1 ปอ อู เฌณ ดูอี พีลีที วี ลาย แดะ แคะ กอย ดา ซึก เฆ, แตห เฆ ปึอน ดี ฮาว กาโฆห. เฆ บอ ตัห กาฌูะ ดี มืง ซอคอ อี มูห กาดาย ดูอี อายูดา ตึอน. เฆ บอ คยัะ ดี มืง เอพีดดัมมีบ อี กอย ดี กาแต มืง ซอคอ ฆาย มืง อาเจกา ตึอน. 2 อาซอลู บอ ดูอี อีซาเรลัะ, เฆ มืร บอ ตัห กาฌูะ, บอ คยัะ ดับ เฆ, แตห เฆ ลาย ดาม โดบ ดีลัยะ เอลา ตึอน, แตห เฆ ปึอน ดี กาโฆห ดี ดูอี พีลีที. 3 เฆ ดูอี พีลีที บอ กอย แดง นอน อู บลาก. ดูอี อีซาเรลัะ บอ กอย แดง นอน ปอ อู บลาก. อึณ บอ มึห ดีลัยะ อี กาคัน ดี กาแต เฆ.

4 อึณ บอ มึห ดา ซึก อี จืร อากอลาด, อี มูห ดูอี มืง ฆาทัะ. อัน แฮะ จา เดา กานีห ดี อู กาซาน. อัน บอ เลห ตัห แคง โดง คยัะ ดูอี พีลีที ตึอน. 5 ดี ฆีณ อัน, อัน ชึบ มาฆีณ บ็อง เดณ. อัน ปี วี ตา ซีโตว บ็อง อี จัน โอย ฆึร ซัะ. 6 อัน มืร ชึบ บ็อง เดณ ดี เปลา อัน. บอ บลา เลียห ปี แงะ อัน ดี ยัะ อัน มูห บ็อง เดณ. 7 อี มูห ฆล็อง บลา เลียห อัน, อึณ ตาง ดาน กาบ็อง ด็อะ ฆลาง. อี มูห ฮีน บลา เลียห อัน, อึณ จัน โอย ซัะ ดีโลย. บอ ดูอี โฆ็ง ครึง กาโฆห อัน, อัน ฮาว แยต นา อาต อากอลาด ตี.

8 อัน บอ ยีต จ็อง. บอ แดะ เฆ ดา ซึก ดูอี อีซาเรลัะ ต็อห, “โกบ อึณ ปาย เหมา เบ เลห ตัห แด ดา ซึก เบ ปาย ตี? โอว นี มูห ดูอี พีลีที. เบ ยี มูห หมาย อาซอลู. แตห เบ ร็อห ดูอี อู วี, แตห อัน เลห ตัห โดง กอย โอว. 9 เซ อัน บอ กาโฆห แป ปียัม โอว, เย ดี คัม ดี แบน หมาย เบ. เซ โอว บอ กาโฆห แป ปียัม วี ตี, เบ ดี โลว แบน หมาย เย, วี โบง ปี จัร เย.” 10 ปัน ตี ดูอี พีลีที ตึอน วี ต็อห, “อาตึร นี, เย หมาณ ดี ลาย ตัะ ดี เบ. แตห เบ แตห ตัห ดูอี อู วี ดี เย. แตห ยาย ปึอน ดี ลาย กาโฆห.” 11 อาซอลู บอ ดูอี อีซาเรลัะ เฆ บอ ยึร โฆรห ดูอี พีลีที ตี, น็อห เฆ บอ ลึร. เฆ บอ โยว กาเซา.

12 อาดาวีด ยี มูห ฆอน ดูอี อาโมยว เอพาราด อี จืร อาเยเซ, อี กอย แคง มืง เบดแลม แคง กาดาย มืง ยูดา. อาเยเซ ตี, อัน มึห ฆอน อีมาย ดา วี. ดอ มูห โจว บาน อาซอลู ตึอน, อาเยเซ แฮะ กัด, อาซาก อัน แฮะ กืน. 13 เฆ ฆอน อีมาย อาเยเซ ตี, อี ดี ตาง โอย วี, เฆ แบน ดา ซึก อี โดบ อาซอลู ตึอน. วี ตาง อัน จืร อาเอลีอาบ. วี กาแต อัน จืร อาพีนาดาบ. วี ฮาโอย อัน จืร อาซามา. 14 อาดาวีด ตึอน ยี มูห วา เตียะ ซืด. อี มูห เฆ โอย วี ตี, เฆ โดบ อาซอลู. 15 อี มูห อาดาวีด ตึอน, อัน โลว เวณ เฮียง บอ มาบู ฆูณ อัน ดี มืง เบดแลม ตึอน. โคว, อัน โลว ฮาว ฮาว, ตัห ตัห โดง กอย อาซอลู ตึอน.

