3 Janerãpekõ rè tè poromosã'ãgatà pemotekokuwa rõmõ, a'e pupe japoregeta rewarà mõ. Kejavõigà teipe janerãpekõ. Ajamã'ẽ ikasiay wete. Kee a'età peupe tapekuwa. Kavaru juru rè jainõ imõtãa, erova rovaa rõmõ. Ta'yrygà mã'ẽ teipe imõtãa. Ajamã'ẽ a'e rupi ijarà werovaoka ipi. Pirujẽ ipirà kõ ve ojarà remimotarà rupi oo ãmẽ. [Ipy kõ ve. Ea kõ ve.] Ajawyi ikasiay a'e imõtãa, ta'yrygà ipe remẽ.

4 Ãmõ, nawiu pãranã rupiwarà rè teve poromosã'ãgatà. Uve ypykuita vo mã'ẽ nawiu ropyta rè, kejavõigà teipe mã'ẽ. Aje yvytu wasu opeju imoãjã nawiu ipi. Ajamã'ẽ nawiu jarà opota nawiu rerova maipe kyty too remẽ, ypykuita vo mã'ẽ rupi tè werovatà eraa. Ovote rõwã ojirovatà. A'e rupi tè werovatà eraa. Kejavõigà teipe remẽ, ikasiay jẽ erovaa mõ. 5 A'evo ve janerãpekõ. Kejavõigà teipe. Ajamã'ẽ ikasiay ipi, a'e pupe japoregeta ipi rewarà mõ.

Ipojy tesõ janerãpekõ pewarà. Tata rè teve poromosã'ãgatà tapekuwa sa'u. Ãwitõ ka'a kykyrerà sinĩgwerà ra'yrygà teipe jamoeny remẽ, a'e ve wapypatà eraa ka'a mitirõwã mã'ẽ. 6 Ãwĩvo ve janerãpekõ pewarà. Kejavõigà teipe janerãpekõ mijã. Ajamã'ẽ omojikwa ywete ayvu teitetea, poromojaiwe mã'ẽ. A'evo remẽ, tata pè okai mãe kõ vo 'ejẽ jikõ'õa ojimosãi. Ajaate janeroupa. Ãjãgai rõvijã wyi tè moregeta teitetea oẽ. Ajawyi tijajireko katu apijarerà kõ wyi.

7 Ayvu katu rupi tè japoregeta jaiko ipi. Kee ja'e kuwa mirà kõ rõmõ ipi. Jakuwa mijarà ojãrõ mãe kõ memyry jamovy'a tojãrõ e'ã ipi. Pirujẽ ka'a rupiwarà kõ a'evo ja'e kuwa ipi. Oveve mãe kõ ve a'evo ja'e kuwa. Ãmõ, yy rupiwarà kõ ve a'evo ja'e kuwa. Jamovy'a tojikõ'õ e'ã janere ipi. 8 Ajamã'ẽ ava nomovy'a'ãi kuwa wãpekõ ayvu teitete tomoẽ e'ã. Venenu vo ywete ayvu teitete. Noje'o'ãi ayvu teitete ipi. Ajawyi ayvu teitete ipojy mã'ẽ tè.

9 Ãmõ remẽ jamoe'e Janejare'e janerãpekõ rupi ipi. “Erõvijã ywete, nekatuay orerõvijã rõmõ neiko ipi”, ja'e ipe. Ajamã'ẽ ãmõ remẽ, ayvu teitete rupi ve jamojaiwe ywe'e tite koivo kõ, ãwisõ Janejare'e oinõ kõ ipe weruparà kõ rõmõ mijã remẽ. Nivoi 'eteay ãwĩvo jaiko remẽ ipi.^a 10 Ãwisõ pe'ĩte ipe janerãpekõ remẽ. Ajamã'ẽ iteetejẽ jamoẽ ipupe ipi. Manyvo põ ãmõ 'ary pè ayvu katu jamoẽ, ãmõ 'ary pè ayvu teitete tè jamoẽ? Nãwĩ vo'ãi kuwasi jaiko mijã, eretãrãgwerà kõ. 11 Emã'ẽ! Pe'ĩte yy reary remẽ, yy e'eay kõrijõ tè oẽ iwyi ipi. Yy isau mã'ẽ rõwã oẽ. Yy e'e kõrijõ tè oẽ. Nojimoje'ai. Ãwĩvo ve ayvu katu kuwasi jamoẽ moẽ mijã!

