อาโมวแซ บอ วี แดะ กาฌูะ เฆ ดูอี อีซาเรลัะ บอ กาลาง ดี เฆ ต็อห, “อึย เบ บีนอง โอว อี มูห ดูอี อีซาเรลัะ, อาตึร นี แตห เบ โทม ปี ดัม เฌาพรา ดี เบ บอ ดารา ปี กาลาง โอว ดี เบ. แตห เบ เฮน บอ โบง โดบ อาคาคัร. 2 เฌาพรา ปี กรึบ เอ, อัน แฮะ กาแซณ ดี เอ ดอ กอย เอ ดี นอน ซีนาย ตึอน.^a 3 อาว มูห, อัน กาแซณ ลอง อัน ตี ดี เฆ ฆูณ ดัง เอ อี กอย ดอ มึอน. อัน แฮะ กาแซณ ดี เอ อี กอย ดอ ตี นี. 4 ดอ กอย เบ ดี ดัง นอน ตึอน, เฌาพรา บอ เบ แฮะ ลาย โดว นา. เฌาพรา บอ กาลาง โฆรห อี เลห แคง เงา ดี เบ. 5 ดอ อัน ตี โอว แฮะ กอย ดี กาแต เฌาพรา ฆาย เบ. โอว บอ โทม โฆรห เฌาพรา, วี กาลาง ดี เบ. โคว, เบ แฮะ โยว กาเซา เงา ตึอน. เบ มืร ตู ยัะ โฮะ แดง นอน.”

6 เฌาพรา แฮะ ต็อห, “โอว มูห เฌาพรา ปี กรึบ เบ. โอว แฮะ แยต เลห เบ แคง มืง แอฆึบ, อี มูห โดง แบน เบ หมาย อี เฮา.

7 แดง โอว แกวะ แตห เบ กรึบ เฌาพรา ปอ กาดัง.

8 แกวะ แตห เบ โบง อารึบ มาเซ คอ อู โมยว. อึณ บอ มูห โมยว อี กอย แคง ฆางหราว, อี กอย แดง กาดาย, อี กอย แคง อึม ครึม กาดาย, เบ แกวะ กรึบ มาเซ. 9 แกวะ มูด ฆึบ กรึบ อารึบ ราง. แกวะ ลึมลา เฆ. โคว, อึณ มูห โอว เฌาพรา ปี กรึบ เบ, อี ตู คัม เบ กรึบ ปอ โมยว. โอว ดี ดัม หมาบ ดี เฆ อี ฌ็อง โอว เซเซ, แตห อึณ กอ ฌัม โอย โจว, พวน โจว. 10 โอว ปี ดี วี ร็อก เฆ อี ร็อก โอว บอ เฆ อี โดบ ดารา โอว เซเซ, แตห อึณ กอ โนะ อู แหรณ โจว.

11 แกวะ แดะ ปีเยณ จืร โอว อี มูห เฌาพรา ปี กรึบ เบ. โคว, โอว ดี ดัม หมาบ ดี ดอน อี อี กาลาง ปีเยณ จืร โอว. 12 แตห เบ กัม ซีแง ดีเหลา, แตห อึณ แบน ซีแง บอด. แตห อึณ บอ โดบ ปี กาลาง เฌาพรา ปี กรึบ เบ ดี เบ. 13 อาดา เดา ซีแง, แตห เบ โฆยวฆยา ดี โบง ฆาน เบ ดอน โมยว. 14 ฮี ฌัม ซีแง อึณบู, แตห เบ ดีเหลา บอ กรึบ เฌาพรา. ซีแง ตี บอ เบ บอ ฆอน เบ, หมาย เบ, โดว ซัดดาวา เบ บอ แคต อี ตัห ตัม แคง กาง เบ, เฆ บอกาเฆลียด อาว ปึอน โบง ฆาน มาเซ. เฆ โลว ดีเหลา ปี เบ ดีเหลา. 15 แตห เบ โหลห ดอ แฮะ แบน เบ หมาย แคง มืง แอฆึบ ตึอน. แตห เบ โหลห บอ เฌาพรา ปี กรึบ เบ อี แฮะ ตา ปวน ตาง อัน, คยอด เลห เบ. โกบ อึณ ปาย ตี เฌาพรา ปี กรึบ เบ แฮะ จัร เบ กัม ซีแง ดีเหลา.

16 แตห เบ โรวเซ ฆูณ มา เบ, แตห อึณ โดบ ปี กาลาง เฌาพรา ปี กรึบ เบ. เซ เบ โบง ปาย ตี เบ ดี โบยว ดาคึย บอ อาซาก เบ ดี โต็ง, แตห เบ ปึอน ดี กอย เหลณ แคง มืง ปี ดี อาบ เฌาพรา ดี เบ.

17 แกวะ ง็อห ยัม อาซาก อี เฮา.

18 อีมาย แกวะ ลูต อีบึณ อี. อีบึณ แกวะ มึห น็อห กืน.

19 แกวะ ปรา โกรวกราม อี.

20 เซ แม แบน ซักเซ ดอ ซูงพยาด เฆ อามู อี, แกวะ กาโลว ลอง อี เฮา.

