1 อาโมวแซ วี ต็อห, “อึย เบ ดูอี อีซาเรลัะ, แตห เบ โทม. อาว เหลณ เบ ดี กาโลห อึม แบลง ยอดาน. เบ ดี บอ ฮาว ดึห มืง อาโมยว ดูอี อี กืน หลึอม เบ. เฆ มืร มึห โปลม เฆ แฮณ หลึอม เบ. มืง เฆ ตี มืร มึห แรง อี จา กาเซา กอ ดูห อึณอูะ.

2 ดูอี อาโมยว เฆ ตี มืร แฮะ จา กาเซา บอ แฮณ กาเซา. อึณ บอ มูห ดูอี อาโมยว อานาคีม. เบ มืร แฮะ ดึอม ยึร อี ต็อห, อาว มึห อี ปึอน แป ดูอี เฆ ตี.

3 คา นี เบ ดี ยึร ดี งาย เบ, เฌาพรา ดี แยต ดี อาต เบ, แตห อึณ กอ ปี เงา อี กาซึม โตต. ดอ ดี ลึบ เบ แคง มืง เฆ ตี, อัน เฌา ดี กาโฆห ดี เฆ บอ แป เฆ. เบ ดี โฮว เลห เฆ บอ ปยาต เฆ, แตห อึณ ปี ปี ดึอม กาแซณ อัน เฌา ดี เบ. 4 วาย แฮะ ฮอต โฮว เตา เฌาพรา ดี เฆ แคง มืง ตี, แกวะ แตห เบ ทาง แคง น็อห เบ ต็อห, ‘โกบ แฮะ โบง เย นา มูห นา หมาน, เฌาพรา แฮะ ตึย เย ตัห บึง มืง นี.’ อาว มูห ปาย ตี. เฌาพรา ดี โฮว เตา เฆ ดี เบ โกบ แฮะ ฮาย แฮะ มืก กาเซา เฆ. 5 อาว มูห เฌาพรา แตห เบ กอย แคง มืง ตี โกบ แฮะ แบน เบ ดูอี บอด ดูอี หมึอม บอ มึห น็อห ซืร น็อห หมาน. เฌาพรา โฮว เตา ดูอี เฆ ตี โกบ มูห เฆ ดูอี ฮาย ดูอี ตู หมึอม. เฌาพรา ดี โบง แตห อึณ โดบ ปี ดึอม กาแซณ อัน ดี ฆูณ ดัง เบ อี มูห อาบราฮัม, อาแซก บอ อาโกบ ตึอน.

6 เฌาพรา แตห เบ กอย แคง มืง บอด มืง หมึอม ตี, อาว มูห โกบ มึห เบ น็อห ซืร น็อห หมาน. แตห เบ นับ, เบ มูห ดูอี ดืร. บอ มาโนว เบ แฮะ หณาบ กาเซา.

7 แตห เบ โนว, แกวะ แตห เบ ปีว. ดอ กอย เบ แคง แปร กาฮ็อห ตึอน, เบ แฮะ โบง แตห เฌาพรา ปี กรึบ เบ แบน น็อห รู กาเซา ดี เบ. ซีณ เลห เบ แคง มืง แอฆึบ กอ วี ฌัม ตัห กอย ดี นี, เบ แฮะ กาบัห ดี เฌาพรา. 8 ดอ กอย เบ ดี นอน ซีนาย ตึอน มืร, เบ แฮะ โบง แตห เฌาพรา รู กาเซา ดี เบ, แตห อัน เฌา กอ รีน ดี แวน โตต เบ บอกาเฆลียด. 9 โอว มืร แฮะ โฮะ กอย แดง นอน, บัร ดี ดึห มาว ปี แดม เฌาพรา โฆรห กาดีก ซัดฌา ปี ลาย กาแซณ อัน ดี เบ. โอว แฮะ กอย ดี ตี กอ โนะ พวน ฆึร ซีแง ดี พวน ฆึร หมึร. โอว มืร ตู โฮม มาเซ, ตู เดียง อึม. 10 ดอ อัน ตี เฌาพรา มืร แฮะ ดึห มาว อา ดีพลาง แปะ แฮะ แดม อัน ตา แด อัน, อาบ ดัว ดี โอว. มาว อา ดีพลาง ตี แฮะ แดม อูน โฆรห อี เลห แคง เงา ดอ ตัห กาฌูะ เบ แดง นอน ตึอน.

11 ดอ แฮะ โนะ พวน ฆึร ซีแง ดี พวน ฆึร หมึร, เฌาพรา มืร ดึห มาว อา ดีพลาง อี แฮะ แดม กาดีก ซัดฌา ตี, อาบ ดัว ดี โอว.

12 เฌาพรา มืร วี ต็อห ดี โอว, ‘แตห แม เลห โลง แดง นอน นี. โคว, ดูอี แปะ แฮะ แยต เลห แม แคง มืง แอฆึบ ตึอน, อู กาจัน เฆ แฮะ ฮอต วัห อึณเตณ, โบง อี ฮาย อี มืก กาเซา. เฆ แฮะ แวน โฆรห ปี กาลาง โอว, ปี จัร โอว เฆ โบง. เฆ แฮะ วี กรึบ อารึบ ราง.’ 13 แฮะ ฮอต, เฌาพรา ปี วี กาลาง ดี โอว ต็อห, ‘โอว แฮะ ฮอต นับ, ดูอี เฆ นี, เฆ มูห ดูอี อี ดืร. บอ มาโนว เฆ แฮะ หณาบ กาเซา. 14 แกวะ แคร โอว. โอว ดี แวน เฆ แตห เฆ ชึม โตต, แกวะ แตห อึณ ซี มึห อี นัมโหลห เฆ. อี มูห แม, โอว ดี แตห แม แบน ดูอี อาโมยว ตาง, แตห แม แบร กืน หลึอม เฆ.’

