อาซามูเอน บอ ดึห กาเปา นามัน, พ็อห ดี ฆีณ อาซอลู บอ อูห อัน. อัน บอ ต็อห, “เฌาพรา แฮะ จัร โอว พ็อห นามัน ดี ฆีณ แม. อัน ดี แตห แม แบน ดา ตาง อี อึบ ดูอี อีซาเรลัะ. 2 อาตึร แม ฮี เลห โดง กอย โอว นี, แม ดี ยึร ดูอี อา วี. ฆาย ดี กอย โคบ บาเรว นาง ราเอน อี มูห ดี เรา เจลีจา โคบ กาอูน กาดาย มืง อาเบนยาม ตึอน. ฆาย อา วี ตี ดี กาลาง ดี แม ต็อห, ‘มาโลว ปี ฮาว เหรต บาย ตึอน, อี แฮะ ฮอต วี ยึร. ฆูณ แม มืร ตู มึห น็อห แหม โกบ มาโลว ตี. อัน วี มึห น็อห แหม โกบ บาย.’ อัน ต็อห, ’โอว ดี ปาย เหมา โกบ ฆอน โอว นี?’

3 เซ แม ฮี ปวน ดี ตี, วี ฌัม โดง มึห เฮ ตาง อี กอย กาตัด เรา ทาบอรา, แม ดี กาตูณ ดูอี โอย วี. เฆ ดี ฮาว โดง กรึบ เฆ เฌาพรา แคง มืง เบดาเอน. อู วี ดี โจะ โฆ็ง ฆอน มาแป โอย โดว. ปอ อู วี ดี โฆ็ง คามูน โอย โบ็ง. ปอ อู วี, อัน ดี โฆ็ง อึม มางูน. 4 เฆ ตี, เฆ ดี กาลาง โฆรห ดี แม. เฆ ดี ดัว คามูน ตี ดี แม อาดา อา โบ็ง. แม ดี บอ ดึห ดี เฆ.

5 วาย อัน ตี แม ดี ฮาว ฌัม ดี นอน โดง กอย เฌาพรา, โดง มึห ดับ ดูอี พีลีที ตึอน. แม ฮี ราม กาตัด มืง ตี, แม ดี กาตูณ พึง ดูอี อี บยาน โฆรห เฌาพรา. เฆ ดี โฆ็ง ดีง ดีเรา บอ ฆรึง บอ เวา บอ ดีง อี ปึอน บัห. เฆ ดี ตัห นา กัว ตึอน, วี โลง บอ บยาน โฆรห เฌาพรา. 6 ดอ อัน ตี น็อห พึอม เฌาพรา อี มึห ปวน ตาง อัน ดี ตัห โลง ดี แม. แม มืร ดี บยาน โฆรห เฌาพรา โดบ เฆ. อึณ ดี แตห น็อห แม กาปลูะ, อาว ฮู ปี ดูอี บรีม. 7 เซ แฮะ แบน โตต ดอน โมยว ปี ต็อห โอว ดี แม ฌึร ตี, แตห แม โบง แคะ ปี โลว แม โบง. โคว, เฌาพรา แฮะ กอย รึม โดบ แม.

8 แม โลว ฮาว ดี อาต, โลง ดี มืง ฆีลัะฆา. โอว มืร ดี วี โลง โดง กอย แม ดี ตี. แม ดี ปึอน ดี หลู ปี หลู อี โดะ ดี เงา บอ ปี หลู อี กอย กาฌูะ โฮม รึม. มาแล, แม โลว บัร บู ซีแง, แตห อึณ กอ ฌัม ปัน ดี ตัห แหน โอว ดี แม ลอง ปี โลว โบง แม.” แคะ ตี อาซามูเอน แฮะ กาลาง ดี อาซอลู.

9 ปัน ตี อาซอลู บอ วี เลห โดง กอย อาซามูเอน ตึอน. ซีแง ตี เฌาพรา บอ แตห น็อห อาซอลู บลืง. อึณ บอ แบน โตต ปี ดึอม กาลาง อาซามูเอน ดี อัน. 10 ดอ ตัห ฌัม อาซอลู บอ แดเจณ อัน ดี นอน ตึอน, อัน บอ วี กาตูณ พึง ดูอี อี บยาน โฆรห เฌาพรา ตึอน. น็อห พึอม เฌาพรา แฮะ ตัห โลง ดี อัน. อัน บอ บยาน โฆรห เฌาพรา โดบ เฆ ตึอน. 11 เฆ ฆึก อัน, เฆ ดูอี อี แฮะ ดึอม นับ อัน อาต นี, เฆ วี ยึร อัน บยาน รึม โฆรห เฌาพรา โดบ พึง ดูอี อี บยาน โฆรห เฌาพรา ตึอน, เฆ วี ลาย กามวน ต็อห, “ออ, อึณ ปาย เหมา ดี ฆอน อากีซา อี มูห อาซอลู? อึณ ปี บอ อัน แฮะ วี แบน ดูอี บยาน โฆรห เฌาพรา.”

12 เฆ ดูอี อี กอย ดี ตี อึณ มึห อู วี อี ต็อห, “ฆูณ อัน มูห อาเซ?” ปัน ตี อึณ วี แบน โฆรห มากาทัะ อี ต็อห, “บอ อาซอลู แฮะ แบน ดูอี บยาน โฆรห เฌาพรา.” 13 วาย อัน ตี อาซอลู แฮะ ฮอต บยาน โฆรห เฌาพรา, อัน ฮาว ฌัม โดง หลู เฆ ตึอน.

