1 อาโมวแซ วี ต็อห, “ดอ อัน ตี เฌาพรา วี ต็อห ดี โอว, ‘แตห แม วี ด็อห มาว ปอ อา ดีพลาง, แตห อึณ ปี คา อาต ตึอน. แฮะ ฮอต, แม บอ วี โฮะ โดง กอย โอว แดง นอน นี. แม บอ โลว วี ดึห เฮ, โบง บอ ฌีดืก โดง ดี อูน มาว ตี. 2 โฆรห ปี แดม อูน โอว ดี มาว อา ดีพลาง แปะ แฮะ ซัต แวน แม ตึอน, โอว ดี วี แดม ดึก ดี มาว ตี, แตห แม วี อูน แคง ฌีดืก ตี.’

3 โอว มืร ดึห เฮ กาทีน, วี โบง ฌีดืก. แฮะ ฮอต, โอว วี ดึห มาว อา ดีพลาง อี แฮะ ปี มาว คา อาต ตึอน, วี โฮะ แดง นอน. 4 เฌาพรา มืร วี แดม ดึก ดารา ฆึร ณ็อง ดี มาว อา ดีพลาง ตี, แตห อึณ ปี โฆรห แปะ แฮะ กาลาง อัน อี เลห แคง เงา ดอ กอย เบ ดี ดัง นอน ตึอน. แฮะ ฮอต, อัน เฌา วี อาบ มาว ตี ดี โอว. 5 โอว มืร วี โลง แดง นอน ตี อู เฌณ บอ ฮับ อูน มาว ตี แคง ฌีดืก ปี โบง โอว, แตห อึณ โดบ แคะ ปี กาลาง เฌาพรา ดี โอว. มาว อา ดีพลาง ตี ซี กอย กอ ฌัม อาตึร.

6 เฆ ดูอี อีซาเรลัะ บอ ยีต ดี อึม คึม ดูอี อายากาน, วี ฮาว โดง จืร โมวซารา. อาโรน บอ ยัม ดี ตี. เฆ บอ ดีบ โดว อัน ดี ตี. ฆอน อีมาย อัน อี จืร อาเลอาซา บอ วี แบน ดา อี หลู ดี เฌาพรา, วี ปลูะ อัน. 7 เฆ บอ ยีต ดี ตี, วี ฮาว โดง จืร โฆะโฆวตา. เฆ ปี วี ยีต ดี โฆะโฆวตา ตี, ปี วี ฮาว ดี โดง จืร ยูดพาซัะ โดง มึห แบลง อึม. 8 ดอ อัน ตี เฌาพรา บอ ร็อห เลห เฆ ดูอี ครึร อาเลวี, แตห เฆ แบน ดูอี อี กาฆอด ฌีดืก เฌาพรา, แบน บอ ดา อี โบง ฆาน เฌาพรา บอ ม็องการา ดัว ดี อี แคะ ปี ซี ม็องการา ดัว เฌาพรา ดี เฆ กอ ฌัม ดอ ตี นี. 9 โกบ อึณ ปาย ตี เฆ ดูอี อาเลวี ตู มึห กาดาย อี แบน คาฆูน เฆ ปี อี เฮา. อึณ มูห ปี เฆฌู เฌาพรา ดี เฆ อี แฮะ แบน คาฆูน ดี เฆ, แตห อึณ โดบ แปะ แฮะ ดึอม กาแซณ เฌาพรา ปี กรึบ เบ ดี เฆ.

10 โอว มืร แฮะ กอย แดง นอน ตี อาดา พวน ฆึร ซีแง ดี พวน ฆึร หมึร ปี คา อาต ตึอน. คา นี มืร, เฌาพรา แฮะ โทม โฆรห ปี ซาคึร โอว. อัน ตู ซี ปยาต เบ. 11 อัน วี ต็อห ดี โอว, ‘แตห แม แยต ฮาว ดูอี เฆ ตี, แตห เฆ ฌัม แคง มืง แปะ แฮะ ดึอม กาแซณ โอว ดี ดัว ดี ฆูณ ดัง เฆ.’”

12 อาโมวแซ วี ต็อห, “อึย เบ ดูอี อีซาเรลัะ, เฌาพรา อี มูห เฌาพรา ปี กรึบ เบ แฮะ จัร เบ, แตห เบ โรวเซ อัน บอ โบง โดบ ปี จัร อัน ดี เบ บอ ร็อก อัน. เบ บอ โลว ดึห บอ น็อห บอ พึอม เบ บอ โตต ดอน โมยว, วี กรึบ เฌาพรา. 13 แตห เบ โบง โดบ ดารา เฌาพรา บอ แคะ ปี กาลาง อัน ดี เบ อาตึร นี. โคว, อึณ ดี แบน อาฆยึร ดี เบ.

14 เฌาพรา ปี กรึบ เบ อัน อึบ โตต บอ แคง ฆางหราว อี จา กาเซา บอ แดง กาดาย บอ ดอน โมยว อี กอย แดง กาดาย นี. 15 ปี บอ แฮะ ปาย ตี มืร, เฌาพรา ยี ร็อก กาเซา เฆ ฆูณ ดัง เบ. อัน เฌา มืร ร็อห เบ อี มูห หลูกหลาน เฆ, แตห เบ แบน ดูอี ปี อึบ อัน เฌา กอ ฌัม ดอ ตี นี. 16 ปาย ตี แตห เบ แวน อี ตู หมึอม แคง น็อห เบ, แตห อึณ ปี อี ซัวะ แวน ฮูน ลัะคานา. แกวะ ฮู แตห เบ ดืร กาเซา. 17 โคว, เฌาพรา ปี กรึบ เบ, อัน ตาง หลึอม ดอน โมยว. อัน บอ มูห ดา กาณา อี อึบ ดา กาณา บอกาเฆลียด. อัน มูห เฌาพรา อี บอด มยาด กาเซา, อี มึห ปวน เฆ อาพูง ดังโคว ตาง, แฮะ กาอาบ อี โรวเซ อัน. อัน เฌา มืร ตู มึห โดง ร็อก โดง ฌ็อง, อัน ตู ดึห ปี ปรา อี ดี ดัว. 18 อัน เฌา มืร ซูงพยาด นา มูห นา หมาน ดี เฆ อี ตู มึห ฆูณ มา, บอ เฆ ยา ซีปรัห. อัน เฌา มืร ร็อก เฆ ดูอี อาโมยว เฮา อี มูห แคต อี กอย แคง มืง เบ. อัน บอ ยอด แมน เฆ, แตห เฆ มึห ดี โฮม ดี ตา. 19 ปาย ตี บอ เบ โลว ร็อก แคต เฆ ตี. โคว, บอ เบ แฮะ ดึอม แบน แคต, กอย แคง มืง แอฆึบ ตึอน. 20 แตห เบ โรวเซ เฌาพรา อี มูห เฌาพรา ปี กรึบ เบ. แตห เบ โบง ฆาน อัน บอ ดืง กาแซณ, แตห มี อัน เฌา โทม. 21 อึณ แฮะ กาอาบ เบ อืบ มยูก มี อัน. อัน บอ มูห เฌาพรา ปี กรึบ เบ. อัน มืร แฮะ โบง อี หมึอม อาม กาเซา, แตห เบ ยึร. 22 ดอ โฆว ดอ ฮาว ฆูณ ดัง เบ แคง มืง แอฆึบ ตึอน, เฆ บอกาเฆลียด กอย บู ฆึร วี. ดอ ตี นี เฌาพรา แฮะ วี แตห เบ แบร กืน กอ ปี ซีมัณ อี กอย แคง เบลณ.”