15 ดอ อัน ตี โอว มืร ดึห มาว อา ดีพลาง ตี, โลง แดง นอน ตึอน. อาคราว อัน ตี เงา แฮะ ปลึก บอ นอน. 16 โอว บอ วี ยึร ปี ปาย เบ. อู กาจัน เบ แฮะ ฮอต แวน ดารา ปี ดัว เฌาพรา ดี เบ, แฮะ ฮอต กาลึบ. เบ แฮะ วี โหลว ดี กรึบ อารึบ มามัก, แตห อึณ แบน หมาบ กืน ดี เบ.

17 โกบ อึณ ปาย ตี โอว มืร ซัต แวน มาว อา ดีพลาง ตึอน, แตห อึณ กาลาต โตต ดี อาต เบ.

18 แฮะ ฮอต, โอว ปี วี โฮะ ครึบเครา ฆึบ ดี อาต เฌาพรา ปอ พวน ฆึร ซีแง ดี พวน ฆึร หมึร ปี คา อาต ตึอน. โอว มืร ตู โฮม มาเซ, ตู เดียง มาเซ โกบ หมาบ แปะ แฮะ ลูต เบ ดี เฌาพรา. เบ แฮะ โบง ดี เฌาพรา อี ฮาย กาเซา, แตห เฌาพรา กอ รู กาเซา ดี เบ. 19 โอว บอ โยว กาเซา โกบ รู เฌาพรา ดี เบ. โอว โยว อัน ดี โบง แตห เบ ชึม, แตห อึณ กอ โตต. มาแล, เฌาพรา บอ วี โทม โฆรห โอว ปอ อู เฌณ. 20 บอ ดี อาโรน เฌาพรา แฮะ รู กาเซา, แฮะ ต็อห ดี โบง แตห อัน ยัม อู เฌณ. ดอ อัน ตี, โอว บอ กาดูห ดี ซาคึร ดาง อัน. 21 โอว บอ ดึห โกรว อี ตู หมึอม อี มูห อารึบ มามัก ปี โบง เบ ตี, อี แตห เบ มึห หมาบ กืน, วี โดะ แคง เงา. โอว บอ มัห บอ ดูห แตห อึณ กอ กาลาต กามอต โตต. โอว บอ วี ดึห กามอต อัน ตี, วี ฮาว แวน แคง อึม อี แหล ตัห ดี นอน ตึอน.

22 ดอ กอย เบ ดี โดง จืร ดาบีรา, โดง จืร มาซา บอ ดี โดง จืร ฆีบารูดฮาตาวา ตึอน มืร, เบ แฮะ โบง แตห เฌาพรา รู กาเซา ดี เบ.

23 ดอ แฮะ แยต เลห อัน เฌา ดี เบ ดี โดง จืร กาเดบานา, อัน เฌา แฮะ จัร เบ ฮาว พาด มืง ปี ดี ดัว อัน ดี เบ. เบ ยี แฮะ กาบัห ดี โฆรห ปี กาลาง เฌาพรา ปี กรึบ เบ. เบ มืร ตู หณึม ตู โทม โฆรห อัน เฌา. 24 ซีณ ดอ นับ โอว ดี เบ, เบ บอ กาบัห ดี เฌาพรา ปาย ตี.

25 โกบ โบง เบ ปาย ตี โอว บอ กาดูห ดี มูด ฆึบ ดี อาต เฌาพรา อาดา พวน ฆึร ซีแง ดี พวน ฆึร หมึร โกบ แฮะ นับ โอว อัน เฌา แฮะ ต็อห ดี ปยาต แวน โตต เบ. 26 โอว บอ ซาคึร ต็อห, ‘อึย แม เฌาพรา อี อึบ โตต ดอน โมยว, แม แฮะ แยต เลห ดูอี ปี อึบ แม แคง มืง แอฆึบ, แตห อึณ บยัะ แคะ ตาง ปวน แม. โอว หมาณ, แกวะ แตห แม เฌา ปยาต แวน โตต เฆ. 27 โอว หมาณ, แตห แม เฌา วี โหลห แดเจณ แม อี มูห อาบราฮัม, อาแซก บอ อาโกบ เฆ ตึอน. แกวะ แตห แม เฌา โนว หมาบ แปะ แฮะ ลูต ดูอี เฆ นี. เฆ บอ ดืร บอ ฮาย กาเซา. 28 โอว โยว เฆ ดูอี แอฆึบ วี ต็อห, “โกบ เฌาพรา อาว ฮู แป ดี แยต ฮาว เฆ, แตห เฆ ฌัม แคง มืง แปะ แฮะ กาแซณ อัน ดี ดัว ดี เฆ, บอ โกบ แฮะ ฌ็อง อัน ดี เฆ, อัน แตห เฆ เลห แคง แปร กาฮ็อห นี, แตห อัน ปึอน ดี ง็อห ยัม เฆ.” 29 ดูอี เฆ นี, เฆ มูห ดูอี แปะ แฮะ ร็อห แม เฌา. เฆ แฮะ ปี คาฆูน แม เฌา. แม เฌา มืร แฮะ จัร อาพูง ดัง โคว แม บอ ปวน ตาง แม แยต เลห เฆ แคง มืง แอฆึบ.’”