คาน 8
อาโมวแซ วี ต็อห, “เบ โลว โบง โดบ โตต ดอน โมยว แคะ กอย ดารา ปี กาลาง โอว ดี เบ อาตึร นี, แตห เบ บอ ปึอน ดี กอย เหลณ บอ แบร กืน แคง มืง แปะ แฮะ กาแซณ แฮะ ดืง เฌาพรา ดี ดัว ดี ฆูณ ดัง เบ.
2 แตห เบ โหลห อี แฮะ ปวน ตัห อาต นี. เฌาพรา ปี กรึบ เบ แฮะ แยต แตห เบ ฮาว โดบ อึณเตณ โต็ง, ฮาว แคง แปร กาฮ็อห อาดา พวน ฆึร ซีนัม. อัน เฌา มืร แฮะ โบง แตห เบ มึห น็อห โฆม, แตห อัน นับ โยว เบ มึห ตู มึห น็อห อี ซี โดบ ดารา อัน.
3 อัน เฌา แฮะ โบง แตห น็อห เบ หนีม, แตห เบ เอต ปี ดี โฮม. แฮะ ฮอต, อัน ปี วี ดัว คามูน มานา ปี ตู ดึอม นับ เบ, ปี ตู ดึอม ยึร ฆูณ ดัง เบ. อัน ดึห คามูน ตี, วี เฮียง เบ โฮม. ปาย ตี อัน แตห เบ นับ, เซ ดูอี มึห มี ปี ดี โฮม อู โมยว, อาว ฆลึม. อึณ ซี โลว บอ โฆรห เฌาพรา ดอน โดว อี เลห แคง โมต อัน, แตห อึณ เฮียง บอ น็อห พึอม ดูอี.
4 อาดา พวน ฆึร ซีนัม ตี, ครึง ปี ตา เบ ตู ราม. เปลา เบ มืร ตู อ็อห.
5 แตห เบ นับ แคง น็อห เบ, เฌาพรา แฮะ มาโนว เบ, แตห อึณ ปี ฆูณ มาโนว ฆอน อัน.
6 โกบ อึณ ปาย ตี แตห เบ โบง โดบ ดารา ปี กาลาง อูน เฌาพรา ดี เบ, แตห เบ โดบ ปี บยัะ เฌาพรา ดี เบ ดอน โมยว บอ แตห เบ โรวเซ อัน เฌา.
7 โคว, เฌาพรา ปี กรึบ เบ ดี ตึย เบ ฌัม แคง มืง บอด, มืง หมึอม, มืง อี มึห อึม แบลง เฆ อึม โตห ดอน ดีลัยะ บอ ดอน นอน.
8 อึณ มูห มืง อี มึห เคาคยูง เฆ เคาบาลี. อึณ บอ มึห บอ เฮ มางูน, เฮ ดีปู, เฮ มาจัก บอ เฮ นามัน บอ งาม มาเพียน อี ลึง กาเซา.
9 แคง มืง ตี, เบ มืร อาว ฮู ฌูด ลูด มาเซ. เบ ดี บอ ปึอน ดี โฮม แพ เซเซ. แคง มาว อึณ ดี มึห ฮีน. เบ ดี ปึอน ดี ฆึห เลห บอ มาล็อง เรณ ดี นอน แคง มืง ตี.
10 เซ เบ แฮะ ปึอน ดี โฮม แพ, แตห เบ อืบ เฌาพรา ปี กรึบ เบ. โคว, อัน เฌา แฮะ ดัว มืง บอด มืง หมึอม ดี เบ.
11 แตห เบ ซาดีก, โยว เบ ปีว เฌาพรา อี มูห เฌาพรา ปี กรึบ เบ. แกวะ แตห เบ แวน ดารา บอ ปี ดัม อูน เฌาพรา ดอน โมยว ปี กาลาง โอว ดี เบ อาตึร นี.
12 เซ เบ แฮะ ฮอต มึห ดี โฮม ลึง ตา ลึง, แฮะ ฮอต โบง บอ กาง อี ชีด, กาง อี ซีคยา,
13 เซ พึง มาบู บอ พึง มามัก เบ บอ รึอน ครีว บอ โกรวกราม เบ แฮะ แบร กืน,
14 แตห เบ ซาดีก, โยว เบ วี มึห น็อห ปีคึก, วี ปีว เฌาพรา อี แฮะ คยอด เบ เลห แคง มืง แอฆึบ อี มูห โดง แฮะ ดึอม แบน เบ หมาย อี เฮา.
15 เฌาพรา ยี แฮะ แยต เบ กาโลห ฮาว แคง แปร กาฮ็อห อี ตาง อี ง็อง. ดี ตี อึณ บอ มึห บอ มาฮัณ อี ฮาย บอ มาแมงเงา อี มึห อาย แฮณ. กาดาย มืร แฮะ กาฮ็อห ต็อง, อาว มึห อึม. เฌาพรา ยี แฮะ วี แตห อึม เลห แคง ดาอาง มาว, แตห เบ มึห ดี เดียง.
16 แคง แปร กาฮ็อห ตี, เฌาพรา แฮะ เฮียง เบ โฮม คามูน มานา ปี ตู ดึอม โฮม ฆูณ ดัง เบ. อัน เฌา แฮะ แตห เบ คัม ดูก อี หณาบ กาเซา, แตห อึณ เทว น็อห เบ, แตห เบ วี มึห น็อห โฆม น็อห เตียม, แตห เบ วี ปึอน ม็องการา บอด วาย อัน ตี.
17 เซ อาว ปาย ตี เบ ดี บอ นับ ดี ต็อห, ‘อึณ มูห ปวน โอว บอ กยัะ โอว อี แฮะ แตห โอว ครัม แคะ นี.’
18 แตห เบ ยี โหลห เซเซ, อึณ มูห ปวน เฌาพรา อี แฮะ แตห เบ ปึอน ดี โบง, แตห เบ วี มึห, วี ครัม. ปาย ตี เฌาพรา แฮะ โบง โดบ กาดีก ซัดฌา แปะ แฮะ ดึอม กาแซณ อัน ดี ฆูณ ดัง เบ. ปาย ตี อึณ แฮะ ฮอต แบน อาตึร นี.
19 เซ เบ วี ปีว เฌาพรา ปี กรึบ เบ, เซ เบ วี โฆม วี กรึบ เฌาพรา ปอ กาดัง, อาตึร นี โอว กาลาง ดี เบ, เบ ดี ลึร ชึม โตต อาคัร หมาน.
20 อัน เฌา ดี โบง แตห เบ ลึร ชึม, แตห อึณ ปี เฆ ดูอี อาโมยว เฮา แฮะ ลึร ชึม อาต ตัห ลึบ เบ แคง มืง เฆ ตึอน.”