1 วาย อัน ตี อึณ มึห ดูอี อัมโมน อู วี, อัน จืร อานาฮาซา. บอ อัน บอ ดา ซึก อัน ตัห คยัะ นา เรต มืง ยาเบด แคง กาดาย มืง ฆีเลอาด ตึอน. เฆ วี บัร มืง ยาเบด ตี, แกวะ แตห อี ปึอน ดี ลึบ, ปึอน ดี เลห. เฆ ดูอี แคง มืง กาลาง ดี อานาฮาซา ตึอน ต็อห, “แตห เอ ลาย กาแซณ. เซ แม ตู กาโฆห ดี เย, เย ดี แตห แม อึบ เย.”

2 อานาฮาซา อี มูห ดูอี อัมโมน ตึอน, อัน วี ต็อห ดี เฆ, “เซ เบ ดี แตห โอว อึบ เบ, แคะ กอย ดูอี อีซาเรลัะ, เบ ดี คัม แตห โอว ฆวัยะ เลห งาย เบ บลาก อาอัห ดอน อี, แตห ซาเร เบ บอ ชึม.”

3 อัน แฮะ ฮอต ต็อห ปาย ตี, เฆ อี มูห ดา ตาง แคง มืง ยาเบด ตึอน บอ วี ต็อห ดี อัน, “เย หมาณ ดี บัร แตห อึณ โนะ บู ซีแง, แตห เย ปึอน ดี จัร ดาลาม ฮาว ดี มืง อีซาเรลัะ ดอน โปละ. ปัน ตี เซ อาว ฮู มึห อาเซ อี ดี ตัห จอย แตห เย ลอด, เย ดี อาบ โดว เย ดี แม.”

4 ดาลาม เฆ ตึอน บอ ฮาว ฌัม ดี มืง ฆีบียา อี มูห โดง กอย อาซอลู ตึอน. เฆ บอ กาลาง โฆรห ตึอน แตห อี นับ. เฆ ดูอี ดอน อี บอ กาโพรม ดี ยาม ตาง ตาง. 5 ดอ อัน ตี อาซอลู โดบ มัก อัน, ตัห ดี โดง นา อัน. อาซอลู บอ ดีหมอด ต็อห, “ดูอี เฆ นี ยาม โกบ มาเซ?” เฆ บอ กาลาง แตห อัน นับ โฆรห ปี ต็อห ดูอี อี ตัห แคง มืง ยาเบด ตึอน.

6 ดอ ยึร อาซอลู โฆรห ตี, น็อห พึอม เฌาพรา อี มึห ปวน ตาง บอ ตัห ปลึก กาเซา อัน. อัน มืร แฮะ รู กาเซา. 7 อัน บอ ง็อห มัก อัน อู ฆู, กาแดบ แบน ดีฆัร ดีฆัร, ดัว ดี ดาลาม เฆ ตึอน, แตห เฆ ฮาว กาลัยะ แคง มืง ดูอี อีซาเรลัะ ดอน โปละ, แตห เฆ กาลาง ต็อห, “อาเซ ตู เลห โดบ ดี ปัน อาซอลู ฆาย อาซามูเอน, มัก อัน โลว คัม ดี โบง ปาย นี.” เฆ ดอน อี บอ โยว กาเซา เฌาพรา. เฆ บอ ลาย โพรม ดอน อี, ต็อห ดี กาโฆห, วี แบน อู น็อห. 8 อาซอลู บอ แดม ฌาราง ดูอี อี ดี กาโฆห ดี มืง เพเรซีก ตึอน. อึณ มึห ดูอี อีซาเรลัะ โอย แซน วี. บอ ดูอี อายูดา มึห โอย หมึณ วี.

9 เฆ บอ กาลาง ดี ดาลาม เฆ ตึอน ต็อห, “แตห เบ กาลาง ดี ดูอี อี กอย แคง มืง ยาเบดฆีเลอาด ตึอน ต็อห, ‘แคหณา ซอดาด ฮี แฆ, อึณ ดี มึห ดูอี ตัห คยอด เบ.’” ดาลาม เฆ ตึอน บอ วี ตัห กาลาง ดี เฆ ดูอี แคง มืง ยาเบด ตึอน, แตห เฆ ดอน อี วี โคย. 10 ปัน ตี ดูอี มืง ยาเบด บอ กาลาง ดี อานาฮาซา อี มูห ดูอี อัมโมน ตึอน ต็อห, “แคหณา เย ดี ตัห โฆม แม, แตห แม ปึอน ดี โบง แคะ ล็อะ น็อห แม.”

11 ปา แคหณา ซีณวัห เจว, อาซอลู บอ กาย็อห ดูอี อัน แบน โอย พึง. เฆ บอ ลึบ ฮาว แคง โดง คยัะ รันซู เฆ ตึอน. เฆ บอ กาโฆห ดี ดูอี อัมโมน. ซอดาด บอ แฆ มืร, เฆ แฮะ ฮอต แป โตต. ดูอี อัมโมน, เฆ อี ซี ฆีด ตึอน, เฆ บอ กาย็อห ฮาว อู วี อู บลาก. อา วี มืร อาว มึห อี ปึอน ดี กาโดบ.

12 วาย อัน ตี แคะ กอย ดูอี อีซาเรลัะ, ดอน อี บอ กาโพรม ดี กาลาง ดี อาซามูเอน ต็อห, “อาเซ แฮะ ดึอม ต็อห, ‘เย ตู โลว อาซอลู อึบ เย?’ เฆ อี กาลาง ปาย ตี แดะ เฆ ตัห ดี นี, แตห เย ปึอน ดี ง็อห ยัม บอ เฆ.”

13 อาซอลู วี ต็อห, “อาตึร นี อาว ปึอน ง็อห ดูอี คอ อู วี, แตห อัน ยัม. อาตึร นี, อึณ มูห ซีแง คยอด เฌาพรา ดูอี อีซาเรลัะ.”

14 อาซามูเอน บอ กาลาง ดี ดูอี เฆ ตึอน ต็อห, “แตห เบ วี เวณ ดี มืง ฆีลัะฆา ตึอน, แตห ดอน อี วี โฆม คูนดีคัม กามาย เอ นี.” 15 อัน แฮะ ฮอต ต็อห ปาย ตี, ดูอี เฆ ตึอน ดอน อี บอ ฮาว ดี มืง ฆีลัะฆา. เฆ บอ อืบ มยูก อาซอลู, ต็อห อัน มูห คูนดีคัม เฆ, แตห บอ เฌาพรา โทม โฆรห เฆ ตี. เฆ บอ หลู ปี ดี หลู อี กอย กาฌูะ ดี อาต เฌาพรา, วี โฮม รึม. อาซอลู บอ เฆ ดูอี อีซาเรลัะ ดอน อี บอ โบง บลอย โบยว ดาคึย ดี ตี.