21 แกวะ แตห เบ หลัยะ อีบึณ อี เฮา. แกวะ แตห เบ มึห น็อห ซี ปึอน กาง อี เฮา บอ กาดาย อัน, หมาย อัน, มามัก มาโลว อัน, บอ แคะ ปี มึห อัน โกรวกราม แบน โมยว แบน โมยว.”

22 อาตี อึณ มูห ดารา ปี กาลาง เฌาพรา ดี เบ บอกาเฆลียด ดอ กอย อัน แดง นอน ตึอน. ดอ อัน ตี อัน แฮะ กาลาง โฆรห ตาง ดี เบ, แตห อึณ เลห แคง เงา บอ แคง อึณอูะ บอ แคง อับ ว็อง อี เฮต กาเซา. แดง ดารา เฌาพรา ตี, อัน เฌา มืร ตู ดัว ดารา ปอ โมยว. แฮะ ฮอต, อัน เฌา แฮะ วี แดม อูน ดารา ตี ดี มาว อา ดีพลาง, วี อาบ ดัว ดี โอว.

23 ดอ ยึร เบ โฆรห อี เลห แคง อับ ว็อง บอ ยึร เงา ตาง อี แฮะ ปลึก นอน ตึอน, เฆ ดา ตาง อี แยต เบ บอ เฆ ดา ตาง อี อึบ แคง ครึร เบ ดอน อี, เฆ บอ วี ตัห โดง กอย โอว, กาลาง ดี โอว ต็อห, 24 ‘เฌาพรา ปี กรึบ เอ แฮะ บยัะ อาพูง ดังโคว อัน บอ ปวน อัน อี ตาง กาเซา, แตห เย ยึร. เย มืร แฮะ ยึร โฆรห อัน อี แฮะ เลห แคง เงา. อาตึร นี, เย แฮะ นับ, เฌาพรา แฮะ กาลาง โฆรห ดี ดูอี. เฆ ยี ตู ยัม. 25 เย มืร ตู ซี ยัม. เซ เฌาพรา ปี กรึบ เอ ดี วี กาลาง โฆรห ดี เอ ปอ อู เฌณ, แตห อึณ เลห แคง เงา อี กูห ตาง, เย ดี บอ ยัม อาคัร หมาน. 26 โคว, อาว มึห ดูอี คอ อู วี อี แฮะ ยึร โฆรห เฌาพรา เลห แคง เงา อี กูห ตาง ปาย ตี วี ลอด ยัม. 27 แม อาโมวแซ อี มูห ดา กาณา เย, แตห แม อู วี ฮาว กอย กาตัด อัน เฌา, แตห แม โทม ปี กาลาง เฌาพรา อี มูห เฌาพรา ปี กรึบ เอ. แคะ ปี ซี กาลาง อัน ดี เย, แตห แม วี กาลาง ดี เย. เย ดี โทม บอ โบง โดบ โตต ดอน โมยว.’

28 เฌาพรา แฮะ ยึร โฆรห แปะ แฮะ กาลาง เบ ดี โอว ตี. อัน ปี วี ต็อห ดี โอว, ‘โอว แฮะ ฮอต ยึร โฆรห ปี กาลาง ดูอี เฆ ตี. โฆรห ปี กาลาง เฆ ตี ดอน โมยว แฮะ หมาน. 29 โอว บอ กาปรา กาเซา, แตห เฆ มึห น็อห ปาย ตี. อึณ แฮะ หมึอม อาคาคัร. เซ เฆ บอ โรวเซ โอว บอ โบง โดบ เซเซ ปี จัร โอว, เฆ มืร ดี โบยว ดาคึย เซเซ บอ โจว เฆ บอ โจว หลูกหลาน เฆ ดอน โจว ดอน บาน.

30 แตห แม วี กาลาง ดี เฆ, แตห เฆ วี เวณ โดง กอย ทึบ บีก เฆ. 31 อี มูห แม, แตห แม กอย โดบ โอว ดี นี. โอว ดี ดัว ดารา โอว ดี แม, ดัว บอ ปี ดัม โอว ดอน โมยว, แตห แม วี มาโนว เฆ, แตห เฆ โบง โดบ ซีคยา ดอ กอย เฆ แคง มืง ปี ดี อาบ โอว ดี เฆ, แตห อึณ แบน มืง เฆ.’ แคะ ตี เฌาพรา แฮะ กาลาง ดี โอว.

32 อึย เบ ดูอี อีซาเรลัะ, แตห เบ โบง โดบ แคะ ปี จัร เฌาพรา เบ โบง ดอน โมยว. แกวะ แตห เบ ลูด, เบ แวน คอ อู โมยว. แตห อึณ ปี เบ ฮาว ซืร ซืร โดบ อึณเตณ, แกวะ วัห นา ฆัะ นา อัห. 33 แตห เบ ซาดีก ดี โบง โดบ ดารา ตี. เซ เบ โบง ปาย ตี เบ ดี ปึอน นา บอด นา หมึอม. อาซาก เบ ดี บอ โต็ง. เบ บอ ปึอน ดี กอย เหลณ แคง มืง ปี ดี อาบ โอว ดี เบ, แตห อึณ แบน มืง เบ.