ดูอี มืง กีรียาดยารีม บอ ดึห ฌีดืก เฌาพรา ตึอน, ฮาว อูน แดง นอน ดี กาง อาพีนาดาบ. เฆ บอ แตห ฆอน อีมาย อัน อี จืร อาเลอาซา อึณปราย โดว อัน, แตห อัน ซีงา บอด, แตห อัน บัร ฌีดืก เฌาพรา ตี.

2 ฌีดืก เฌาพรา บอ กอย เหลณ แคง มืง กีรียาดยารีม ตึอน, อึณ กอ โนะ อา ฆึร ซีนัม. ดูอี อีซาเรลัะ, เฆ บอกาเฆลียด บอ แบน น็อห กลึร โกบ หมาบ เฆ. เฆ บอ วี กาพา โหลห เฌาพรา. 3 ปัน ตี อาซามูเอน บอ กาลาง ดี เฆ ดูอี อีซาเรลัะ ต็อห, “เซ แฮะ หมาน, ซี โดบ ซีคยา เบ เฌาพรา, เบ โลว แวน เฌา ปี กรึบ เฆ ดูอี อาโมยว เฮา, โลว แวน บอ อารึบ นาง เอซาทารีด, อี กอย กาแต เบ. เบ โลว บึง กรึบ มี เฌาพรา อาคัร หมาน. เซ เบ โบง ปาย ตี เฌาพรา ดี จอย เบ, แกวะ ฮู แตห เบ กาดูห ดูก ดี เฆ ดูอี พีลีที ตึอน.” 4 ปัน ตี เฆ ดูอี อีซาเรลัะ บอ แวน อารึบ เฌา บาลัะ บอ อารึบ เฌา เอซาทารีด ตึอน. เฆ บอ กรึบ มี เฌาพรา อาคาคัร.

5 อาซามูเอน บอ กาลาง ดี เฆ ต็อห, “แตห ดูอี อีซาเรลัะ บอกาเฆลียด ตัห กาฌูะ ดี มืง มีฌาพา. โอว ดี ซาคึร ดี เฌาพรา ดาง เบ ดี ตี.” 6 เฆ บอ ตัห กาฌูะ ดี มืง มีฌาพา ตี. แฮะ ฮอต, เฆ บอ กาโพรม ดี ต็อะ อึม, โหลว ดี กาดาย, แตห อึณ แบน ปี หลู ดี เฌาพรา. เฆ บอ ยืน ปี ดี โฮม ซีแง ตี. เฆ บอ กาลาง ต็อห, “เย แฮะ ฮอต โบง อี ตู หมึอม ดี อาต แม เฌาพรา.” อาซามูเอน บอ ซูงพยาด อามู เฆ ดูอี อีซาเรลัะ ดอน อี ดี มืง ตึอน.

7 ปัน ตี เฆ ดูอี พีลีที บอ ยึร ลอง ดูอี อีซาเรลัะ แฮะ ตัห กาฌูะ ดี มืง มีฌาพา ตี. ดา ตาง เฆ บอ แรน ซึก, ฮาว โดง กอย ดูอี อีซาเรลัะ, ต็อห ดี กาโฆห ดี เฆ. ดูอี อีซาเรลัะ บอ ยึร ลอง อัน ตี, เฆ บอ โยว ดูอี พีลีที.

8 เฆ บอ กาโพรม ดี กาลาง ดี อาซามูเอน ต็อห, “อาว โลว ดีเหลา, แตห แม ซาคึร ดี เฌาพรา ดาง เอ. แตห เฌาพรา จอย เอ, แตห อัน คยอด เอ, แกวะ แตห ดูอี พีลีที แป เอ.”

9 อาซามูเอน บอ ดึห ฆอน มาบู อี ซี ปู อู โดว, หลู ดี เฌาพรา. อึณ แบน ปี ดี หลู อี โดะ ดี เงา. อัน บอ ซาคึร ดี เฌาพรา ดาง เฆ ดูอี อีซาเรลัะ. เฌาพรา มืร โทม โฆรห อัน.

10 ดอ ต็อห อาซามูเอน ดี หลู ปี ดี หลู ตี, เฆ ดูอี พีลีที บอ ตัห ต็อห ดี กาโฆห ดี ดูอี อีซาเรลัะ. เฌาพรา บอ แตห กานัม ฮัม กาเซา แดง ดูอี พีลีที, แตห เฆ กาฟัร กาเฟียน, บอ เตา ดี ดูอี อีซาเรลัะ. 11 ดูอี อีซาเรลัะ บอ กาโพรม ดี เลห แคง มืง มีฌาพา ตึอน, คูงครัห กาโฆห ดี เฆ กอ ฌัม กาตัด มืง เบดฆา.

12 ปัน ตี อาซามูเอน บอ ดึห มาว, เบลห กาจ็อง ดี กาแต มืง มีฌาพา ฆาย มืง เชน, แตห เฆ โหลห เฌาพรา แฮะ จอย เฆ. อัน บอ แตห โดง ตี จืร เอปัะเนจัะ. กอ ฌัม ซีแง อาตึร นี, ลอง ดาง อัน เลห “เฌาพรา แฮะ จอย เอ.” 13 แฮะ ปาย ตี ดูอี พีลีที เฆ ตึอน แฮะ ฮอต ชึม. วาย อัน ตี เฆ มืร อาว ฮู ตัห แคง มืง ดูอี อีซาเรลัะ. เฌาพรา บอ แร เฆ ดูอี พีลีที ตึอน. อึณ กอ มูห บอ โจว อาซามูเอน เฆ อาว ฮู ปึอน ตัห. 14 มาน มืง แปะ แฮะ ปึอน เฆ ดูอี พีลีที มืร, ดูอี อีซาเรลัะ แฮะ ฮอต วี ปึอน วีว. จูห ดี มืง เอโครน กอ ฌัม มืง ฆาทัะ ตึอน, เฆ แฮะ ฮอต กาดูห ดี วี แตห วีว โตต ดี ดูอี อีซาเรลัะ. อี มูห มาน มืง, ดูอี อีซาเรลัะ วี บัร ซีคยา, แกวะ ฮู แตห เฆ ดูอี พีลีที วี ปึอน. ดอ อัน ตี เฆ ดูอี อีซาเรลัะ ฆาย ดูอี อาโมวรีด บอ ลาย โพรม, อาว ฮู กาโฆห.

15 อาซามูเอน แบน อี ซูงพยาด อามู เฆ ดูอี อีซาเรลัะ บอ โจว อัน. 16 ดอน ซีนัม ดอน ซีนัม อัน แลบ ดี ยอด มืง เบดาเอน บอ มืง ฆีลัะฆา บอ มืง มีฌาพา ตึอน. ดอ ฌัม อัน มึง ตี, อัน ซูงพยาด อามู เฆ ดูอี อีซาเรลัะ. 17 ดอน เฌณ อัน บอ ฮาว มืง รามา, อี มูห โดง กอย กาง อัน. อัน บอ ซูงพยาด อามู ดูอี อีซาเรลัะ ดี ตี. อัน บอ โบง บอ กาโช็ง หลู ดี เฌาพรา ดี ตี.