1 อานี อึณ มูห ดารา ดอน โมยว บอ ปี ดัม อูน เฌาพรา ปี กรึบ เบ ดี เบ, แตห โอว วี มาโนว เบ, แตห เบ โบง โดบ ดอ กอย เบ แคง มืง โดง ดี ฮาว กอย เบ วาย กาโลห เบ แบลง ยอดาน. 2 บอ โจว เบ, บอ โจว หลูกหลาน เบ, แตห เบ โรวเซ เฌาพรา อี มูห เฌาพรา ปี กรึบ เบ. แตห เบ โดบ ดารา อัน เฌา, แตห อึณ ปี ปี กาลาง โอว ดี เบ นี. ปาย ตี อึณ ดี แตห อาซาก เบ โต็ง, แตห เบ ปึอน ดี กอย เหลณ แคง มืง ตี.

3 เบ ดูอี อีซาเรลัะ, แตห เบ โทม บอ โบง โดบ ดารา ตี ดอน โมยว, แตห เบ ปึอน ดี กอย ดาคึย แบน ดูอี อาโมยว ตาง แคง มืง บอด มืง หมึอม ตี. แตห อึณ บอ โดบ แปะ แฮะ ดึอม กาแซณ เฌาพรา ดี ฆูณ ดัง เบ.

4 เบ ดูอี อีซาเรลัะ, แตห เบ โทม. เฌาพรา ปี กรึบ เอ, อัน มูห เฌาพรา อู กาดัง. 5 เบ โลว ร็อก อัน เฌา ตี, แตห บอ น็อห บอ โตต ร็อก อัน. แคะ ปึอน เบ ร็อก แคง น็อห, แคะ มึห เบ อางยาน, แคะ มึห เบ โปลม, ฌึร ตี เบ โลว ดึห โตต ดอน โมยว, วี ร็อก อัน เฌา. 6 ดารา ปี มาโนว โอว ดี เบ อาตึร นี เบ โลว อูน แคง น็อห, แกวะ แตห เบ ปีว ดอ เหมา. 7 แตห เบ ดึห ดารา ตี, วี มาโนว ฆอน เบ. เบ บอ กอย แคง กาง บอ ฮาว โดบ อึณเตณ, เบ บอ ดีเหลา, เบ บอ ยีต, แตห เบ ลาย กามวน ลาย แค ลอง ดารา ตี. 8 แตห เบ แดม โฆรห อัน, ปัก ดึก ดี แด เบ บอ ปัก ดึก ดี กาต็อห เบ, แตห อึณ แบน อี ดัว ซาดีก ดี เบ เซเซ. 9 แตห เบ แดม ดารา ตี, ดึก ดี ร็อง บาง มาโลห กาง เบ, บอ ดี ร็อง บาง มาโลห แวง เบ.

10 เฌาพรา อี มูห เฌาพรา ปี กรึบ เบ, อัน แฮะ ดึอม กาแซณ ดี ฆูณ ดัง เบ อี มูห อาบราฮัม บอ อาแซก บอ อาโกบ ต็อห, อัน ดี แตห เบ กอย แคง มืง อี มึห แรง, อี ตาง, อี จา. อัน ดี แตห เบ กอย บอ แคง มืง ปี ตู กาดูห เบ ดี แด ดี โบง. 11 อัน ดี บอ แตห เบ กอย แคง กาง อี แฮะ มึห โกรว บอด บอ โกรว หมึอม อี แฮะ โนะ นา แคง, อี มูห โกรว ปี ตู กาดูห เบ ดี กาฌูะ อูน. อัน ดี บอ แตห เบ มึห อึม คึม ปี ตู กาดูห เบ ดี ฆึห. บอ มาน มางูน เฆ เฮ นามัน ปี ตู กาดูห เบ ดี ซัม. ดอ แตห เฌาพรา เบ กอย แคง มืง ตี, เบ ดี บอ ปึอน ดี โฮม แพ โฮม กืน. 12 โคว, โอว ต็อห, แตห เบ ซาดีก, แกวะ แตห เบ ปีว เฌาพรา อี แฮะ คยอด เลห เบ แคง มืง แอฆึบ อี มูห โดง แปะ แฮะ ดึอม แบน เบ หมาย อี เฮา.

