1 อาซามูเอน กาลาง โฆรห ดี ดูอี อีซาเรลัะ. อัน ต็อห, “เบ ยอด, โอว แฮะ โทม โฆรห ปี กาลาง เบ ดี โอว. โอว แฮะ แตห เบ มึห คูนดีคัม อี อึบ เบ. 2 ดอ ตี นี คูนดีคัม ตี ดี แบน อี แยต เบ. อี ยี มูห โอว, โอว แฮะ กัด. ฮึก ฆีณ โอว มืร แฮะ ลูย. ฆอน โอว มืร กอย รึม โดบ เบ. โอว แฮะ แบน อี แยต เบ ซีณ ดีแตด โอว กอ ฌัม อาตึร นี. 3 โอว ยี ซี กอย ดี นี. บอ เฌาพรา บอ คูนดีคัม ปี ดึอม พ็อห โอว นามัน, ฆาย มืร แฮะ กอย ดี นี, โทม โฆรห เบ. แตห เบ กาลาง ดี โอว. โอว แฮะ ดึอม ดึห มัก อาเซ? โอว แฮะ ดึอม ดึห มาลา อาเซ? โอว แฮะ ดึอม ปีหล็อก ดี อาเซ? โอว แฮะ ดึอม คาหนาบ ดี อาเซ? โอว แฮะ ดึอม ปรา ดี ดึห รึอน ดี อาเซ, อี มูห รึอน อี ตู แตห โอว ยึร นา หมาน? เซ โอว แฮะ โบง ฌึร ตี ดี เบ, โอว ดี วี แตห วีว โตต.”

4 อัน แฮะ ฮอต ต็อห ปาย ตี เฆ วี ต็อห ดี อัน, “แม ซารา, แม ตู ดึอม ปีหล็อก ดี เย. แม ตู ดึอม คาหนาบ ดี เย. แม ตู ดึห โกรว อาเซ บอ ตู ดึอม ปรา ดี กึห รึอน คอ อี แจก.”

5 อัน ปี วี ต็อห, “เฌาพรา บอ คูนดีคัม ปี ดึอม พ็อห โอว นามัน แฮะ แบน ซักเซ ลอง อัน ตี. เบ ตู มึห มาเซ ปี ดี พยาก โอว.” ปัน ตี เฆ ปี วี ต็อห, “แฮะ มูห.”

6 ปัน ตี อาซามูเอน วี ต็อห, “อัน เฌา อี มูห เฌาพรา อี ร็อห อาโมวแซ ฆาย อาโรน ตึอน, อัน แฮะ แตห ฆูณ ดัง เบ เลห แคง มืง แอฆึบ ตึอน. 7 ดอ ตี นี แตห เบ กอย ดี นี บอ โทม ซีคยา. โอว ดี วี แค ดี เบ ปี ดี ปาย เฌาพรา ดี เบ บอ ดี ฆูณ ดัง เบ. อึณ มูห นา หมาน บอ นา หมึอม อาม กาเซา ดอน โมยว.

8 วาย แฮะ ฌัม อายาโกบ แคง มืง แอฆึบ, ดา ดา เบ ตึอน แฮะ ซาคึร หมาณ กาเซา ดี เฌาพรา. เฌาพรา บอ จัร อาโมวแซ ฆาย อาโรน, แตห ฆาย ตึย ดา ดา เบ เลห แคง มืง แอฆึบ, วี ตัห ฌัม แคง มืง นี.

9 มาแล, เฆ แฮะ วี ปีว เฌาพรา อี มูห เฌาพรา ปี กรึบ เฆ. อัน เฌา แฮะ แตห รันซู กาโฆห ดี เฆ. แฮะ ฮอต, อัน วี อาบ เฆ ดี อาซีซาลัะ, อี มูห ดา โบว ตาง แคง มืง ปี อึบ คูนดีคัม อาฮาจอ ตึอน. แฮะ อาบ บอ ดี ดูอี พีลีที บอ ดี คูนดีคัม อี อึบ ดูอี โมวอาบ ตึอน.

10 ปัน ตี เฆ บอ ซาคึร ดี เฌาพรา, บอ ต็อห, ‘เย แฮะ แวน แม เฌา, แฮะ วี กรึบ เฌา บาลัะ บอ เฌา เอซาทารีด. อาตึร นี เย ยี หมาณ ต็อห, แตห แม เฌาพรา จอย เย, แตห เย ลอด ตัะ รันซู เย. ปัน ตี เย ดี วี กรึบ มี แม เฌาพรา.’ 11 เฆ แฮะ ฮอต ต็อห ปาย ตี เฌาพรา บอ จัร อาเยรูบบาลัะ บอ อาเบดาน, อาเยพาดา บอ อาซามูเอน, แตห เฆ จอย เบ, แตห เบ ลอด ตัะ รันซู เบ อี แฮะ โรบ เบ. เบ กอ ปึอน ดี ลอด ซีคยา, กอ ปึอน ดี กอย ดาคึย.