16 ดูอี พีลีที วี ตึอน, อาดา พวน ฆึร ซีแง, ซีณวัห อู เฌณ, บา ดี อับ อู เฌณ, อัน ตัห เครียะ เฆ, บยัะ โดว อัน ดี เฆ.

17 ดอ อัน ตี อาเยเซ บอ ดัม ฆอน อัน อี จืร อาดาวีด ตึอน ต็อห, “นี, แตห แม ดึห โหงว มาตูห อู เอพา,^a แตห แม ดึห บอ คามูน ฆึร ดีกลวน, ตึย ดี อีกัด แม. แตห แม ดึห ฮาว ปีครัน, แตห แม เจว ฌัม โดง กอย อีกัด แม เฆ ตี. 18 บอ อึม ปู มัก อี ปราง โปลม อาดา ฆึร ดีกลวน นี, แม ดึห ฮาว ดัว ดี โบว ตาง อี อึบ อู แหรณ วี ตึอน. แม ยอด อีกัด แม, โยว เฆ แฮะ กอย ดาคึย, โยว เฆ มึห ปี ดี โลว. แตห แม วี ตัห แค ดี โอว ลอง ปี ปาย เฆ. 19 ดอ ตี นี เฆ กอย รึม โดบ อาซอลู บอ ดูอี อีซาเรลัะ บอกาเฆลียด, กาโฆห ดี ดูอี พีลีที. เฆ กอย โดบ ดีลัยะ เอลา ตึอน.”

20 ฆูณ อัน แฮะ ฮอต กาลาง โฆรห ตี, อาดาวีด บอ ยีต ซีณวัห เจว เจว. มาบู อัน อัน บอ อาบ ดี ดูอี อี เฮียง นา ปัน, แบน ดา อี ยอด แมน. อัน บอ ดึห โกรว ปี ต็อห ฆูณ อัน ตึอน บอ ฌัม โดง ดี โลว ลึบ ฮาว อัน ดอ ซีงยา ยอด ดา ซึก เฆ ตึอน ปี ดี ปาย ดับ เฆ. เฆ บอ ดัด แตห เฆ กาโฆห. 21 ดับ ดูอี อีซาเรลัะ บอ ดับ ดูอี พีลีที บอ กอย กาซืร. 22 อาดาวีด บอ ดึห ปี โฆ็ง ตัห อัน, อาบ ดัว ดี ดา อี บัร โกรว เฆ ตึอน. แฮะ ฮอต, อัน กาแบลบ ฮาว กาแต ซึก โดง กาโฆห เฆ. อัน บอ โฆรห ดี อีกัด อัน. 23 ดอ กาลาง อัน โฆรห ตี, ดา ซึก ดูอี พีลีที อี จืร อากอลาด, อี ตัห มืง ฆาทัะ, อัน บอ เลห ตัห แคง โดง กอย ดูอี พีลีที. อัน กาลาง ปี ต็อห อัน ซีแง อาต ตึอน, แตห บอ อาดาวีด ยึร โฆรห อัน ตี. 24 ดูอี อีซาเรลัะ ฮี ยึร ดูอี วี ตี, เฆ โยว กาเซา. วี กาโพรม ดี เตา.

25 เฆ ดูอี อีซาเรลัะ ลาย กามวน ต็อห, “เบ ยึร วี อี เลห ตัห ตึอน, อัน แนนัะ ดูอี อีซาเรลัะ. วี เหมา อี แป ปียัม อัน, คูนดีคัม ดี อาบ ดัว ฆอน อีบึณ อัน อู วี. บอ โกรวกราม กืน อี ง็อห ตาง, อัน ดี ดัว. บอ วอแว, ฆูณ มา อัน อาว โลว ฮับ รึอน จึง แคง มืง อีซาเรลัะ นี.”