13 แตห เบ โรวเซ เฌาพรา ปี กรึบ เบ. แตห เบ กรึบ มี อัน เฌา อู กาดัง ตี. แคะ ปี ดืง ปี กาแซณ เบ, แตห เบ แตห เฌาพรา โทม. 14 แกวะ แตห เบ กรึบ เฌาพรา ปอ อู กาดัง อี มูห ปี กรึบ เฆ ดูอี อี กอย โคบ เบ. 15 โคว, เฌาพรา อี มูห เฌาพรา ปี กรึบ เบ อี แฮะ กอย รึม โดบ เบ, อัน ตู คัม เบ กรึบ เฌา ปอ กาดัง. เซ เบ ยี โบง ปาย ตี อัน ดี รู กาเซา ดี เบ. น็อห รู อัน ดี ปี เงา อี กาซึม เบ, โบง แตห เบ ลึร ชึม โตต, ตู แตห เบ ปึอน ดี กอย แคง มืง เบ. 16 แกวะ แตห เบ เทว น็อห อัน เฌา อี มูห เฌาพรา ปี กรึบ เบ. แกวะ โบง ปี ดึอม โบง เบ ดอ กอย เบ ดี โดง จืร มาซา ตึอน.^a 17 เบ โลว โบง โดบ ซีคยา ดารา ตี, แตห อึณ กอ เฌะ โตต ดอน โมยว แคะ ปี ดัม อูน เฌาพรา ดี เบ. 18 แตห เบ โบง นา ซืร นา หมาน, โบง นา บอด นา หมึอม อี ล็อะ น็อห เฌาพรา, แตห เบ บอ โบยว ดาคึย, ปึอน ดี บึง มืง บอด มืง หมึอม แปะ แฮะ กาแซณ เฌาพรา ดี ดัว ดี ฆูณ ดัง เบ. 19 เบ ดี บอ ปึอน ดี โฮว เตา รันซู เบ บอกาเฆลียด, แตห อึณ ปี แปะ แฮะ ดึอม กาลาง เฌาพรา ดี เบ.

20 นา อาต นี ฮาว ฆอน เบ ดี บอ ดีหมอด เบ ต็อห, ‘เฌาพรา แฮะ ดัม อูน ดารา แบน โมยว แบน โมยว, แตห เอ โดบ. มาเซ อึณ มูห ลอง ดาง อัน?’ 21 เบ ดี บอ วี เวียะ โฆรห เฆ ตี ต็อห, ‘เย แฮะ ดึอม แบน หมาย คูนดีคัม แคง มืง แอฆึบ. มาแล เฌาพรา อี มึห ปวน ตาง แฮะ คยอด เลห เย. 22 เฌาพรา แฮะ โบง อี หมึอม อาม กาเซา แบน โมยว แบน โมยว อี บยัะ ปวน ตาง อัน. อัน แฮะ โบง บอ อี หมึอม โยว กาเซา ดี เฆ ดูอี แคง มืง แอฆึบ บอ ดี คูนดีคัม, ดี อามู อามาด อัน บอ ดี ดอน อี อี กอย แคง โฮว คูนดีคัม. 23 อัน เฌา แฮะ แตห เย ลอด เลห แคง มืง แอฆึบ ตี, วี แยต เย ตัห ฌัม ดี นี. อัน เฌา แฮะ อาบ กาดาย นี ดี เย, แตห อึณ โดบ ปี ดึอม กาแซณ อัน ดี ฆูณ ดัง เอ. 24 โกบ อึณ ปาย ตี เฌาพรา อี มูห เฌาพรา ปี กรึบ เอ แฮะ เบลห อูน ดารา, แตห เอ โบง โดบ, แตห อึณ กอ เฌะ โตต ดอน โมยว, แตห เอ โรวเซ อัน เฌา. ปาย ตี อึณ ดี แบน อาฆยึร ดี เอ, แตห เอ มึห อาซาก อี ดาคึย เซเซ ปี อาตึร นี. 25 เซ เอ โฆยวฆยา ดี โบง โดบ ดารา ปี ดัม อูน อัน เฌา ดี เอ ตี, เฌาพรา มืร ดี ดัว น็อห ซืร น็อห หมาน ดี เอ.’