12 Pemã'ẽ gatu esa, eretãrãgwerà kõ. Kwapo'i rè tè poromosã'ãgatà esa tapetekokuwa sa'u. Kwapo'i'y i'a remẽ, jakuwa kwapo'i rõmõ tè i'a ipi. Ãmõ rupi tè rõwã i'a. Uva'a rõmõ teve rõwã i'a. Ivo ve akaju i'a remẽ, akaju rõmõ tè i'a. Ãmõ rupi tè rõwã i'a. Ãwĩvo kuwasi jane mijã! Ayvu katu kõrijõ tè kuwasi jamoẽ mãerã jẽ Janejare'e koty rewarà kõ rõmõ jaiko remẽ. Ajamã'ẽ mõrijõ rõmõ ayvu jamoẽ ipi. Ayvu katu. Ayvu teitete. Mokopejõ jamoẽ ipi. Ajawyi aepo a'e pejẽ, eretãrãgwerà kõ.

13 Tapeenu ikõ eayvu nẽ. Pejimotekokuwapa Jesu rekoa rè peiko. A'e rupi awi tapeiko! Toporoerõarõ e'ã ikõ peiko nẽ. Ivo toporoereko ikõ peiko ipi nẽ. Ãmẽ tè petekokuwaa ojikuwatà jane kõ pè. 14 Na'evoi petekokuwa rã'ãga kõrijõ tè sõ remẽ. A'e kõ ojimõarõay ãmõ kõ rè ipi. Ãmõ, ojimokasi teywete sõ jane kõ rè ipi. Nivoi tesõ ekoi ãmẽ kupa. Eruparà kõ rõmõ rõwã tapeiko ãmẽ. Kee tapejẽ tite e'ã ipi: “Ije ywesõ atekokuwavay. Ãmõ kõ vo rõwã ije”, tapejẽ e'ã ikenẽ. Aepo pejẽ sõ remẽ, pewarità tè ãmẽ. Petekokuwa rã'ãga tè peiko rewarà mõ a'evo peiko ipi. 15 Janejare'e tekokuwaa rupi rõwã a'evo ekoi mãe kõ. Otekokuwaa rã'ãga rupi tè a'evotà ekoi kupa. Ãjãgai rõvijã tè aepo omo'eoka kõ. 16 Jajimõarõ sõ ãmõ jane kõ pè remẽ, nikatui ãmẽ ipi. Ãmõ, japota sõ jajimokasi teywete remẽ, nikatui teve. Jaiko teitetetà tè ãmẽ ky'y. Janeaiweraytà ãmẽ a'evo jaiko remẽ ipi.

17 Ajamã'ẽ Janejare'e remimotekokuwa rõmõ jaiko remẽ, janeaiwererà nijapotai ãmẽ ky'y. Ãmõ, japota katu ãmõ kõ rè jajimory ipi. Ikatua rupi jareko ãmõ kõ ipi. Japorijauesa kõ teve ãmẽ ipi. Wãisõ jaiko jaiko. Owaray jareko jane kõ ipi. Ãwitõ janevo mãe kõ, ãwĩvo ve ãmõ kõ. Janerova'arà rupi kõrijõ tè rõwã a'evo tijaiko ipi. Janepy'a rupi ve tesõ a'evo tijaiko. 18 [Ãwĩvo Janejare'e rupi tè jatekokuwa jaiko remẽ, janepy'aory katutà jaiko. Jimitãa rè tè poromosã'ãgatà tapekuwa sa'u.] Ãwitõ koo pè moma'eyva jaõtã remẽ, i'a katu jome. Ãwĩvo ve jajimory ojee remẽ, janepy'aory katu jome ipi.