1 ดอ อัน ตี อึณ มึห ดูอี ครึร อาเบนยาม. อัน จืร อากีซา, อัน มูห ฆอน อาบีเอลัะ อี มูห ฆอน อาเฌโรว. อาเฌโรว มูห ฆอน อาเบคอลาด. อาเบคอลาด มูห ฆอน อาพี. อากีซา ตึอน แฮะ ครัม กาเซา บอ มึห ปวน ตาง. 2 อัน มึห ฆอน อีมาย อู วี, อี จืร อาซอลู. อาซอลู ตี อัน ชีด กาเซา. แคะ กอย ดูอี อีซาเรลัะ, อู วี มืร อาว มึห อี ปี อัน. อัน แฮะ จา หลึอม อี เฮา. อี เฮา แฮะ จา แคะ ปูง ยัะ อัน.

3 อึณ บอ ฌัม อู ซีแง, มาโลว ฆูณ อาซอลู ตึอน แฮะ โบยห มัง โดว. โคว, ฆูณ อาซอลู อี จืร อากีซา ตึอน, อัน ต็อห ดี อาซอลู, “แตห แม แดะ แดเจณ โอว อู วี, แตห บาย ฮาว เหรต มาโลว ตี.” 4 ฆาย ตึอน บอ ฮาว เหรต ดี นอน อาเอพารีม บอ แคง มืง ซาลีซา ดอน โปละ. ฆาย ยี ตู กาตูณ. ฆาย บอ กาโลห ฮาว แคง มืง ซาลีม. มาโลว ยี ตู กอย ดี ตี. ฆาย ตู ยึร. ฆาย บอ วี กาโลห ฮาว, เหรต แคง มืง อาเบนยาม ดอน โปละ. ฆาย ยี ตู ยึร.

5 ดอ วี ฌัม ฆาย แคง มืง อาฌูพัะ ตึอน, อาซอลู บอ วี กาลาง ดี ดีแบ อัน ตึอน ต็อห, “แตห อาย วี เวณ, ฆูณ โอว ตู น็อห แหม โกบ มาโลว ตี. โอว โยว ฆูณ โอว วี มึห น็อห แหม โกบ อาย.”

6 ดีแบ อัน ตึอน วี ต็อห, “ยอด, แคง มืง นี อึณ มึห ดูอี ปี ตึย เฌาพรา อู วี. เฆ โฆม กาเซา อัน. โฆรห ปี กาลาง อัน แฮะ มูห, อึณ หมาน อาคัร. แตห อาย ฮาว โดง กอย อัน ตี. อัน ดี แค แหน อึณเตณ, แตห อาย นับ นา เหมา ดี ฮาว เหรต มาโลว ตี.”

7 อาซอลู วี ต็อห ดี อัน, “เซ อาย ฮาว, อาย ดี ดึห มาเซ หลู? คามูน ปี โฆ็ง อาย แฮะ ฮอต โตต. ปี ปึอน ดี หลู ดี ดูอี ปี ตึย เฌาพรา ตี, อู โมยว มืร อาย ตู มึห. มาเซ ปี ซี มึห อาย?”

8 อัน แฮะ ฮอต กาลาง ปาย ตี. แดเจณ อัน ตึอน ต็อห, “แม ยอด นี, โอว ซี มึห รึอน แฌด อู เท. แตห อาย ดัว ดี ดูอี ปี ตึย เฌาพรา ตี, แตห อัน แหน โดง กอย มาโลว ดี อาย.” 9 ดอ มึอน เฆ ดูอี อีซาเรลัะ เซ เฆ ซี ดีหมอด ดี เฌาพรา, เฆ ต็อห, “แตห เอ ฮาว ดี ดูอี อี ยึร.” ดอ ตี นี เฆ ยี ต็อห, “ดูอี บยาน โฆรห เฌาพรา” ดี ดูอี ฌึร ตี.

10 อาซอลู วี ต็อห ดี แดเจณ อัน, “แฮะ มูห, แตห อาย ฮาว.” ฆาย บอ ฮาว ดี มืง โดง กอย ดูอี ปี ตึย เฌาพรา ตึอน. 11 ดอ ฮาว ฆาย โดบ นอน นา เรต มืง ตึอน, ฆาย บอ กาตูณ ดีบยา เฆ ตัห ต็อะ อึม. ฆาย บอ ดีหมอด ดีบยา เฆ ตี ต็อห, “ดี นี อึณ มึห ดูอี อี ยึร?”

12 ปัน ตี ฆอน ดีบยา เฆ วี ต็อห, “แฮะ มึห, อัน ตัห อาต ตัห บาย นี. แตห บาย ฮาว ปีครัน บาย. นา กาตึอน อัน แฮะ ตัห ฌัม แคง มืง นี. อาตึร นี, เฆ ดอน อี แฮะ เบลห ปี ดี หลู เฆ แดง กาโช็ง อี กอย นา กัว ตึอน. 13 เซ บาย ลึบ ฮาว แคง มืง, บาย ดี กาตูณ อัน อาต โฮะ โฮม อัน บลอย โดง หลู เฆ ตี. เฆ ดูอี อี กอย นา กัว, เฆ ตู ปึอน โฮม อาต ตัห ม็องการา อัน ดี ปี หลู เฆ ตี. อัน ฮี ฮอต ม็องการา แตห, แคต อี แฮะ ตัห แฮะ ปึอน โฮม. โคว, เซ บาย ฮาว ดอ ตี นี, บาย ดี กาตูณ อัน.”