26 อาดาวีด มืร ดีหมอด เฆ อี กอย โคบ อัน ต็อห, “เซ อึณ มึห ดูอี อี แป ปียัม ดูอี พีลีที ตี, อี ดี โบง แกวะ ฮู แตห เฆ กาลาง โฆรห อี หมึอม กาณัห ดี เอ, อัน ดี ปึอน อาฆยึร มาเซ? เฆ มูห ดูอี ปีเยณ, อี ตู คัม ดี ซัวะ แวน ฮูน ลัะคานา. อาว ปึอน แนนัะ ดา ซึก เอ บอ เฌาพรา อี อึบ เอ นี.”

27 เฆ วี กาลาง ปี คา อาต ต็อห, “วี เหมา อี แป ปียัม ดูอี ตึอน, อาฆยึร อัน, อัน ดี ปึอน แคะ ต็อห เอ ตึอน.”

28 อาเอลีอาบ อี มูห อีกัด ตาง อาดาวีด, อัน บอ ยึร โฆรห ปี กามวน อาดาวีด ดี ดา ซึก ตึอน, อัน บอ รู กาเซา ดี วา อัน ต็อห, “อึณ ปาย เหมา แม โลง ตัห ดี นี? แม แตห อาเซ ยอด มาบู อี แจก แคง แปร ตึอน? โอว แฮะ นับ, น็อห แม ปีคึก. น็อห แม แฮะ ฮาย กาเซา. แม ตัห, โกบ ซี ยึร แม โดง กาโฆห อี ดี นี.”

29 อาดาวีด วี ต็อห, “โอว แฮะ โบง มาเซ ดอ ตี นี? อาว ปึอน กามวน ดี อี?” 30 อัน ปี วี ฮาว ณืร ปอ อู วี, ดีหมอด ปี คา อาต ตึอน. เฆ มืร ปี วี กาลาง ปี คา อาต ดี อัน. 31 ดอ วี ยึร อี เฮา โฆรห ปี กาลาง อาดาวีด ตึอน, เฆ บอ วี กาลาง ดี อาซอลู. อาซอลู บอ วี แดะ อาดาวีด ตัห โดง กอย อัน.

32 อาดาวีด บอ กาลาง ดี อาซอลู ต็อห, “แกวะ แตห อาเซ มึห น็อห ลึร โกบ ดูอี วี ตี. โอว อี มูห แดเจณ แม, โอว ดี ฮาว กาโฆห ดี ดูอี พีลีที ตี.”

33 อาซอลู กาลาง ดี อาดาวีด ต็อห, “แม ตู ปึอน ฮาว กาโฆห ดี ดูอี พีลีที ตี. แม ซี ดีแตด, แม ซี หนึม. ดูอี วี ตี อัน แฮะ แบน ฆีณ ซึก ซีณ ดอ หนึม อัน.”

34 ปัน ตี อาดาวีด วี กาลาง ดี อาซอลู ต็อห, “ดอ เฮียง โอว มาบู ฆูณ โอว, อึณ แฮะ ดึอม มึห มาครังซี ฆาย มาเฆรห ตัห ก็อะ กาบ ฮาว ฆอน มาบู ดีแตด แคง พึง อัน. 35 โอว บอ คูงครัห โดบ, ง็อห ยัม บอ อา โดว. โอว วี พาด ดึห มาบู ดี โมต มาครังซี ฆาย มาเฆรห ตี. ดอ วี ดัณ ปัะ มาเฆรห ตี ดี โอว, โอว บอ ดืด ดี โมห อัน บอ มัห แตห อัน กอ ยัม. 36 โอว นี แฮะ ง็อห มาครังซี บอ มาเฆรห, แฮะ ยัม อา โดว ตี. ดูอี พีลีที อี ตู คัม ดี ซัวะ แวน ฮูน ลัะคานา เฆ ตี, อัน ดี ปี โดว ซัดดาวา ตี. โคว, อัน แฮะ แนนัะ ดา ซึก บอ เฌาพรา เอ อี อีม. 37 เฌาพรา แฮะ จอย โอว, แกวะ แตห มาครังซี ปึอน ดี โบะ โอว, แกวะ แตห มาเฆรห ปึอน ดี กรีห โอว. เฌาพรา ดี บอ จอย โอว แกวะ แตห ดูอี พีลีที ปึอน ดี ปาย เหมา ดี โอว.” อัน แฮะ ฮอต ต็อห ปาย ตี. อาซอลู วี ต็อห ดี อัน, “อึร, แตห แม ฮาว. แตห เฌาพรา กอย รึม โดบ แม.”

