1 อาโมวแซ วี ต็อห, “เฌาพรา อี มูห เฌาพรา ปี กรึบ เบ, อัน ดี แยต ฮาว เบ, แตห เบ ฌัม แคง มืง โดง ดี ฮาว กอย เบ ตี. อัน เฌา ดี โฮว เตา อาโมยว เฆ ดูอี อี ตาง หลึอม เบ บอ มึห โปลม หลึอม เบ. อึณ บอ มูห ดูอี อาโมยว เฮทีด, ดูอี ฆีฆาซีด, ดูอี อาโมวรีด, ดูอี กานัณ, ดูอี เพเรซีด, ดูอี ฮีวีด บอ ดูอี เยบูซีด.

2 ดูอี เฆ ตี เฌาพรา แฮะ อาบ ดี เบ. เซ เบ แฮะ แป เฆ, เบ โลว ง็อห แวน โตต เฆ บอกาเฆลียด. อาว ปึอน ลาย แบน ฆึก ดี เฆ ดอ เหมา. อาว ปึอน มึห น็อห กาเว เฆ.

3 อาว ปึอน คัด ลาย ดึห ดี เฆ. แกวะ แตห ฆอน อีบึณ เบ คัด ดึห ฆอน อีมาย เฆ. บอ ฆอน อีบึณ เฆ แกวะ วี ดึห แบน เอา เบ.

4 โยว เฆ กาซูห ฆอน อีมาย เบ แวน เฌาพรา, วี ฮาว กรึบ เฌา ปี กรึบ เฆ. เซ เบ โบง ปาย ตี เฌาพรา ดี รู กาเซา ดี เบ บอ โบง แตห เบ ลึร ชึม โตต อู เฌณ.

5 โคว อัน ตี, เบ โลว ปยาต แวน กาโช็ง หลู เฆ ดี เฌา แบน โมยว แบน โมยว, ดูห มาว บอด ปี กรึบ เฆ, แตห อึณ กาลาต. เบ โลว ฆัร แวน บอ ร็อง นาง กานัม อี จืร นาง เอซูรา ตึอน, โดะ แวน บอ อารึบ ปี กรึบ เฆ.

6 เบ โลว โบง ปาย ตี โกบ มูห เบ ดูอี บอด, ดูอี ปี อึบ เฌาพรา อี มูห เฌาพรา ปี กรึบ เบ. แคะ กอย ดูอี บอกาเฆลียด, เฌาพรา แฮะ ร็อห เบ, แตห เบ แบน ดูอี อาโมยว อัน, แตห เบ บึง มี อัน.

7 อาว มูห, เฌาพรา ร็อห เบ โกบ แฮะ แบร กืน เบ หลึอม ดูอี อาโมยว เฮา. โคว, เบ แฮะ เปรต หลึอม ดูอี ดอน โมยว.

8 เฌาพรา แฮะ ร็อห เบ โกบ ร็อก อัน ดี เบ บอ โกบ โบง อัน, แตห อึณ โดบ ปี ดึอม กาแซณ อัน ดี เฆ ฆูณ ดัง เบ. โคว อัน ตี, ปวน อัน แฮะ คยอด เบ, แตห เบ ลอด แบน หมาย คูนดีคัม แคง มืง แอฆึบ ตึอน.

9 ปาย ตี แตห เบ นับ, เฌาพรา อี มูห เฌาพรา ปี กรึบ เบ, อัน อู กาดัง ตี มูห เฌาพรา อี โบง ซืร ซืร หมาน หมาน เซเซ. อัน บอ โบง โดบ เซเซ กาดีก ซัดฌา แปะ แฮะ ดัว อัน. อัน เฌา บอ บยัะ ปวน อัน ดี เฆ อี ร็อก อัน บอ เฆ อี โบง โดบ ดารา อัน ดอน โจว ดอน บาน, แตห อึณ กอ โนะ อู แหรณ โจว.

10 มาแล, อัน เฌา มืร ตู แกร ตู ทืง ดี ดัม หมาบ ดี เฆ อี ฌ็อง อัน.

11 โคว, แตห เบ โทม โฆรห ปี มาโนว โอว ดี เบ ดอ ตี นี. แตห เบ โบง โดบ ดารา ปี ดัม เฌาพรา ดี เบ อาตึร นี.

12 เซ เบ บอ โทม บอ โบง โดบ ดารา นี, เฌาพรา อี มูห เฌาพรา ปี กรึบ เบ, อัน ดี กาเว เบ บอ โบง เซเซ แปะ แฮะ ดึอม ดืง, ดึอม กาแซณ อัน ดี ฆูณ ดัง เบ.

13 อัน เฌา ดี บอ ร็อก เบ บอ ม็องการา ดัว ดี เบ บอ แตห เบ แบร กืน. อัน เฌา ดี ม็องการา ดัว บอ ดี หลูกหลาน เบ บอ มาน เบ เฆ โดง นา เบ บอ มาน มางูน เบ เฆ เฮ นามัน เบ บอ พึง มาบู มามัก เบ บอกาเฆลียด. อัน เฌา ดี ม็องการา ดัว ดี เบ ปาย ตี แคง มืง แปะ แฮะ ดึอม กาแซณ อัน ดี ดัว ดี ฆูณ ดัง เบ.

