“Janejare'e pyri tijaiko ipi”, e'i mã'ẽ
4
Manyvo rewarà mõ rõwã pejimoãpã ojeeve ipi! Ãmõ, peayvu ai ywete teve ojikoty peiko ipi! Peporegeta ai tesõ ojiupe peiko! 2 Emã'ẽ. Joma'e kõ rè pejimopirai pemãjã. Ãmõ remẽ pejuka tarepe tesõ mirà mõ ima'e mõ rekyità. Ajamã'ẽ manyvo napereko'ãi kuwa ekyi pema'e rõmõ mijã. Ãmõ, pejiayvuvaja vaja kõrijõ peiko. Napeporanui rã'ĩ Janejare'e pè penemiporu rã kõ rè rewarà mõ a'evo peiko tite. 3 Ãmõ remẽ, peporanu ipe ijupe. Ajamã'ẽ ni'ei mã'ẽ kõrijõ pepota. Ajawyi Janejare'e nome'ẽi peupe, penemimota ywesõ kõrijõ pepota Janejare'e remimota wyi rewarà mõ. [Ãwĩvo pejẽ remẽ, peiko teywete petekokuwa e'ã rõmõ peiko ipi.]4 Janejare'e werovija rã'ãga mãe kõ tè pejẽ wyi kee a'e pejẽ. Nivoi tesõ pejẽ Janejare'e pè peiko ipi. Emimota rupi rõwã peiko rewarà mõ aepo a'e pejẽ. Ãwitõ wãivĩ mõ omẽnà rovakeve tesõ ãmõ kwaima'e rè ekoi remẽ, ãwĩvo 'ejẽ pejẽ Janejare'e rovake peiko ipi. Ayvu noenui mãe kõ tè pejẽ! Janejare'e rè pejikõ'õ mãe kõ tè pejẽ! Napetekokuwai mã'ẽ tè pejẽ peiko! Janejare'e noerovijai mãe kõ rè sõ pejimory remẽ, Janejare'e ãpã rõmõtà tè pejẽ ãmẽ peiko! 5 Ajamã'ẽ kee e'i Janejare'e ayvu, janeupewarà mõ: “Janejare'e o'Ãg oinõma janepy'a kõ pupe. A'e okãte'ã janere ipi”, e'i maekwerà. Teywete rõwã aepo e'i! 6 Aje a'e ywesõ poroporijauesa mã'ẽ rõmõ ekoi mã'ẽ tè. Ajare kee Janejare'e okusiwaoka jane kõ pè: “Janejare'e nopotai poroapyrasa mãe kõ ipi. Ajamã'ẽ noporoapyrasai mãe kõ rè oja'a katu ipi”, e'i maekwerà.a
7 Ajawyi kee a'e pejẽ. Aje ywete tapejime'ẽ Janejare'e po pè erovija e'e, a'e pejẽ. Kee tapejẽ: “Janejare'e, oropota erõvijã rõmõ ene!” tapejẽ ijupe ipi. Aepo pejẽ remeve, ãjãgai rõvijã pè kee tapejẽ: “Ejisyry eo! Erõvijã rõwã ene!” tapejẽ ijupe ipi. Ameve aepo jaa wenu remeve ojavatà rã'ĩ oo pewyi ãmẽ ipi. 8 Janejare'e pyri tapeiko ipi. Ipyri peiko remẽ, peneve ekoità teve ipi. Peaiwererà wyi tapepoi. Tapejipy'aky'a'ooka Janejare'e pè ipi. Awyje ekoa rupi kõrijõ tè tapeiko ãmẽ ky'y. 9 Mõa'ãrõwã peaiwererà pereko peneve. Penory ywe'e tite peaiwererà rè peiko. A'evo rõwã tapeiko ky'y. Tapejimosĩoka peaiwererà rè ky'y. 10 Tapejinõ gatu e'ã peiko peaiwererà rè Janerõvijã ywete rovake. Tapejimome'u ijupe ipi. Ãmẽ tè pepy'amokasità wayvu rupi katu tapeiko ãmẽ ky'y.
“A'evo tijaporegeta ai e'ã ãmõ kõ pè”, e'i mã'ẽ
11 Eretãrã kõ, tapeporegeta ai e'ã ikõ ojiupe peiko ipi nẽ, a'e pejẽ. Peporegeta ai ojee remẽ, pejavytà ãmẽ Janejare'e ayvukwerà.b Kee e'i maevo sõ tite mã'ẽ votà tè pejẽ a'evo peiko remẽ: “Janejare'e ayvu nikasi eupe”, e'i mã'ẽ votà tè pejẽ. 12 Janejare'e tè wayvu ivo tekoua rewarà okusiwaoka [tãmõ Moisesi pè, upi tijaiko]. A'e rupi janemosã'ãga. A'e kõrijõ tè janerereko katu kuwa. A'e kõrijõ tè janeremavo kuwa teve. Pejẽ rõwã! Ajawyi “nivoi” tapejẽ te'ĩte e'ã koivo kõ pè, a'e pejẽ.
“Nijakuwai manyvotà jaiko kovi”, e'i mã'ẽ
13 Pejapyaka katu ikenẽ. Kee pejẽ tite ipi: “Wãime rupi orootà oroiko oroposiko rã'ĩ. Maevo age'e orootà. Maevo kovi orootà”, pejẽ. Ãmõ, kee pejẽ teve: “Pe'ĩ kwaray rõmõ oroerokwapatà oroiko oroposiko”, pejẽ. “Kejavu karakuri oromoatytà”, pejẽ teve. Ikatu sa'u aepo napejẽi remẽ. 14 Kee rewarà mõ aepo a'e pejẽ. Nijakuwai manyvotà kõ'ẽme jaiko ipi rewarà mõ. Janemãnõa rã nijakuwai. Jaiko ke'ĩatu tè ipi. Serẽnà vo mã'ẽ tè jane. Ãwitõ serẽnà oiko rã'ĩte ji'ive remẽ, ãmẽ ajaire ipuku sa'u paire okãjãma oo. Ãwĩvo jane, serẽnà vo jaiko. Ke'ĩatu tè jaiko. Awyje mã'ẽ rõmõ rõwã jaiko ipi.c
15 Ajawyi kee tapejẽ kõrijõ ipi: “Janejare'e opota remẽ tè manyvotà oroiko”, tapejẽ kõrijõ. “Opota remẽ tè, oroiko jẽtà oroiko”, tapejẽ kõrijõ ipi. Ãmõ, “Wãime rupi rã'ĩ orootà. Ãmõ, moma'e ma'e rè oroposikotà. Janejare'e opota remẽ tè, a'evotà oroiko”, tapejẽ kõrijõ ipi. 16 Ãmõ, kee tapejẽ e'ã teve pevote: “Ije evote aposiko aiko ipi”, tapejẽ e'ã peupe. Aepo pejẽ sõ remẽ, pevote pejimoe'e ywe'e titetà peiko ãmẽ. Ãwĩvo pejẽ remẽ, nivoi mã'ẽ rõmõtà tè pejẽ ãmẽ ky'y. 17 Pekuwa ipe Janejare'e rekoa manyvo tijaiko mã'ẽ. Ajawyi upi ikõ tapeiko nẽ. Pekuwa ipe remẽ, ajamã'ẽ upi napeikoi sõ remẽ, “Nivoi mãe kõ tè pejẽ”, e'ità Janejare'e peupe.