14 ฆาย ตึอน บอ ลึบ ฮาว แคง มืง ตึอน. ดอ ลึบ ฆาย แคง มืง ตี, อาซามูเอน บอ ตัห กาตูณ ฆาย ดอ ฮาว อัน โดง หลู เฆ ตึอน.

15 ซีณ อาหมึร, อาต ฌัม อาซอลู ตึอน, เฌาพรา แฮะ กาลาง ดี อาซามูเอน ต็อห, 16 “แคหณา คราว นี, โอว ดี จัร ดูอี อู วี อี ตัห แคง มืง อาเบนยาม, แตห อัน ตัห ฌัม โดง กอย แม. แม โลว พ็อห นามัน ดี อัน, แตห อัน แบน ดา ตาง อี แยต ดูอี อีซาเรลัะ. อัน ตี มูห ดูอี ดี คยอด เฆ ดูอี อาโมยว โอว, แกวะ แตห เฆ ดูอี พีลีที วี ดัว ดูก ดี เฆ. โอว แฮะ ฮอต ยึร ปี ซาคึร เฆ, บอ วี กาเว เฆ.”

17 วาย อัน ตี ดอ ยึร อาซามูเอน อาซอลู ตึอน, เฌาพรา วี ต็อห ดี อัน, “แตห แม ยอด ดูอี แปะ แฮะ กาลาง โอว ดี แม ตึอน. ดูอี ตี, อัน ดี อึบ ดูอี อาโมยว โอว บอกาเฆลียด.”

18 ปัน ตี อาซอลู บอ ตัห กาตัด อาซามูเอน ดี บาง มาโลห มืง ตึอน. อัน บอ ดีหมอด ต็อห, “หมาณ แม แหน กาง ดูอี อี ยึร ดี โอว.”

19 อาซามูเอน วี กาลาง ดี อาซอลู ต็อห, “โอว นี มูห ดูอี อี ยึร. แตห แม แยต ดี อาต, โฮะ นา กัว โดง หลู เฆ. อาตึร นี แม ดี ปึอน ดี โฮม ดี รึม โดบ โอว. ปา แคหณา ซีณวัห โอว ดี แตห แม ฮาว. โอว ดี กาลาง บยัะ แคะ ปี กาพา แม แคง น็อห แม ตี. 20 มาโลว แม อี แฮะ โบยห ตัะ อาหมึร ตึอน มืร, แม แกวะ กลึร. เฆ แฮะ ฮอต ยึร. ลอง ปี ซี ปึอน ปี ซี หมาณ เฆ ดูอี อีซาเรลัะ นี, ปี หน็อะ อึณด็อะ ดอน อี, อึณ มูห แม บอ อึณโฮม ฆูณ แม.”

21 อาซอลู วี กาลาง ดี อัน ต็อห, “โอว นี โอว แฮะ มูห ดูอี ครึร อาเบนยาม. อึณ มูห อี เปรต ซืด กาแต เฆ ดูอี อีซาเรลัะ. อึณโฮม ฆูณ โอว มืร เปรต หลึอม อี เฮา แคง ครึร อาเบนยาม. โกบ อึณ ปาย เหมา, แม กาลาง ดี โอว ปาย ตี?”

22 ปัน ตี อาซามูเอน บอ แดะ อาซอลู ฆาย แดเจณ อัน ตึอน, แตห ฆาย ลึบ แคง โฮว โดง กอย แคต ตึอน, แตห ฆาย ตูต กอย โดง กอย ดา ตาง. อึณ ยี มึห แคต แปะ แฮะ บาง ตัห เฆ กาบัก โอย ฆึร วี. 23 อาซามูเอน บอ แดะ ดูอี อี จึอม ปี ดี โฮม ตึอน, บอ กาลาง ดี อัน ต็อห, “ยัง ปี จัร โอว แม อูน ตึอน, แตห แม ดึห ตัห ดอ ตี นี.”

24 ปัน ตี ดูอี จึอม ปี ดี โฮม ตึอน, อัน บอ ดึห ตัห อี มูห ยัง ฆึม บอ โตต, วี เบลห นา อาต อาซอลู. อาซามูเอน บอ กาลาง ดี อัน ต็อห, “แม ยอด, อาตี มูห ปี อูน โอว ดี แม. แตห แม โฮม. อาตี โอว แฮะ อูน อาดา แม, อู ซีณ ดอ บาง โอว แคต ตัห ดี นี.” ซีแง ตี, อาซอลู บอ โฮม รึม โดบ อาซามูเอน.

25 ฆาย บอ ยีต โดง หลู เฆ ตึอน, วี โลง ลึบ แคง มืง ตึอน. หมึร ตี, อาซามูเอน ฆาย อาซอลู บอ ลาย กามวน แคง กาง คร็อง แดง. 26 ฆาย บอ ยีต ซีณ ซีณวัห เจว, แปร หณัม บลาง. อาซามูเอน บอ แดะ อาซอลู แคง กาง ตึอน ต็อห ดี อัน, “แม อึณปราย โดว แม. โอว ดี ตึย แม ฮาว.” แฮะ ฮอต, อาซอลู บอ ยีต. ฆาย บอ กาโดบ เลห ฮาว. 27 ดอ ฌัม ฆาย ดี โคบ มาโลห มืง ตึอน, อาซามูเอน บอ กาลาง ดี อาซอลู ต็อห, “แตห แดเจณ แม ฮาว แยต นา อาต.” ปัน ตี แดเจณ อัน ตึอน บอ แยต. อัน ปี วี ต็อห, “แม กอย อู กาจัน. โอว ดี กาลาง ปี ต็อห เฌาพรา ดี แม.”