14 ฆูณ แตะ อาซอลู ดีหมอด อัน ฆาย แดเจณ อัน ตึอน ต็อห, “อึย, บาย ตัห นา เหมา?” ฆาย ตึอน วี ต็อห, “ยาย ฮาว เหรต มาโลว, ยาย บอ นับ อาว ฮู ยึร, ยาย มืร บอ วี ฮาว ฌัม โดง กอย อาซามูเอน.”

15 ฆูณ แตะ อาซอลู ตึอน ปี วี ต็อห, “กาลาง ดี โอว, มาเซ ปี แค อาซามูเอน ดี บาย?”

16 อาซอลู วี กาลาง ดี ฆูณ แตะ อัน ตึอน ต็อห, “อาซามูเอน กาลาง แตห ยาย นับ ซีคยา, อี แฮะ ฮอต ยึร มาโลว ตึอน.” ลอง ดี อึบ อัน มาน มืง ปี กาลาง อาซามูเอน ตึอน, อัน ยี ตู แค.

17 ปัน ตี อาซามูเอน ตึอน บอ แดะ กาฌูะ ดูอี อีซาเรลัะ ดอน อี, แตห เฆ ตัห โดง กอย เฌาพรา แคง มืง มีฌาพา ตึอน. 18 อัน บอ กาลาง ดี ดูอี อีซาเรลัะ ต็อห, “เฌาพรา อี มูห เฌาพรา ปี กรึบ ดูอี อีซาเรลัะ, อัน ต็อห, ‘โอว แฮะ แตห ดูอี อีซาเรลัะ เลห แคง มืง แอฆึบ, ตัห ดี นี. โอว แฮะ แตห เบ ลอด ตัะ เฆ อี มึห ปวน, อี คาหนาบ เบ โบง ฆาน กืน.’ 19 ดอ ตี นี, เบ ยี วี แวน อี มูห เฌาพรา เบ, อี แฮะ จอย แตห เบ ปวน ดูก, ปวน หณาบ ดอน โมยว. เบ แฮะ กาลาง ต็อห, ‘เย หมาณ คูนดีคัม, แตห อัน อึบ เย.’ โกบ อึณ ปาย ตี เบ โลว วี กรึบ เฌาพรา, แตห เบ ตัห ดี อัน ครึร เหมา ครึร อัน, แตห เฌาพรา ร็อห อี ดี อึบ เบ.”

20 ปัน ตี อาซามูเอน บอ แตห ดูอี ดอน โมยว ดอน ครึร ตัห กอย เครียะ อัน. แฮะ ฮอต, ดูอี อาเบนยาม แบน ดูอี แปะ แฮะ ร็อห เฌาพรา. 21 อัน แตห ดูอี ครึร อาเบนยาม ตึอน ตัห แบน อึณกรึห แบน อึณกรึห. อึณ บอ มูห อึณกรึห อามาตารี แปะ แฮะ ร็อห อัน เฌา. แคง อึณกรึห ตี อึณ วี มูห อาซอลู อี มูห ฆอน อากีซา ตึอน, อี ปี ร็อห อัน. เฆ วี เหรต อัน, ยี ตู ยึร อัน. 22 เฆ ปี วี ดีหมอด เฌาพรา ต็อห, “อี มูห ฆอน อีมาย วี ตี, อัน แฮะ ตัห ดี นี?”

แฮะ ฮอต, เฌาพรา วี ต็อห, “อัน เครียง อัน โดง กอย โกรว เฆ.”

23 เฆ บอ กาแบลบ ฮาว แดะ ตัห อาซอลู. ดอ ตัห กอย อัน กาแต ดูอี กืน ตึอน, อัน จา หลึอม เฆ ดอน อี. เฆ บอกาเฆลียด การัม แคะ ปูง ยัะ อัน. 24 อาซามูเอน บอ กาลาง ดี เฆ ดูอี กืน ต็อห, “แตห เบ ยอด, ดูอี แปะ แฮะ ร็อห เฌาพรา ดัว ดี เบ. กาแต เบ ดูอี กืน นี, อาว มึห อี ปี อัน คอ อู วี.” แคะ กอย ดูอี บอกาเฆลียด, เฆ บอ กาโพรม ดี ดัด ตาง ต็อห, “แตห คูนดีคัม เย ดาคึย เซเซ.”

25 แฮะ ฮอต, อาซามูเอน บอ วี กาลาง ดี เฆ ลอง ปี ดี ปาย คูนดีคัม ดี อึบ เฆ, แตห เฆ กอ นับ ซีคยา ดอน อี ลอง อัน ตี. อัน บอ แดม ฮับ โตต ดอน โมยว แคง บับ, อูน นา อาต เฌาพรา. วาย อัน ตี อัน บอ จัร เฆ, แตห เฆ วี เวณ ดี กาง โดง กอย เฆ ดอน อี.

26 อาซอลู มืร เวณ ดี กาง อัน แคง มืง ฆีบียา ตึอน. เฌาพรา บอ วี อึณปราย น็อห ดูอี อี โปลม คัะ, อี มึห แฮณ, แตห เฆ แบน ดา อี อี กอย เซเซ รึม โดบ อัน. 27 อี มูห เฆ อี ตู หมึอม มัง อี, เฆ ยี ลาย กาลาง ต็อห, “ดูอี วี นี, อัน ดี ปาย เหมา ดี คยอด เอ?” โคว, เฆ ตู มึห ดี อาบ ลักซอง มาเซ ดี คูนดีคัม กามาย เฆ. เฆ มืร ตู โรวเซ อัน. อาซอลู ยี ตู โทม โฆรห เฆ.