38 อาซอลู บอ ดึห ครึง อัน, ดัว ดี อาดาวีด บอ แตห อัน ชึบ บอ มาฆีณ บ็อง บอ ซีโตว ฮีน. 39 อาดาวีด บอ ดึห มาปัวะ ลาง อาซอลู, ปัก ดึก ดี ครึง ปี ตา อัน. อัน บอ เทว ดี ฮาว, โกบ หณัม ดึอม ชึบ อัน ครึง กาโฆห ตี. แฮะ ฮอต, อาดาวีด วี ต็อห ดี อาซอลู, “โอว ตู ปึอน โฆ็ง ฮาว อาฌัะ นี. โอว หณัม ดึอม ตา อาฌัะ นี.” แฮะ ฮอต, อัน บอ วี บูต อูน โตต. 40 ปัน ตี อัน บอ ดึห อึณกรวน อัน. บอ ทอน มาว อี ซีคยา พัน โบ็ง โดบ ดีลัยะ แบลง ตึอน, บอ ฮับ แคง ฮู ปี แงะ ฮาว อัน ดอ เฮียง อัน มาบู ตึอน. อัน บอ ดึห ดี โฆ็ง บอ วัน มัง วึณ มาว อัน, บอ ฮาว เครียะ ดูอี พีลีที ตึอน.

41 ดูอี พีลีที ตึอน บอ ดูอี อี โฆ็ง ครึง กาโฆห อัน, ฆาย ฮาว กอย นา อาต อัน. ฆาย มืร บอ ตัห เครียะ อาดาวีด ตึอน. 42 ดอ ยึร ดูอี พีลีที ดี อาดาวีด, อัน แนนัะ อาดาวีด. อัน ยอด, ยี ซี มูห ฆอน. ฮึก ฆีณ อัน มืร เรณ เรณ. งาย เฆ นา อัน มืร ชีด. 43 อัน บอ ต็อห, “แม ทาง โอว นี มูห มาโซว, แตห แม โฆ็ง อึณกรวน ตัห ณืร โอว?” ดูอี พีลีที ตึอน บอ ฆาว ปวน เฌาพรา อัน, ดืง บอ เอห อาดาวีด. 44 ปัน ตี อัน กาลาง ดี อาดาวีด ต็อห, “ตัห โดง กอย โอว ดี นี. โอว ดี แตห มาซีม แคง ฆางหราว บอ มาโดว แปร โฮม ยัง แม.”

45 อาดาวีด วี ต็อห ดี ดูอี พีลีที ตึอน, “แม ตัห โฆ็ง บอ เลียห บอ มาปัวะ ลาง บอ เลียห ซัด, ตัห โดง กอย โอว. มาแล อี มูห โอว, โอว โฆ็ง มี ปวน เฌาพรา อี อึบ โตต ดอน โมยว, อี มูห ดา โบว อี อึบ ดา ซึก ดูอี อีซาเรลัะ. อัน เฌา ตี มูห อี แปะ แฮะ แนนัะ แม. 46 เฌาพรา ตี อัน ดี อาบ แม ดี โอว อาตึร นี. โอว ดี ง็อห ยัม แม บอ แดบ แวน ฆีณ แม. โอว ดี ดึห โดว ยัม ดูอี พีลีที ตี, ดัว ดี มาซีม แคง ฆางหราว. บอ มาโดว แปร ดี ปึอน ดี โฮม ยัง แม อาตึร นี. ปัน ตี ดูอี บอกาเฆลียด ดี บอ นับ ลอง เฌาพรา กอย รึม โดบ ดูอี อีซาเรลัะ. 47 แคะ กอย ดูอี บอกาเฆลียด, เฆ กอ ดี นับ, เฌาพรา ตู จอย ตา ปัวะ เฆ เลียห. โคว, อึณ มูห เฌาพรา อี ดี กาโฆห ดี เบ, อัน เฌา ดี แตห เย แป เบ.”

