเรลัะ. เฆ มึห ลักเลา โอย แหรณ หลาง บอ ดูอี อี ป็อะ ลักเลา ตี เดา แหรณ วี. ดา ซึก เฆ มืร กืน. อึณ กอ แหนน กาฮาต ดี โคบ นัมมูกซารา ดี กืน. เฆ มืร ตัห คยัะ ดับ เฆ ดี มืง มีกมาด, อี มูห นา เลห ซีแง มืง เบดอาเวน ตึอน. 6 เฆ ดูอี อีซาเรลัะ บอ นับ ลอง ดี ฌัม เฆ ดูก ตาง. เฆ แฮะ นับ, อึณ ดี หณาบ กาเซา ดี เฆ. อี ดี คาหนาบ เฆ. ปัน ตี เฆ บอ เหรต ดี เครียง เฆ แคง กาเดา มาว, แคง กาโอ็ง นอน, กาแดะ ดาอาง, กาแดะ นอน, บอ เหรต โดง มึห ดี โฆละ แคง กาเดา กาดาย. 7 ดูอี แฮแบร มัง อี บอ กาโลห อึม แบลง ยอดาน, วี ฮาว ดี มืง ฆัด ฆาย มืง ฆีเลอาด. อี มูห อาซอลู, อัน ยี ซี กอย ดี มืง ฆีลัะฆา ตึอน. เฆ ดูอี บอกาเฆลียด โดบ อัน. มาแล, เฆ ยี โยว กาเซา. 8 อาซอลู วี กอย บัร บู ซีแง แคะ ปี ดึอม ต็อห อาซามูเอน ดี อัน. บอ ฌัม อาคราว อัน, อาซามูเอน ยี หณัม ตัห ฌัม แคง มืง ฆีลัะฆา ตี. ดา ซึก อัน บอ จูห ดี เตา ฮาว อู วี อู บลาก. 9 อาซอลู บอ ต็อห, “ดึห ปี ดี หลู อี โดะ ดี เงา บอ ปี ดี หลู อี กอย กาฌูะ โฮม รึม, ดัว ดี โอว.” แฮะ ฮอต อัน บอ หลู ปี หลู อี โดะ ดี เงา ตี. 10 อัน แฮะ ฮอต หลู ปี หลู อี โดะ ดี เงา ตี, อาซามูเอน บอ ตัห. อาซอลู บอ ฮาว บัร ดี รวห อัน.

11 อาซามูเอน บอ ดีหมอด อัน ต็อห, “แม แฮะ โบง มาเซ?” อาซอลู ต็อห, “โกบ ตู ตัห แม ซีแง ต็อห แม ดี ตัห, ดา ซึก แฮะ เตา กาย็อห ดี โอว, ฮาว อู วี อู บลาก. ดูอี พีลีที แฮะ วี ตัห กาฌูะ โตต ดี มืง มีกมาด ตึอน. 12 ดอ ยึร โอว ฌึร ตี, โอว วี กาพา แคง น็อห โอว, ‘ดูอี พีลีที ดี ตัห กาโฆห ดี เย ดี มืง ฆีลัะฆา นี. โอว ยี หณัม ปึอน ดี ฆันโดว เฌาพรา. โกบ อึณ ปาย ตี โอว กอ นับ แคง น็อห, โอว โลว หลู ปี หลู อี โดะ ดี เงา ตี.’”

13 อาซามูเอน วี ต็อห ดี อาซอลู, “แม แฮะ ฮอต โบง นา มืก. แม ตู โดบ ดารา เฌาพรา, แคะ ปี ดัม อูน เฌาพรา ดี แม. เซ แม บอ โบง แตห อึณ ล็อะ น็อห เฌาพรา, เฌาพรา ดี แตห บอ แม อึบ ดูอี อีซาเรลัะ เซเซ นา อาต นี ฮาว. 14 ดอ ตี นี, อึณ อาว ฮู แบน ปาย ตี. โกบ ตู โทม แม โฆรห ปี จัร เฌาพรา ดี แม, เฌาพรา แฮะ ฮอต วี เหรต ดูอี ปอ อู วี อี ล็อะ น็อห อัน, อี ปี อึง อัน, แตห อัน แยต ดูอี ปี อึบ อัน.” 15 อาซามูเอน บอ เลห ตัะ มืง ฆีลัะฆา, วี โฮะ ดี มืง ฆีบียา อี มูห แคง กาดาย ดูอี อาเบนยาม ตึอน. อาซอลู บอ ตีห ดูอี อี กอย โดบ อัน. อึณ มึห ดูอี เดา มาย็อห วี.

16 วาย อัน ตี อาซอลู ฆาย อาโยวนาทาน อี มูห ฆอน อัน บอ เฆ ดูอี อี กอย โดบ ฆาย ตึอน, เฆ กอย ดี มืง ฆีบา อี มูห แคง กาดาย ดูอี อาเบนยาม ตึอน. ดูอี พีลีที บอ คยัะ ดี มืง มีกมาด ตึอน. 17 อึณ บอ มึห ดา ซึก เฆ ดูอี พีลีที โอย พึง, เฆ เลห ฮาว ตัะ ดับ เฆ. อู พึง บอ ฮาว โดบ อึณเตณ ฮาว ดี มืง ออพารัะ อี มูห แคง มืง ตาง ซูอาน ตึอน. 18 ปอ อู พึง บอ ฮาว โดบ อึณเตณ มืง เบดโฮวรูน. ปอ อู พึง วี ฮาว โดบ อึณเตณ กาอูน กาดาย อี มูห แคง ดีลัะ เฌโบวยีม นา แปร กาฮ็อห ตึอน.

19 เฆ ดูอี พีลีที แฮะ ดึอม ต็อห, “เอ ตู แตห อาเซ นับ ปี นับ เอ. โยว ดูอี แฮแบร เฆ วี โบง บลา เลียห บอ อาตึม ราง เฆ. โกบ ต็อห เฆ ปาย ตี แคง มืง อีซาเรลัะ, อู วี มืร ตู มึห อี นับ ดี จึม.” 20 โคว, เซ ดูอี อีซาเรลัะ ซี แตห บลา แท เฆ, อึณโละ บอ มึย เฆ อึณวาต เฆ วี ลัม, เฆ ดอน อี โลว โลง โดง กอย ดูอี พีลีที ตี. 21 เฆ ยี หมาณ รึอน กืน ดอ จึม เฆ. เซ อึณ มูห บลา แท เฆ อึณโละ, เฆ หมาณ รึอน แฌด โอย เท. อี มูห มึย เฆ อึณวาต เฆ หมาณ อู เท. เซ วี อึณปราย อึณรีห เฆ บอ หมาณ แคะ ตี.

22 โคว อัน ตี, ดอ กาโฆห เฆ ดูอี อีซาเรลัะ, เฆ อาว ฮู วี มึห ดี โฆ็ง บลา เลียห เฆ มาปัวะ ลาง. มี อาซอลู ฆาย อาโยวนาทาน ตึอน วี มึห ดี โฆ็ง มาปัวะ ลาง.

23 ดอ อัน ตี ดูอี พีลีที บอ ตึย ดา ซึก เฆ มัง อี ฮาว โดบ อึณเตณ อี ฮาว นา มืง มีกมาด ตึอน.