12 วาย อัน ตี ดอ ยึร เบ อานาฮาซา อี มูห คูนดีคัม ดูอี อัมโมน ตัห กาโฆห ดี เบ, เฌาพรา อี มูห เฌาพรา ปี กรึบ เบ, อัน แฮะ ปี คูนดีคัม เบ. เบ ยี วี ต็อห ดี โอว, ‘อาว มูห, เย ซี ปึอน คูนดีคัม, แตห อัน แบน อี อึบ เย.’ 13 ดอ ตี นี, แตห เบ ยอด, คูนดีคัม แปะ แฮะ หมาณ เบ ตี, เฌาพรา แฮะ ดัว, แตห อัน อึบ เบ. 14 เซ เบ บอ โรวเซ เฌาพรา, ตู แวน โฆรห อัน, เซ เบ กรึบ มี อัน เฌา, อึณ แฮะ มูห. ปาย ตี บอ เบ บอ คูนดีคัม อี อึบ เบ ดี โดบ ซีคยา เฌาพรา. 15 เซ เบ ยี ตู โทม, ยี ตู ดึห โฆรห เฌาพรา, เบ ฮี หลึร ดารา เฌาพรา, เฌาพรา มืร ตู จอย เบ. เฌาพรา ดี โบง ดี เบ แตห อึณ ปี แปะ แฮะ ดึอม โบง อัน ดี ดา ดา เบ ตึอน.

16 ดอ ตี นี, เบ กอย หนีม หนีม. บัร เบ ยอด, เฌาพรา ดี โบง อี หมึอม อาม, แตห เบ ยึร. 17 อาตึร นี มูห ซีแง โซะ เคาคยูง. โอว ดี ซาคึร ดี เฌาพรา. อัน เฌา ดี แตห ฆลาย โจห. อึณ ดี มึห บอ ฮัม กานัม. ดอ อัน ตี เบ ดี นับ หมาบ แปะ แฮะ โบง เบ ดี เฌาพรา ดอ หมาณ กาเซา เบ คูนดีคัม.”

18 วาย อัน ตี อาซามูเอน บอ ซาคึร ดี เฌาพรา. ซีแง ตี เฌาพรา บอ แตห ฆลาย โจห บอ มึห บอ ฮัม กานัม. ดูอี เฆ ตึอน บอกาเฆลียด บอ อาม บอ โยว กาเซา เฌาพรา บอ อาซามูเอน.

19 เฆ บอกาเฆลียด บอ วี กาโพรม ดี ต็อห ดี อาซามูเอน, “หมาณ แม ซาคึร ดาง เย ดี เฌาพรา อี มูห เฌาพรา ปี กรึบ แม, แกวะ แตห เย กาดูห ดี ยัม. เย แฮะ โบง หมาบ กืน. บอ แปะ แฮะ หมาณ เย คูนดีคัม แฮะ แว แบน หมาบ อึณ ปัว ดี เย.”

20 อาซามูเอน วี ต็อห ดี เฆ, “เบ แกวะ โยว. เบ ปี บอ แฮะ โบง หมาบ ตี, เบ แกวะ วัห แล อึณเตณ เฌาพรา, ดึห แคะ กอย น็อห พึอม เบ, วี ซาคึร ดี เฌาพรา. 21 เบ แกวะ วัห อึณเตณ เฌาพรา. แกวะ วี กรึบ อารึบ อี ตู มึห ดี ลอง ดี ดาง. เฆ ตู ปึอน จอย เบ, ตู ปึอน คยอด เบ. เฆ ตู มึห ปวน มาเซ. 22 เฌาพรา ซี แตห ดอน อี นับ น็อห ดีฮาง อัน. โคว, อัน มืร ตู เบลห ตู แวน เบ อาโมยว ดูอี ปี ร็อห อัน. อึณ แฮะ ล็อะ น็อห เฌาพรา. อัน มืร แฮะ ร็อห แตห เบ แบน ดูอี ปี อึบ อัน. 23 อี มูห โอว, เซ โอว ตู ซาคึร เซเซ ดาง เบ ดี เฌาพรา, อึณ ดี แบน หมาบ ดี โอว. โคว, โอว ดี ซาคึร ดาง เบ เซเซ. โอว ดี บอ มาโนว เบ เซเซ ลอง นา บอด นา หมึอม, แตห เบ นับ ซีคยา. 24 เบ โลว โรวเซ เฌาพรา. เบ โลว ดึห โตต โตต แคะ กอย น็อห พึอม เบ, โดบ มี อัน เฌา ตี เซเซ. เบ โลว เฌณฌา ลอง อี หมึอม อาม กาเซา แปะ แฮะ โบง เฌาพรา ดี เบ. 25 เซ เบ ยี แนะ โบง อี ตู หมึอม, บอ เบ บอ คูนดีคัม เบ ตี ดี ลึร ชึม โตต.”