48 ดูอี พีลีที ตึอน บอ แว ตัห เครียะ อาดาวีด, ต็อห ดี แดบ อัน. อาดาวีด บอ กาแบลบ ปีครัน อัน ฮาว ณืร ดูอี พีลีที ตึอน. 49 อัน บอ โจก มาว อู โบ็ง แคง ฮู ปี แงะ อัน ตึอน, บอ ฮัร แคง วัน ปี วึณ อัน, บอ วึณ ดี ดูอี พีลีที อู เฌณ, แตห มาว ตึอน บอ ล็อะ กาต็อห อัน, แตห อัน บอ เกห ซาฆึบ แดง กาดาย.

50 ปาย ตี อาดาวีด แฮะ แป ดูอี พีลีที ตา วัน ปี วึณ อัน ฆาย มาว อู โบ็ง ตึอน, บอ ล็อะ ดูอี พีลีที ตึอน, แตห อัน กอ ยัม. อัน ตู มึห ดี กาโฆห ตา มาปัวะ เฆ บลา เลียห.

51 ปัน ตี อาดาวีด บอ ฮาว ดี ดูอี พีลีที บอ ทอด มาปัวะ อัน ดี บราม อัน บอ แดบ กาดัด ฆีณ อัน.

ดูอี พีลีที เฆ บอ ยึร, ดา ซึก อี ดึอม อึบ เฆ, อัน แฮะ ฮอต ยัม, เฆ บอ กาโพรม ดี เตา อู เฌณ. 52 ปัน ตี ดูอี อีซาเรลัะ บอ ดูอี อายูดา บอกาเฆลียด, เฆ บอ ยีต ดัด ซีนัน ซีนืง, บอ กาโพรม ดี คูงครัห ณอน ดูอี พีลีที เฆ ตึอน, แตห กอ ฌัม มืง ฆาทัะ บอ มาโลห มืง เอโครน. อึณ ยี มึห ดูอี พีลีที อี แฮะ เกห, แฮะ ยัม, เฆ กอย โดบ อึณเตณ ฮาว มืง ซารีม, กอ ฌัม มืง ฆาทัะ บอ มืง เอโครน. 53 ดูอี อีซาเรลัะ บอ วี ตัห โดง คูงครัห เฆ ดูอี พีลีที ตึอน, วี ตัห พาด บอ โดง คยัะ เฆ. 54 อาดาวีด บอ ดึห ฮาว ฆีณ ดูอี พีลีที ตึอน, โฆ็ง ฮาว กอ ฌัม มืง เยรูซาแลม. อัน บอ ดึห บอ ครึง กาโฆห เฆ, วี อูน แคง ทึบ อัน.

55 ยี มูห อาซอลู, ดอ ยึร อัน อาดาวีด แฮะ ฮาว กาโฆห ดี ดูอี พีลีที ตึอน, อัน บอ ดีหมอด ดา โบว อัน อี จืร อาบานา ตึอน ต็อห, “อึย อาบานา, ฆอน อีมาย นี, อัน มูห ฆอน อาเซ?” อาบานา วี ต็อห, “แม คูนดีคัม, แฮะ มูห แฮะ หมาน, โอว มืร ตู นับ.”

56 คูนดีคัม มืร วี ต็อห, “ดีหมอด ดี ยอด, อัน มูห ฆอน อาเซ.”

57 ดอ วี ตัห อาดาวีด โดง ยัม ดูอี พีลีที ตึอน, อาบานา บอ แดะ อาดาวีด, แตห อัน ฮาว ฌัม โดง กอย อาซอลู. ดอ อัน ตี อัน ยี ซี โฆ็ง บอ ฆีณ ดูอี พีลีที ตึอน.

58 อาซอลู บอ ดีหมอด อาดาวีด ต็อห, “อึย ฆอน อีมาย, แม มูห ฆอน อาเซ?” อาดาวีด วี กาลาง ต็อห, “โอว มูห ฆอน อาเยเซ, อี กอย แคง มืง เบดแลม ตึอน.”