1 อาซามูเอน ตึอน อาซาก อัน แฮะ แฆ. อัน บอ ดึห ฆอน อีมาย อัน, แตห ฆาย ซูงพยาด อามู ดูอี อีซาเรลัะ. 2 อี มูห ฆอน ฆีณ อัน, อัน จืร อาโยวเอลัะ. อี มูห วา อาโยวเอลัะ ตี, อัน จืร อาพียัะ. ฆาย แบน ดา ตาง อี ซูงพยาด ดารา อี กอย ดี มืง บีราเซบา. 3 มาแล, ฆอน อัน ฆาย ยี ตู โดบ อึณเตณ ปี ปาย ฆูณ ฆาย. ฆาย วี มึห น็อห ซี โดบ อึณเตณ อี ตู โดบ ดารา. ฆาย มึห น็อห ลอพัะ, ปรา ดี ดึห รึอน ดี อี บอ ตู ซูงพยาด นา หมาน.

4 ดอ อัน ตี เฆ ดา ตาง แคง มืง อีซาเรลัะ ดอน อี บอ ตัห กาฌูะ โดง กอย อาซามูเอน แคง มืง รามา ตึอน. 5 เฆ กาโพรม ดี ต็อห ดี อัน, “แม ซารา, อาซาก แม แฮะ กืน. แม มืร แฮะ แกร ดี กัด. อี มูห ฆอน แม ฆาย ยี ตู โดบ อึณเตณ ปี ปาย แม. เซ อึณ ปาย ตี, หมาณ แม วี ร็อห แตห เย มึห คูนดีคัม อี อึบ เย. แตห อึณ ปี ดูอี อาโมยว เฮา.”

6 ลอง ปี ต็อห เฆ, “แตห แม ร็อห ดัว คูนดีคัม, แตห อัน อึบ เย,” อึณ ตู ล็อะ น็อห อาซามูเอน. อัน บอ วี ซาคึร ดี เฌาพรา. 7 เฌาพรา บอ วี กาลาง ดี อัน ต็อห, “แม โทม โฆรห ปี กาลาง เฆ ดี แม. อาว มูห เฆ แวน แม. เฆ แฮะ แวน โอว. เฆ ฮู แตห โอว อึบ เฆ. 8 อู ซีณ ดอ แตห โอว เบ เลห แคง มืง แอฆึบ ตึอน กอ ฌัม อาตึร นี, เฆ แฮะ แวน โอว, วี กรึบ เฌา ปี กรึบ อี เฮา. ปี โบง เฆ ดอ ตี นี, อึณ บอ ปาย ตี. 9 ดอ ตี นี, แม โทม โฆรห เฆ. มาแล, แม โลว แตห ซาดีก ดี เฆ, ยี ตู โลว แคร เฆ. แม โลว กาลาง แหน ทูงฆยาม ปี ดี ปาย คูนดีคัม ฮี อึบ เฆ.”

10 เฌาพรา แฮะ ฮอต กาลาง โฆรห ตี, อาซามูเอน บอ ดึห โฆรห เฌาพรา ตี, วี กาลาง ดี เฆ อี ซี ปึอน คูนดีคัม ตึอน. อัน ต็อห, 11 “แตห เบ โทม ลอง ทูงฆยาม คูนดีคัม. เซ อัน ฮี อึบ เบ, อัน ดี ดึห ฆอน เบ, แตห อึณ แบน อี ลึมลา ลักเลา อัน, แตห เฆ เฮียง บอ อึณปร็อง อัน. มัง อี อัน ดี แตห เฆ กาแบลบ แยต นา อาต ลักเลา อัน. 12 อัน ดี แตห มัง อี แบน ดา โบว อี อึบ ดา ซึก อู แหรณ. มัง อี ดี อึบ พัน ฆึร. อัน ดี ดึห มัง อี, แตห เฆ แท มาน, แท โดง นา อัน. มัง อี แตห เฆ โซะ โหงว. มัง อี อัน ดี แตห เฆ โบง ครึง กาโฆห ปี ตา ดา ซึก. มัง อี, อัน ดี จัร เฆ โบง ครึง ลักเลา. 13 อี มูห ฆอน อีบึณ เบ, อัน ดี ดึห แตห เฆ โบง นามัน อูห หงูน. มัง อี อัน ดี แตห เฆ แบน อี จึอม ปี ดี โฮม อัน, แตห เฆ โบง คามูน แบน โมยว แบน โมยว ปี ดี โฮม อัน. 14 อัน ดี ดึห บอ มาน เบ บอ โดง นา เบ, มาน เบล มางูน เบ บอ กาปึม เฮ นามัน เบ. อัน ดี ร็อห ฌึร ตี อี บอด หลึอม โตต, วี ดัว ดี ดูอี อัน, ดัว ดี แดเจณ อัน. 15 อัน ดี ดึห ปี ซัม ปี รัณ เบ. เบ ฮี มึห ฆึร บูน, อู บูน เบ โลว ดัว ดี อัน. อัน ดี วี ดัว ดี เฆ อี อึบ ดา ซึก อัน บอ เฆ อี มูห อามู อามาด อัน. 16 อัน ดี ดึห หมาย เบ บอ มูห อีบึณ อีมาย อี ออน กาเซา หลึอม อี. บอ มาโลว เบ อี หมึอม, อัน ดี ดึห แตห เฆ วี โบง ฆาน อัน. 17 โดว ซัดดาวา เบ ฆึร บูน อู บูน อัน ดี ดึห. เบ ดี กาดูห ดี แบน หมาย อัน. 18 ปัน ตี เบ ดี กาดูห ดี ยาม โกบ คูนดีคัม ปี ร็อห เบ ตี. ปัน อัน ตี เฌาพรา มืร ตู โทม โฆรห เบ.”

19 อาซามูเอน แฮะ ฮอต กาลาง ลอง อัน ตี ดอน โมยว, ดูอี เฆ ตึอน ยี ตู โทม โฆรห อัน. เฆ วี ต็อห, “อาว มูห, เย ซี ปึอน คูนดีคัม, แตห อัน อึบ เย. 20 แตห เย ปี ดูอี อาโมยว เฮา. แตห คูนดีคัม ซูงพยาด อามู เย. แตห อัน ปึอน ดี ลึบ ลึบ เลห เลห นา อาต เย, แตห อัน กาโฆห ดี รันซู เย.”

21 อาซามูเอน แฮะ ยึร โตต โฆรห เฆ ตึอน ดอน โมยว, อัน วี กาลาง ดี เฌาพรา. 22 เฌาพรา ปี วี กาลาง ดี อาซามูเอน ต็อห, “โทม โดบ โฆรห เฆ ตี. ดัว คูนดีคัม ดี เฆ.”

อาซามูเอน บอ วี กาลาง ดี ดูอี อีซาเรลัะ ต็อห, “แตห เบ วี เวณ แคง มืง โดง กอย เบ ดอน อี.”