14 แคะ กอย ดูอี แดง กาดาย นี บอกาเฆลียด อาว มึห ดูอี คอ อู โมยว อี ปึอน ม็องการา บอด ปี เบ. ดูอี กาแต เบ ตู มึห อี แฮะ หมัน. บอ โดว ซัดดาวา เบ ดอน โดว ดี มึห ฆอน.

15 เฌาพรา ดี ฆ็อง ดี แร อาเพ อาเร บอ เซา รอฆา ดอน โมยว ดี เบ. อัน เฌา มืร ตู แตห เบ คัม เซา รอฆา อี กาเซา อี ปี แปะ แฮะ ดึอม ยึร เบ แคง มืง แอฆึบ ตึอน. อัน เฌา ดี แตห เฆ อี มูห รันซู เบ คัม เซา รอฆา ฌึร ตี.

16 เบ โลว ปยาต แวน ดูอี แปะ แฮะ อาบ เฌาพรา ดี เบ บอกาเฆลียด. เบ ตู ปึอน กาเว เฆ. เบ มืร ตู ปึอน กรึบ เฌา ปี กรึบ เฆ. โคว, ลอง อัน ตี อึณ ดี แบน ปี เฆ ดีณ ยอต เฆ คืม ดี เบ.

17 แกวะ แตห เบ ทาง แคง น็อห เบ, ดูอี เฆ ตี แฮะ กืน หลึอม เบ. โคว, เบ ตู ปึอน ดี โฮว เตา เฆ.

18 เบ แกวะ โยว เฆ, แตห เบ โหลห แปะ แฮะ โบง เฌาพรา ปี กรึบ เบ ดี คูนดีคัม แคง มืง แอฆึบ บอ ดี เฆ ดูอี ปี อึบ อัน.

19 แตห เบ โหลห ดูก ตาง แปะ แฮะ ยึร เบ บอ อี หมึอม อาม กาเซา แบน โมยว แบน โมยว แปะ แฮะ โบง เฌาพรา อี แฮะ แตห อึณ ลึห แคะ ตาง ปวน อัน. อัน แฮะ แตห เบ ปึอน ดี เลห ฮาว ดาคึย. อัน เฌา ดี โบง ดี เฆ ดูอี ปี โยว เบ, แตห อึณ ปี แปะ แฮะ โบง อัน ดี เฆ ดูอี แอฆึบ ตี.

20 แดง ตี, เฌาพรา ปี กรึบ เบ ดี จัร มาแอง เฆ มากาอาณ ตัห ดอก ตัห ปยาต เฆ, แตห บอ เฆ อี ซี ฆีด อี แฮะ ปรา ดี เตา, ปรา ดี เครียง กอ ยัม โตต.

21 โกบ อึณ ปาย ตี เบ แกวะ โยว ดูอี เฆ ตี. เฌาพรา ปี กรึบ เบ ดี กอย รึม โดบ เบ. อัน เฌา มูห เฌาพรา อี มึห อาพูง ดังโคว ตาง อี หมึอม อาม บอ หมึอม โยว.

22 อัน เฌา ดี โฮว เตา ดูอี แคง มืง โดง ดี ลึบ ฮาว เบ ตี อู เฌณ อี แจก อี แจก. เบ ตู ปึอน โฮว เตา เฆ เลห โตต อู เฌณ, โยว มาโดว แปร ฮาย วี แบร กืน, วี แบน ดูก ดี เบ.

23 เฌาพรา ดี อาบ ดูอี เฆ ตี ดี เบ. อัน ดี แตห อึณ แบน น็อห โยว กาเซา ดี เฆ, แตห อึณ กาฟัร กาเฟียน แคง น็อห เฆ, แตห เฆ กอ ลึร ชึม โตต.

24 อัน เฌา ดี ดึห คูนดีคัม เฆ อาบ ดี เบ. เบ โลว ง็อห ยัม เฆ, แตห อี เฮา กอ ปีว โตต เฆ. อึณ มืร ตู มึห อาเซ อี ปึอน แคร เบ ดอ เหมา. เบ ดี บอ ปยาต แวน โตต เฆ ดอน อี.

25 เบ โลว โดะ แวน โตต อารึบ ราง เฆ แคง เงา. เบ มืร ตู ปึอน หลัยะ รึอน เฆ ครีว ปี ปีด เฆ ดี อารึบ ราง ตี. เบ ตู ปึอน ดึห ดี เบ. เซ เบ ฮี โบง ฮี ดึห, โยว อึณ ปี เบ ดี เคร ยอต เฆ คืม ปี ดีณ เฆ. ฌึร ตี อึณ บอ มูห ปี กาอีห กาเซา เฌาพรา.

26 เบ ตู ปึอน ดึห อารึบ ราง คอ อู โมยว, ตัห ลึบ แคง กาง เบ. เซ เบ ยี ดึห ตัห, เบ ดี บอ คัม อี ปยาต แวน เบ ปี อารึบ ตี. เบ โลว กาอีห, โลว ฌ็อง โกรว ฌึร ตี ดอน โมยว. โคว, อึณ มูห แปะ แฮะ ฮอต แวน เฌาพรา.”